LIKE SUANLƐ 39
?Ɔ dunman o “nguan fluwa’n” nun?
“Be nga be nyin yi Anannganman b’ɔ kan ndɛ kle be-ɔ be fa’n, be klɛli be dunman i bɔbɔ i nyrun lɛ.”—MAL. 3:16.
JUE 61 Ɲanmiɛn i Lalofuɛ mun, an wɔ amun ɲrun!
I SU FITILƐ *
Kɛ ɔ fɛ i Abɛli blɛ su lele andɛ’n, Zoova klɛ sran’m be dunman “nguan fluwa’n” nun. (An nian ndɛ kpɔlɛ 1-2 be nun.)
1. (1) ?Kɛ nga Malasi 3:16 fa kan’n sa’n, fluwa benin yɛ Zoova su klɛ-ɔ? (2) ?Ngue yɛ ɔ o fluwa sɔ’n nun-ɔn?
ZOOVA boli fluwa cinnjin kun i klɛlɛ bo i afuɛ akpi kpanngban yɛ. Sran’m be dunman yɛ ɔ o fluwa sɔ’n nun-ɔn. Sran klikli nga be klɛli i dunman’n yɛle Abɛli m’ɔ suli Ɲanmiɛn kpa’n. * (Lik. 11:50, 51) Kɛ ɔ fɛ i lɛ’n, Zoova klɛli sran wie mun ekun be dunman fluwa sɔ’n nun. Yɛ andɛ’n, sran miliɔn kpanngban be dunman o fluwa sɔ’n nun. Biblu’n kɛn i ndɛ se kɛ ɔ ti fluwa kun mɔ be nga Zoova kunndɛ kɛ i wla kpɛ́n be su’n, be dunman’n wo nun-ɔn. Asa’n, ɔ kɛn i ndɛ se kɛ ɔ ti “nguan fluwa.” Like suanlɛ nga nun’n, é wá flɛ́ i kɛ “nguan fluwa.”—An kanngan Malasi 3:16 nun; Sa Nglo Yilɛ 3:5; 17:8.
2. (1) ?Wan mun yɛ be klɛ be dunman nguan fluwa’n nun-ɔn? (2) ?Ngue yɛ é yó naan e dunman wá trán fluwa sɔ’n nun wie-ɔ?
2 Be kwlaa nga be sro Zoova mɔ be bu i dunman’n i akunndan’n yɛ be dunman’n wo nguan fluwa’n nun-ɔn. Sran sɔ’m bé wá ɲán nguan m’ɔ leman awieliɛ’n. Andɛ’n, sɛ e nin Zoova e afiɛn mantan naan e lafi tɛ nga i Wa Zezi Klisi fɛli i wun yili’n su’n, e dunman kwla tran fluwa sɔ’n nun wie. (Zan 3:16, 36) Be nga be lafi su kɛ bé kɔ́ ɲanmiɛn su-o, annzɛ be nga bé trán asiɛ’n su wa-o, be kwlakwla be kunndɛ kɛ be dunman tran nguan fluwa’n nun wie.
3-4. (1) ?Sɛ be klɛ e dunman nguan fluwa’n nun’n, i sɔ’n kle kɛ saan é ɲán nguan m’ɔ leman awieliɛ’n? An yiyi nun. (2) ?Kosan benin mun yɛ é wá tɛ́ be su like suanlɛ nga ɔ nin i sin liɛ’n be nun-ɔn?
3 ?Sɛ be klɛ sran kun i dunman nguan fluwa’n nun’n, i sɔ’n kle kɛ saan ɔ́ ɲán nguan m’ɔ leman awieliɛ’n? Kɛ ɔ ko yo naan y’a wun kosan sɔ’n i su tɛlɛ’n, maan e fa e ɲin e sie i ndɛ nga Zoova kan kleli Moizi m’ɔ o Ezipt Lɔ Tulɛ 32:33 nun’n su. Zoova seli kɛ: “Sran ng’ɔ fɔnnin min wun’n yɛ ń núnnún i dunman min fluwa’n nun-ɔn.” I sɔ’n kle kɛ be kwla nunnun dunman nga be o fluwa sɔ’n nun’n. Sɛ é kwlá sé’n, i bo bolɛ nun’n, Zoova klɛ dunman sɔ mun klɛyɔn nun. (Ngl. 3:5, jnd.) I sɔ’n ti’n, maan e mian e ɲin naan Zoova klɛ e dunman’n biki nun naan ɔ ka fluwa sɔ’n nun titi.
4 Sanngɛ e kwla usa e wun kɛ: “?Ngue ndɛ yɛ Biblu’n kɛn i be nga be dunman o nguan fluwa nun’n, ɔ nin be nga be dunman nunman nun’n be su-ɔ? ?Blɛ benin nun yɛ be nga be dunman o fluwa’n nun’n bé ɲán nguan m’ɔ leman awieliɛ’n niɔn? ?Yɛ be nga b’a siman Zoova naan b’a wu’n, be li? ?Be liɛ yó sɛ? ?Be kwla klɛ be dunman nguan fluwa’n nun wie? É wá tɛ́ kosan sɔ’m be su like suanlɛ nga ɔ nin i sin liɛ’n be nun.
?WAN MUN YƐ BE DUNMAN O NGUAN FLUWA’N NUN-ƆN?
5-6. (1) ?Kɛ nga Filipufuɛ Mun 4:3 fa kan’n sa’n, wan mun yɛ be dunman o nguan fluwa’n nun-ɔn? (2) ?Blɛ benin nun yɛ be dunman’n trán nguan fluwa’n nun tititi-ɔ?
5 ?Wan mun yɛ be dunman o nguan fluwa’n nun-ɔn? Kɛ ɔ ko yo naan y’a tɛ kosan sɔ’n su’n, é wá fá e ɲin é síe sran akpasua nnun be su. Sran sɔ’m be nun wie’m be dunman o nguan fluwa’n nun yɛ wie’m be dunman nunman nun.
6 Sran akpasua klikli’n yɛle be nga be kpali be sieli be ngunmin mɔ be nin Zezi bé dí famiɛn ɲanmiɛn su lɔ’n. ?Sran sɔ’m be dunman o nguan fluwa nun dɔ nga su? Ɛɛn. Ndɛ nga akoto Pɔlu kan kleli i “wiengu junman difuɛ” nga be o Filipu lɔ’n, ɔ kle kɛ be nga be kpali be sieli be ngunmin mɔ be nin Zezi bé dí famiɛn’n, be dunman o nguan fluwa’n nun. (An kanngan Filipufuɛ Mun 4:3 nun.) Sanngɛ kɛ ɔ ko yo naan be dunman’n w’a ka fluwa sɔ’n nun titi’n, ɔ fata kɛ be nin Ɲanmiɛn be nanti klanman lele guɛ i ti nin bo. Kɛ be ko sie be nzɔliɛ kasiɛn’n yɛ be dunman’n trán fluwa’n nun tititi-ɔ. Be kwla sie be nzɔliɛ sɔ’n ka naan b’a wu, annzɛ ka naan ɲrɛnnɛn dan’n w’a bo i bo.
7. ?Kɛ nga Sa Nglo Yilɛ 7:16, 17 fa kan’n sa’n, blɛ benin nun yɛ sran kpanngban mɔ be ti bua’m be wie’m be nunfuɛ’n be dunman ká nguan fluwa’n nun tititi-ɔ?
7 Sran akpasua nɲɔn su’n yɛle sran kpanngban mɔ be ti bua’m be wie’m be nunfuɛ’n. ?Sran sɔ’m be dunman o nguan fluwa nun dɔ nga su? Ɛɛn. ?Sɛ Aamagedɔn alɛ’n nun’n be fite nun’n, be dunman’n ká nguan fluwa’n nun? Ɛɛn. (Ngl. 7:14) Zezi seli kɛ sran sɔ’m “bé ɲán nguan m’ɔ leman awieliɛ’n.” (Mat. 25:46) Sanngɛ sran sɔ’m be su kaman lɛ be ɲanman nguan m’ɔ leman awieliɛ’n. Be dunman nga be klɛli klɛyɔn nun nguan fluwa’n nun’n, ɔ́ ká lɛ. Zezi i afuɛ akpi famiɛn dilɛ blɛ’n nun’n, “ɔ́ kánkán be, yɛ ɔ́ fá be kɔ́ nzue ti mɔ be man nguan’n be nuan.” Be nga be fa atin nga Klisi kle’n su mɔ be nin Zoova be nanti klanman’n, be dunman’n ká nguan fluwa’n nun tititi.—An kanngan Sa Nglo Yilɛ 7:16, 17 be nun.
8. (1) ?Wan mun yɛ be dunman nunman nguan fluwa’n nun-ɔn? (2) ?Ngue sa yɛ ɔ́ wá jú sran sɔ’m be su-ɔ?
8 Sran akpasua nsan su’n yɛle be nga be fa be sunnzun boli mɔ bé wá núnnún be Aamagedɔn alɛ’n nun’n. Sran sɔ’m be dunman’n nunman nguan fluwa’n nun. Zezi kannin be ndɛ seli kɛ: “Sran sɔ’m bé wú, yɛ be su ɲanman nguan kun mlɔnmlɔn.” (Mat. 25:46) Ɲanmiɛn wawɛ’n maan Pɔlu seli kɛ: “E Min’n wá dí sran sɔ’m be jɔlɛ. Yɛ fɔ nga bé fá tú be’n yɛle kɛ bé núnnún be mlɔnmlɔn.” (2 Tes. 1:9; 2 Piɛ. 2:9) Sa kunngba’n ɔ́ jú be nga be bɔbɔ be ɲinfu be kan Ɲanmiɛn wawɛ’n i wun ndɛ tɛtɛ’n be su wie. Be su ɲanman nguan m’ɔ leman awieliɛ’n, bé núnnún be mlɔnmlɔn. I sɔ’n kle weiin kɛ be su cɛnman be wie. (Mat. 12:32; Mar. 3:28, 29; Ebr. 6:4-6) Siɛn’n, maan é kán sran akpasua nɲɔn mɔ bé wá cɛ́n be naan be tran asiɛ’n su wa’n be ndɛ.
BE NGA BÉ WÁ CƐ́N BE’N
9. (1) ?Kɛ nga Sa Nga Be Yoli’n 24:15 fa kan’n sa’n, sran akpasua nɲɔn benin mun yɛ bé wá cɛ́n be-ɔ? (2) ?Ngbaciɛ benin yɛ ɔ o sran akpasua nɲɔn sɔ’m be afiɛn-ɔn?
9 Biblu’n kan sran akpasua nɲɔn mɔ bé wá cɛ́n be naan be tran asiɛ’n su wa’n be ndɛ. Sran sɔ mun yɛle ‘be nga be yoli sa kpa’n, ɔ nin be nga b’a yoman sa kpa’n.’ (An kanngan Sa Nga Be Yoli’n 24:15 nun.) ‘Be nga be yoli sa kpa’n’ yɛle be nga be suli Zoova lele guɛli i ti nin i bo’n. ‘Be nga b’a yoman sa kpa’n’ yɛle be nga b’a suman Zoova’n. Sran sɔ’m be nun sunman be nzuɛn’n timan kpa. ?Kɛ mɔ bé wá cɛ́n sran akpasua nɲɔn sɔ mun’n ti’n, e kwla se kɛ be dunman’n wo nguan fluwa’n nun? Kɛ ɔ ko yo naan y’a si kosan sɔ’n i su tɛlɛ’n, maan e kan sran akpasua nɲɔn sɔ’m be ndɛ kunngunngun.
10. (1) ?Ngue ti yɛ bé wá cɛ́n “be nga be yoli sa kpa” mun-ɔn? (2) ?Junman benin yɛ be nun wie’m bé wá dí-ɔ? (An nian “Fluwa’n nun kannganfuɛ’m be kosan mun” ng’ɔ kan be nga bé wá cɛ́n be naan be tran asiɛ’n su wa’n be ndɛ’n i nun.)
10 Sran akpasua nnan su’n yɛle ‘be nga be yoli sa kpa’n.’ Be klɛli be dunman nguan fluwa’n nun ka naan b’a wu. ?Kɛ be wuli’n, be nunnunnin be dunman’n nguan fluwa’n nun? Cɛcɛ. Afin Zoova i wla w’a fiman be su yɛ i ɲrun’n be te o “nguan” nun. Biblu’n se kɛ Zoova “timan be nga be wuli’n be Ɲanmiɛn, sanngɛ ɔ ti be nga be o nguan nun’n be Ɲanmiɛn. Afin Ɲanmiɛn ɲrun’n, be kwlaa be o nguan nun.” (Lik. 20:38) I sɔ’n kle kɛ, be nga be yoli sa kpa’n, be dunman o nguan fluwa’n nun. Sanngɛ sɛ é kwlá sé’n be klɛli be dunman sɔ mun “klɛyɔn” nun. (Lik. 14:14) E si kɛ bé wá síe sran sɔ’m be nun wie mun “mɛn wunmuan’n i su kpɛnngbɛn.”—Jue. 45:17.
11. ?Ngue yɛ ɔ fata kɛ ‘be nga b’a yoman sa kpa’n,’ be yo ka naan be dunman w’a tran nguan fluwa’n nun-ɔn?
11 Sran akpasua nnun su’n yɛle ‘be nga b’a yoman sa kpa’n.’ Sran sɔ’m b’a siman Zoova i mmla mun ka naan b’a wu. Ɔ maan b’a kwlá yoman like ng’ɔ ti kpa’n i ɲrun. I sɔ’n ti’n, b’a klɛman be dunman nguan fluwa’n nun. Sanngɛ sɛ Ɲanmiɛn cɛn be naan be yo sa ng’ɔ ti kpa’n, bé klɛ́ be dunman nguan fluwa’n nun wie. Kɛ bé wá cɛ́n sran akpasua sɔ mun’n, bé wá mían ukalɛ wun. Afin kwlaa naan b’a wu’n be yoli sa tɛtɛ wie mun. Ɔ maan, ɔ fata kɛ be kle be like naan b’a kwla wun wafa ng’ɔ fata kɛ be nanti Zoova i mmla’m be su’n. Kɛ ɔ ko yo naan i sɔ liɛ’n w’a yo ye’n, Ɲanmiɛn i Famiɛn Dilɛ blɛ’n nun’n, é wá klé sran’m be like asiɛ wunmuan’n su. Like klɛ sɔ’n ɔ́ wá yó i liɛ ngunmin kun.
12. (1) ?Wan mun yɛ bé wá klé be nga b’a yoman sa kpa’n be like-ɔ? (2) ?Be nga be waan be nantiman like nga be kle be su’n, sa benin yɛ ɔ́ wá jú be su-ɔ?
12 ?Wan mun yɛ bé wá klé be nga b’a yoman sa kpa’n be like-ɔ? Be nga bé wá dí i sɔ junman’n, yɛle sran kpanngban kpa’n, ɔ nin be nga be yoli sa kpa mɔ be cɛnnin be’n. Zezi nin be nga be kpali be sieli be ngunmin’n bé wá fá be ɲin bé síe i sran’m be like klelɛ sɔ’n su kpa. (Ngl. 20:4) Be nga be waan be sɔman like klelɛ sɔ’n nun klanman’n, kannzɛ be ɲan afuɛ ya bɔbɔ’n, be su yaciman be nguan nun. (Eza. 65:20) Zoova nin Zezi be si like ng’ɔ o sran kun i awlɛn’n nun’n. Ɔ maan be su yaciman sran fi lɛ naan ɔ yo sa tɛtɛ mun mɛn klanman’n nun lɔ.—Eza. 11:9; 60:18; 65:25; Zan 2:25.
BE NGA BÉ ƝÁN NGUAN’N NIN BE NGA BÉ DÍ BE JƆLƐ’N
13-14. (1) ?Wafa sɛ yɛ laa’n e wunnin ndɛ nga Zezi kannin m’ɔ o Zan 5:29 nun’n i wlɛ-ɔ? (2) ?Sanngɛ kɛ e fa e ɲin e sie i ndɛ mma sɔ’n su kpa’n, ngue ndɛ yɛ Zezi waan ɔ́ kán-ɔn?
13 Zezi kannin be nga bé wá cɛ́n be naan be tran asiɛ’n su wa’n be ndɛ seli kɛ: “Blɛ wie wá jú’n, be kwlaa nga be o ndia’m be nun’n, bé tí i nɛn’n kpɛkun bé fín ndia’m be nun bé fíte. Be nga be yoli sa kpakpa mun’n, bé ɲán nguan. Yɛ be nga be yoli sa tɛtɛ mun’n, bé dí be jɔlɛ.” (Zan 5:28, 29) ?Ndɛ sɔ’n i bo’n yɛle benin?
14 Laa’n, e buli i kɛ Zezi su kan like nga be nga bé wá cɛ́n be’n bé wá yó’n i ndɛ. Yɛle kɛ, kɛ be ko cɛn sran sɔ mun’n, wie’m bé yó sa kpa yɛ wie’m bé yó sa tɛ. Sanngɛ kɛ e fa e ɲin e sie i ndɛ mma sɔ’n su kpa’n, e wun kɛ Zezi w’a seman kɛ be nga bé wá cɛ́n be’n, bé yó sa kpa annzɛ bé yó sa tɛ. Sanngɛ ɔ seli kɛ ‘be nga be yoli sa kpa’n’ nin ‘be nga be yoli sa tɛ’n.’ Wafa nga Zezi kannin ndɛ’n, ɔ kle kɛ sa ng’ɔ juli laa’n i ndɛ yɛ ɔ su kan-ɔn. Ɔ maan ndɛ mma sɔ’n kan like nga be nga bé wá cɛ́n be’n, be dun mmua yoli ka naan b’a wu’n i ndɛ. Wafa nga e wun ndɛ mma sɔ’n i wlɛ siɛn’n, ɔ ti su. Afin mɛn klanman nun lɔ’n, be su manman sran fi i atin kɛ ɔ yo sa tɛ. Ɔ maan be nga be yoli sa tɛ mɔ ndɛ mma sɔ’n kan be ndɛ’n, be dun mmua yoli sa sɔ mun ka naan b’a wu. ?Sanngɛ kɛ Zezi se kɛ be nga bé wá cɛn be’n, wie’m “bé ɲán nguan” kpɛkun ‘bé dí wie’m be jɔlɛ’n,’ ngue ndɛ yɛ i waan ɔ́ kán-ɔn?
15. (1) ?Wan mun yɛ kɛ bé wá cɛ́n be’n ‘bé ɲán nguan-ɔn’? (2) ?Ngue ti-ɔ?
15 Be nga be yoli sa kpa ka naan b’a wu’n, kɛ bé wá cɛ́n be’n “bé ɲán nguan.” Afin be dunman o nguan fluwa’n nun. Ɔ maan sa kunngba’n yɛ ɔ́ wá jú “be nga be yoli sa kpakpa mun” m’ɔ Zan 5:29 kan be ndɛ’n, ɔ nin “be nga be yoli sa kpa” m’ɔ Sa Nga Be Yoli’n 24:15 kan be ndɛ’n be su-ɔ. Wafa nga e wun ndɛ mma sɔ’m be wlɛ’n, ɔ nin ndɛ ng’ɔ o Rɔmunfuɛ Mun 6:7 nun’n, be kɔ likawlɛ. Ndɛ mma sɔ’n se kɛ: “Kɛ sran kun ko wu’n, be boman sa tɛ ng’ɔ yoli i laa’n su be diman jɔlɛ kun.” Ɔ maan be nga be yoli sa kpa’n, be sa tɛ nga be yoli’n kɛ be ko wu’n, Zoova yaci sa sɔ mun cɛ be. Sanngɛ i wla fiman sa kpa nga be yoli’n su. (Ebr. 6:10) Sanngɛ sɛ be nga be yoli sa kpa mɔ be cɛnnin be’n, be kunndɛ kɛ be dunman ka nguan fluwa nun titi’n, ɔ fata kɛ be su Zoova lele guɛ i ti nin i bo.
16. ?Wan mun yɛ kɛ bé wá cɛ́n be’n, ‘bé dí be jɔlɛ-ɔ’?
16 ?Yɛ be nga be yoli sa tɛtɛ mun ka naan b’a wu’n, be li? Kannzɛ bɔbɔ kɛ be wu’n Zoova yaci be sa tɛ mun cɛ be’n, sanngɛ b’a sunmɛn i. Ɔ maan be dunman nunman nguan fluwa’n nun. “Be nga be yoli sa tɛtɛ mun’n,” ɔ nin be nga “b’a yoman sa kpa” mɔ Sa Nga Be Yoli’n 24:15 kan be ndɛ’n, sa kunngba’n yɛ ɔ́ jú be su-ɔ. Yɛle kɛ, kɛ bé wá cɛ́n be’n “bé dí be jɔlɛ.” * Zezi wá fɛ́ i ɲin síe i be nga b’a yoman sa kpa’n be su kpa naan ɔ́ nían sɛ bé yó sa kpa-o. (Lik. 22:30) Kɛ ɔ ko yo naan b’a wun i wlɛ sɛ ɔ fata kɛ be klɛ be dunman nguan fluwa’n nun’n, i sɔ’n fá blɛ. Sɛ be nga b’a yoman sa kpakpa mun’n be kunndɛ kɛ be dunman tran nguan fluwa’n nun’n, ɔ fata kɛ be yaci be ayeliɛ tɛtɛ mun naan be fa be wun be man Zoova.
17-18. (1) ?Ngue yɛ ɔ fata kɛ be kwlaa nga bé wá cɛ́n be naan be tran asiɛ’n su wa’n be yo-ɔ? (2) ?Blɛ benin nun yɛ sran’m be yoli sa nga Sa Nglo Yilɛ 20:12, 13 kɛn i ndɛ’n niɔn?
17 Be nga be yoli sa kpa’n nin be nga b’a yoman sa kpa’n, kɛ bé wá cɛ́n be’n, ɔ fata kɛ be nanti fluwa nga bé wá tíke be su Zezi i afuɛ akpi famiɛn dilɛ blɛ’n nun’n, be nun ndɛ’n su. Akoto Zan kannin sa sɔ m’ɔ wunnin i aolia nun’n i ndɛ seli kɛ: “N wunnin be nga be wuli’n. Be nga be le ɲrun-o, be nga be leman ɲrun-o, n wunnin be. Be jinjin famiɛn bia’n i ɲrun lɛ, kpɛkun be tikeli fluwa wie’m be su. Be tikeli fluwa kun ekun su. Yɛle nguan fluwa’n. Ndɛ ng’ɔ o fluwa sɔ’m be nun’n nin be nga be wuli’n be ayeliɛ’n, be su yɛ be niannin be dili be jɔlɛ-ɔ.”—Ngl. 20:12, 13.
18 ?Sa benin su yɛ bé jrán bé dí be nga bé cɛ́n be’n be jɔlɛ-ɔ? ?Like nga be yoli ka naan b’a wu’n i su yɛ bé jrán bé dí be jɔlɛ-ɔ? Cɛcɛ. Nán maan e wla fi su kɛ kɛ be wuli’n be yacili be sa tɛ mun cɛli be. Ɔ maan sa nga be yoli mɔ be kɛn i ndɛ’n, ɔ kwlá yoman sa nga be yoli ka naan b’a wu’n. Sanngɛ kɛ bé wá cɛ́n be mɔ bé wá klé be like mɛn klanman’n nun lɔ’n, like nga bé wá yó’n i ndɛ yɛ be kan-ɔn. I kpa bɔbɔ’n, Nowe nin Samiɛli, nin Davidi, ɔ nin Daniɛli mɔ be suli Ɲanmiɛn kpa’n, be kusu ɔ fata kɛ be suan Zezi Klisi i su like yɛ be kle kɛ be lafi tɛ ng’ɔ fɛli i wun yili’n su. ?Sɛ ɔ fata kɛ sran sɔ’m be suan like’n, yɛ be nga b’a yoman sa kpa’n be li? ?Be su suanman like kpanngban kpa traman sran sɔ mun?
19. ?Be nga be waan be nantiman like nga bé wá klé be su’n, sa benin yɛ ɔ́ wá jú be su-ɔ?
19 ?Be nga be waan be nantiman like nga bé wá klé be su’n, sa benin yɛ ɔ́ wá jú be su-ɔ? Sa Nglo Yilɛ 20:15 se kɛ: “Be nga be dunman nunman nguan fluwa’n nun’n, be to be guali sin dan’n nun.” Yɛle kɛ bé wá núnnún be mlɔnmlɔnmlɔn. I sɔ’n kle kɛ ɔ ti cinnjin kɛ e mian e ɲin naan be klɛ e dunman nguan fluwa’n nun naan ɔ ka nun titi.
Aniaan bian kun su kle sran wie’m be like afuɛ akpi famiɛn dilɛ blɛ’n nun. (An nian ndɛ kpɔlɛ 20 nun.)
20. ?Zezi i afuɛ akpi famiɛn dilɛ blɛ nun’n, junman cinnjin benin yɛ sran’m bé wá dí-ɔ? (An nian foto ng’ɔ o fluwa’n i bui’n su’n.)
20 Nanwlɛ, Zezi i afuɛ akpi famiɛn dilɛ blɛ’n, ɔ́ wá yó aklunjɔɛ dilɛ blɛ dan! Yɛle kɛ é wá klé sran’m be like asiɛ wunmuan’n su. Asa ekun’n, blɛ sɔ’n nun’n bé wá nían be nga be yoli sa kpa’n, nin be nga b’a yoman sa kpa’n, be nzuɛn’n. (Eza. 26:9; Yol. 17:31) ?Wafa sɛ yɛ bé wá klé sran’m be like blɛ sɔ’n nun-ɔn? Like suanlɛ nga i sin liɛ nun’n, é wá tɛ́ kosan sɔ’n su.
JUE 147 Ɲanmiɛn mán e anannganman nguan
^ Zan 5:28, 29 nun’n, Zezi seli kɛ: “Be nga be yoli sa kpakpa mun’n, bé ɲán nguan. Yɛ be nga be yoli sa tɛtɛ mun’n, bé dí be jɔlɛ.” Like suanlɛ nga nun’n, é wá wún i ndɛ sɔ’n i nun yiyilɛ wafa uflɛ. Kpɛkun é kán sran akpasua nɲɔn sɔ mɔ bé wá cɛ́n be’n be ndɛ.
^ Be boli nguan fluwa’n i klɛ bo “mɛn’n i bo bolɛ” nun. Mɛn’n yɛle be nga bé wá ɲán tɛ nga Zezi fɛ i wun yili’n i su ye’n. (Mat. 25:34; Ngl. 17:8) Abɛli yɛ ɔ ti sran klikli nga be klɛli i dunman fluwa sɔ’n nun-ɔn.
^ Laa’n, e seli kɛ “jɔlɛ dilɛ” nga be kɛn i ndɛ wa’n, ɔ ti sran’m be fɔ bulɛ. Jɔlɛ dilɛ’n ɔ kwla yo fɔ bulɛ. Sanngɛ jɔlɛ dilɛ nga Zezi kɛn i ndɛ wa’n, ɔ timan sran’m be fɔ bulɛ. Ɔ su kɛn i ɲin m’ɔ́ wá fá síe i be nga b’a yoman sa kpa’n be su’n i ndɛ. Glɛki’m be fluwa kun seli kɛ “ɔ ti sran’m be ayeliɛ’n i nianlɛ.”
