LIKE SUANLƐ 4
?Ngue ti yɛ e yo e Wla Kpɛnlɛ aɲia’n niɔn?
“An yo i kɛ nga sa titi naan amun wla kpɛn min su.”—LIK. 22:19.
JUE 20 A fali ɔ awlɛn su Ba’n mannin
I SU FITILƐ *
1-2. (1) ?Blɛ benin nun yɛ e wla kpɛn e awlɛn su sran kun m’ɔ wuli’n i su dan-ɔn? (2) ?Kɔnguɛ kasiɛn ka naan b’a kun Zezi’n ngue yɛ ɔ yoli-ɔ?
KANNZƐ bɔbɔ e awlɛn su sran kun wuli w’a cɛ sɛ’n, sanngɛ e wla fimɛn i su le. Asa’n kɛ afuɛ nuan kwlakwla’n i wie cɛn’n ko ju’n, e wla kpɛnkpɛn i su dan.
2 Afuɛ nuan kwlakwla’n mɛn wunmuan’n nun’n, e nin sran miliɔn kaka e yo aɲia cinnjin kpa kun e fa kle kɛ e wla kpɛn sran kun mɔ e klo i kpa’n i wie’n su. Sran sɔ’n yɛle Zezi Klisi. (1 Piɛ. 1:8) Zezi fɛli i nguan’n mannin naan e ɲan e ti sa tɛ’n nin wie’n be sa nun. (Mat. 20:28) I bɔbɔ yɛ ɔ seli i sɔnnzɔnfuɛ’m be kɛ be yo aɲia sɔ’n niɔn. Kɔnguɛ kasiɛn ka naan b’a kun i’n yɛ ɔ kpɛli aɲia sɔ’n i ba-ɔ. Ɔ seli kɛ: “An yo i kɛ nga sa titi naan amun wla kpɛn min su.”—Lik. 22:19.
3. ?Ngue yɛ é wá kɛ́n i ndɛ like suanlɛ nga nun-ɔn?
3 Kɛ é yó e Wla Kpɛnlɛ aɲia’n, sran miliɔn kaka be trɛn i bo. Be nun’n, be nga bé kɔ́ ɲanmiɛn su’n b’a sɔnman. Sanngɛ be nga bé trán asiɛ’n su wa’n be sɔnnin kpa. Like suanlɛ nga nun’n, é wá kán like nga ti yɛ sran akpasua nɲɔn sɔ’m be tran e Wla Kpɛnlɛ aɲia’n i bo’n i ndɛ. Kpɛkun é wá kán i su ye nga be ɲɛn i’n i ndɛ wie. Sanngɛ maan e dun mmua e kan like nga ti yɛ be nga be kpali be sieli be ngunmin’n be tran aɲia sɔ’n i bo’n i ndɛ ka.
?NGUE TI YƐ BE NGA BE KPALI BE SIELI BE NGUNMIN’N BE TRAN E WLA KPƐNLƐ AƝIA’N I BO-Ɔ?
4. ?Ngue ti yɛ be nga be kpali be sieli be ngunmin’n be ngunmin yɛ be di kpanwun’n kpɛkun be nɔn duvɛn’n niɔn?
4 Afuɛ nuan kwlakwla’n kɛ é yó e Wla Kpɛnlɛ aɲia’n, be nga be kpali be sieli be ngunmin’n be di kpanwun’n kpɛkun be nɔn duvɛn’n. ?Ngue ti yɛ be ngunmin yɛ be di kpanwun’n kpɛkun be nɔn duvɛn’n niɔn? Kɛ ɔ ko yo naan y’a tɛ kosan sɔ’n su’n, maan e fa e ɲin e sie i like nga Zezi yoli i kɔnguɛ kasiɛn ka naan b’a kun i’n i su. Kɛ ɔ nin i akoto’m be wieli Delɛ cɛn’n i di’n, ɔ kpɛli aɲia kun ba. I sin’n, be flɛli aɲia sɔ’n kɛ E Min’n i nnɔsua nun aliɛ. Aɲia sɔ’n i bo’n, ɔ bubuli kpanwun nun kpɛkun ɔ fa mɛnnin i akoto mun kɛ be di. I sin’n, ɔ fali duvɛn mannin be kɛ be nɔn. Asa ekun’n, ɔ kannin aenguɛ nɲɔn be ndɛ kleli be. Be yɛle aenguɛ uflɛ’n nin Famiɛn dilɛ aenguɛ’n. * (Lik. 22:19, 20, 28-30) Aenguɛ sɔ’m be ti’n, Zezi i akoto mun nin sran wie’m bé dí famiɛn ɲanmiɛn su lɔ yɛ bé yó Ɲanmiɛn ɲrun jranfuɛ. (Ngl. 5:10; 14:1) Kɛ mɔ be ngunmin yɛ be nin Zezi be trali aenguɛ sɔ mun’n i ti yɛ be ngunmin yɛ be di kpanwun kpɛkun be nɔn duvɛn’n niɔn.
5. ?Ngue yɛ be nga be kpali be sieli be ngunmin’n be wun i wlɛ-ɔ?
5 Like uflɛ nga ti yɛ be nga be kpali be sieli be ngunmin’n be tran e Wla Kpɛnlɛ aɲia’n i bo’n yɛle kɛ blɛ sɔ’n nun’n be bu like nga bé wá ɲɛ́n i’n i akunndan. Zoova waan ɔ́ mán be like dan kpa kun. Yɛle kɛ kɛ bé wá kɔ́ ɲanmiɛn su lɔ’n, ɔ́ mán be wunnɛn kun m’ɔ saciman’n yɛ be su wuman kun le. Asa’n be nin Zezi Klisi bé dí famiɛn. Sanngɛ be nun cinnjin kpafuɛ’n yɛle kɛ bé wún Zoova bɔbɔ ba’n. (1 Kor. 15:51-53; 1 Zan 3:2) Be nga be kpali be sieli be ngunmin’n be lafi su kɛ bé kɔ́ ɲanmiɛn su. Sanngɛ be wun i wlɛ kɛ kwlaa naan Ɲanmiɛn w’a man be atin kɛ be ko tran ɲanmiɛn su lɔ’n, ɔ fata kɛ be su i kpa lele be guɛ i ti nin i bo. (2 Tim. 4:7, 8) Kɛ be bu like nga bé wá ɲɛ́n i ɲanmiɛn su lɔ’n i akunndan’n, ɔ yo be fɛ dan. (Tit. 2:13) ?Yɛ “bua’m be wie mun” be li? (Zan 10:16) ?Ngue ti yɛ be tran e Wla Kpɛnlɛ aɲia’n i bo wie-ɔ?
?NGUE TI YƐ BUA’M BE WIE MUN BE TRAN E WLA KPƐNLƐ AƝIA’N I BO WIE-Ɔ?
6. ?Ngue ti yɛ bua’m be wie mun be tran e Wla Kpɛnlɛ aɲia’n i bo wie-ɔ?
6 Kɛ bua’m be wie mun be tran e Wla Kpɛnlɛ aɲia’n i bo’n, be diman kpanwun’n yɛ be nɔnman duvɛn’n wie. Sanngɛ kɛ be tran aɲia sɔ’n i bo’n ɔ yo be fɛ. Afuɛ 1938 nun yɛ be mannin be atin kɛ be tran e Wla Kpɛnlɛ aɲia’n i bo wie-ɔ. Afuɛ 1938, Marsi 1, Sasafuɛ Tranwlɛ’n seli kɛ: “Sɛ bua’m be wie mun be tran aɲia sɔ’n i bo wie’n, ɔ ti su. […] Afin blɛ sɔ’n nun’n, be kwlaa be kwla di aklunjɔɛ.” Kɛ yasua kun nin bla kun bé já’n, be osufuɛ nin be janvuɛ nga be bali aja’n bo’n be di aklunjɔɛ. I wafa kunngba’n kɛ bua’m be wie mun be tran e Wla Kpɛnlɛ aɲia’n i bo’n be di aklunjɔɛ wie.
7. ?Ngue ndɛ yɛ be yiyi nun e Wla Kpɛnlɛ aɲia’n i bo-ɔ?
7 Kɛ é yó e Wla Kpɛnlɛ aɲia’n, bua’m be wie mun be kusu be bu like nga bé wá ɲɛ́n i’n i akunndan wie. Asa’n aɲia sɔ’n i bo’n, be tie nzra nun ijɔlɛ fɛfɛ kpa kun. Nzra nun ijɔlɛ sɔ’n nun’n, be kan like nga Zezi nin sran 144.000 bé wá yó mán klɔ sran mun be Afuɛ Akpi Famiɛn Dilɛ Blɛ’n nun’n i ndɛ. Blɛ sɔ’n nun’n, bé wá yó maan asiɛ’n káci lika klanman kpɛkun fɔ su tranman sran’m be nun kun. Kɛ sran miliɔn kaka nga be tran e Wla Kpɛnlɛ aɲia’n i bo’n be bu like nga bé wá ɲɛ́n i’n i akunndan’n, ɔ yo be fɛ dan. Be kannin ninnge sɔ’m be nun wie’m be ndɛ Ezai 35:5, 6; 65:21-23 nin Sa Nglo Yilɛ 21:3, 4 be nun. Kɛ be bu like sɔ mɔ be bɔbɔ nin be awlɛn su sran’m bé wá ɲɛ́n i’n i akunndan’n, be lafi su kɛ be liɛ yó ye. Yɛ i sɔ’n man be wunmiɛn naan b’a su Zoova kpa titi.—Mat. 24:13; Gal. 6:9.
8. ?Sa uflɛ benin ti yɛ bua’m be wie mun be tran e Wla Kpɛnlɛ aɲia’n i bo wie-ɔ?
8 Maan e kan sa uflɛ nga ti yɛ bua’m be wie mun be tran e Wla Kpɛnlɛ aɲia’n i bo wie’n i ndɛ. Be waan bé yó sɔ fá klé kɛ be klo be nga be kpali be sieli be ngunmin’n naan be suan be bo. Ɲanmiɛn Ndɛ’n seli kɛ be nga be kpali be sieli be ngunmin’n nin bua’m be wie mun be bo wá yó kun bé yó ninnge wie mun likawlɛ. Siɛn’n, maan e fa e ɲin e sie i ninnge sɔ’m be nun wie’m be su.
9. ?Ngue ndɛ yɛ Zakari 8:23 kɛn i wafa nga bua’m be wie mun nin be nga be kpali be sieli be ngunmin’n bé wá trán’n su-ɔ?
9 An kanngan Zakari 8:23 nun. Ndɛ mma sɔ’n kan wafa nga bua’m be wie mun nin be nga be kpali be sieli be ngunmin’n bé trán’n i ndɛ. Ndɛ mma sɔ’n nun’n, ‘Zifu’ nga be kɛn i ndɛ’n ɔ ti be nga be kpali be sieli be ngunmin’n be nzɔliɛ. (Rɔm. 2:28, 29) Kpɛkun ‘sran blu nga be aniɛn’n ti ngunminngunmin’n’ be ti bua’m be wie mun be nzɔliɛ. Sɛ é kwlá sé’n, ‘be tra be nga be kpali be sieli be ngunmin’n be wun tralɛ’n.’ Yɛle kɛ be fa be wun be mantan be yɛ be bo yo kun be su Ɲanmiɛn likawlɛ. Kɛ é yó e Wla Kpɛnlɛ aɲia’n yɛ i sɔ liɛ’n i ɲin fite kpa-ɔ. Afin be nin be nga be kpali be sieli be ngunmin’n be yo aɲia’n likawlɛ.
10. ?Ngue yɛ Zoova yoli naan ndɛ ng’ɔ o Ezekiɛl 37:15-19, 24, 25 nun’n w’a kpɛn su-ɔ?
10 An kanngan Ezekiɛl 37:15-19, 24, 25 nun. Zoova yo maan ndɛ sɔ’n kpɛn su andɛ. Yɛle kɛ ɔ yo maan bua’m be wie mun nin be nga be kpali be sieli be ngunmin’n be bo yo kun be su i likawlɛ. Ndɛ mma sɔ’n kan waka bue nɲɔn be ndɛ. “Zida” i waka’n ti be nga be lafi su kɛ bé kɔ́ ɲanmiɛn su’n be nzɔliɛ. Afin laa Izraɛli lɔ’n, Zida akpasua’n nun yɛ be kpa be nga be di famiɛn’n niɔn. Kpɛkun “Efraimun” i waka liɛ’n ti be nga be lafi su kɛ bé trán asiɛ’n su wa’n be nzɔliɛ. * Zoova seli kɛ ɔ́ fá waka bue nɲɔn sɔ mun mántan su kpɛkun bé káci “waka wunmuan kunngba.” Ndɛ sɔ’n i bo’n yɛle kɛ sran akpasua nɲɔn sɔ’m bé káci akpasua kunngba. I sɔ’n kle kɛ be bo wá yó kun bé sú Ɲanmiɛn kpɛkun Klisi Zezi yó be famiɛn. E wun i sɔ liɛ’n e Wla Kpɛnlɛ aɲia’n i bo. Yɛle kɛ be akpasua nɲɔn’n be yoman aɲia’n i ngunminngunmin, sanngɛ be yo i likawlɛ. I lɛ nun’n, be kaci kɛ “bua fa kun” mɔ be ‘tafuɛ’n ti kunngba’n’ sa.—Zan 10:16.
11. ?Wafa sɛ yɛ bua nga Matie 25:31-36, 40 kan be ndɛ’n be suan Klisi i niaan’m be bo-ɔ?
11 An kanngan Matie 25:31-36, 40 nun. “Bua” nga Zezi kan be ndɛ’n be ti be nga bé wá sú Zoova kpa mɛn’n i awieliɛ blɛ’n nun’n be nzɔliɛ. Sran sɔ’m be lafi su kɛ bé trán asiɛ’n su wa. Be yɛ be flɛ be ekun kɛ bua’m be wie mun niɔn. Be suan Klisi i niaan nga be te o asiɛ’n su wa’n be bo kpa titi. I wie yɛle kɛ be nin be bo jasin fɛ’n mɛn’n wunmuan’n nun yɛ be uka sran mun naan be kaci Zezi i sɔnnzɔnfuɛ.—Mat. 24:14; 28:19, 20.
12-13. ?Like uflɛ benin yɛ bua’m be wie mun be yo fa suan Klisi i niaan’m be bo-ɔ?
12 Like uflɛ mɔ bua’m be wie mun be yo fa suan Klisi i niaan’m be bo’n, yɛle kɛ e Wla Kpɛnlɛ aɲia blɛ’n nun’n be yia sran mun naan be trɛn i bo. (An nian kuku nga be flɛ i kɛ “ ?Ngue yɛ a kwla yo i e Wla Kpɛnlɛ aɲia’n i blɛ’n nun-ɔn?” i nun.) Asa’n, be fa ajalɛ wie mun naan b’a kwla yo e Wla Kpɛnlɛ aɲia’n mɛn’n wunmuan’n nun. Kannzɛ bɔbɔ be nga be kpali be sieli be ngunmin’n be nun wie fi nunman asɔnun bo kun nun’n, be yo aɲia sɔ’n i lɔ wie. Kɛ bua’m be wie mun be suan Klisi i niaan’m be bo kɛ ngalɛ sa’n, ɔ yo be bɔbɔ be fɛ. Be si kɛ ninnge kwlaa nga be yo man Klisi i niaan sɔ mun’n, ɔ ti kɛ Zezi bɔbɔ yɛ be su yo mɛn i sa.—Mat. 25:37-40.
13 Siɛn’n, é wá kán ninnge uflɛ nga ti yɛ be nga be kpali be sieli be ngunmin’n nin bua’m be wie mun be yo e Wla Kpɛnlɛ aɲia’n be ndɛ.
?NGUE TI YƐ E KWLAKWLA E TRAN E WLA KPƐNLƐ AƝIA’N I BO-Ɔ?
14. ?Ngue yɛ Zoova nin Zezi be yoli m’ɔ kle kɛ be klo e dan-ɔn?
14 E waan é klé Zoova nin Zezi be kɛ e si ye. Zoova yo ninnge sunman fa kle kɛ ɔ klo e. Sanngɛ be nun dan kpafuɛ’n yɛle kɛ ɔ fɛli i awlɛn su Ba’n mannin naan e ɲan e ti. (Zan 3:16) Zezi kusu kleli kɛ ɔ klo e dan kpa wie. Yɛle kɛ ɔ kplinnin su kɛ ɔ́ fɛ́ i nguan’n kpɔ́ e ti. (Zan 15:13) Like nga Zoova nin Zezi be yo mannin e lɛ’n, e su kwlá tanninmɛn i kalɛ le. Sanngɛ e kwla kle be kɛ e si ye. Yɛle kɛ aliɛ ba kwlaa nun’n, maan e yo like ng’ɔ jɔ be klun’n. (Kol. 3:15) Asa ekun’n, maan e tran e Wla Kpɛnlɛ aɲia’n i bo. I liɛ’n, é bú klolɛ nga be klo e’n i akunndan yɛ é klé be kɛ e klo be wie.
15. ?Ngue ti yɛ be nga be kpali be sieli be ngunmin’n nin bua’m be wie mun be bu e ti kpɔlɛ tɛ’n i like dan-ɔn?
15 E bu e ti kpɔlɛ tɛ’n i like dan. (Mat. 20:28) Be nga be kpali be sieli be ngunmin’n be bu e ti kpɔlɛ tɛ’n i like dan afin i ti yɛ be kwla ɲan like nga be wla o su’n niɔn. Kɛ mɔ be lafi Zezi i tɛ’n su ti’n, Zoova bu be sran kpa yɛ ɔ flɛ be kɛ i mma mun. (Rɔm. 5:1; 8:15-17, 23) Bua’m be wie mun be kusu be bu e ti kpɔlɛ tɛ’n i like dan wie. Kɛ mɔ be lafi Zezi i tɛ’n su ti’n, be ti sanwun Ɲanmiɛn ɲrun, be kwla su i kpa kpɛkun be lafi su kɛ bé fín “ɲrɛnnɛn dan’n” nun bé fíte. (Ngl. 7:13-15) Like kun mɔ be bue nɲɔn’n be yo fa kle kɛ be bu e ti kpɔlɛ tɛ’n i like dan’n yɛle kɛ afuɛ nuan kwlaa nun’n, be tran e Wla Kpɛnlɛ aɲia’n i bo.
16. ?Like uflɛ nga ti yɛ e tran e Wla Kpɛnlɛ aɲia’n i bo’n yɛle benin?
16 Like uflɛ nga ti yɛ e tran e Wla Kpɛnlɛ aɲia’n i bo’n yɛle kɛ e waan é klé kɛ e ɲin yi Zezi. Kɛ Zezi kpɛ́ e Wla Kpɛnlɛ aɲia’n ndɛ ng’ɔ kannin’n, sɛ é trán asiɛ’n su wa-o annzɛ é kɔ́ ɲanmiɛn su-o, ɔ fata kɛ e kwlaa e nanti su. Ɔ seli kɛ: “An yo i kɛ nga sa titi naan amun wla kpɛn min su.”—1 Kor. 11:23, 24.
E KWLAKWLA E ƝAN E WLA KPƐNLƐ AƝIA’N I SU YE
17. ?Kɛ e yo e Wla Kpɛnlɛ aɲia’n i su ye benin yɛ e ɲɛn i-ɔ?
17 E nin Zoova e afiɛn mantan. (Zak. 4:8) Kɛ nga e fa wunnin i sa’n, kɛ é yó e Wla Kpɛnlɛ aɲia’n e bu like nga Zoova waan ɔ́ fá mán e’n ɔ nin klolɛ m’ɔ klo e’n be akunndan. (Zer. 29:11; 1 Zan 4:8-10) Kɛ e bu ninnge sɔ’m be akunndan’n, e klo Zoova tankaan kpa kpɛkun e nin i e afiɛn mantan kpa.—Rɔm. 8:38, 39.
18. ?Kɛ e fa e ɲin e sie i ajalɛ kpa nga Zezi kle e’n su’n, ngue yɛ e kunndɛ kɛ é yó-ɔ?
18 E kunndɛ kɛ é nían Zezi i ajalɛ kpa’n su. (1 Piɛ. 2:21) Kɛ e Wla Kpɛnlɛ aɲia’n i cɛn’n wá jú’n, e kanngan Biblu’n nun ndɛ mma wie’m be nun. Ndɛ mma sɔ’m be fa e ɲin sie i ninnge nga Zezi yoli be i lemɔcuɛ kasiɛn nun’n, ɔ nin i wie’n nin i cɛnlɛ’n be su. Kpɛkun kɛ é yó e Wla Kpɛnlɛ aɲia’n, nzra nun ijɔlɛ’n kpɛn e wla kɛ Zezi klo e. (Efɛ. 5:2; 1 Zan 3:16) Kɛ e fa e ɲin e sie i ajalɛ kpa nga Zezi kle e’n su’n, e kunndɛ kɛ ‘é nánti kɛ i sa wie.’—1 Zan 2:6.
19. ?É yó sɛ naan Ɲanmiɛn w’a klo e titi?
19 E kunndɛ kpa kɛ é yó naan Ɲanmiɛn klo e titi. (Zid. 20, 21) Sɛ e kunndɛ kɛ Ɲanmiɛn klo e titi’n, ɔ fata kɛ e ɲin yi i titi, e yo naan i dunman’n yo sanwun, yɛ e yo maan i klun jɔ e wun. (Nya. 27:11; Mat. 6:9; 1 Zan 5:3) Kɛ e tran e Wla Kpɛnlɛ aɲia’n i bo’n, ndɛ nga e ti i lɔ’n yo maan e fua kpa kɛ aliɛ ba kwlaa nun’n é yó Zoova i klun sa’n. Kɛ e yo sɔ’n, ɔ ti kɛ e su se Zoova kɛ ‘e kunndɛ kɛ é yó naan ɔ klo e titi’ sa.
20. ?Ngue ti yɛ ɔ fata kɛ e tran e Wla Kpɛnlɛ aɲia’n i bo-ɔ?
20 Sɛ e lafi su kɛ é kɔ́ ɲanmiɛn su-o, annzɛ é ká asiɛ’n su wa-o, ɔ fata kɛ e kwlakwla e tran e Wla Kpɛnlɛ aɲia’n i bo. Aɲia sɔ’n i bo’n e wla kpɛn Zezi Klisi mɔ e klo i kpa’n i wie’n su. Sanngɛ ng’ɔ ti cinnjin kpa’n yɛle kɛ e wla kpɛn like nga Zoova yoli fa kle kɛ ɔ klo e’n i su. Yɛle kɛ ɔ fɛli i Wa’n fa kpɔli e ti. Afuɛ 2022 nga nun’n é wá yó e Wla Kpɛnlɛ aɲia’n Ya cɛn m’ɔ ti Avrili i le 15 su’n i nnɔsua nun. Kɛ mɔ e klo Zoova nin i Wa’n ti’n maan e yo like kwlaa nga e kwla yo naan y’a tran aɲia cinnjin sɔ’n i bo’n.
JUE 16 Zoova i Wa’n ti’n e mɛnmɛn i
^ Afuɛ nuan kwlakwla’n, be nga be lafi su kɛ bé kɔ́ ɲanmiɛn su’n nin be nga bé trán asiɛ’n su wa’n be yo e Wla Kpɛnlɛ aɲia’n. Like suanlɛ nga nun’n, é wá kán sa nga ti yɛ e yo aɲia sɔ’n ɔ nin i su ye nga e ɲɛn i’n, be ndɛ.
^ Sɛ a kunndɛ kɛ á sí aenguɛ uflɛ’n nin Famiɛn dilɛ aenguɛ’n be su ndɛ wie mun ekun’n, kanngan like suanlɛ ng’ɔ suan “Amún wá yó ‘min nyrun jranfuɛ’m be nvle’” i nun. Ɔ o afuɛ 2014, Ɔktɔblu 1, Sasafuɛ Tranwlɛ’n i bue 18-20 nun.
^ Sɛ a kunndɛ kɛ á sí waka bue nɲɔn nga Ezekiɛl ndɛ tre 37 kan be ndɛ’n be su ndɛ’n nun kpa ekun’n, kanngan fluwa Le culte pur de Jéhovah enfin rétabli! i bue 130-135, i ndɛ kpɔlɛ 3-17 nun.
