LIKE SUANLƐ 24
Zoova i sa yaci cɛlɛ’n leman wunsu
“Min Min, ɔ klun ti kpa, a yaci sran wun sa cɛ i. Be nga be kpan flɛ wɔ’n, a yi wɔ aklunye’n i nglo kle be.”—JUE. 86:5.
JUE 42 Ɲanmiɛn i sufuɛ’n i srɛlɛ’n
I SU FITILƐ *
1. ?Akunndanfuɛ’n 7:20 nun’n, ndɛ benin yɛ Famiɛn Salomɔn kannin-ɔn?
FAMIƐN Salomɔn seli kɛ: “Sran kun b’ɔ yo sa kpa lele guɛ i ti nin i bo’n, b’ɔ yoman sa tɛ kaan sa le’n, i sɔ’n nunman nyanmiɛn’n bo wa.” (Aku. 7:20) Ndɛ sɔ’n ti nanwlɛ. Afin e kwlaa e fɔn. (1 Zan 1:8) Yɛ kɛ e fɔn’n, e kunndɛ kɛ Ɲanmiɛn annzɛ e wiengu’m be yaci e wun sa’n cɛ e.
2. ?Kɛ e janvuɛ kpa kun yaci e wun sa’n cɛ e’n, i sɔ’n yo e sɛ?
2 Atrɛkpa’n, ɔ wla kpɛn blɛ kun mɔ a loli ɔ janvuɛ kun i ngasi’n i su. Kɛ mɔ a kunndɛman kɛ amun janvuɛ’n saci’n ti’n, a kpɛtɛli i. ?Kɛ ɔ janvuɛ’n yacili ɔ wun sa’n cɛli wɔ’n, i sɔ’n yoli wɔ sɛ? Ɔ wla guali ase. ?Nɛ́n i-ɔ? I kpa bɔbɔ’n, ɔ klun jɔli kpa.
3. ?Kosan benin mun yɛ é wá tɛ́ be su like suanlɛ nga nun-ɔn?
3 E kunndɛ kɛ e nin Zoova e janvuɛ’n tra kpa. Sanngɛ ɔ ju wie’n, e kan ndɛ wie annzɛ e yo like wie m’ɔ lo i ngasi-ɔ. ?Ngue yɛ ɔ kle kɛ Zoova kunndɛ kpa kɛ ɔ́ yáci e wun sa’n cɛ́ e-ɔ? ?Ngue ti yɛ e kwla se kɛ Zoova i sa yaci cɛlɛ’n leman wunsu-ɔ? ?Yɛ wan mun yɛ Zoova yaci be wun sa’n cɛ be-ɔ?
ZOOVA KUNNDƐ KƐ Ɔ́ YÁCI E WUN SA MUN CƐ́ E
4. ?Ngue yɛ ɔ kle kɛ Zoova kunndɛ kɛ ɔ́ yáci e wun sa’n cɛ́ e-ɔ?
4 Ɲanmiɛn Ndɛ’n kle kɛ Zoova kunndɛ kɛ ɔ́ yáci e wun sa mun cɛ́ e. Kɛ Zoova yili i wun nglo kleli Moizi Sinai Oka’n su lɔ’n, ɔ sinnin anzi kun lika seli i kɛ: “N ti Anannganman. N ti Nyanmiɛn aklunyefuɛ, nin aunnvuɛ sifuɛ, n faman ya ndɛndɛ. Min aklunye’n ti dan, yɛ sa nga n kan kɛ ń yó be’n, ń yó be. N yi min aklunye’n i nglo sran’m be lika lele n fa wlu be anunman’m be anunman liɛ’m be nun lele ju be akpasua akpi su. N yaci be sa tɛ mun, nin be nyin kekle, ɔ nin be fɔnlɛ mun n cɛ be.” (Tul. 34:6, 7) Zoova ti Ɲanmiɛn kun m’ɔ ti klun ufuefuɛ-ɔ yɛ ɔ si aunnvɔɛ. Ɔ kunndɛ kɛ ɔ́ yáci be nga be sa tɛ’n yo be nsisɔ’n be wun sa’n cɛ́ be.—Nee. 9:17; Jue. 86:15.
Zoova si sa kwlaa nga be juli e su laa’n. (An nian ndɛ kpɔlɛ 5 nun.)
5. ?Kɛ nga Jue Mun 103:13, 14 fa kan’n sa’n, kɛ mɔ Zoova si e kpa’n ti’n, ngue yɛ ɔ yo-ɔ?
5 Kɛ mɔ Zoova ti e Yifuɛ’n ti’n, ɔ si e kpa. Ɔ si be kwlaa nga be o asiɛ’n su’n be tinuntinun be kpa. (Jue. 139:15-17) Ɔ maan ɔ si e tinuntinun e fɔnlɛ’m be kwlaa kpan. Ɔ si kɛ Adan nin Ɛvu be sa tɛ’n ti yɛ andɛ’n e fɔn-ɔn. I kpa bɔbɔ’n, ɔ si sa nga be juli e su laa mɔ i ti yɛ e yo ninnge wie mun’n. ?Kɛ mɔ Zoova si e kpa’n ti’n, ngue yɛ ɔ yo-ɔ? Kɛ m’ɔ si e kpa’n ti’n, ɔ si e aunnvɔɛ.—Jue. 78:39, an kanngan Jue Mun 103:13, 14 nun.
6. ?Ngue yɛ Zoova yoli m’ɔ kle kɛ ɔ kunndɛ kɛ ɔ́ yáci e sa tɛ mun cɛ́ e-ɔ?
6 Zoova kleli kɛ ɔ kunndɛ kɛ ɔ́ yáci e sa tɛ mun cɛ́ e. Ɔ si kɛ Adan dunman nun ti’n, e kwlaa e kacili sa tɛ’n nin wie’n be kanga. (Rɔm. 5:12) Ɔ maan e bɔbɔ e kwlá deman e wun yɛ e kwlá deman sran fi kusu. (Jue. 49:7-9) Sanngɛ e Ɲanmiɛn m’ɔ klo sran’n yoli like kun naan y’a kwla ɲan e ti. ?Ngue yɛ ɔ yoli-ɔ? Kɛ nga Zan 3:16 fa kan’n sa’n, Zoova sunmɛnnin i Wa kunngba cɛ’n asiɛ’n su naan ɔ wa wu e ti. (Mat. 20:28; Rɔm. 5:19) E dunman nun ti’n, Zezi wuli ɲrɛnnɛn wie naan sran kwlaa ng’ɔ lafi i su’n ɔ ɲɛn i ti. (Ebr. 2:9) Nanwlɛ, kɛ Zoova wunnin kɛ i awlɛn su Ba’n su wu ɲrɛnnɛn wie’n, ɔ yoli i ya dan. Sɛ ɔ ti kɛ Zoova kunndɛman kɛ ɔ́ yáci e wun sa mun cɛ́ e’n, nn ɔ su kplinman su kɛ be kun i Wa’n.
7. ?Sran benin wie mun yɛ Zoova yacili be wun sa’n cɛli be-ɔ?
7 Biblu’n kan sran kpanngban mɔ Zoova yacili be wun sa’n cɛli be’n, be ndɛ. (Efɛ. 4:32) ?Amun si sran sɔ’m be nun wie mun? Atrɛkpa’n, amun bu Famiɛn Manase i akunndan. Famiɛn klunwifuɛ sɔ’n fɔnnin Zoova i wun dan. Ɔ suli sran kaka be bo naan be sɔ amuin. Ɔ kunnin i bɔbɔ i klun ba mun fa yili tɛ mɛnnin i amuin mun. I kpa bɔbɔ’n, ɔ yoli amuin kun kpɛkun ɔ fa ko sieli i Zoova bɔbɔ i sua’n nun. Biblu’n se kɛ: “Ɔ yoli sa sunman bɔ Anannganman kloman be’n, ɔ fa be fɔkɔli i anwlɛn.” (2 Nyo. 33:2-7) Ɔ nin i sɔ ngba’n, kɛ Manase kacili i sa’n, Zoova yacili i wun sa’n kwlaa cɛli i. I kpa bɔbɔ’n, ɔ yoli maan ɔ kacili famiɛn ekun. (2 Nyo. 33:12, 13) Kɔlɛ’n, amun bu Famiɛn Davidi i akunndan wie. I kusu fɔnnin Zoova i wun dan kpa wie. I wie yɛle kɛ ɔ kunndɛli sran yi kpɛkun ɔ kunnin sran. Sanngɛ kɛ ɔ dili i sa tɛ’n i nanwlɛ m’ɔ kacili i sa’n, Zoova yaci cɛli i. (2 Sam. 12:9, 10, 13, 14) I kwlaa sɔ’n kle kɛ Zoova kunndɛ kpa kɛ ɔ́ yáci e wun sa mun cɛ́ e. Yɛ kɛ nga é wá wún i’n sa’n, be kwlá fɛmɛn i sa yaci cɛlɛ’n be sunnzunman klɔ sran’m be liɛ’n kaan sa.
ZOOVA I SA YACI CƐLƐ’N LEMAN WUNSU
8. ?Ngue yɛ ɔ kle kɛ Zoova yɛ ɔ ti Jɔlɛ difuɛ kpafuɛ’n niɔn?
8 Zoova ti ‘asiɛ’n sufuɛ’m be kwlaa be Jɔlɛ difuɛ.’ (Bob. 18:25) Kɛ ɔ ko yo naan jɔlɛ difuɛ kun w’a di i junman’n i kpa’n, ɔ fata kɛ ɔ si mmla’n kpa. Zoova kusu si mmla’n i kpa. Afin i yɛ ɔ kpɛ mmla man e-ɔ. (Eza. 33:22) Sran fi siman sa kpa’n nin sa tɛ’n be ngbaciɛ’n i kpa kɛ Zoova sa. ?Ngue ekun yɛ ɔ fata kɛ jɔlɛ difuɛ kun si i-ɔ? Ɔ fata kɛ ɔ si ndɛ kun i ngbɛsungbɛsu’n kwlaa ka naan w’a di jɔlɛ. Zoova kusu si sa kwlaa kpan. I kwlaa sɔ’n ti’n, i yɛ ɔ ti Jɔlɛ difuɛ kpafuɛ’n niɔn.
9. ?Ngue yɛ Zoova si i mɔ i ti’n ɔ kwla yaci sran kun i wun sa’n cɛ i-ɔ?
9 Zoova timan kɛ klɔ sran’m be jɔlɛ difuɛ mun sa. Afin i liɛ’n kɛ sa kun tɔ’n, ɔ si i ngbɛsungbɛsu’n kwlaa. (Bob. 18:20, 21; Jue. 90:8) Like nga sran’m be kwlá wunmɛn i’n, i liɛ’n ɔ wun i. Ɔ si like ng’ɔ su sran kun bo m’ɔ yo sa kun’n. Like sɔ’n kwla yo wafa nga sran’n fa ti’n, annzɛ wafa nga be tɛli i’n, annzɛ lika ng’ɔ tran’n annzɛ akunndan ng’ɔ bu’n. Asa’n, Zoova si like ng’ɔ o e awlɛn nun’n. Ɔ si like ng’ɔ su e bo mɔ e yo ninnge wie mun’n, ɔ nin e klun akunndan’n kwlaa. Like fi timan fiawa i ɲrun. (Ebr. 4:13) Kɛ mɔ Zoova si sa kwlaa nun’n, i ti yɛ ɔ yaci e wun sa’n cɛ e-ɔ.
Zoova yo sa i nuan su, yɛ ɔ kpaman sran nun. Be kwlá wlɛmɛn i sa bo naan ɔ di ndɛ kwlɛ. (An nian ndɛ kpɔlɛ 10 nun.)
10. ?Ngue ti yɛ e kwla lafi su kɛ jɔlɛ kwlaa nga Zoova di’n ɔ ti su-ɔ? (Mmla’n 32:4)
10 Jɔlɛ kwlaa nga Zoova di’n ɔ ti su. Afin ɔ kpaman sran nun. Kpɛkun ɔ jranman sran’m be sran waka’n, annzɛ be sika’n annzɛ be ɲrun mɔ be le i’n annzɛ ninnge nga be si be yo’n be su naan w’a di be jɔlɛ. (1 Sam. 16:7; Zak. 2:1-4) Sran fi kwlá mianman Zoova kɛ ɔ yo like wie yɛ sran fi kwlá wlɛmɛn i sa bo naan ɔ di ndɛ kwlɛ. (2 Nyo. 19:7) Zoova diman jɔlɛ ya su le. Asa’n, sɛ ɔ klo sran kun-o annzɛ ɔ klomɛn i-o, nɛ́n i sɔ’n su yɛ ɔ jran di i jɔlɛ-ɔ. (Tul. 34:7) Kɛ mɔ Zoova si sa kwlaa kpɛkun ɔ si ngwlɛlɛ dan’n, i ti yɛ ɔ ti Jɔlɛ difuɛ kun m’ɔ leman wunsu’n niɔn.—An kanngan Mmla’n 32:4 nun.
11. ?Ngue yɛ ɔ kle kɛ Zoova i sa yaci cɛlɛ’n leman wunsu-ɔ?
11 Be nga be klɛli Biblu’n i bue nga be klɛli i Ebre nun’n, be wunnin i wlɛ kɛ Zoova i sa yaci cɛlɛ’n leman wunsu. Kɛ bé klɛ́ Biblu’n i bue sɔ’n, ɔ ju wie’n be bo Ebre’n nun ndɛ mma kun su. Fluwa kun seli kɛ: “Be fa ndɛ mma sɔ’n be kan Ɲanmiɛn i sa yaci cɛlɛ’n i ngunmin i ndɛ. Be fa kanman klɔ sran’m be sa yaci cɛlɛ’n m’ɔ juman Ɲanmiɛn liɛ’n nun kaan sa’n i ndɛ le.” Zoova kunngba cɛ yɛ ɔ kwla yaci sran kun i wun sa’n cɛ i mlɔnmlɔn-ɔn. ?Kɛ Zoova yaci e wun sa’n cɛ e’n, i su ye benin yɛ e ɲɛn i-ɔ?
12-13. (1) ?Kɛ Zoova yaci sran kun i wun sa’n cɛ i’n, i su ye benin yɛ ɔ ɲɛn i-ɔ? (2) ?Kɛ Ɲanmiɛn yaci sran kun i wun sa’n cɛ i’n, ɔ bo su di jɔlɛ ekun?
12 Kɛ sran kun wun i wlɛ kɛ Zoova yacili i wun sa’n cɛli i’n, ‘i wun jɔ i fɔuun.’ I wla gua ase yɛ i akunndan’n bumɛn i fɔ kun. ‘Zoova kunngba’ cɛ yɛ kɛ ɔ yaci sran kun i wun sa’n cɛ i’n, sran’n i wun yo i sɔ-ɔ. (Yol. 3:19) Kɛ Zoova yaci sran kun i wun sa’n cɛ i’n, ɔ yo maan ɔ nin i be afiɛn sɛ kpa kɛ w’a fɔnmɛn i wun le sa.
13 Kɛ Zoova ko yaci sran kun i wun sa’n ko cɛ i’n, ɔ boman su diman jɔlɛ kun. Yɛ ɔ jranman sa sɔ’n su tumɛn i fɔ kun. (Eza. 43:25; Zer. 31:34) Zoova yo maan e nin e sa tɛ mun e afiɛn’n ti nun kɛ “wia afiliɛ’n nin wia atɔliɛ’n be afiɛn’n ti nun ju’n sa.” * (Jue. 103:12) Kɛ e bu Zoova i sa yaci cɛlɛ’n i akunndan’n, e kunndɛ kɛ é lɛ́ i ase. Asa’n, e ɲin yi i kpa tra laa’n. (Jue. 130:4) ?Sanngɛ wan mun yɛ Zoova yaci be wun sa’n cɛ be-ɔ?
?WAN MUN YƐ ZOOVA YACI BE WUN SA’N CƐ BE-Ɔ?
14. ?Zoova i sa yaci cɛlɛ’n i su like benin yɛ e wunnin i-ɔ?
14 Kɛ nga e fa wunnin i sa’n, Zoova nianman kɛ sran kun i sa tɛ’n ti kaan annzɛ ɔ ti dan naan w’a yaci w’a cɛ i. Asa’n, e wunnin i kɛ, kɛ mɔ Zoova ti e Yifuɛ nin e Jɔlɛ difuɛ kpɛkun i yɛ ɔ kpɛ mmla man e’n ti’n, sɛ ɔ fata kɛ ɔ yaci e wun sa’n cɛ e’n i yɛ ɔ si i-ɔ. ?Kwlaa naan Zoova w’a yaci sran kun i wun sa’n w’a cɛ i’n, ngue su yɛ ɔ fɛ i ɲin sie-ɔ?
15. ?Kɛ nga Liki 12:47, 48 fa kan’n sa’n, like kun mɔ Zoova fɛ i ɲin sie su’n yɛle benin?
15 Like kun mɔ Zoova fɛ i ɲin sie su’n yɛle kɛ ɔ nian sɛ sran ng’ɔ yoli sa tɛ’n si kɛ like ng’ɔ su yo’n ɔ ti tɛ-o. Ndɛ nga Zezi kɛnnin i Liki 12:47, 48 nun’n, ɔ yi i sɔ liɛ’n i nglo. (An kanngan nun.) Sɛ sran kun yo sa tɛ wie kusu nn ɔ si jrɛiin kɛ i sɔ’n ló Zoova i ngasi’n naan ɔ yo’n, nn w’a yo sa tɛ dan. Ɔ cɛman naan Ɲanmiɛn w’a yacimɛn i wun sa’n w’a cɛmɛn i. (Mar. 3:29; Zan 9:41) Sanngɛ maan e di e wun nanwlɛ, ɔ ju wie’n e yo ninnge wie mɔ e bɔbɔ e si kɛ ɔ timan kpa-ɔ. ?I lɛ nun’n, Ɲanmiɛn kwla yaci cɛ e? Ɛɛn. Afin ɔ fɛ i ɲin sie i like uflɛ su.
Sɛ e sa tɛ’n yo e nsisɔ sakpa’n, e kwla lafi su kɛ Zoova yáci cɛ́ e. (An nian ndɛ kpɔlɛ 16-17 be nun.)
16. (1) ?Ngue yɛ ɔ kle kɛ sran kun i sa tɛ’n yo i nsisɔ-ɔ? (2) ?Ngue ti yɛ ɔ ti cinnjin kɛ e kle kɛ e sa tɛ’m be yo e nsisɔ-ɔ?
16 Like uflɛ mɔ Zoova fɛ i ɲin sie su’n yɛle kɛ ɔ nian sɛ sran ng’ɔ yoli sa’n i sa tɛ’n yo i nsisɔ sakpa-o. ?Kɛ sran kun i sa tɛ’n yo i nsisɔ’n, ngue yɛ ɔ yo-ɔ? Ɔ kaci i akunndan’n nin i nzuɛn’n. Kpɛkun sa kpa mɔ w’a yoman’n ti’n, ɔ yo i ya. Sran nga i sa tɛ’n yo i nsisɔ’n, sa ng’ɔ yoli’n yo i ya sɔ. Sanngɛ ng’ɔ yo i ya kpa ekun’n yɛle kɛ ɔ nin Ɲanmiɛn be afiɛn’n w’a saci. Nán e wla fi su kɛ Manase nin Davidi be yoli sa tɛtɛ sunman. Sanngɛ kɛ mɔ be sa tɛ’n yoli be nsisɔ sakpa’n ti’n, Zoova yaci cɛli be. (1 Fam. 14:8) Kɛ e yo sa tɛ’n, Zoova kunndɛ kɛ e yo ninnge wie mun e fa kle kɛ ɔ yo e nsisɔ kwlaa naan w’a yaci w’a cɛ e. Sɛ e yoli sa tɛ wie naan ɔ yo e ya’n, ɔ fataman kɛ e ka ngalɛ’n su. Ɔ fata kɛ e yo ninnge uflɛ wie mun ekun. * Siɛn’n, maan e kan like uflɛ mɔ Zoova fɛ i ɲin sie su’n i ndɛ.
17. (1) ?Kɛ be se kɛ sran kun kaci i sa’n, i bo’n yɛle benin? (2) ?Ngue ti yɛ i sɔ yolɛ’n ti cinnjin-ɔn? (Ezai 55:7)
17 Like uflɛ mɔ Zoova kunndɛ kɛ sran ng’ɔ yoli sa tɛ’n ɔ yo’n, yɛle kɛ ɔ kaci i sa. I bo’n yɛle kɛ ɔ yaci atin tɛ’n i su falɛ naan ɔ fa Zoova i atin liɛ’n su. (An kanngan Ezai 55:7 nun.) Ɔ fata kɛ sran’n kaci i akunndan’n naan ɔ yo Zoova i klun sa. (Rɔm. 12:2; Efɛ. 4:23) Ɔ fata kɛ ɔ miɛn i ɲin naan ɔ wlɛ i akunndan laa’n nin i nzuɛn laa’n be ase. (Kol. 3:7-10) Sɛ e lafi tɛ nga Klisi yili’n su’n, yɛ Zoova kwla yaci e wun sa’n cɛ e-ɔ. Sɛ ɔ wun kɛ e mian e ɲin kpa e kaci e sa’n, ɔ́ yó maan é ɲán tɛ sɔ’n i su ye.—1 Zan 1:7.
E KWLA LAFI SU KƐ ZOOVA YÁCI E WUN SA’N CƐ́ E
18. ?Zoova i sa yaci cɛlɛ’n i su ndɛ benin yɛ e kannin-ɔn?
18 Maan e bo ndɛ nga e kannin’n i kpɔlɛ kan. Nanwlɛ, Zoova i sa yaci cɛlɛ’n leman wunsu. ?Ngue ti yɛ e se sɔ-ɔ? I klikli’n yɛle kɛ ɔ kunndɛ kpa kɛ ɔ́ yáci e wun sa’n cɛ́ e. I nɲɔn su’n, ɔ si e lele kpe nun. Ɔ si wafa ng’ɔ yili e’n i kpa, yɛ sɛ e yo sa tɛ wie naan ɔ yo e nsisɔ sakpa’n ɔ si nun. Kpɛkun i nsan su’n yɛle kɛ kɛ Zoova yaci e wun sa’n cɛ e’n, ɔ nunnun i mlɔnmlɔn. Ɔ maan ɔ ti kɛ y’a yoman sa sɔ’n sa. I sɔ m’ɔ yo’n ti’n, e akunndan’n buman e fɔ yɛ e di aklunjɔɛ i sulɛ’n nun.
19. ?Kannzɛ e yo sa tɛ’n, ngue ti yɛ e kwla di aklunjɔɛ-ɔ?
19 Sɛ fɔ’n nin-a wieman e nun’n, e te yo sa tɛ. Sanngɛ ndɛ kun m’ɔ o e fluwa kun nun’n wla e fanngan kpa. Ɔ se kɛ: “Kɛ mɔ Zoova si aunnvɔɛ’n ti’n, i wla fiman su kɛ fɔ o i sufuɛ’m be nun. Ɔ maan sɛ be fɔn’n, ɔ nunman nun kɛ be akunndan’n bu be fɔ sa trilili. (Jue. 103:8-14; 130:3) Sɛ be mian be ɲin be fa Ɲanmiɛn i atin’n su’n, ɔ fata kɛ be klun jɔ. (Fp. 4:4-6; 1 Zan 3:19-22).” Nanwlɛ, ndɛ sɔ’n gua e awlɛn su nzue dan.
20. ?Ngue yɛ é wá kɛ́n i ndɛ like suanlɛ nga i sin liɛ’n nun-ɔn?
20 Kɛ e si kɛ sɛ e yo sa tɛ naan ɔ yo e nsisɔ sakpa’n, Zoova yáci cɛ́ e’n, i sɔ’n yo e fɛ dan. ?Yɛ e li? ?Wafa sɛ yɛ e kwla yaci sa cɛ kɛ Zoova sa-ɔ? ?Sa yaci cɛlɛ nun’n, ngue yɛ Zoova yo mɔ e kusu e yo wie-ɔ? ?Sanngɛ ngbaciɛ benin yɛ ɔ o e nin Zoova e afiɛn-ɔn? ?Ngue ti yɛ ɔ ti cinnjin kɛ e wun ngbaciɛ sɔ’n i wlɛ-ɔ? Like suanlɛ nga i sin liɛ’n nun’n, é wá tɛ́ kosan sɔ’m be su.
JUE 45 Min klun lɔ akunndan’n
^ Biblu’n kle kɛ Zoova kunndɛ kɛ ɔ́ yáci be nga be sa tɛ’n yo be nsisɔ’n be sa tɛ’n cɛ́ be. Sanngɛ ɔ ju wie’n e kwla bu i kɛ e nin i sɔ’n fataman. Like suanlɛ nga nun’n, é wá wún i kɛ sɛ e yo sa tɛ naan ɔ yo e nsisɔ sakpa’n, Ɲanmiɛn yáci cɛ́ e.
^ Amun nian fluwa An fa amun wun mantan Zoova i ndɛ tre 26, i ndɛ kpɔlɛ 9 nun.
^ NDƐ WIE’M BE NUN YIYILƐ: Sran nga i sa tɛ’n yo i nsisɔ’n ɔ kaci i akunndan’n. Asa’n i ayeliɛ laa’n, annzɛ sa ng’ɔ yoli’n, annzɛ like kpa mɔ w’a yoman’n ti’n i wla bo i wun. Sran nga i sa tɛ’n yo i nsisɔ sakpa’n, ɔ fa ajalɛ. Yɛle kɛ ɔ kaci i ayeliɛ’n.
