Maan e fa e ɲin e sie i wafa nga Biblu’n tɛ kosan sɔ’m be su’n i su.

Sa Nga Be Yoli’n 24:15 se kɛ “be nga be yoli sa kpa-o, be nga b’a yoman sa kpa-o, bé cɛ́n.” Be nga be yoli sa kpa’n, yɛle be nga be suli Zoova kpa ka naan b’a wu’n. Ɔ maan be klɛli be dunman nguan fluwa’n nun anannganman i ɲrun lɛ. (Mal. 3:16) Be nga b’a yoman sa kpa’n, yɛle be nga b’a suman Zoova ka naan b’a wu’n. Be dunman nunman nguan fluwa’n nun.

Sran akpasua nɲɔn nga be kan be ndɛ Sa Nga Be Yoli’n 24:15 nun’n, be kunngba’n yɛ be kan be ndɛ Zan 5:28, 29 nun-ɔn. Zezi seli kɛ “be nga be yoli sa kpakpa mun’n, bé ɲán nguan. Yɛ be nga be yoli sa tɛtɛ mun’n, bé dí be jɔlɛ. Be nga be yoli sa kpa’n, be yoli sa sɔ mun ka naan b’a wu. Kɛ mɔ be dunman o nguan fluwa’n nun’n, i ti yɛ bé wá cɛ́n be naan be ɲan nguan’n niɔn. Be nga b’a yoman sa kpa’n, be yoli sa tɛtɛ mun ka naan b’a wu. Ɔ maan bé wá cɛ́n be naan be di be jɔlɛ. Be dunman nunman nguan fluwa’n nun wie. I sɔ’n ti’n, bé wá mán be blɛ naan be suan Zoova i su like, naan be kle kɛ be kwla klɛ be dunman nguan fluwa’n nun.

Sa Nglo Yilɛ 20:12, 13 se kɛ be kwlaa nga bé wá cɛ́n be’n, ɔ fata kɛ be nanti ‘fluwa nga bé wá tíke be su’n’ be nun ndɛ’n su. Fluwa sɔ’m be nun ndɛ’n yɛle mmla uflɛ nga sran’m bé wá dí su mɛn klanman’n nun lɔ’n. Be nga be su nantiman fluwa sɔ’m be nun ndɛ’n su’n, Zoova núnnún be.—Ezai 65:20.

Daniɛl 12:2 se kɛ be nga be wuli’n be nun wie’m bé wá jáso. ‘Wie’m bé ɲán anannganman nguan, yɛ wie’m be kusu bé wún ɲannzuɛn m’ɔ lɛman awieliɛ’n.’ Kɛ be ko cɛn sran mun’n, sa ng’ɔ́ wá jú’n i ndɛ yɛ ndɛ mma sɔ’n kan-ɔn. Wie’m ‘bé ɲán anannganman nguan, yɛ wie’m bé wún ɲannzuɛn m’ɔ lɛman awieliɛ’n.’ Ɔ maan kɛ afuɛ akpi famiɛn dilɛ blɛ’n ko wie’n, sran wie’m bé ɲán nguan m’ɔ leman awieliɛ’n. Yɛ bé núnnún wie mun mlɔnmlɔnmlɔn.—Ngl. 20:15; 21:3, 4.

Maan e fa sunnzun ase kun e nian. E kwla fa sran akpasua nɲɔn nga bé wá cɛ́n be’n, e sunnzun sran wie mɔ be waan bé kó trán nvle uflɛ nun’n. E kwla fa be nga be yoli sa kpa’n, e sunnzun be nga be ɲannin fluwa m’ɔ kle kɛ be kwla di junman, annzɛ be kwla yo ninnge uflɛ wie mun nvle sɔ’n nun lɔ’n. Kpɛkun, e kwla fa be nga b’a yoman sa kpa’n, e sunnzun be nga be ɲannin fluwa m’ɔ man be atin kɛ be wlanwlan nvle sɔ’n nun kan naan nán bé cɛ́ lɔ’n. Ɔ fata kɛ sran sɔ’m be kle kɛ be kwla man be atin kɛ be tran nvle sɔ’n nun lɔ titi. I wafa kunngba’n, be nga b’a yoman sa kpa mɔ bé wá cɛ́n be’n, ɔ fata kɛ be nanti Zoova i mmla’m be su, yɛ be kle kɛ be kwla yo sa kpa. I liɛ’n, bé mán be atin kɛ be tran mɛn klanman’n nun. Kannzɛ fluwa nga sran sɔ’m be ɲɛnnin i’n ti sɛ ti sɛ’n, i agualiɛ su’n bé mán wie’m be atin kɛ be tran nvle sɔ’n nun titi. Yɛ wie’m be kusu bé kán be bo. Sanngɛ sɛ bé mán be atin kɛ be tran nvle sɔ’n nun lɔ titi annzɛ bé kán be bo’n, ɔ fin nzuɛn nga bé yí i nglo lɔ’n. I wafa kunngba’n, be kwlaa nga bé wá cɛ́n be’n, sɛ bé trán mɛn klanman’n nun lɔ, annzɛ be su tranman lɔ’n, ɔ fin wafa nga bé wá klé kɛ be lafi Ɲanmiɛn su’n, ɔ nin nzuɛn nga bé wá yí i nglo lɔ’n.

Zoova ti Ɲanmiɛn kun m’ɔ si aunnvɔɛ-ɔ. Kpɛkun ɔ yo sa’n i nuan su sɛsɛsɛ. (Mml. 32:4; Jue. 33:5) Ɔ́ wá cɛ́n be nga be yoli sa kpa’n, ɔ nin be nga b’a yoman sa kpa’n. Ɔ́ wá yó sɔ fa kle kɛ ɔ klo be. Sanngɛ kusu ɔ kunndɛ kɛ sran’m be nanti i mmla’m be su. Ɔ maan saan be nga be klo i mɔ be nanti i mmla’m be su’n, be ngunmin yɛ bé trán mɛn klanman’n nun lɔ-ɔ.