1 Korɛntifuɛ Mun 15:8 nun’n, Pɔlu seli kɛ: “Kasiɛn su’n, min mɔ n ti kɛ ba mɔ i blɛ w’a juman yɛ be wuli i’n sa’n, ɔ yili i wun nglo kleli min wie.” Laa’n, e seli kɛ atrɛkpa’n, blɛ mɔ Pɔlu wunnin Zezi mɔ w’a ɲan ɲrun ɲanmiɛn su lɔ’n i ndɛ yɛ ɔ su kan-ɔn. Ɔ ti kɛ nn b’a wu i uflɛ sa, annzɛ b’a cɛn i naan ɔ o ɲanmiɛn su lɔ sa. Kɛ sa sɔ’n jú nn be nga bé wá cɛ́n be naan be wɔ Ɲanmiɛn su’n, be cɛnlɛ’n nin-a bomɛn i bo. Kɛ sa sɔ’n juli’n, afuɛ ya kpanngban sinnin ka naan sran cɛnlɛ sɔ’n w’a bo i bo. Sanngɛ kɛ e wa fali e ɲin e sieli i ndɛ mma sɔ’n su kpa’n, e wunnin i wlɛ kɛ ɔ fata kɛ e yiyi nun wafa uflɛ.

E si kɛ sa ng’ɔ juli mɔ Pɔlu kacili Klisifuɛ’n i ndɛ yɛ ɔ su kan-ɔn. ?Sanngɛ kɛ ɔ se kɛ ɔ “ti kɛ ba mɔ i blɛ w’a juman yɛ be wuli i’n sa’n,” ngue ndɛ yɛ i waan ɔ́ kán-ɔn? Wafa nga e kwla tɛ kosan sɔ’n su’n ɔ sɔnnin.

Pɔlu i Klisifuɛ kacilɛ’n fuli i nun yɛ ɔ sɛnngɛnnin i akunndan’n. Kɛ ba kun i anglo juman mɔ be wu i’n, ɔ fu be nun. Kɛ Sɔlu (kɛ ɔ́ kɔ́ i ɲrun’n be wa flɛli i kɛ Pɔlu) kɔ́ Damasi naan ɔ́ kó klé Klisifuɛ nga be o lɔ’n be yalɛ’n, ɔ siman kɛ ɔ́ wá wún Zezi mɔ w’a cɛn nguan’n aolia nun. Pɔlu i Klisifuɛ kacilɛ’n, ɔ fuli i nun. Yɛ ɔ fuli Klisifuɛ nga be o Damasi lɔ m’ɔ kunndɛ kɛ ɔ́ klé be yalɛ’n be nun wie. Sa ng’ɔ juli’n yoli kekle dan ti’n, i ɲin mma sili le nɲɔn kun.—Yol. 9:1-9, 17-19.

Pɔlu kacili Klisifuɛ “blɛ ng’ɔ nin i fataman nun.” Glɛki nun ndɛ nga be kacili i Wawle nun kɛ “ba mɔ i blɛ w’a juman yɛ be wuli i’n” be kwla kaci ekun kɛ ba mɔ be wuli i “blɛ ng’ɔ nin i fataman nun’n.” Biblu kun (Bible de Jérusalem) kacili ndɛ sɔ’n kɛ “ɔ ti kɛ be wuli min blɛ mɔ b’a sunnzunman’n i nun sa.” I nun mɔ Pɔlu káci Klisifuɛ’n, nn Zezi w’a dun mmua w’a wɔ ɲanmiɛn su. Pɔlu kannin sran wie mɔ kɛ be cɛnnin Zezi’n be wunnin i’n be ndɛ. Sanngɛ i bɔbɔ liɛ’n, kɛ be cɛnnin Zezi’n w’a wunmɛn i ka naan w’a wɔ ɲanmiɛn su. (1 Kor. 15:4-8) “Blɛ ng’ɔ nin i fataman nun” yɛ Zezi yili i nglo kleli Pɔlu-ɔ. Ɔ kunndɛ kɛ Pɔlu wun i i ti yɛ ɔ yoli sɔ-ɔ.

Kɛ ɔ́ kɛ́n i bɔbɔ i ndɛ’n ɔ kɛnnin i wun ase. Fluwa sifuɛ wie’m be waan wafa nga Pɔlu kannin ndɛ’n, ɔ ti kɛ ɔ bumɛn i wun sran sa. Sɛ ɔ ti sɔ sakpa’n, nn Pɔlu wunnin i wlɛ kɛ akoto junman nga be fa mɛnnin i’n, ɔ nin i fataman. I kpa bɔbɔ’n, i bɔbɔ seli kɛ: “Min yɛ n ti akoto’m be nun kaanfuɛ’n niɔn. Yɛ ɔ fataman kɛ be flɛ min akoto bɔbɔ, afin n kleli Ɲanmiɛn i asɔnun’n i nunfuɛ’m be yalɛ. Sanngɛ Ɲanmiɛn i aklunye dan’n ti’n n ti akoto.”—1 Kor. 15:9, 10.

Ɔ maan e kwla se kɛ Pɔlu su kan blɛ mɔ Zezi yili i wun nglo kleli i m’ɔ kacili Klisifuɛ’n i ndɛ. Sa sɔ’n juli blɛ m’ɔ nin i fataman’n nun, yɛ ɔ sanngannin Pɔlu i akunndan. Ɔ wunnin i wlɛ kɛ aolia nun like ng’ɔ wunnin i’n ɔ nin i fataman. I kwlaa yoli-o, sa sɔ m’ɔ juli’n, ɔ yoli i cinnjin. I sɔ’n ti’n, Pɔlu wa wunnin i wlɛ kɛ Zezi cɛnnin sakpa. Ɔ maan sɛ blɛ sunman’n, kɛ Pɔlu bó jasin fɛ’n ɔ boli sa sɔ’n su’n, i sɔ’n boman e nuan.—Yol. 22:6-11; 26:13-18.