1. (1) ?Ngue ndɛ yɛ anzi kun kan-ɔn? (2) ?Wafa sɛ yɛ ndɛ sɔ’n ɲan ta e su-ɔ?

 ?SƐ ANZI kun waan ɔ́ kán ndɛ klé wɔ’n á síe ɔ su i nuan bo? Sɛ é kwlá sé’n andɛ’n anzi kun kan ndɛ kle “be nga be o mɛnmɛn kwlaa nun’n, ɔ nin be nga be fin akpasuaakpasua kwlaa su’n nin be nga be kan aniɛn wafawafa kwlaa’n, ɔ nin sran wafawafa kwlaa.” (Ngl. 14:​6, 7) Zoova yɛ ɔ ti Ɲanmiɛn m’ɔ fata kɛ sran kwlakwla su i’n niɔn. Kɛ Zoova man e atin kɛ e su i i sua mɔ nán sran yɛ ɔ kplannin’n nun’n i sɔ’n ti e cenjele like dan!

2. ?Ngue yɛle Zoova i sua mɔ nán sran yɛ ɔ kplannin’n? (An nian kuku nga be flɛ i kɛ “ ?Ɔ timan ngue?” i nun.)

² ?Ngue yɛle Ɲanmiɛn i sua mɔ nán sran yɛ ɔ kplannin’n? ?É yó sɛ naan y’a si sua sɔ’n i su ndɛ? Nán sua jrɛiin kun sa-ɔ. Ɔ ti ajalɛ kwlaa nga Zoova fali naan e ti kpɔlɛ tɛ mɔ Zezi yili’n ti’n y’a kwla su i’n. Akoto Pɔlu kannin ajalɛ sɔ’m be ndɛ fluwa ng’ɔ klɛli ko mannin Klisifuɛ nga be ti Ebre mɔ be tran Zide lɔ’n i nun. b

3-4. (1) ?Klisifuɛ nga be ti Ebre mɔ be o Zide lɔ’n be su ndɛ benin yɛ Pɔlu kannin-ɔn? (2) ?Wafa sɛ yɛ ɔ ukali be-ɔ?

³ ?Ngue ti yɛ Pɔlu klɛli fluwa ko mannin Klisifuɛ nga be ti Ebre mɔ be tran Zide lɔ’n niɔn? Atrɛkpa’n sa cinnjin nɲɔn ti-ɔ. I klikli’n yɛle kɛ i waan ɔ́ wlá be fanngan. Kɛ ɔ fɛ i Klisifuɛ sɔ’m be kaan nun’n, be dan lika be o Zifu’m be Ɲanmiɛn sulɛ  wafa’n nun laa. I sin’n, kɛ be kacili Klisifuɛ’n, atrɛkpa’n be Ɲanmiɛn sulɛ wafa sɔ’n i su kpɛnngbɛn’m be yoli be finfin. Afin Klisifuɛ’m be leman Ɲanmiɛn sulɛ sua dan kun mɔ be kwla kɔ lɔ be ko su Ɲanmiɛn-ɔn. Asa’n, be leman tɛ yiwlɛ yɛ be leman Ɲanmiɛn ɲrun jranfuɛ. I sɔ’n kwla bubu Klisifuɛ sɔ’m be sa sin, yɛ ɔ kwla yo maan be su suman Ɲanmiɛn kpa kun. (Ebr. 2:1; 3:​12, 14) Ɔ maan atrɛkpa bɔbɔ’n, be nun wie’m be seli be wun kɛ bé wá sá bé sín be Ɲanmiɛn sulɛ wafa laa’n nun ekun.

⁴ Pɔlu seli Klisifuɛ nga be ti Ebre’n be kɛ be “diman sran nga b’a tin’n be aliɛ liɛ’n.” Yɛle kɛ be mianman be ɲin naan b’a si Ɲanmiɛn Ndɛ nga i bo ti kploun’n i kpa. (Ebr. 5:​11-14) Be nun wie’m be te di Moizi Mmla’n su. Sanngɛ Pɔlu yiyili nun kɛ tɛ nga Moizi Mmla’n maan be yi’n ɔ nunnunman sa tɛ’n i ngba. I sɔ’n ti’n ɔ fataman kɛ Klisifuɛ’m be di Moizi mmla’n su kun. Ɔ maan Pɔlu wa fali be ɲin sieli i Ɲanmiɛn Ndɛ nga be bo ti kploun kpa’n be nun wie’m be su. Ɔ kpɛnnin be wla kɛ like kun o lɛ mɔ e fa e wla e gua su ‘mɔ i kpa tra Moizi Mmla’n’ niɔn. Like sɔ’n taka tɛ mɔ Zezi fɛli i wun yili’n su, yɛ ɔ kwla uka e naan y’a fa ‘e wun y’a mantan Ɲanmiɛn.’—Ebr. 7:​18, 19.

5. (1) ?Like cinnjin kpa benin yɛ Ebre Mun fluwa’n fa e ɲin sie su-ɔ? (2) ?Ngue ti-ɔ?

⁵ Pɔlu kannin sa nga ti yɛ Klisifuɛ’m be Ɲanmiɛn sulɛ wafa’n ti kpa tra Zifu’m be liɛ’n lele’n i ndɛ. Ɔ yiyili nun kleli be kɛ Zifu’m be Ɲanmiɛn sulɛ wafa’n ɔ “ti ninnge nga bé wá bá’n be wawɛ. Sanngɛ sran nga ti yɛ e wun ninnge sɔ’m be wawɛ’n, yɛle Klisi’n.” (Kol. 2:17) Ɔ le like kun nin i wawɛ. I wafa kunngba’n, wafa nga Zifu’m be suli Ɲanmiɛn laa’n, ɔ ti wafa nga sran’m bé wá sú Ɲanmiɛn cɛn wie lele’n i wawɛ. Ɔ maan ɔ fata kɛ e wun ajalɛ mɔ Zoova fali naan w’a yaci e sa tɛ mun w’a cɛ e’n i wlɛ. I liɛ’n é kwlá su i kɛ ng’ɔ nin i fata’n sa. Maan e fa wafa nga Zifu’m be suli Ɲanmiɛn laa’n e sunnzun wafa nga Klisifuɛ’m be su Ɲanmiɛn andɛ’n. I sɔ’n yó maan é wún Ɲanmiɛn i sua’n mɔ nán sran yɛ ɔ kplannin’n i su ndɛ’n i wlɛ kpa, yɛ é wún like nga i sɔ’n kle e’n.

6. ?Ngue yɛ be yo i tannin sua’n nun lɔ-ɔ?

⁶ Zifu’m be blɛ su’n. Pɔlu fali Zifu’m be ɲin sieli i Ɲanmiɛn i tannin sua mɔ Moizi tɛkɛli i afuɛ 1512 nun ka naan Klisifuɛ’m be  blɛ’n w’a ju’n, i su. (An nian kuku nga be flɛ i kɛ “Zifu’m be blɛ su’n nin Klisifuɛ’m be blɛ su’n” nun.) Blɛ wie nun’n, lika kwlaa nga Izraɛlifuɛ’m bé kɔ́’n, be fa tannin sua’n be kɔ wie. Be yoli i sɔ lele afuɛ kɔe 500 ka naan b’a kplan Ɲanmiɛn sua’n Zerizalɛmun lɔ. (Tul. 25:​8, 9; Kal. 9:22) “Tannin sua mɔ Ɲanmiɛn yi i wun nglo nun’n” i nun yɛ Izraɛlifuɛ’m be su Ɲanmiɛn yɛ be yi tɛ be mɛn i-ɔ. (Tul. 29:​43-46) Sanngɛ Ɲanmiɛn i tannin sua’n ti like cinnjin kpa kun mɔ Klisifuɛ’m bé wá yó i Ɲanmiɛn sulɛ nun’n i nzɔliɛ.

7. ?Blɛ benin nun yɛ sɛ é kwlá sé’n be kplannin Zoova i sua mɔ nán sran yɛ ɔ kplannin’n niɔn?

⁷ Klisifuɛ’m be blɛ su’n. Ɲanmiɛn i tannin sua m’ɔ o lɛ Izraɛlifuɛ’m be blɛ su’n ɔ ti ‘ɲanmiɛn su lɔ liɛ’n i nzɔliɛ.’ Yɛ ɔ uka e naan y’a wun Ɲanmiɛn i sua mɔ nán sran yɛ ɔ kplannin’n i wlɛ. Akoto Pɔlu seli kɛ ɔ ti Ɲanmiɛn i tannin sua ‘ng’ɔ o lɛ andɛ’n i nzɔliɛ.’ (Ebr. 8:5; 9:9) I sɔ’n kle kɛ i nun mɔ Pɔlu klɛ́ Klisifuɛ nga be ti Ebre’n be fluwa’n nn Ɲanmiɛn i sua mɔ nán sran yɛ ɔ kplannin’n ɔ o lɛ. Afuɛ 29 nun yɛ sɛ é kwlá sé’n be kplannin sua sɔ’n niɔn. Afin afuɛ sɔ’n nun yɛ be yoli Zezi i batɛmun-ɔn. Yɛ ɔ kacili Ɲanmiɛn ɲrun jranfuɛ dan Ɲanmiɛn i sua mɔ nán sran yɛ ɔ kplannin’n nun. c—Ebr. 4:14; Yol. 10:​37, 38.

8-9. ?Kɛ nga Ebre Mun 7:​23-27 fa kan’n sa’n, ngbaciɛ benin yɛ ɔ o Izraɛli lɔ Ɲanmiɛn ɲrun jranfuɛ dan’n nin Zezi m’ɔ ti Ɲanmiɛn ɲrun jranfuɛ dan’n be afiɛn-ɔn?

⁸ Zifu’m be blɛ su’n. Ɲanmiɛn ɲrun jranfuɛ dan’n yɛ ɔ dun Ɲanmiɛn i sufuɛ’m be ɲrun mmua-ɔ. Kɛ be yili Ɲanmiɛn i tannin sua’n i nglo’n be kpali Aarɔn kɛ ɔ yo Ɲanmiɛn ɲrun jranfuɛ dan. Sanngɛ kɛ nga Pɔlu fa kannin’n sa’n, “sran kpanngban be kaci Ɲanmiɛn ɲrun jranfuɛ, afin wie’n ti’n, Ɲanmiɛn ɲrun jranfuɛ’m be kwlá diman be junman’n be guɛmɛn i ti nin i bo. Ɔ maan kɛ wie’m bé wú’n, nn wie’m bé sín be osu.” d (An kanngan Ebre Mun 7:​23-27 nun.) Asa’n kɛ mɔ fɔ o be nun’n ti’n ɔ fata kɛ be yi be bɔbɔ be sa tɛ’n i ti tɛ. I lɛ nun’n, ngbaciɛ dan kun o Izraaɛli lɔ Ɲanmiɛn ɲrun jranfuɛ dan’n nin Zezi Klisi m’ɔ ti Ɲanmiɛn ɲrun jranfuɛ dan’n be afiɛn.

⁹ Klisifuɛ’m be blɛ su’n. Kɛ mɔ Zezi yɛ ɔ ti Ɲanmiɛn ɲrun jranfuɛ dan’n ti’n, “ɔ di junman […] tannin sua kpakpafuɛ’n i nun lɔ. Tannin sua sɔ’n Zoova yɛ ɔ yoli-ɔ, nán sran yɛ ɔ yoli-ɔ.” (Ebr. 8:​1, 2) Pɔlu seli kɛ kɛ mɔ Zezi “trán nguan nun tititi ti’n, sran fi su sinmɛn i osu jranman Ɲanmiɛn ɲrun.” Ɔ seli ekun kɛ: ‘Fiɛn kaan sa nunmɛn i wun, yɛ ɔ nin sa tɛ yofuɛ’m be timan kun kaan sa.’ Asa’n “ɔ timan kɛ Ɲanmiɛn ɲrun jranfuɛ dan onga’m be sa, yɛle kɛ i liɛ’n, ɔ nunman nun kɛ ɔ yi tɛ cɛn kwlakwla.” Siɛn’n, maan e kan ngbaciɛ ng’ɔ o tɛ yiwlɛ’n nin tɛ nga be yi be Zifu’m be blɛ su’n ɔ nin Klisifuɛ’m be blɛ su liɛ’n be afiɛn’n i ndɛ.

10. ?Tɛ nga be yi be tɛ yiwlɛ nga aaba yɛ be yoli’n su’n be ti ngue nzɔliɛ?

¹⁰ Zifu’m be blɛ su’n. Be fali aaba yoli tɛ yiwlɛ kun be fa sieli i Ɲanmiɛn i tannin sua’n i ɲrun lɛ. Lɛ yɛ be yi tɛ man Zoova-ɔ. (Tul. 27:​1, 2; 40:29) Sanngɛ tɛ sɔ mɔ be yi’n ɔ kwlá nunnunman nvlefuɛ’m be sa tɛ’n i ngba. (Ebr. 10:​1-4) Tɛ nga be yi be titi Ɲanmiɛn i tannin sua’n nun’n be ti tɛ kun mɔ cɛn wie lele’n bé wá yí i kpɛ kunngba’n i nzɔliɛ.  Tɛ sɔ’n ti yɛ bé kwlá núnnún sran’m be kwlaa be sa tɛ’n i mlɔnmlɔn-ɔn.

11. ?Tɛ yiwlɛ benin su yɛ Zezi fɛli i wun yili tɛ-ɔ? (Ebre Mun 10:​5-7, 10)

¹¹ Klisifuɛ’m be blɛ su’n. Zezi si kɛ Zoova sunmɛnnin i asiɛ’n su wa kɛ ɔ wa fɛ i nguan’n kpɔ sran’m be ti. (Mat. 20:28) Ɔ maan kɛ be yoli i batɛmun’n ɔ ti kɛ w’a fɛ i wun w’a man Zoova kɛ ɔ́ yó i klun sa’n sa. (Zan 6:38; Gal. 1:4) Zoova bɔbɔ yɛ ɔ kunndɛli kɛ i Wa’n fɛ i nguan’n man naan klɔ sran’m be ɲan be ti-ɔ. Zezi w’a fɛmɛn i wun w’a yiman tɛ tɛ yiwlɛ jrɛiin kun su. Tɛ yiwlɛ nga Zezi fɛli i wun yili tɛ su’n, yɛle Ɲanmiɛn i klun sa m’ɔ yoli’n. Zezi fɛli i nguan’n mannin kɛ ɔ́ fá kpɔ́ sran’m be kwlaa be ti. “Ɔ yoli i sɔ kpɛ kunngba cɛ.” Ɔ maan be kwlaa nga be lafi Klisi su’n be kwla ɲan be ti. (An kanngan Ebre Mun 10:​5-7, 10 nun.) Siɛn’n, maan e fa e ɲin e sie i Ɲanmiɛn i tannin sua’n i nun ninnge’m be su naan e wun like nga be ti be nzɔliɛ’n.

12. ?Wan yɛ ɔ kwla wlu Ɲanmiɛn i tannin sua’n i sua ba’m be nun-ɔn?

¹² Zifu’m be blɛ su’n. Ɲanmiɛn i tannin sua’n nin i sua nga be wa kplannin be kasiɛn su Zerizalɛmun lɔ’n be fa be wun. Yɛle kɛ be kwlaa be klun lɔ’n, be le sua ba nɲɔn. I kun yɛle “Sua Ba m’ɔ ti Ɲanmiɛn liɛ Klonglo’n,” yɛ kun ekun yɛle “Sua Ba Ngunmin Kun m’ɔ ti Ɲanmiɛn liɛ Klonglo’n.” Rido kun kpɛ be afiɛn. (Ebr. 9:​2-5; Tul. 26:​31-33) Kannin siewlɛ nin tabli nin kpanwun nga be siesie be Ɲanmiɛn ɲrun’n be o Sua Ba m’ɔ ti Ɲanmiɛn liɛ Klonglo’n i nun. ‘Be nga be guali be  ti su nglo mɔ be sieli be kɛ be yo Ɲanmiɛn ɲrun jranfuɛ’n’ be ngunmin yɛ be le atin be ko di junman lɔ-ɔ. (Kal. 3:​3, 7, 10) Ɲanmiɛn i alaka mɔ sika ɔkwlɛ yɛ be fa yoli’n ɔ o Sua Ba Ngunmin Kun m’ɔ ti Ɲanmiɛn liɛ Klonglo’n i nun. Lɔ yɛ Zoova yi i wun nglo-ɔ. (Tul. 25:​21, 22) Ɲanmiɛn ɲrun jranfuɛ dan’n i kunngba cɛ yɛ ɔ le atin wlu lɔ-ɔ. Afuɛ nuan kun nun’n, Sa Tɛ’n i Ti Kpatalɛ Cɛn’n nun yɛ ɔ kwla wlu lɔ-ɔ. (San. 16:​2, 17) Blɛ sɔ’n nun’n, ɔ fa nnɛn nga be fa yi tɛ’n be mmoja’n wie ko kpɛtɛ i bɔbɔ nin nvlefuɛ’m be kwlaa be ti. Kɛ ɔ́ kɔ́ i ɲrun’n, Zoova wa yiyili like nga ninnge sɔ’m be ti be nzɔliɛ’n i nun kpa.—Ebr. 9:​6-8. e

13. ?Sua Ba m’ɔ ti Ɲanmiɛn liɛ Klonglo’n nin Sua ba ngunmin kun m’ɔ ti Ɲanmiɛn liɛ klonglo’n, be ti ngue nzɔliɛ?

¹³ Klisifuɛ’m be blɛ su’n. Zoova fɛli i wawɛ’n kpali Zezi i sɔnnzɔnfuɛ wie mun sieli be ngunmin. Sran sɔ mɔ be ti sran 144.000 be nin Zezi bé kó dí Ɲanmiɛn ɲrun jranlɛ junman’n ɲanmiɛn su lɔ. (Ngl. 1:6; 14:1) Sua Ba m’ɔ ti Ɲanmiɛn liɛ Klonglo’n ɔ ti wafa nga sran sɔ’m be nin Ɲanmiɛn be afiɛn fa ti’n i nzɔliɛ. (Rɔm. 8:​15-17) Sua Ba Ngunmin Kun m’ɔ ti Ɲanmiɛn liɛ Klonglo’n ɔ ti Zoova i tranwlɛ m’ɔ o ɲanmiɛn su lɔ’n i nzɔliɛ. “Rido” ng’ɔ kpɛ sua ba nɲɔn sɔ’m be afiɛn’n ɔ ti Zezi i wunnɛn’n i nzɔliɛ. Zezi kwlá fɛmɛn i klɔ sran wunnɛn’n ɔ fa kɔman ɲanmiɛn su lɔ ko diman Ɲanmiɛn ɲrun jranlɛ junman’n. Kɛ Zezi fɛli i wun yili tɛ’n ɔ tikeli be nga be kpali be sieli be ngunmin’n be ɲanmiɛn su kɔlɛ’n i atin. Be kusu ɔ fata kɛ be kpɔci be klɔ sran wunnɛn’n naan b’a kwla ɲan be akatua m’ɔ o ɲanmiɛn su lɔ’n. (Ebr. 10:​19, 20; 1 Kor. 15:50) Kɛ Zezi wuli mɔ be cɛnnin i’n, ɔ wluli Ɲanmiɛn i sua’n mɔ nán sran yɛ ɔ kplannin’n i Sua Ba Ngunmin Kun m’ɔ ti Ɲanmiɛn liɛ Klonglo’n i nun. I sin’n, be kwlaa nga be kpali be sieli be ngunmin’n bé wá tó i lɔ.

14. ?Kɛ nga Ebre Mun 9:​12, 24-26 fa kan’n sa’n, ngue ti yɛ kɛ e su Zoova i sua mɔ nán sran yɛ kplannin’n nun’n, i sɔ’n le ɲrun tra wafa nga Zifu’m be suli Ɲanmiɛn laa’n niɔn?

¹⁴ Ajalɛ nga Zoova fali be naan y’a kwla su i kpa’n be taka e ti kpɔlɛ tɛ’n nin Zezi i Ɲanmiɛn ɲrun jranlɛ junman dilɛ’n be su. Yɛ e wun kɛ be kpa tra wafa nga Zifu’m be suli Ɲanmiɛn’n lele. Yɛle kɛ Izraɛli lɔ Ɲanmiɛn ɲrun jranfuɛ dan’n, ɔ wlu sua ba jrɛiin kun mɔ klɔ sran yɛ ɔ kplannin’n nun. Yɛ nnɛn mmoja yɛ ɔ fa wlu lɔ-ɔ. Sanngɛ Zezi liɛ’n “ɲanmiɛn su lɔ yɛ ɔ ɔli-ɔ.” Ɔ ko jrannin Zoova bɔbɔ ɲrun. Yɛ ɔ fɛli i nguan’n mɔ fɔ nunman nun’n kleli Zoova naan “tɛ m’ɔ fɛ i wun yili’n ti’n, sa tɛ’n wie mlɔnmlɔnmlɔn.” (An kanngan Ebre Mun 9:​12, 24-26 nun.) Zezi i tɛ liɛ ng’ɔ fɛli i wun yili’n ɔ nunnun sa tɛ’n mlɔnmlɔn. Siɛn’n, é wá wún i kɛ kannzɛ e lafi su kɛ é trán asiɛ’n su wa-o annzɛ é kɔ́ ɲanmiɛn su-o, e kwlakwla e kwla su Zoova i sua mɔ nán sran yɛ ɔ kplannin’n i nun.

15. ?Wan mun yɛ laa’n be di junman Ɲanmiɛn i tannin sua’n i awlo klun’n nun-ɔn?

¹⁵ Zifu’m be blɛ su’n. Ɲanmiɛn i tannin sua’n le i awlo klun mɔ be sisili i wun-ɔn. Lɛ yɛ Ɲanmiɛn ɲrun jranfuɛ’m be di be junman’n niɔn. Be fali aaba yoli tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n. Kpɛkun be fali aaba yoli kpongbo dan kun wie. Lɛ yɛ Ɲanmiɛn ɲrun jranfuɛ’m be wunnzin ka naan b’a di be junman’n niɔn. (Tul. 30:​17-20; 40:​6-8) Sanngɛ Ɲanmiɛn sua nga be wa kplannin be kasiɛn’n su’n be le awlo klun uflɛ kun ekun. Be nga be timan Ɲanmiɛn ɲrun jranfuɛ’n be kwla jran lika sɔ’n nun be su Ɲanmiɛn.

16. ?Wan mun yɛ be di su Ɲanmiɛn i sua mɔ nán sran yɛ ɔ kplannin’n i awlo klun’m be nun-ɔn?

 ¹⁶ Klisifuɛ’m be blɛ su’n. Ka naan be nga be kpali be sieli be ngunmin’n be nin Zezi b’a ko di Ɲanmiɛn ɲrun jranlɛ junman’n ɲanmiɛn su lɔ’n, dɔ nga su’n, be su Ɲanmiɛn i sua mɔ nán sran yɛ ɔ kplannin’n i awlo klun kaan nun asiɛ’n su wa. Kpongbo dan nga be fali aaba be yoli mɔ be gua nun nzue’n ɔ ti like cinnjin kpa kun nzɔliɛ. Ɔ kle kɛ ɔ fata kɛ Klisifuɛ’m be kwlakwla be yo sanwun be wunnɛn’n su nin be akunndan’n nun. ?Sanngɛ nin yɛ “sran kpanngban kpa” mɔ be suan be nga be kpali be sieli be ngunmin’n be bo’n be su Ɲanmiɛn-ɔn? Akoto Zan wunnin kɛ ‘be jinjin famiɛn bia’n i ɲrun lɛ.’ Lika sɔ’n ti Ɲanmiɛn i awlo klun dan’n i nzɔliɛ. Lɛ yɛ ‘be su Ɲanmiɛn wia nun nin kɔnguɛ i sua’n nun-ɔn.’ (Ngl. 7:​9, 13-15) Nanwlɛ, kɛ Zoova man e atin kɛ e su i i sua mɔ nán sran yɛ ɔ kplannin’n i nun’n, i sɔ’n ti e cenjele like dan!

17. ?Ngue yɛ e kwla yo e man Zoova-ɔ?

¹⁷ Andɛ’n, Klisifuɛ’m be kwlakwla be kwla su Zoova. I sɔ yolɛ nun’n, be fa be blɛ’n nin be wunmiɛn’n nin be sa nun ninnge mun be suan Ɲanmiɛn i junman’n i bo. Ɔ maan kɛ nga akoto Pɔlu kan kleli Klisifuɛ nga be ti Ebre’m be sa’n, ‘e kwla manman Ɲanmiɛn titi. Manmanlɛ sɔ’n ti kɛ tɛ yɛ e su yi e mɛn i sa, yɛ e kwla bo i dunman’n naan sran’m be ti.’ (Ebr. 13:15) Wafa nga e kwla kle Zoova kɛ i sulɛ mɔ e kwla su i’n, ɔ ti e cenjele like dan’n yɛle kɛ i sulɛ nun’n, maan e yo like kwlaa nga e kwla yo’n.

18. (1) ?Kɛ nga Ebre Mun 10:​22-25 fa kan’n sa’n, ngue yɛ ɔ fataman kɛ e ɲin kpa su le-ɔ? (2) ?Ngue yɛ ɔ fataman kɛ e wla fi su le-ɔ?

¹⁸ An kanngan Ebre Mun 10:​22-25 nun. Kɛ Pɔlu guɛ́ i ndɛ’n i bo’n fluwa ng’ɔ klɛli ko mannin Ebre mun’n i nun’n, ɔ kannin ninnge wie m’ɔ fataman kɛ e ɲin kpa be su Ɲanmiɛn sulɛ nun’n be ndɛ. Ninnge sɔ’m be nun wie mun yɛle Ɲanmiɛn srɛlɛ’n nin jasin fɛ bolɛ’n nin aɲia’m be bo tranlɛ’n. ‘Kɛ mɔ e wun kɛ mɛn’n i awieliɛ’n su mantan koko’n, ɔ fata kɛ e yo i sɔ tra su.’ Sa Nglo Yilɛ fluwa’n i awieliɛ lɔ’n, Zoova i anzi’n kɛnnin i kpɛ nɲɔn kɛ: “Su Ɲanmiɛn!” (Ngl. 19:10; 22:9) Ɔ kɛnnin i sɔ fa kleli kɛ i sɔ yolɛ’n ti cinnjin kpa. I sɔ’n ti’n, nán maan e wla fi Zoova i sua mɔ nán sran yɛ ɔ kplannin’n i su ndɛ nanwlɛ’n su le. Asa’n maan atin mɔ Zoova man e kɛ e su i’n, ɔ yo e cinnjin titi!