IZRAƐLIFUƐ’M be blɛ su’n, kɛ bé fúnndanfúnndan asiɛ’n naan bé lúa ninnge mun’n, yɛ be bo afuɛ’n i kalɛ bo-ɔ. E blɛ liɛ nga nun’n, blɛ sɔ’n tɔ Sɛptanblu annzɛ Ɔktɔblu anglo nun.

Laa nun’n, sran wie’m be nian anglo ba’n yɛ be ka anglo nin afuɛ mun-ɔn. (Anglo kun di cɛn ba 29 annzɛ 30.) Sanngɛ wie’m be nian wia’n yɛ be ka afuɛ mun-ɔn. Be nga be nian anglo ba’n be afuɛ nuan’n cɛman kɛ be nga be nian wia’n be liɛ’n sa. Ɔ maan be yo ninnge wie mun naan be nin be nga be nian wia’n be liɛ’n w’a sɛ. I wie yɛle kɛ be uka cɛn ba’m be su, annzɛ be fa anglo kun be uka su. Atrɛkpa’n ka naan afuɛ’n w’a bo i bo’n yɛ be yo sɔ-ɔ. I sɔ’n yo maan afuɛ’m be sɛ. Ɔ maan be si blɛ ng’ɔ fata kɛ be lua ninnge mun annzɛ be ti be’n.

Sanngɛ Moizi blɛ su’n, Ɲanmiɛn seli Izraɛlifuɛ’m be kɛ be bo afuɛ nuan’n i kalɛ bo Abibu annzɛ Nizan anglo’n nun. (Tul. 12:2; 13:4) Anglo sɔ’n nun’n be di ble kpɛlɛ cɛn’n nin cɛn uflɛ wie mun.—Tul. 23:15, 16.

Fluwa sifuɛ kun m’ɔ suan Emili Surɛɛ seli kɛ: “Blɛ ng’ɔ fata kɛ be fa anglo kun be uka afuɛ nuan’n su’n i wlɛ wunlɛ timan kekle. Nizan anglo’n nun’n, cɛn nga anglo ba’n ta kpa’n yɛ be di Delɛ Cɛn’n niɔn. (Nizan i le 14 su.) Titi’n, kɛ cɛn nga wia nun’n nin kɔnguɛ’n be tɛnndɛn’n sɛ’n ko sin’n, yɛ be di cɛn sɔ’n niɔn. Ɔ maan sɛ bé nían naan afuɛ kun nun’n be di Delɛ Cɛn’n kwlaa naan cɛn sɔ’n w’a ju’n, be uka afuɛ sɔ’n su anglo kun.”

Zoova i Lalofuɛ’m be niɛn i sɔ’n su naan b’a si cɛn ng’ɔ fata kɛ be di E Min’n i Nnɔsua nun Aliɛ’n. Cɛn sɔ’n tɔ Marsi annzɛ Avrili anglo’n nun. Kɛ be fa sunnzun Ebre’m be kananndrie’n, ɔ tɔ Nizan i le 14 su. Kɛ be ko si cɛn’n, be bo su kle aniaan mɔ be o mɛn wunmuan’n nun’n. *

?Izraɛlifuɛ’m be yo sɛ yɛ be si kɛ anglo kun su wa wie naan uflɛ su wa bo i bo-ɔ? Andɛ’n, i sɔ yolɛ’n timan kekle. Afin e kwla nian kananndrie nga be o fluwa su annzɛ e ajulisu mannzin’m be nun’n i nun. Sanngɛ laa nun’n, i sɔ yolɛ’n leman ba.

Nowe blɛ su’n anglo kwlaa di cɛn ba 30. (Bob. 7:11, 24; 8:3, 4) Sanngɛ i sin’n, yɛle kɛ Izraɛlifuɛ’m be blɛ su’n, nán anglo ngba yɛ ɔ di cɛn ba ablasan-ɔn. Afin be liɛ’n, kɛ anglo ba’n fi mɔ be wun i’n yɛ be bo anglo’n i kalɛ bo-ɔ. Ɔ maan ɔ kwla di cɛn ba 29 annzɛ 30.

Cɛn kun’n, Davidi nin Zonatan be seli kɛ: “Ainman ti anglo le kun.” (1 Sam. 20:5, 18) I sɔ’n kle kɛ be blɛ su’n, be si cɛn nga anglo kun wá dí’n ka naan anglo’n bɔbɔ w’a bo i bo. ?Izraɛlifuɛ’m be yo sɛ yɛ be si blɛ nga anglo kun bo i bo’n niɔn? Zifu’m be fluwa kun mɔ be flɛ i kɛ Misna’n kwla uka e naan y’a wun i wlɛ. Fluwa sɔ’n se kɛ, kɛ Zifu’m be fin Babilɔnin bali’n, be jɔlɛ difuɛ dandan’m be wa yoli like kun. Anglo nso nga Zifu’m be di cɛn mun’n be nun’n, i anglo kasiɛn’n i le 30 su’n jɔlɛ difuɛ sɔ’m be yia. Be yɛ be kle cɛn nga anglo kun bo i bo’n niɔn. ?Ngue su yɛ be jran naan b’a yo sɔ-ɔ?

Be siesieli sran wie mun Zerizalɛmun kpɔlɛ wie’m be su. Kɔnguɛ kwlaa’n sran sɔ’m be niannian ɲanmiɛn su lɔ. Kɛ be wun kɛ anglo’n w’a fi’n, be bo su kle jɔlɛ difuɛ dandan mun. Sɛ jɔlɛ difuɛ sɔ’m be wun kɛ be nun kaka be kan ndɛ kunngba’n, be se nvlefuɛ’m be kɛ anglo uflɛ w’a bo i bo. ?Yɛ sɛ lika’n wla aosin dan naan be kwlá wunman anglo ba’n nin? Sɛ ɔ ti sɔ’n, jɔlɛ difuɛ’m be se kɛ anglo nga be o nun’n ɔ́ dí cɛn ba 30 naan anglo uflɛ w’a bo i bo.

 Fluwa Misna’n kle kɛ, kɛ jɔlɛ difuɛ’m be ko fɛ i sɔ ajalɛ’n, be sɔ sin Olivie Oka’n su, Zerizalɛmun i wun koko lɛ, be fa kle kɛ anglo’n w’a bo i bo. Kpɛkun be sɔ sin Izraɛli mɛn’n nun lika nglonglo’m be su wie. I sin’n, be sunman sran nvle wunmuan’n nun kɛ be bo i ndolo. Ɔ maan Zifu nga be tran Zerizalɛmun lɛ’n, ɔ nin Izraɛli mɛn’n nun klɔ kanngan’m be ngba be su’n be si kɛ anglo uflɛ w’a bo i bo. Ɔ maan be kwlaa be kwla di cɛn blɛ kunngba’n nun.

Sɛ a nian kananndrie ng’ɔ o ngua lɛ’n i nun’n, á sí anglo nga Izraɛlifuɛ’m be di cɛn mun yɛ be yo be ninnge mun’n.