1. ?Ngue ti yɛ kɛ andɛ’n sran su lafilɛ’n w’a yo kekle’n, i sɔ’n boman e nuan-ɔn?

 SATAN i mɛn nga nun’n, sran su lafilɛ’n w’a yo kekle. Aata difuɛ mun, nin politikifuɛ mun, ɔ nin Ɲanmiɛn sulɛ wafa’m be su kpɛnngbɛn’m be ayeliɛ’n ti’n, sran’m be sa sin bubu be. I kpa bɔbɔ’n, sran kpanngban be lafiman be janvuɛ mun, nin be mantanfuɛ mun, ɔ nin be awlofuɛ’m be su kun. Ɔ fataman kɛ i sɔ’n bo e nuan. Afin Biblu’n se kɛ: “Mɛn’n i awieliɛ blɛ nun’n, […] sran’m be nin be wiengu’m be su nantiman klanman, […] bé sáci sran wun, […] bé kpɛ́ be wiengu’m be bo waka.” I sɔ’n kle kɛ sran’m bé wá yó ninnge mun kɛ Satan m’ɔ ti mɛn nga i min mɔ be kwlá lafimɛn i su’n i sa.—2 Tim. 3:1-4; 2 Kor. 4:4.

2. (1) ?Wan mun yɛ e kwla lafi be su-ɔ? (2) ?Kosan benin yɛ aniaan wie’m be fa usa be wun-ɔn?

² E mɔ e ti Klisifuɛ’n, e si kɛ e kwla lafi Zoova su. (Zer. 17:7, 8) E si kɛ ɔ klo e, yɛ ɔ ‘yimɛn i janvuɛ’m be ase le.’ (Jue. 9:11) Asa’n, e kwla lafi Zezi su wie. Afin e dunman nun’n, ɔ fɛli i nguan’n mannin. (1 Piɛ. 3:18) Asa ekun’n, e kwla lafi Biblu’n su. Afin e bɔbɔ e wunnin kɛ i nun ndɛ’n, ɔ yo e ye. (2 Tim. 3:16, 17) Ɔ maan e kwla lafi Zoova nin Zezi, ɔ nin Biblu’n nun ndɛ’n be su. Sanngɛ aniaan wie’m be kwla usa be wun kɛ: ‘?E kwla lafi aniaan’m be su titi? ?Ngue ti yɛ ɔ fata kɛ e lafi be su-ɔ?’

3. ?Ngue yɛ ɔ ti e cenjele like dan-ɔn? (Marki 10:29, 30)

³ Zoova yoli maan e o i sufuɛ mɔ be o mɛn wunmuan’n nun’n, be nun wie. Kɛ e bu i su ye nga e ɲɛn i’n i akunndan’n, ɔ yo e fɛ dan! (An kanngan Marki 10:29, 30 nun.) Asiɛ wunmuan’n su’n, e niaan’m be klo Zoova kɛ e sa, yɛ be mian be ɲin be nanti i mmla’m be su. E kwlakwla e aniɛn’n, nin e ninnge yolɛ wafa’n, ɔ nin e wun wlawlalɛ  wafa’n be timan kun. Ɔ nin i sɔ ngba’n, e afiɛn mantan. Kannzɛ bɔbɔ e siman e wun laa’n, sanngɛ kɛ e wun e wiengu’n, e di aklunjɔɛ. I li kɛ e nin be e su e Si m’ɔ o ɲanmiɛn su lɔ’n likawlɛ’n, yɛ e di aklunjɔɛ kpa’n niɔn.—Jue. 133:1.

4. ?Ngue ti yɛ e mian e niaan’m be wun-ɔn?

⁴ E blɛ liɛ nga nun’n, ɔ ti cinnjin kpa kɛ e nin e niaan mun e afiɛn mantan kpa. Ɔ ju wie’n, be uka e naan y’a kwla jran e su sa’m be ɲrun kekle. (Rɔm. 15:1; Gal. 6:2) Yɛ be uka e naan y’a kwla su Zoova kpa, naan e nin i e afiɛn w’a mantan kpa. (1 Tes. 5:11; Ebr. 10:23-25) ?Sɛ ɔ ti kɛ e leman aniaan naan b’a uka e naan y’a jran e kpɔfuɛ Satan m’ɔ ti Suɛn Tɔnfuɛ’n, ɔ nin i mɛn tɛ nga be ɲrun kekle’n, nn e liɛ yó sɛ? Ɔ cɛ kan’n, Satan ɔ nin be ng’ɔ sie be’n, bé wá fá alɛ wlá Zoova i sufuɛ’m be sin. Blɛ sɔ’n nun’n, é wá ɲán ukalɛ nga aniaan’m bé wá úka e’n, i su ye dan!

5. ?Ngue ti yɛ kɛ ɔ ko yo naan aniaan wie’m b’a lafi aniaan nga be o asɔnun’n nun’n be su’n, ɔ ti kekle-ɔ?

⁵ Kɛ ɔ ko yo naan aniaan wie’m b’a lafi aniaan nga be o asɔnun’n nun’n be su’n, ɔ ti kekle man be. Afin atrɛkpa’n, be kannin be su ndɛ wie kleli aniaan wie kpɛkun aniaan sɔ’n kan kleli sran uflɛ. Annzɛ aniaan wie seli be kɛ ɔ́ yó like wie mán be, sanngɛ w’a yoman. Annzɛ kusu asɔnun’n nunfuɛ wie kannin ndɛ wie, annzɛ ɔ yoli like wie m’ɔ loli be ngasi-ɔ. Kɛ i sɔ sa’m be ju’n, e wiengu’m be su lafilɛ’n kwla yo kekle. ?Ngue yɛ ɔ kwla uka e naan y’a lafi aniaan’m be su-ɔ?

6. ?Wafa sɛ yɛ e niaan’m be klolɛ’n kwla uka e naan y’a lafi be su-ɔ? (1 Korɛntifuɛ Mun 13:4-8)

⁶ Aniaan’m be klolɛ’n yɛ ɔ kwla uka  e naan y’a lafi be su-ɔ. Korɛntifuɛ Mun fluwa klikli’n ndɛ tre 13 kan wafa nga e kwla kle kɛ e klo e wiengu mun’n, i ndɛ. Sɛ e nian ndɛ sɔ’n su e nanti’n, i sɔ’n úka e naan y’a lafi e wiengu’m be su. Annzɛ kusu sɛ e lafiman e wiengu’m be su kun’n, i sɔ’n úka e naan y’a lafi be su ekun. (An kanngan 1 Korɛntifuɛ Mun 13:4-8 be nun.) I wie yɛle kɛ i ndɛ mma 4 se kɛ “sran ng’ɔ klo sran’n, ɔ trɛ i awlɛn, kpɛkun ɔ yo sran ye.” Kɛ e fɔn Zoova wun’n, ɔ trɛ i awlɛn e wun. Ɔ maan sɛ e niaan’m be yo e sa wie annzɛ be kan ndɛ wie naan ɔ lo e ngasi’n, ɔ fata kɛ e tra e awlɛn be wun. I ndɛ mma 5 se kɛ: ‘Sran ng’ɔ klo sran’n ɔ faman ya ndɛndɛ, ɔ faman sa siemɛn i klun.’ E kunndɛman kɛ é fá sa nga e niaan’m be yo e’n, é síe e klun naan blɛ uflɛ nun’n é fá kan ndɛ. Akunndanfuɛ’n 7:9 se kɛ ‘nán e fa ya ndɛndɛ.’ Ɔ maan, sɛ e nanti ndɛ ng’ɔ o Efɛzifuɛ Mun 4:26 nun’n su’n, é ɲán su ye dan! Ɔ se kɛ: “Nán amun fa ya lele naan wia’n tɔ su.”

7. ?Wafa sɛ yɛ ndɛ ng’ɔ o Matie 7:1-5 nun’n, ɔ uka e naan y’a lafi e niaan’m be su-ɔ?

⁷ Like kun ekun m’ɔ kwla uka e naan y’a lafi e niaan’m be su’n, yɛle kɛ maan e bu be kɛ nga Zoova fa bu be’n sa. Zoova klo be yɛ ɔ faman sa nga be yo’n, siemɛn i klun. E kusu maan e yo kɛ Zoova sa. (Jue. 130:3) Nán e fa e ɲin e sie i aniaan’m be fɔnlɛ’n su, sanngɛ maan e mian e ɲin naan e fa e ɲin e sie i be nzuɛn kpa’n su. Asa’n, maan e lafi su kɛ be kwla yo sa kpa. (An kanngan Matie 7:1-5 nun.) E si kɛ be kunndɛ kɛ bé yó like ng’ɔ ti kpa’n yɛ be sunnzunman e nin like tɛ. Afin sran ng’ɔ klo sran’n ɔ “bu like kwlaa nanwlɛ.” (1 Kor. 13:7) I sɔ’n kleman kɛ Zoova kunndɛ kɛ e lafi sran’m be su sa ngbɛn. Sanngɛ ɔ kunndɛ kɛ e lafi be kwlaa nga be ayeliɛ’n kle kɛ be kwla lafi be su’n, be su. *

8. ?Ngue yɛ é yó naan y’a lafi e niaan’m be su-ɔ?

⁸ Sran su lafilɛ’n ɔ ti kɛ aɲinyiɛ’n sa. Yɛle kɛ e kwlá mianman sran kɛ i ɲin yi e. I wafa kunngba’n, e kwlá mianman sran kɛ ɔ lafi e su. Kusu kɛ ɔ ko yo naan y’a lafi sran kun su’n, i sɔ’n fa blɛ. ?Ngue yɛ é yó naan y’a lafi e niaan’m be su-ɔ? Maan e si be kpa. I sɔ yolɛ nun’n, maan e nin be e koko yalɛ aɲia’m be bo. Maan e nin be e bo jasin fɛ’n. Maan e tra e awlɛn be wun, yɛ e man be atin naan be kle kɛ be ti sran mɔ be kwla lafi be su-ɔ. Atrɛkpa’n, i bo bolɛ nun’n e su kanman e klun ndɛ’n kwlaa e kleman aniaan kun mɔ e simɛn i kpa’n. Sanngɛ kɛ e nin i e afiɛn mántan kɔ́’n, é kán e klun ndɛ é klé i siɛn’n. (Lik. 16:10) ?Yɛ sɛ aniaan kun yoli wɔ like wie mɔ i ti’n a lafimɛn i su kun’n nin? Nán kpli se kɛ a nin i be traman janvuɛ kun. Nán maan sran wie i ayeliɛ’n ti’n, á sé kɛ a lafiman aniaan’m be su kun. Siɛn’n, é wá kán Zoova i sufuɛ wie mɔ sran wie’m be ayeliɛ’n bubuli be sa sin mɔ sanngɛ be lafili be wiengu’m be su titi’n be ndɛ. I sɔ’n wá úka e naan y’a lafi e wiengu’m be su titi.

9. (1) ?Wafa sɛ yɛ Anin suannin ajalɛ nga Zoova fali’n i bo titi-ɔ? (2) ?Ngue yɛ Anin i su ndɛ’n kle e-ɔ?

⁹ ?Aniaan nga be dun e ɲrun mmua’n, be nun wie w’a lo ɔ ngasi le? Sɛ ɔ ti sɔ’n, Anin i su ndɛ’n kwla uka ɔ kpa. Anin blɛ su’n, Eli m’ɔ ti Ɲanmiɛn ɲrun jranfuɛ dan’n yɛ ɔ dun Izraɛlifuɛ’m be ɲrun mmua  Zoova i sulɛ’n nun-ɔn. Sanngɛ Eli i awlofuɛ’m be ayeliɛ’n timan kpa. I mma yasua mɔ be ti Ɲanmiɛn ɲrun jranfuɛ’n, be yo ɲannzuɛn sa mun titi. Sanngɛ be si w’a tuman be fɔ kɛ ɔ nin i fata’n sa. Zoova w’a kaman lɛ w’a tuman Eli junman nun. Ɔ nin i sɔ’n ngba’n, Anin w’a seman kɛ kɛ mɔ Eli yɛ ɔ ti Ɲanmiɛn ɲrun jranfuɛ dan’n ti’n, ɔ kɔman Zoova sulɛ Ɲanmiɛn i tannin sua’n nun lɔ kun. Kɛ Anin i wla boli i wun m’ɔ́ srɛ́ Ɲanmiɛn’n, Eli buli i kɛ w’a nɔn nzan w’a bo. W’a usaman bla’n i sa, ɔ ka lɛ buli i fɔ. (1 Sam. 1:12-16) Sanngɛ Anin tali nda kɛ sɛ ɔ wu ba yasua kun’n, ɔ́ fɛ́ i kɔ́ Ɲanmiɛn i tannin sua’n nun lɔ naan ɔ ko di junman lɔ. Kusu nn ɔ si kɛ sɛ ɔ fɛ i kɔ lɔ’n, Eli yɛ ɔ́ níɛn i su-ɔ. (1 Sam. 1:11) Ɔ fata kɛ be tu Eli i mma’m be fɔ. I sɔ kusu yɛ Zoova yoli-ɔ. Ɔ yoli sɔ blɛ ng’ɔ ti i su’n nun. (1 Sam. 4:17) Sanngɛ Anin liɛ’n, Zoova yrɛli i su. Ɔ mɛnnin i ba yasua kun. Be flɛli i kɛ Samiɛli.—1 Sam. 1:17-20.

10. ?Kannzɛ bɔbɔ sran wie’m be jasoli Davidi wun’n, wafa sɛ yɛ ɔ kleli kɛ ɔ te lafi sran su-ɔ?

¹⁰ ?Ɔ janvuɛ kpa wie yoli ɔ like wie m’ɔ bubuli ɔ sa sin-ɔn? Sɛ ɔ ti sɔ’n, Famiɛn Davidi i su ndɛ’n kwla uka ɔ kpa. I janvuɛ kun suan Asitɔfɛli. Kɛ Davidi i wa Absalɔmun kunndɛli kɛ ɔ́ dé famiɛn bia’n i sa nun’n, Asitɔfɛli jrannin Absalɔmun sin. Nanwlɛ, kɛ Davidi i wa’n nin i janvuɛ’n be jasoli i wun’n, i sɔ’n yoli i ya dan! Sanngɛ Davidi w’a seman kɛ i sɔ’n ti’n, ɔ lafiman sran su kun. Ɔ lafili i janvuɛ kpa kun mɔ w’a jasomɛn i wun wie’n i su titi. Be flɛ i kɛ Isai. Davidi si kɛ ɔ kwla lafi i su. Isai kleli kɛ ɔ ti janvuɛ kpa. I kpa bɔbɔ’n, Davidi ti’n, ɔ fɛli i nguan’n sieli i wie nuan.—2 Sam. 17:1-16.

11. ?Wafa sɛ yɛ Nabali i sran’m be nun kun kleli kɛ ɔ lafi sran su-ɔ?

¹¹ Maan e fa e ɲin e sie i Izraɛli bian kun mɔ be flɛ i kɛ Nabali’n i sufuɛ’m be nun kun su. Davidi nin i sran’m be sasali Nabali i sufuɛ mun. Bian sɔ’n ti aɲanbeunfuɛ. Cɛn kun’n, Davidi seli Nabali kɛ ɔ mɛn i sran’m be aliɛ, naan like kwlaa ng’ɔ ɲɛn i’n ɔ kwla fa man. Nabali w’a kplinman su. I sɔ’n ti’n, Davidi fali ya dan kpa. I waan ɔ́ kó kún Nabali i awlo’n nun yasua’m be kwlaa. Nabali i sufuɛ’m be nun kun ko kannin ndɛ’n kleli Nabali i yi Abigaili. Afin ɔ ti  awlo’n i nunfuɛ wie, yɛ ɔ si kɛ Abigaili kwla de i. W’a seman kɛ ɔ́ wánndi, ɔ lafili su kɛ Abigaili kwla siesie ndɛ sɔ’n. Ɔ si kɛ Abigaili ti ngwlɛlɛfuɛ. I su m’ɔ lafili’n w’a yoman ngbɛn. Abigaili fali ajalɛ yakpa su. Ɔ yoli maan Davidi guɛli i ya’n i ase. (1 Sam. 25:2-35) Abigaili lafili su kɛ Davidi kwla kaci aniɛn.

12. ?Wafa sɛ yɛ Zezi kleli kɛ ɔ lafi i sɔnnzɔnfuɛ’m be su-ɔ?

¹² Kannzɛ bɔbɔ Zezi i sɔnnzɔnfuɛ’m be fɔnnin kpɛ sunman’n, sanngɛ ɔ lafili be su. (Zan 15:15, 16) Kɛ Zaki nin Zan be seli Zezi kɛ ɔ yo naan be ɲan ɲrun Ɲanmiɛn Famiɛn Diwlɛ nun lɔ’n, w’a seman kɛ be klun akunndan’n ti tɛ. Asa’n, w’a tuman be akoto junman’n nun. (Mar. 10:35-40) I sin’n, kɛ be bali Zezi i tralɛ kɔnguɛ’n, i sɔnnzɔnfuɛ’m be wanndili. (Mat. 26:56) Ɔ nin i sɔ ngba’n, Zezi lafili be su titi. Zezi si kpa kɛ fɔ o be nun. Sanngɛ “ɔ kloli be lele guɛli i ti nin i bo.” (Zan 13:1) Asa kusu’n, kɛ be cɛnnin Zezi’n, ɔ fali junman cinnjin kun fa wlɛli i akoto 11 be sa nun. Ɔ seli be kɛ be nian sran be like klelɛ naan be kaci i sɔnnzɔnfuɛ junman’n su. Yɛ be niɛn i bua mɔ be ndɛ lo i kpa’n be lika. (Mat. 28:19, 20; Zan 21:15-17) Be su m’ɔ lafili’n w’a yoman ngbɛn. Afin be kwlaa be suli Zoova lele fa guɛli i ti nin i bo. Nanwlɛ, e wiengu’m be su lafilɛ nun’n, Anin, nin Davidi, nin Nabali i sufuɛ’n, nin Abigaili, ɔ nin Zezi be kle e ajalɛ kpa.

13. ?Ngue yɛ ɔ kwla yo maan aniaan kun yaci i wiengu’m be su lafilɛ-ɔ?

¹³ Atrɛkpa’n, cɛn kun a kannin ɔ klun ndɛ kleli aniaan kun kpɛkun aniaan sɔ’n ko kan kleli sran uflɛ. Nanwlɛ, e si kɛ i sɔ’n boli ɔ wla dan! I sɔ sa’n juli aniaan bla kun su. Cɛn kun’n, ɔ kannin sa ng’ɔ o i su’n i ndɛ kleli asɔnun kpɛnngbɛn kun. Kɛ i aliɛ cɛnnin’n, asɔnun kpɛnngbɛn sɔ’n i yi’n flɛli aniaan bla’n naan ɔ́ wlɛ́ i fanngan. Aniaan bla’n ka lɛ wunnin i wlɛ kɛ asɔnun kpɛnngbɛn’n boli sa sɔ’n su kleli i yi’n. I sɔ’n ti’n, kɛ ɔ ko yo naan w’a lafi i su ekun’n, ɔ yoli kekle kan. Aniaan bla’n ko wunnin asɔnun kpɛnngbɛn uflɛ wun naan ɔ ukɛ i. I sɔ m’ɔ yoli’n, ɔ ti kpa dan! Asɔnun kpɛnngbɛn sɔ’n ukali aniaan bla’n naan w’a kwla lafi asɔnun kpɛnngbɛn’m be su ekun.

14. ?Ngue yɛ ɔ ukali aniaan bian kun naan w’a lafi aniaan’m be su ekun-ɔn?

¹⁴ Aniaan kun fali asɔnun kpɛnngbɛn nɲɔn be wun ya cɛli kpa. Ɔ seli i wun kɛ ɔ kwlá lafiman be su. Sanngɛ ɔ buli ndɛ kun mɔ aniaan kun mɔ i ɲin yi i kpa’n kannin’n i akunndan. Ɔ seli kɛ: “Satan yɛ ɔ ti e kpɔfuɛ’n niɔn, nán e niaan mun-ɔn.” Aniaan bian’n wa buli ndɛ sɔ’n nin wafa ng’ɔ kwla nanti su’n, be akunndan kpa. Ɔ srɛli Zoova kɛ ɔ ukɛ i. Ɔ maan ɔ nin aniaan nɲɔn sɔ’m be kwla siesieli be afiɛn.

15. ?Ngue ti yɛ ɔ ju wie’n, kɛ ɔ ko yo naan y’a lafi sran wie’m be su ekun’n i sɔ’n kwla fa blɛ-ɔ? An fa sa kun yiyi nun.

¹⁵ ?Ɔ junman nga a di i asɔnun’n nun’n w’a fin ɔ sa le? Nanwlɛ, kɛ i sɔ sa’n ju’n ɔ timan pɔpɔ. I sɔ sa’n juli aniaan bla kun mɔ be flɛ i kɛ Klɛti’n ɔ nin i nin be su. Kɛ alɛ dan nɲɔn su’n nun’n, be tanninnin Zoova i Lalofuɛ’m be Ɲanmiɛn sulɛ Alemaɲin lɔ’n, aniaan bla’n nin i nin’n be suli Zoova kpa titi. Blɛ sɔ’n nun’n, aniaan’m be seli aniaan bla Klɛti kɛ ɔ klɛ Sasafuɛ Tranwlɛ’n i nun ndɛ’n fluwa su fa man aniaan mun. Sanngɛ be wa wunnin kɛ i baba kloman Zoova i Lalofuɛ’m be sa. I sɔ’n ti’n, be seli i kɛ nán maan ɔ di i sɔ junman liɛ’n kun. Afin be seli be wun kɛ i baba kwla ko kan aniaan’m be su ndɛ kle be kpɔfuɛ mun. Sanngɛ w’a  kaman ngalɛ’n i ngunmin su. Alɛ dan nɲɔn su’n nun’n, aniaan’m b’a faman e fluwa’m be nun wie fi b’a manman Klɛti nin i nin be kun. I kpa bɔbɔ’n, kɛ be nin be yia’n be faman ijɔlɛ manman be. Nanwlɛ, i sɔ’n boli be wla dan! I sɔ’n ti’n, Klɛti seli kɛ kɛ ɔ ko yo naan w’a yaci sa sɔ’n w’a cɛ aniaan sɔ mun naan w’a lafi be su ekun’n, ɔ cɛli kpa. Sanngɛ kɛ ɔ́ kɔ́ i ɲrun’n, ɔ wunnin i wlɛ kɛ Zoova w’a yaci aniaan sɔ’m be wun sa’n w’a cɛ be. Ɔ maan ɔ fata kɛ i kusu ɔ yaci be wun sa’n cɛ be wie. *

16. ?Ngue ti yɛ ɔ fata kɛ e mian e ɲin naan y’a lafi aniaan’m be su titi-ɔ?

¹⁶ Sɛ sa sɔ’n i wunsu w’a ju ɔ su le’n, mian ɔ ɲin naan w’a kwla lafi aniaan’m be su ekun. Atrɛkpa’n, i sɔ yolɛ’n fá blɛ. Sanngɛ ɔ ɲin nga á mían’n, ɔ su kaman ngbɛn. Maan e fa sunnzun ase kun e yiyi nun. Sɛ sran kun w’a di aliɛ wie mɔ be guali nun ayre tɛ’n i wie le’n, siɛn’n ɔ́ nían like ng’ɔ di’n su kpa. Sanngɛ ɔ su seman kɛ i sɔ’n ti’n, ɔ diman like kun. I wafa kunngba’n, ɔ fataman kɛ sa wie mɔ be yoli e’n ti’n, e se kɛ e lafiman e niaan’m be su kun. Afin e si kɛ fɔ o be nun. Sɛ e yo like kwlaa nga e kwla yo naan y’a lafi aniaan’m be su titi’n, é dí aklunjɔɛ. Kpɛkun é fá e ɲin é síe i like nga e bɔbɔ e kwla yo naan anuansɛ nin bo kun yolɛ’n b’a tran asɔnun’n nun titi’n be su.

17. (1) ?Ngue ti yɛ ɔ ti cinnjin kɛ e lafi e niaan’m be su-ɔ? (2) ?Ngue yɛ é wá kɛ́n i ndɛ like suanlɛ nga i sin liɛ nun-ɔn?

¹⁷ I yo, Satan i mɛn nga nun’n sran’m be lafiman be wiengu su kun. Sanngɛ Zoova i anuannzɛ’n nun’n, kɛ mɔ e klo e wiengu’n ti’n e lafi e wiengu su. I sɔ’n ti’n dɔ nga su’n, e di aklunjɔɛ yɛ e bo ti kun. Yɛ e ɲrun lɔ’n, i sɔ’n úka e naan y’a kwla jran kekle. ?Yɛ sɛ aniaan wie loli ɔ ngasi’n nin? ?Ngue yɛ ɔ fata kɛ a yo naan w’a seman kɛ a lafiman sran su kun-ɔn? Bu sa sɔ’n kɛ nga Zoova fa bu i’n sa, nanti Biblu’n nun ndɛ’n su, klo aniaan mun tankaan kpa. Kpɛkun nian be nga be kleli ajalɛ kpa mɔ Biblu’n kan be ndɛ’n be liɛ’n su. E kwla mian e ɲin naan y’a lafi e niaan’m be su titi. Sɛ e yo sɔ’n, é ɲán janvuɛ kpanngban mɔ ‘bé yó kpa trá e niaan bɔbɔ-ɔ.’ (Nya. 18:24) Sanngɛ e kusu ɔ fata kɛ e kle kɛ aniaan’m be kwla lafi e su wie. Like suanlɛ nga i sin liɛ nun’n, é wá wún like nga e kwla yo naan y’a kle e niaan’m be kɛ be kwla lafi e su’n.