LIKE SUANLƐ 40
‘Bé wá klé sran mun Ɲanmiɛn i atin’n’
“Be nga be kle sran’m be Nyanmiɛn i atin’n, bé kpája kɛ nzraama’m be sa tititi.”—DAN. 12:3.
JUE 151 Ɔ́ flɛ́ be
I SU FITILƐ *
1. ?Sa benin yɛ ɔ́ wá jú Klisi i afuɛ akpi famiɛn dilɛ blɛ’n nun-ɔn?
KƐ KLISI i afuɛ akpi famiɛn dilɛ blɛ nun’n, bé wá cɛ́n sran mun’n i sɔ’n wá yó ɲɛnmɛn-o! Be kwlaa nga be awlɛn su sran’m be wuli’n, be kunndɛ kpa kɛ bé wún be sran sɔ mun ekun. I sɔ kusu yɛ Zoova kunndɛ-ɔ. (Zɔb 14:15) Kɛ bé wá cɛ́n sran sɔ mun’n, aklunjɔɛ nga be nga be awlɛn su sran’m be wuli’n bé wá dí’n, maan e bu i akunndan kan e nian. Kɛ nga e fa wunnin i like suanlɛ ng’ɔ sinnin lɛ nun’n sa’n, “be nga be yoli sa kpa” mɔ be dunman o nguan fluwa’n nun’n, bé wá cɛ́n be naan ‘be ɲan nguan.’ (Yol. 24:15; Zan 5:29) Atrɛkpa’n e awlɛn su sran nga be wuli’n, be nun wie’m bé wá trán be nga bé dún mmua cɛ́n be naan be tran asiɛ’n su wa’n be nun wie. * Asa ekun’n, “be nga b’a yoman sa kpa” mɔ be yɛle be nga b’a suman Zoova ka naan b’a wu’n, bé wá cɛ́n be naan ‘be di be jɔlɛ.’
2-3. (1) ?Kɛ nga Ezai 11:9, 10 fa kan’n sa’n, ngue like yɛ bé wá yó i asiɛ wunmuan’n su-ɔ? (2) ?Kosan benin mun yɛ é wá tɛ́ be su like suanlɛ nga nun-ɔn?
2 Ɔ fata kɛ be kle be kwlaa nga bé wá cɛ́n be’n, be like. (Eza. 26:9; 61:11) Ɔ maan bé wá fá ajalɛ wie mun naan b’a kwla kle sran kwlaa sɔ’m be like. (An kanngan Ezai 11:9, 10 nun.) ?Ngue ti-ɔ? Afin ɔ fata kɛ be nga b’a yoman sa kpa mɔ bé wá cɛ́n’n, be suan Zezi Klisi nin Ɲanmiɛn sielɛ’n nin e ti kpɔlɛ tɛ’n nin Zoova yɛ atin mɔ Zoova le i sie nglo nin asiɛ’n, be su like. Asa’n, ɔ fata kɛ be nga be yoli sa kpa bɔbɔ’n be si like nga Zoova waan ɔ́ yó i asiɛ’n su m’ɔ yili i nglo blɛblɛblɛ kleli i sufuɛ mun’n. Afin Zoova i sufuɛ sɔ’m be nun wie’m be dun mmua wuli ka naan b’a wie Biblu’n i klɛ. Ɔ maan be nga be yoli sa kpa-o, be nga b’a yoman sa kpa-o, be bue nɲɔn’n bé wá súan like kpanngban.
3 Ɔ maan like suanlɛ nga nun’n, é wá tɛ́ kosan nga’m be su: ?Wafa sɛ yɛ bé wá klé sran’m be like-ɔ? ?Ngue ti yɛ sɛ bé klɛ́ sran’m be dunman nguan fluwa’n nun annzɛ be su klɛman’n, i sɔ’n fin wafa nga bé wá sɔ́ like nga bé wá klé be’n nun’n niɔn? Kosan sɔ’m be tɛlɛ’n ti cinnjin kpa man e andɛ. Kɛ bé wá cɛ́n sran mun’n sa ng’ɔ́ wá ju’n, ndɛ wie mɔ be o Daniɛl nin Sa Nglo Yilɛ fluwa’n be nun’n, bé wá úka e naan y’a wun i wlɛ. Maan e dun mmua e fa e ɲin e sie i ndɛ ng’ɔ o Daniɛl 12:1, 2 nun’n su.
“SRAN KPANNGBAN BƆ BE O NDIA NUN’N BÉ JÁSO”
4-5. ?Mɛn’n i awieliɛ blɛ’n i su ndɛ benin yɛ Daniɛl 12:1 kan-ɔn?
4 An kanngan Daniɛl 12:1 nun. Daniɛl fluwa’n kan sa cinnjin wie mɔ bé jú mɛn’n i awieliɛ blɛ nun’n be ndɛ. I wie yɛle kɛ Daniɛl 12:1 se kɛ Misɛli mɔ yɛle Zezi Klisi “m’ɔ sasa [Ɲanmiɛn] i nvle’n nunfuɛ mun’n,” ɔ́ wá bá. Afuɛ 1914 nun mɔ be sieli Zezi i famiɛn Ɲanmiɛn i famiɛn diwlɛ’n nun lɔ’n, yɛ ndɛ sɔ’n boli i su kpɛnlɛ bo-ɔ.
5 Daniɛli seli ekun kɛ Zezi “bá” awlabɔɛ blɛ nun. “I sɔ awlabɔɛ liɛ’n, kɛ ɔ fin cɛn bɔ mɛn’n wo lɛ lele m’ɔ́ fá jú ndɛ yɛ’n, be nian wunmɛn i sɔ le.” “Awlabɔɛ blɛ” sɔ’n yɛle ‘ɲrɛnnɛn dan’ nga Matie 24:21 kɛn i ndɛ’n. Awlabɔɛ blɛ sɔ’n i awieliɛ lɔ’n, Zezi wá kún Ɲanmiɛn i sufuɛ’m be ti alɛ. Alɛ sɔ’n yɛle Aamagedɔn alɛ’n. Sa Nglo Yilɛ fluwa’n se kɛ Ɲanmiɛn i sufuɛ sɔ’m be ti sran kpanngban kpa yɛ “be fin ɲrɛnnɛn dan’n nun.”—Ngl. 7:9, 14.
6. ?Kɛ sran kpanngban kpa’n be ko fin ɲrɛnnɛn dan’n nun be ko fite’n, ngue sa yɛ ɔ́ wá jú-ɔ? An yiyi nun. (An nian “Fluwa’n nun kannganfuɛ’m be kosan mun” ng’ɔ kan be nga bé wá cɛ́n be naan be tran asiɛ’n su wa’n be ndɛ’n i nun.)
6 An kanngan Daniɛl 12:2 nun. ?Kɛ sran kpanngban kpa’n be ko fin ɲrɛnnɛn dan’n nun be ko fite’n, ngue sa yɛ ɔ́ wá jú-ɔ? Laa’n, e seli kɛ be nga bé cɛ́n be mɔ bé kɔ́ ɲanmiɛn su’n be ndɛ yɛ Daniɛl 12:2 kan-ɔn. Annzɛ ɔ kan jasin fɛ bolɛ junman nga e kpɔfuɛ’m be ti’n e jrɛnnin i afuɛ 1918 nun’n mɔ i sin’n e wa boli ekun’n, i ndɛ wie. * Sanngɛ siɛn’n, e wun i wlɛ kɛ be nga bé wá cɛ́n be mɛn klanman’n nun lɔ’n, be ndɛ yɛ ndɛ mma sɔ’n kan-ɔn. ?Ngue ti yɛ e sɔ-ɔ? “Ndia” nga be kɛn i ndɛ Daniɛl 12:2 nun’n, i kunngba’n yɛ be kɛn i ndɛ Zɔb 17:16 nun mɔ be se kɛ ‘be wla ye ase’n’ niɔn. I sɔ’n kle kɛ Daniɛl 12:2 kan be nga bé wá cɛ́n be naan be tran asiɛ’n su wa’n be ndɛ. Kɛ mɛn’n i awieliɛ blɛ’n nin Aamagedɔn alɛ’n be ko sin’n yɛ bé wá cɛ́n sran sɔ mun-ɔn.
7. (1) ?Kɛ be se kɛ be nga bé wá cɛ́n be’n be nun wie’m bé ɲán “anannganman nguan’n,” i bo’n yɛle benin? (2) ?Ngue ti yɛ be cɛnlɛ liɛ’n wá yó kpa trá be nga be cɛnnin be laa’n be cɛnlɛ liɛ’n niɔn?
7 ?Kɛ Daniɛl 12:2 se kɛ be nga bé wá cɛ́n be’n be nun wie’m bé ɲán “anannganman nguan’n,” i bo’n yɛle benin? I bo’n yɛle kɛ Zezi i afuɛ akpi famiɛn dilɛ blɛ nun’n, be nga bé wá cɛ́n be’n bé wá súan Zoova nin Zezi be su like titi. Be nga be ɲin wá yí Zoova nin Zezi’n, bé ɲán nguan m’ɔ leman awieliɛ’n. (Zan 17:3) Sran sɔ’m bé wá ɲán “nguan kpafuɛ’n.” Ɔ maan be cɛnlɛ’n ɔ́ wá yó kpa trá be nga be cɛnnin be laa’n be cɛnlɛ liɛ’n. (Ebr. 11:35) ?Ngue ti-ɔ? Afin kɛ mɔ fɔ o be nga be cɛnnin be laa’n be nun’n ti’n, be wa wuli ekun.
8. ?Ngue ti yɛ be nga bé wá cɛ́n be’n be nun wie’m “bé wún nyannzuɛn m’ɔ lɛman awieliɛ’n” niɔn?
8 Nán be nga bé wá cɛ́n be’n, be ngba yɛ bé sɔ́ like nga Zoova wá klé be’n i nun-ɔn. Afin Daniɛl 12:2 se kɛ be nga bé wá cɛ́n be’n, be nun wie’m “bé wún nyannzuɛn m’ɔ lɛman awieliɛ’n.” Kɛ mɔ be nun wie’m bé wá yó ɲin kekle’n ti’n, be su klɛman be dunman nguan fluwa’n nun wie. Ɔ maan be su ɲanman nguan m’ɔ leman awieliɛ’n yɛ bé wá núnnún be mlɔnmlɔn. Ɔ maan kɛ be ko cɛn sran mun’n, like nga bé wá yó’n, i ndɛ yɛ Daniɛl 12:2 kan-ɔn. * (Ngl. 20:12) Be nun wie’m bé wá ɲán nguan m’ɔ leman awieliɛ’n, sanngɛ wie’m be su ɲɛnmɛn i.
‘BÉ WÁ KLÉ SRAN MUN ƝANMIƐN I ATIN’N’
9-10. (1) ?Kɛ ɲrɛnnɛn dan’n ko sin’n, ngue sa yɛ ɔ́ wá jú ekun-ɔn? (2) ?Wan mun yɛ ‘bé yó nyɛnmɛn kɛ Nyanmiɛn su lɔ’n fa yo klanman’n sa-ɔ’?
9 An kanngan Daniɛl 12:3 nun. ?Kɛ ‘awlabɔɛ blɛ’n’ ko sin’n ngue sa yɛ ɔ́ wá jú ekun-ɔn? Kɛ ɲrɛnnɛn dan’n ko sin’n, sa ng’ɔ́ wá jú’n yɛ Daniɛl 12:3 kɛn i ndɛ-ɔ.
10 ?Wan mun yɛ ‘bé yó nyɛnmɛn kɛ Nyanmiɛn su lɔ’n fa yo klanman’n sa-ɔ’? Ndɛ ng’ɔ o Matie 13:43 nun’n, ɔ uka e naan y’a wun sran sɔ’m be wlɛ. Ndɛ mma sɔ’n se kɛ: “Blɛ sɔ’n nun’n, sran seinfuɛ’m bé kpája kpa kɛ wia’n sa be Si i Famiɛn diwlɛ’n nun.” Ndɛ mma sɔ’n nun’n Zezi su kan “be ng’ɔ fata kɛ be wlu Ɲanmiɛn i Famiɛn diwlɛ’n nun’n,” be ndɛ. Sran sɔ mun yɛle be nga be kpali be sieli be ngunmin mɔ be nin Zezi bé dí famiɛn ɲanmiɛn su lɔ’n. (Mat. 13:38) Ɔ maan Daniɛl 12:3 su kan be nga be kpali be sieli be ngunmin’n, ɔ nin junman nga bé wá dí i Zezi i afuɛ akpi famiɛn dilɛ blɛ nun’n, be ndɛ.
Sran 144.000 be nin Zezi bé wá nían sran’m be like klelɛ junman nga é wá dí i afuɛ akpi famiɛn dilɛ blɛ’n nun’n su. (An nian ndɛ kpɔlɛ 11 nun.)
11-12. ?Junman benin yɛ sran 144.000 bé wá dí i afuɛ akpi famiɛn dilɛ blɛ’n nun-ɔn?
11 ?Wafa sɛ yɛ be nga be kpali be sieli be ngunmin’n ‘bé wá klé sran mun Ɲanmiɛn i atin’n’ niɔn? Be nga be kpali be sieli be ngunmin’n be nin Zezi bé wá nían sran’m be like klelɛ junman nga é wá dí i afuɛ akpi famiɛn dilɛ blɛ’n nun’n i su. Sran 144.000 nga be nin Zezi bé wá dí famiɛn’n, bé yó Ɲanmiɛn ɲrun jranfuɛ wie. (Ngl. 1:6; 5:10; 20:6) Ɔ maan bé wá yó naan ‘nvlenvle’m be nunfuɛ’m be yo juejue.’ Yɛle kɛ bé wá úka be blɛblɛblɛ naan fɔ’n tu be nun. (Ngl. 22:1, 2; Eze. 47:12) Nanwlɛ, i sɔ’n wá yó be nga be kpali be sieli be ngunmin’n be fɛ kpa!
12 ?Wan mun yɛ bé wá trán sran kpanngban nga bé wá klé be Ɲanmiɛn i atin’n be nun wie-ɔ? Sran sɔ mun yɛle be nga bé wá cɛ́n be’n, nin be nga bé wá fín Aamagedɔn alɛ’n nun fíte’n, ɔ nin ba nga bé wá wú be mɛn klanman’n nun lɔ’n. Kɛ afuɛ 1.000 ko wie’n, fɔ su tranman sran’m be nun kun. ?Ɔ maan blɛ benin nun yɛ sɛ é kwlá sé’n be dunman mɔ i klikli nun’n be klɛli i klɛyɔn nun’n, bé wá klɛ́ i biki nun-ɔn?
SRAN’M BE SA NIANLƐ KASIƐN’N
13-14. ?Ngue yɛ ɔ fata kɛ be kwlaa nga fɔ su tranman be nun kun’n be yo naan b’a ɲan nguan m’ɔ leman awieliɛ’n niɔn?
13 Nán e wla fi su kɛ nán fɔ m’ɔ nunman sran kun nun’n, i ti yɛ ɔ́ ɲán nguan m’ɔ leman awieliɛ’n niɔn. Maan e bu Adan nin Ɛvu be akunndan kan e nian. Kannzɛ bɔbɔ fɔ nunman be nun’n, sanngɛ ɔ fata kɛ be kle kɛ be ɲin yi Zoova ka naan b’a ɲan nguan m’ɔ leman awieliɛ’n. Sanngɛ be ɲin w’a yimɛn i.—Rɔm. 5:12.
14 ?Kɛ afuɛ akpi famiɛn dilɛ blɛ’n wá sín’n, be nga be o asiɛ’n su’n be liɛ yó sɛ? Fɔ su tranman be nun kun. ?Sanngɛ sran sɔ’m be kwlaa bé súan Zoova i sielɛ’n i bo? ?Annzɛ be nun wie’m bé yó kɛ Adan nin Ɛvu mɔ be ɲin w’a yiman Ɲanmiɛn’n be sa? Ɔ fata kɛ be tɛ kosan sɔ’m be su. ?Sanngɛ wafa sɛ yɛ bé tɛ́ kosan sɔ’m be su-ɔ?
15-16. (1) ?Blɛ benin nun yɛ sɛ sran’m bé sú Zoova annzɛ be su sumɛn i’n, bé wá mán be atin naan be yi i nglo-ɔ? (2) ?Wafa sɛ yɛ sran’m be sa nianlɛ kasiɛn’n i bo’n gúa-ɔ?
15 Bé wá wlá Satan i bisua afuɛ 1.000. Blɛ sɔ’n nun’n, ɔ su kwlá lakaman sran’m be kun. Sanngɛ kɛ afuɛ 1.000 ko sin’n, bé wá yáci i nun. Kpɛkun ɔ́ wá kúnndɛ kɛ ɔ́ láka sran mɔ fɔ nunman be nun kun’n. Blɛ sɔ’n nun’n, sɛ sran’m bé súan Ɲanmiɛn i sielɛ’n i bo annzɛ be su suɛnmɛn i bo’n, bé wá mán be atin naan be yi i nglo weiin. (Ngl. 20:7-10) Kɛ Satan wá láka be’n, like nga bé wá yó’n, yɛ ɔ́ yó maan be dunman ká nguan fluwa nun titi annzɛ ɔ su kaman nun-ɔn.
16 Sran kpanngban kpa mɔ be siman be nuan’n, bé wá yó kɛ Adan nin Ɛvu be sa. Yɛle kɛ be su kplinman su kɛ Zoova sie be. ?Ngue sa yɛ ɔ́ wá jú be su-ɔ? Sa Nglo Yilɛ 20:15 se kɛ: “Be nga be dunman nunman nguan fluwa’n nun’n, be to be guali sin dan’n nun.” Ndɛ sɔ’n kle kɛ bé wá núnnún ɲin keklefuɛ sɔ mun mlɔnmlɔn. Sanngɛ sran sunman bé wá jrán Satan i ɲrun kekle blɛ sɔ’n nun. Ɔ maan, be dunman ká nguan fluwa nun tititi.
MƐN’N I “AWIELIƐ BLƐ’N” NUN
17. ?Ndɛ benin yɛ anzi kun kan kleli Daniɛli m’ɔ́ kpɛ́n su e blɛ liɛ’n nun-ɔn? (Daniɛl 12: 4, 8-10)
17 Kɛ e bu sa nga bé wá jú e ɲrun lɔ’n be akunndan’n, e wun blibli e. Anzi kun kannin sa wie mɔ bé wá jú mɛn’n i ‘awieliɛ blɛ’ nun’n be ndɛ kleli Daniɛli. Blɛ sɔ’n yɛle e blɛ liɛ nga. (An kanngan Daniɛl 12:4, 8-10 nun; 2 Tim. 3:1-5.) Anzi’n seli Daniɛli kɛ: “Sran kpanngban kpa […] be silɛ’n ɔ́ úka su.” Ndɛ sɔ’n kle kɛ Ɲanmiɛn i sufuɛ’m bé wá wún ndɛ nga be o Daniɛl fluwa nun’n be wlɛ kpa. Anzi’n seli ekun kɛ mɛn’n i awieliɛ blɛ nun’n, “sran tɛtɛ mɔ be wunman sa wlɛ’n, bé yó sa tɛ’n bé kɔ́ be nyrun.” Ndɛ sɔ’n kle kɛ klunwifuɛ’m be su wunman ndɛ sɔ’m be wlɛ.
18. ?Ngue sa yɛ ɔ ka kan’n ɔ́ jú klunwifuɛ’m be su-ɔ?
18 Andɛ’n, ɔ kwla yo e kɛ kɛ klunwifuɛ’m be yo sa tɛ’n, sa fi juman be su sa. (Mal. 3:14, 15) Ɔ ka kan’n, Zezi wá fá be nga be fa be sunnzun boli mun’n síe i sa bɛ su yɛ ɔ́ dí be jɔlɛ. Kpɛkun be nga be ti kɛ bua sa’n, ɔ́ fá be síe i sa fama su. (Mat. 25:31-33) Klunwifuɛ’m be su finman ɲrɛnnɛn dan nun be fiteman. Yɛ be su cɛnman be naan se kɛ bé trán mɛn klanman’n nun. Ɔ maan be dunman su tranman be nga bé wá klɛ́ be dunman ‘anannganman i ɲrun lɛ’ mɔ Malasi 3:16 kɛn i ndɛ’n, be nun wie.
19. (1) ?Dɔ nga su’n, ngue yɛ ɔ fata kɛ e yo-o? (2) ?Yɛ ngue ti-ɔ? (Malasi 3:16-18)
19 Dɔ nga su yɛ ɔ fata kɛ e kle kɛ e nunman klunwifuɛ’m be nun wie-ɔ. (An kanngan Malasi 3:16-18 nun.) Dɔ nga su’n, Zoova su yia be nga be ti ‘i liɛ mlɔnmlɔn’n’ be nuan. E kunndɛ kpa kɛ é trán sran sɔ’m be nun wie.
Daniɛli nin e awlɛn su sran nga be wuli’n, ɔ nin sran uflɛ wie mun ekun bé ‘wá jáso’ fá be akatua’n mɛn klanman’n nun lɔ. Kɛ é wá wún be’n, ɔ́ wá yó e fɛ kpa! (An nian ndɛ kpɔlɛ 20 nun.)
20. (1) ?Ndɛ kasiɛn benin yɛ be kan kleli Daniɛli-ɔ? (2) ?Ngue ti yɛ e kunndɛ kpa kɛ ndɛ sɔ’n kpɛn su-ɔ?
20 Nanwlɛ, e blɛ nga ti i liɛ ngunmin kun. Sanngɛ sa cinnjin wie’m bé wá jú e ɲrun lɔ. Ɔ ka kan’n, bé wá núnnún klunwifuɛ mun. I sin’n, ndɛ nga Zoova kan kleli Daniɛli’n ɔ́ kpɛ́n su. Ɔ seli i kɛ: “Á wá jáso kó fá wɔ akatua’n mɛn’n i awieliɛ lɔ.” (Dan. 12:13) ?A su minndɛ blɛ mɔ Daniɛli nin ɔ awlɛn su sran nga be wuli’n bé ‘wá jáso’n’? Sɛ ɔ ti sɔ’n, mian ɔ ɲin su Zoova kpa titi. I liɛ’n, ɔ dunman trán Zoova i nguan fluwa’n nun.
JUE 80 ‘Amun nian kɛ Zoova ti kpa dan’n!’
^ Like suanlɛ nga nun’n, sran’m be like klelɛ nga Daniɛl 12:2, 3 kɛn i ndɛ’n, é wá yíyí nun wafa uflɛ. É wá kán be nga bé wá dí junman sɔ’n, ɔ nin blɛ nga bé wá dí junman sɔ’n be ndɛ. Asa’n é wá wún i kɛ kɛ Klisi i afuɛ akpi famiɛn dilɛ blɛ’n ko wie mɔ bé wá sá sran mun nían’n, like klelɛ sɔ’n ɔ́ wá úka be kpa.
^ Atrɛkpa’n, bé wá bó sran’m be cɛnlɛ bo be nga be suli Zoova kpa mɔ be wuli mɛn’n i awieliɛ blɛ’n nun’n be su. I sin’n, bé wá cɛ́n sran onga mun. Sɛ i sɔ yɛ bé wá cɛ́n sran mun sakpa’n, nn be nga bé cɛ́n be’n, bé sí be nga bé wá sɔ́ be nun’n. I kwlaa yoli-o, Biblu’n se kɛ be nga bé wá kɔ́ ɲanmiɛn su’n, be cɛnlɛ’n ‘tó be tó be.’ Ɔ maan e kwla se kɛ be nga bé wá trán asiɛ’n su wa’n be cɛnlɛ liɛ’n yó sɔ wie.—1 Kor. 14:33; 15:23.
^ Ndɛ nga e su kɛn i wa’n ti ndɛ ng’ɔ o Prêtons attention à la prophétie de Daniel ! i ndɛ tre 17 ɔ nin ndɛ ng’ɔ o afuɛ 1987 Zuie 1 Sasafuɛ Tranwlɛ’n Blɔfuɛ nun liɛ’n i bue 21-25 be nun’n, i nun yiyilɛ wafa uflɛ.
^ Sanngɛ “be nga be yoli sa kpa” nin “be nga b’a yoman sa kpa” mɔ Sa Nga Be Yoli’n 24:15 kan be ndɛ’n, ɔ nin “be nga be yoli sa kpakpa mun” nin “be nga be yoli sa tɛtɛ mun,” mɔ Zan 5:29 kan be ndɛ’n be liɛ’n, sa nga be yoli ka naan b’a wu’n, be ndɛ yɛ ndɛ mma sɔ’m be kan-ɔn.
