BE FLƐ aniaan bla kun kɛ Liza. * Ɔ kannin like klikli nga ti yɛ ɔ kunndɛli kɛ ɔ́ sú Zoova’n i ndɛ seli kɛ: “Klun ufue nga aniaan’m be yili i nglo min lika’n yɛ ɔ ukali min kpa-ɔ.” I kunngba’n yɛle aniaan bla kun m’ɔ suan Anin’n i liɛ’n. Ɔ seli kɛ: “Be klun ufue’n ukali min kpa trali ndɛ nga be kannin’n.” Aniaan’m be klun ufue’n ukali be kpa naan b’a su Zoova.

?Wafa sɛ yɛ e kwla yi e klun ufue’n i nglo e wiengu’m be lika-ɔ? É wá kán wafa nga e kwla yo sɔ’n be nun nɲɔn be ndɛ. Be yɛle e ijɔlɛ’n nun nin e ayeliɛ’n nun. Kpɛkun é wá kán be ng’ɔ fata kɛ e yi i nglo be lika’n be ndɛ wie.

Nyanndra Mun ndɛ tre 31 kan bla kpa kun i ndɛ. Biblu’n se kɛ “klun ufue yolɛ i mmla’n” wo i nuan. (Nya. 31:26, NWT) Kɛ mɔ “mmla” sɔ’n wo i nuan ti’n, ndɛ ng’ɔ fin i nuan fite’n ti kpa yɛ ɔ ijɔ wɛtɛɛ su. Ɔ fata kɛ “mmla” sɔ’n tran siɛ’m be nuan wie. Siɛ nin niɛn’m be si kɛ sɛ be kan ndɛ tɛtɛ kle be mma mun’n, ɔ kwla kle be mma’m be yalɛ. Kpɛkun be su faman ndɛ nga be kan’n su kun. I sɔ’n ti’n sɛ be kunndɛ kɛ ba’m be ɲin yi be’n, ɔ fata kɛ be kan ndɛ amanniɛn su kle be.

?Kannzɛ bɔbɔ e leman ba’n, ngue yɛ e kwla yo naan y’a kan ndɛ amanniɛn su-ɔ? Nyanndra Mun 31:26 kan like nga e kwla yo’n i ndɛ se kɛ: “Kɛ ɔ uke i nuan’n, ngwlɛlɛ ndɛ yɛ ɔ fin lɔ fite-ɔ.” (NWT) Ɔ maan kwlaa naan y’a kan ndɛ’n, maan e bu ndɛ nga é kán’n nin wafa nga é kán’n be sin kpa. Sɛ sran kan ndɛ ya su kle e’n, maan e usa e wun kɛ: ‘?Ndɛ nga n má kán’n ɔ́ yó i ya trá su annzɛ ɔ́ yó maan i ya’n gúa ase?’ (Nya. 15:1) Maan e bu ndɛ sin ka naan y’a kan.

Biblu’n se kɛ: “Sran ng’ɔ́ kán ndɛ-ɔ ɔ bumɛn i sin’n, i nuan nun ndɛ’n ɔ yra fiaan kɛ kue yɛ b’a fa wɔ sran sa.” (Nya. 12:18) Sɛ e wun i wlɛ kɛ ndɛ nga e kan’n nin wafa nga e kan ndɛ’n be kwla lo e wiengu’m be ngasi’n, é bú ndɛ sin ka naan y’a kan. Sɛ e nian “klun ufue yolɛ i mmla’n” su e nanti’n, e su kanman ndɛ tɛtɛ kleman sran. (Efɛ. 4:31, 32) Sanngɛ é kán ndɛ amanniɛn su. I lɛ nun’n Zoova kle e ajalɛ kpa. Kɛ i sufuɛ Eli i wla boli i wun’n, ɔ guɛli i awlɛn su nzue. Anzi ng’ɔ sunmɛnnin i’n kannin ndɛ wɛtɛɛ su kleli Eli. (1 Fam. 19:12) Sɛ e waan é yó klun ufuefuɛ’n, ɔ fata kɛ e kan ndɛ amanniɛn su. Sanngɛ ɔ fata kɛ e yi i nglo e ayeliɛ’n nun wie. ?Wafa sɛ?

Sɛ e nian Zoova i ajalɛ’n su’n, e su kanman ndɛ amanniɛn su ngunmin. Sanngɛ é yó e wiengu’m be ye wie. (Efɛ. 4:32; 5:1, 2) Liza mɔ e kɛnnin i ndɛ’n, ɔ kannin wafa nga aniaan’m be yili be klun ufue’n i nglo’n i ndɛ seli kɛ: “Sa wie ti’n, ɔ fata kɛ e tu e sua’n nun e ko tran lika uflɛ. Ɔ fuli e nun. Sanngɛ aniaan nɲɔn nin be yi’m be fali kɔnnze be ko ukali e naan y’a wla e trɔ mun. Kɛ ɔ́ yó sɔ’n, nn n nin-a boman Biblu’n nun like suanlɛ bo  bɔbɔ.” Aniaan’m be klun ufue’n ti’n, Liza kunndɛli kɛ ɔ́ súan Biblu’n nun like.

Anin mɔ e kɛnnin i ndɛ’n kusu kannin wafa nga aniaan’m be klun ufue’n ukɛli i’n i ndɛ. Ɔ seli kɛ: “Sran’m be ayeliɛ’n ti’n, n lafiman sran su. Kɛ Zoova i Lalofuɛ’m be toli min’n, i klikli’n nun’n n lafiman be su. N usali min wun kɛ: ‘?Ngue ti yɛ be uka min-ɔn?’ Sanngɛ aniaan bla ng’ɔ kleli min like’n i klun ufue’n ti’n, n ma lafili i su.” ?Wafa sɛ yɛ i bo’n guali-ɔ? I bɔbɔ tɛli su kɛ: “N ma fali min ɲin sieli i like ng’ɔ kle min’n su kpa ekun.”

E sie i nzɔliɛ kɛ aniaan’m be klun ufue’n ɲannin ta Liza nin Anin be su kpa. Ɔ maan be kunndɛli kɛ bé sú Zoova wie. Aniaan’m be klun ufue’n ti’n, be wa lafili Zoova nin i sufuɛ’m be su.

Sran wie’m be finwlɛ’n ti’n, be ijɔman tɛtɛ yɛ be klo srilɛ. I yo, sɛ wafa nga be tali e’n annzɛ e finwlɛ’n ti’n e ɲin yi sran’n ɔ ti kpa. Sanngɛ i sɔ’n ngunmin kwlá ukaman e naan y’a yi klun ufue yolɛ kpafuɛ’n  i nglo.—An nian Sa Nga Be Yoli’n 28:2 nun.

Klun ufue yolɛ kpafuɛ’n wo nzuɛn nga Ɲanmiɛn wawɛ’n maan sran yi be nglo’n be nun wie. (Gal. 5:22, 23) Ɔ maan sɛ e waan é yí klun ufue yolɛ kpafuɛ’n i nglo’n, ɔ fata kɛ e lo e wun e man Ɲanmiɛn wawɛ’n naan ɔ sie e. Sɛ e yo sɔ’n, é kwlá sɔ́nnzɔn Zoova nin Zezi. E mɔ e ti Klisifuɛ’n, ɔ fata kɛ sran’m be ndɛ lo e. I lɛ nun’n, ɔ fata kɛ e klo sran mun ɔ nin e Ɲanmiɛn Zoova. Sɛ e yo sɔ’n, klun ufue yolɛ kpafuɛ m’ɔ fin sran awlɛn nun mɔ Ɲanmiɛn i klun jɔ su’n, é yí i nglo.

Be nga be yo e ye’n nin be nga e si be’n, be ye yolɛ’n timan kekle. (2 Sam. 2:6) I wie yɛle kɛ e kwla la be ase. (Kol. 3:15) ?Yɛ sɛ e bu i kɛ sran kun nin ye yolɛ fataman nin? ?Ngue yɛ ɔ fata kɛ e yo-ɔ?

Maan e bu ndɛ nga i akunndan: Be nga be nin ye yolɛ fataman bɔbɔ’n, Zoova yo be ye. Asa’n, Biblu’n m’ɔ ti i nuan Ndɛ’n kle kɛ ɔ ti cinnjin kɛ e yi nzuɛn sɔ’n i nglo. I wie yɛle kɛ i bue nga be klɛli i Glɛki nun’n i nun’n, be kannin ‘sran ye yolɛ’n’ i ndɛ kpɛ kaka kpa. ?Wafa sɛ yɛ Ɲanmiɛn yi i aklunye’n i nglo e lika-ɔ?

Maan e bu sran miliɔn kpanngban nga Zoova yi i aklunye’n i nglo be lika’n be akunndan kan e nian. Ɔ man be like nga be miɛn i wun naan b’a ka nguan nun’n. (Mat. 5:45) Ka naan y’a si Zoova bɔbɔ’n, ɔ yili i aklunye’n i nglo e lika. (Efɛ. 2:4, 5, 8) I wie yɛle kɛ ɔ fɛli i Wa kunngba cɛ’n mannin naan e ɲan e ti. Akoto Pɔlu seli kɛ e ti kpɔlɛ tɛ sɔ’n kle kɛ “Ɲanmiɛn i aklunye’n ti dan sakpa.” (Efɛ. 1:7) Asa ekun’n, kannzɛ bɔbɔ e fɔn Zoova i wun kpɛ sunman’n, sanngɛ ɔ kle e atin titi. Like ng’ɔ kle e’n ti kɛ “nglɛmun bɔlɛ sa.” (Mml. 32:2) Nanwlɛ, ye ng’ɔ yo e’n e su kwlá yiman e mɛnmɛn i le. I kpa bɔbɔ’n, sɛ ɔ ti kɛ Zoova w’a yimɛn i aklunye’n i nglo e lika sa’n, nn e su ɲanman like e faman e wla e guaman su le.—An nian 1 Piɛli 1:13 nun.

Nanwlɛ, Zoova i aklunye’n yo ɲɛnmɛn yɛ ɔ wla fanngan. I sɔ’n ti’n, maan e yi e aklunye’n i nglo sran’m be kwlaa be lika wie. Nán maan e kpa sran nun. Sanngɛ kɛ Zoova sa’n, maan cɛn kwlakwla’n e yo sran’m be ye. (1 Tes. 5:15) Sɛ e yo sran ye titi’n, é yó kɛ sin dan wie mɔ b’a trɔ i ayrɛ blɛ’n nun sa. E ti’n, e osufuɛ nin e niaan Klisifuɛ mun nin e wiengu junman difuɛ mun nin e suklu lɔ janvuɛ mun ɔ nin e mantanfuɛ’m be wla gúa ase.

Sɛ e kan ndɛ amanniɛn su’n yɛ sɛ e yo e wiengu’m be ye’n, e osufuɛ mun nin aniaan’m bé ɲán su ye. Sɛ aniaan kun kunndɛ kɛ be ukɛ i i awlo nun junman’m be dilɛ nun annzɛ be ko di gua mɛn i’n, maan e ukɛ i. Asa’n, sɛ e kɔ jasin fɛ bolɛ naan e wun kɛ sran kun sa w’a mian’n maan e ukɛ i wie.

Kɛ Zoova sa’n, maan e ijɔlɛ nun-o, e ayeliɛ nun-o, e nian “klun ufue yolɛ i mmla’n” su e nanti.