?A kanngannin afuɛ nga nun Sasafuɛ Trawlɛ’n i nun ndɛ’m be nun kpa? Sɛ ɔ ti sɔ’n, tɛ kosan nga’m be su:

?Kɛ be se kɛ ‘e kaci e akunndan’n’ i bo’n yɛle benin? (Rɔm. 12:2)

I sɔ’n kleman kɛ ɔ fata kɛ e yo ninnge kpakpa mun ngunmin. Sanngɛ maan e mian e ɲin naan e si sran wafa nga e ti’n sakpa’n. Yɛ sɛ é nían naan ɔ fata kɛ e kaci e sa ninnge wie’m be nun naan y’a kwla nanti Zoova i mmla’m be su kpa’n, nán e sisi e bo naan y’a yo sɔ.—w23.01, b. 8-9.

?Kɛ é fá e ɲin síe i sa nga be o mɛn’n nun’n be su’n, wafa sɛ yɛ e kwla kle kɛ nian e wun su-ɔ?

E fa e ɲin sie i sa nga be ju mɛn’n nun mɔ be yia ndɛ nga Ɲanmiɛn nuan ijɔfuɛ’m be kannin’n be nuan’n be su. Kɛ é kókó sa sɔ’m be su yalɛ’n, nán maan e kan ndɛ wie m’ɔ kwla kpɛ akplowa silɛ ba-ɔ. Afin ɔ cɛman naan aniaan’m b’a bubu be wun nun. Sanngɛ maan ndɛ nga é kán’n, ɔ taka fluwa nga Zoova i anuannzɛ’n yili be’n be su. (1 Kor. 1:10)—w23.02, b. 16.

?Ngbaciɛ benin yɛ ɔ o Zezi i batɛmun’n nin i sɔnnzɔnfuɛ’m be liɛ’n i afiɛn-ɔn?

Be wuli Zezi nvle kun mɔ i nunfuɛ’m be ti Ɲanmiɛn liɛ klonglo’n nun. Ɔ maan ɔ nunman nun kɛ ɔ fɛ i wun man Zoova kɛ e liɛ’n sa. Fɔ nunman Zezi nun yɛ w’a yoman sa tɛ.—w23.03, b. 5.

?Ngue yɛ e kwla yo naan e wiengu’m b’a tɛ kosan’m be su wie aɲia’m be bo-ɔ?

Maan ndɛ nga é kán’n, ɔ yo kpe kan. I liɛ’n sran uflɛ kwlá íjɔ wie. Nán e ngunmin e kan ndɛ cinnjin’m be ngba. I liɛ’n, be onga’m be kwla ijɔ wie.—w23.04, b. 23.

?Ngue yɛle “Atin m’ɔ ti Sanwun’n” mɔ Ezai 35:8 kɛn i ndɛ’n?

Zifu’m be blɛ su’n, atin sɔ’n yɛle atin nga Zifu nga be fin Babilɔnin’n be sinnin su ɔli be nvle’n nun lɔ’n. ?Yɛ e blɛ su’n nin? Lele mɔ afuɛ 1919 fá jú’n, sran wie’m be dili junman wie mun. I wie yɛle kɛ be kacili Biblu’n nun ndɛ’n aniɛn kpanngban nun, yɛ be yili Biblu’n i kpanngban kpa. Kɛ ɔ fɛ i lɛ’n, Ɲanmiɛn i sufuɛ’m be sinnin “Atin m’ɔ ti Sanwun’n” su. Yɛ atin sɔ’n i su nantilɛ’n ti’n, bé ɲán suyralɛ kpanngban.—w23.05, b. 15-19.

?Bla nɲɔn benin mun yɛ Ɲanndra Mun ndɛ tre 9 kan be ndɛ-ɔ?

Ɔ kan “bla sinnglinfuɛ” kun m’ɔ fa be ng’ɔ yia be’n kɔ “ndia’n” nun lɔ’n i ndɛ. Yɛ ɔ kan “ngwlɛlɛ’n i kpafuɛ’n” m’ɔ fa be ng’ɔ yia be’n kɔ “sa wlɛ wunlɛ’n i atin” liɛ’n su’n i ndɛ. Yɛ i sɔfuɛ’m bé ká nguan nun. (Ɲan. 9:​1, 6, 13, 18)—w23.06, b. 22-24.

?Ɲanmiɛn nin Lɔtu be nantilɛ’n nun’n, wafa sɛ yɛ ɔ kleli kɛ ɔ ti wun ase kanfuɛ naan i like yolɛ yoman ya-ɔ?

Zoova seli Lɔtu kɛ ɔ jaso Sodɔmun lɛ naan ɔ wanndi wɔ okaoka’m be nun lɔ. Sanngɛ kɛ Lɔtu seli kɛ ɔ́ kó fía Zoaa lɔ’n, Ɲanmiɛn kplinnin su.—w23.07, b. 21.

Sɛ bla kun wun kɛ i wun’n nian bian nin bla nna nga be fa fite nzra nun’n, ngue yɛ ɔ kwla yo-ɔ?

Ɔ fataman kɛ ɔ se i wun kɛ i dunman nun ti-ɔ. Maan ɔ miɛn i ɲin naan ɔ nin Ɲanmiɛn be afiɛn mantan kpa. Yɛ maan ɔ bu bla wie mɔ be wla boli be wun mɔ Ɲanmiɛn fɔnvɔli be’n be su ndɛ’n i akunndan. Asa ekun’n ɔ kwla ukɛ i wun’n.—w23.08, b. 14-17.

?Kɛ sran kun si like nga e lafi su’n i su akplowa’n, é yó sɛ naan y’a tɛ i su amanniɛn su?

Maan e se e wun kɛ kosan nga sran’n usa e’n, annzɛ akplowa ng’ɔ si’n kwla uka e naan y’a si akunndan ng’ɔ bu’n ɔ nin ninnge nga be ti i cinnjin’n. Sɛ e yo sɔ’n é kwlá tɛ́ i su amanniɛn su.—w23.09, b. 17.

?Wan mun yɛ be wlali Mari i fanngan-ɔn? ?Yɛ ngue yɛ i sɔ’n kle e-ɔ?

Kɛ Mari tili i kɛ i yɛ ɔ́ wú Mesi’n, Gabriɛli nin Elizabɛti be wlɛli i fanngan. E kusu e wiengu Klisifuɛ’m be kwla wla e fanngan wie.—w23.10, b. 15.

?Wafa sɛ yɛ Zoova kwla tɛ e srɛlɛ’m be su-ɔ?

Ɔ tali nda kɛ ɔ́ tíe e srɛlɛ mun, naan ɔ́ nían sɛ ɔ nin i klun sa’n be kɔ likawlɛ-o. (Zer. 29:12) Wafa ng’ɔ́ tɛ́ sran kun su’n, ɔ nin sran uflɛ liɛ’n be su yoman kun. Sanngɛ i kwlaa yoli-o, ɔ́ súan e bo titi.—w23.11, b. 21-22.

Rɔmunfuɛ Mun 5:2 kan like nga ‘e lafi su’n’ i ndɛ. ?Ngue ti yɛ i ndɛ mma 4 kan like sɔ’n i ndɛ ekun-ɔn?

Kɛ sran kun tie jasin fɛ’n, ɔ kwla lafi su kɛ ɔ́ trán mɛn klanman’n nun asiɛ’n su wa. Kɛ ɲrɛnnɛn’m bé tɔ́ i su m’ɔ́ jrán kekle m’ɔ́ wún kɛ Ɲanmiɛn i klun jɔ i wun’n, ɔ lafi i sɔ liɛ’n su kpa tra laa’n. Yɛ like sɔ m’ɔ lafi su’n yo i cinnjin dan.—w23.12, b. 12-13.