1. ?Sa benin yɛ ɔ kle aniaan kpanngban be yialɛ-ɔ?

 ATRƐKPA’N, a sunnzunnin kɛ á yó Ɲanmiɛn sulɛ nun like kun. Sanngɛ kɛ ɔ ko yo naan w’a yiɛ i nuan’n ɔ ti kekle. b Sɛ ɔ ti sɔ sakpa’n, nán bu i kɛ ɔ ngunmin yɛ sa’n ju ɔ su-ɔ. I wie yɛle aniaan bian kun mɔ be flɛ i kɛ Filipu’n i liɛ’n. Ɔ kunndɛ kɛ ɔ́ srɛ́ Ɲanmiɛn kpa trá laa’n kpɛkun ɔ́ srɛ́ i kpɛ sunman. Sanngɛ ɔ ɲɛnmɛn i ti kaan sa. Be flɛ aniaan bla kun kɛ Erika. I liɛ’n, ɔ kunndɛ kɛ ɔ́ jú jasin fɛ bolɛ aɲia’n i bo lɔ dɔ su. Sanngɛ e kwla se kɛ cɛn kwlaa’n ɔ ka siɛn. Be flɛ aniaan bian kun kɛ Toma. Kpɛ sunman’n, ɔ kunndɛli kɛ ɔ́ kánngan Biblu’n i wunmuan’n nun. Ɔ seli kɛ: “Nanwlɛ ti kpa, n kloman Biblu’n nun kannganlɛ. N boli i bo kpɛ nsan, sanngɛ blɛ kwlaa sɔ’n nun’n kɛ n ju Saun Yolɛ fluwa su’n kpɛkun m’an jran.”

2. ?Ngue ti yɛ sɛ e sunnzunnin kɛ é yó like kun naan e nin-a kwlá yoman’n, ɔ fataman kɛ e sa sin bubu e-ɔ?

² Sɛ a sunnzunnin kɛ á yó like kun naan a nin-a kwlá yoman’n, nán ɔ sa sin bubu wɔ. I kpa bɔbɔ’n, ninnge nga e bu i kɛ be yolɛ timan kekle bɔbɔ’n, be yolɛ fa blɛ yɛ ɔ fata kɛ e mian e ɲin kpa. Kɛ mɔ a te kunndɛ kpa kɛ á yó like nga a sunnzunnin ti’n, i sɔ’n kle kɛ Zoova sulɛ’n ti wɔ cinnjin naan a kunndɛ kɛ á tú ɔ klun sú i. Kɛ Zoova wun ɔ ɲin mɔ a mian’n, ɔ yo i fɛ. Ɔ kunndɛman kɛ a yo like nga a kwlá yoman’n. (Jue. 103:14; Mis. 6:8) I sɔ’n ti’n, ninnge nga kɛ a niɛn i siin a kwla yo be’n yɛ fa be sie ɔ ɲrun kɛ á yó be-ɔ. ?Sanngɛ kɛ a ko fa like kun ko sie ɔ ɲrun kɛ á yó’n, ngue  yɛ a kwla yo naan w’a yo like sɔ’n niɔn? É wá kán ninnge wie mɔ be kwla uka wɔ’n be ndɛ.

3. ?Ngue ti yɛ sɛ e waan é yó like kun’n, ɔ ti cinnjin kɛ e fua kpa-ɔ?

³ Sɛ e waan é yó like kun naan e fua kpa kɛ é yó like sɔ’n, e kwla yo. Afin é mían é ɲín é yó like kwlaa nga e kwla yo naan like sɔ’n w’a yo ye’n. E kwla fa fualɛ mɔ e fua kɛ é yó like kun’n, e sunnzun aunmuan m’ɔ su alie kun bo lele naan w’a ju i juwlɛ’n. Sɛ aunmuan’n fita titi’n, alie’n i kanfuɛ’n kwla ju lika ng’ɔ su kɔ lɔ’n. Sɛ ɔ fita kekle kusu’n, ɔ́ jú lika sɔ’n nun lɔ ndɛndɛ kpa. I wafa kunngba’n, sɛ e kunndɛ kɛ é yó like wie naan e fua kpa kɛ é yó like sɔ’n, saan é yó. Be flɛ aniaan bian kun kɛ Davidi yɛ ɔ tran nvle nga be flɛ i kɛ Salivadɔɔ’n nun. Ɔ seli kɛ: “Kɛ e fua kpa kɛ é yó like kun’n, e mian e ɲin kpa naan y’a kwla yo like sɔ’n. Yɛ e manman like fi i atin kɛ ɔ tanndan e ɲrun.” ?Sɛ e waan é yó like kun’n, ngue yɛ e kwla yo naan y’a kunndɛ kpa kɛ é yó like sɔ’n niɔn?

4. ?Ngue yɛ e kwla srɛ Ɲanmiɛn kɛ ɔ yo man e-ɔ? (Filipufuɛ Mun 2:13) (An nian desɛn’n wie.)

⁴ Maan e srɛ Ɲanmiɛn. Zoova kwla fɛ i wawɛ’n uka e naan y’a kunndɛ kpa kɛ é yó like nga e sunnzunnin kɛ é yó’n. (An kanngan Filipufuɛ Mun 2:13 nun.) Ɔ ju wie’n, e sunnzun kɛ é yó like kun afin e si kɛ ɔ fata kɛ e yo like sɔ’n. I sɔ’n kusu ti kpa. Sanngɛ wie liɛ’n like sɔ’n i yolɛ’n yoman e fɛ kpa. I sɔ sa’n juli aniaan bla kun mɔ be flɛ i kɛ Norina’n i su. Ɔ tran nvle nga be flɛ i kɛ Uganda’n i nun. Blɛ kun nun’n, ɔ kunndɛli kɛ ɔ́ klé sran kun i Biblu’n nun like. Sanngɛ i sɔ yolɛ yomɛn i fɛ kpa. Afin ɔ se i wun kɛ ɔ siman like kle kpa. ?Ngue yɛ ɔ ukɛli i-ɔ? I bɔbɔ seli kɛ: “N srɛli Zoova cɛn kwlakwla kɛ ɔ yo naan n klo kpa kɛ ń klé sran kun i Biblu’n nun like. Blɛ kunngba’n nun’n, n miannin min ɲin n suannin like klelɛ’n i su like kpa. Kɛ ɔ dili anglo nɲɔn kun’n, n sieli i nzɔliɛ kɛ n kunndɛ kpa kɛ ń klé sran kun i Biblu’n nun like. Afuɛ kunngba sɔ’n nun’n, n ma boli sran nɲɔn be Biblu’n nun like klelɛ bo.”

5. ?Ngue ti yɛ sɛ e bu ninnge nga Zoova yo mannin e’n be su akunndan, é fúa kpa kɛ é yía ninnge nga e sunnzunnin kɛ é yó be’n be nuan-ɔn?

⁵ Maan e bu ninnge nga Zoova yo mannin e’n be su akunndan. (Jue. 143:5) Kɛ akoto Pɔlu buli Ɲanmiɛn i aklunye dan m’ɔ yili i nglo i lika’n i su akunndan’n, ɔ fuali kpa kɛ ɔ́ míɛn i ɲin dí Zoova i junman’n. (1 Kor. 15:9, 10; 1 Tim. 1:12-14) I wafa kunngba’n, sɛ e bu ninnge nga Zoova yo mannin e’n be su akunndan’n, é fúa kpa kɛ é yó like nga e sunnzunnin kɛ é yó é mɛ́n i’n. (Jue. 116:12) I sɔ yɛ aniaan bla kun m’ɔ tran nvle nga be flɛ i kɛ Ɔndurasi’n nun’n, ɔ yoli-ɔ. Aniaan bla’n kunndɛli kɛ ɔ́ káci titi atin bofuɛ. Ɔ seli kɛ: “N buli klolɛ mɔ Zoova klo min’n i su akunndan. I wie yɛle kɛ ɔ ukali min maan n wunnin i sufuɛ kpa mun. Asa’n, min ndɛ lo i yɛ ɔ sasa min. Ninnge sɔ’m be su akunndan bulɛ’n ti’n n kloli Zoova tankaan kpa. Kpɛkun n kunndɛli kpa kɛ ń mían min ɲin kpa naan ń káci titi atin bofuɛ.”

6. ?Ngue ekun yɛ ɔ kwla uka e naan y’a kunndɛ kpa kɛ é yó like kun-ɔn?

⁶ Maan e fa e ɲin e sie i like nga e waan é yó’n i su ye nga é ɲɛ́n i’n su. Erika m’ɔ kunndɛ kɛ ɔ́  jú jasin fɛ bolɛ aɲia’n i bo lɔ dɔ su’n, ɔ kannin like ng’ɔ ukɛli i’n i ndɛ. Ɔ seli kɛ: “N sieli i nzɔliɛ kɛ kɛ n juman jasin fɛ bolɛ aɲia’n i bo lɔ dɔ su’n, like kaka sin min sin. Sanngɛ sɛ n ju lɔ dɔ su’n, n kwla yo aniaan’m be like kpɛkun e nin be e kwla koko yalɛ. Asa’n, n kwla fa jasin fɛ bolɛ’n i su ajalɛ nga be kle e’n su. I liɛ’n jasin fɛ bolɛ’n yó min fɛ kpɛkun ń sí i bo kpa wie.” Erika fɛli i ɲin sieli jasin fɛ bolɛ aɲia’n i bo kɔlɛ dɔ su’n, i su ye ng’ɔ́ ɲɛ́n i’n i su. Ɔ maan siɛn’n, ɔ miɛn i ɲin ju lɔ dɔ su. E kusu e kwla fa e ɲin e sie i ninnge nga e waan é yó be’n, be su ye nga e kwla ɲɛn i’n be su. I wie yɛle kɛ sɛ e kunndɛ kɛ é kánngan Biblu’n nun titi annzɛ é srɛ́ Ɲanmiɛn kpa titi’n, e kwla fa e ɲin e sie i wafa nga i sɔ’n kwla uka e naan e nin Zoova e afiɛn w’a mantan kpa’n i su. (Jue. 145:18, 19) Asa’n, sɛ e kunndɛ kɛ é yí nzuɛn kpa kun i nglo’n, e kwla fa e ɲin e sie i wafa nga i sɔ’n kwla yo maan e nin e wiengu mun e tran klanman’n i su. (Kol. 3:14) Asa ekun’n, e kwla klɛ ninnge nga e waan é yó be’n, be su ye nga e kwla ɲɛn i’n e sie. Kpɛkun maan e kanngan fluwa sɔ’n nun tikatika. Toma mɔ e kɛnnin i ndɛ’n seli kɛ: “Kɛ n bu sa nga ti yɛ ɔ fata kɛ n yo like kun’n i akunndan’n, i sɔ yo maan n kunndɛ kpa kɛ ń yó like sɔ’n.”

7. ?Ngue yɛ ɔ ukali Zulio nin i yi naan b’a kwla yia like nga be sunnzunnin kɛ bé yó’n i nuan-ɔn?

⁷ Maan e nin be nga be wla e fanngan’n e san nun. (Ɲan. 13:20) Be flɛ aniaan bian kun kɛ Zulio. Ɔ nin i yi be kunndɛli kɛ bé bó jasin fɛ’n i kpa trá laa’n. Zulio kannin like ng’ɔ ukali be naan b’a kwla yo like sɔ’n i ndɛ. Ɔ seli kɛ: “E janvuɛ nga be wla e fanngan kɛ e yo like nga e sunnzunnin kɛ é yó’n, e fali e wun e mantannin be. E nin be e kokoli like nga e waan é yó’n i su yalɛ. Be nun kpanngban be kwla yiali ninnge nga be sunnzunnin kɛ bé yó be’n be nuan. Ɔ maan be kwla mannin e afɔtuɛ wie mɔ be ukali e kpa-ɔ. Ɔ ju wie’n, be usa e wafa nga e kunndɛ kɛ é yía like nga e sunnzunnin kɛ é yó’n i nuan’n i su sa. Kpɛkun be wla e fanngan.”

8. ?Sɛ e waan é mínndɛ kɛ like kun i yolɛ yo e fɛ ka naan y’a yo’n, wafa sɛ yɛ i bo’n gua-ɔ? (An nian desɛn’n wie.)

⁸ Nanwlɛ ti kpa, nán blɛ kwlaa nun yɛ like kun i yolɛ yo e fɛ-ɔ. I sɔ’n kleman kɛ e kwlá yoman like nga e sunnzunnin kɛ é yó’n i le. Maan e fa sran kun m’ɔ su fa alie kɔ lika’n i su sunnzun ase’n ekun: Ɔ ju wie’n aunmuan’n kwla fita kekle kpa. Ɔ maan ɔ kwla su alie’n i bo kɔ ndɛndɛ. Sanngɛ nán blɛ kwlaa nun yɛ aunmuan’n fita kekle-ɔ. Cɛn wie bɔbɔ’n, ɔ fitaman mlɔnmlɔn. ?I sɔ’n kle kɛ alie’n su kwlá kɔmɛn i ɲrun kun? Cɛcɛ. Alie wie’m be le motɛɛ yɛ wie’m be kusu tɛbua yɛ be fa kan be-ɔ. Ɔ maan alie’n i kanfuɛ’n kwla sɔ motɛɛ’n i nuan annzɛ ɔ kwla fa tɛbua fa kan alie’n. Sɛ ɔ yo sɔ’n, ɔ kwla ju i juwlɛ. I wafa kunngba’n, fualɛ nga e fua kpa kɛ é yó like kun’n, ɔ ti kɛ aunmuan’n sa. Ɔ ju wie’n, fualɛ nga e fua’n ɔ yo dan. Ɔ ju wie kusu’n, ɔ kan ase. Yɛ wie liɛ bɔbɔ’n, like fi yolɛ yoman e fɛ. Sanngɛ sɛ e waan é mínndɛ kɛ like kun i yolɛ yo e fɛ ka naan y’a yo’n, e su yomɛn i le. Ɔ maan kɛ alie’n i kanfuɛ m’ɔ yoli ninnge wie mun naan w’a kwla ɔ i ɲrun’n i liɛ’n sa’n, kannzɛ like kun i yolɛ yoman e fɛ’n, sanngɛ e kwla yo ninnge wie mun naan y’a yia like sɔ’n i nuan. Sɛ e tra e awlɛn e yo ninnge sɔ  mun naan e yia like nga e sunnzunnin kɛ é yó’n i nuan’n, é ɲán su ye. Ka naan y’a kan ninnge nga e kwla yo be’n be ndɛ’n, maan e dun mmua e tɛ kosan kun mɔ e kwla fa usa e wun’n i su.

9. ?Sɛ Ɲanmiɛn sulɛ nun’n e waan é yó like kun naan i yolɛ yoman e fɛ’n, ɔ fata kɛ e yo like sɔ’n? An yiyi nun.

⁹ Zoova kunndɛ kɛ kɛ é sú i’n e di aklunjɔɛ kpɛkun e su i e klunklo su. (Jue. 100:2; 2 Kor. 9:7) Ɔ maan e kwla usa e wun kɛ: ?Sɛ Ɲanmiɛn sulɛ nun’n e waan é yó like wie naan i yolɛ yoman e fɛ’n, ɔ fata kɛ e yo like sɔ’n kekle nun? I lɛ nun’n, akoto Pɔlu kle e ajalɛ kpa. Ɔ seli kɛ: “N finfin min wun like yɛ n sie min wunnɛn’n kɛ min kanga sa.” (1 Kor. 9:25-27, jnd) Ndɛ sɔ’n kle kɛ kannzɛ like nga Zoova seli Pɔlu kɛ ɔ yo’n, i yolɛ yomɛn i fɛ’n, sanngɛ ɔ miɛnnin i ɲin kpa yoli. Kɛ Pɔlu yoli sɔ’n, Zoova i klun jɔli i wun kpɛkun ɔ yoli i mo.—2 Tim. 4:7, 8.

10. ?Kannzɛ bɔbɔ like kun i yolɛ yoman e fɛ’n, sanngɛ sɛ e mian e ɲin e yo’n, i su ye benin yɛ é ɲɛ́n i-ɔ?

¹⁰ E kusu kɛ Ɲanmiɛn i sulɛ nun like kun i yolɛ yoman e fɛ mɔ sanngɛ e mian e ɲin e yo’n, Zoova i klun jɔ. Afin ɔ si kɛ kannzɛ bɔbɔ e kloman like’n sɔ’n i yolɛ’n, sanngɛ klolɛ mɔ e klo i’n, i ti yɛ e mian e ɲin e yo like sɔ’n niɔn. Ɔ maan kɛ ng’ɔ fa yrali Pɔlu su sa’n, e kusu ɔ́ yrá e su wie. (Jue. 126:5) Kɛ é wá wún kɛ Zoova yra e su’n, i sɔ yó maan like nga e sunnzunnin kɛ é yó’n i yolɛ’n yó e fɛ. Be flɛ aniaan bla kun kɛ Lusina. Ɔ tran nvle nga be flɛ i kɛ Polɔɲin’n i nun. Ɔ seli kɛ: “Ɔ ju wie’n, jasin fɛ bolɛ’n yoman min fɛ. I li kɛ afɛ’n yo dan’n yɛ min wun yo min sɔ kpa’n niɔn. Sanngɛ kɛ n mian min ɲin n kɔ jasin fɛ bolɛ’n, i sin aklunjɔɛ nga n di’n be kanman.” Siɛn’n, é wá kán ninnge nga be kwla uka e naan sɛ e waan é yó like kun’n, i yolɛ w’a yo e fɛ’n be ndɛ.

11. ?Wafa sɛ yɛ Zoova kwla uka e naan y’a nian e wun su-ɔ?

¹¹ E srɛ Ɲanmiɛn kɛ ɔ fɛ i wawɛ’n man e. Sɛ e waan é yó like kun naan i yolɛ ti kekle man e annzɛ i yolɛ yoman e fɛ’n, Ɲanmiɛn wawɛ’n kwla uka e naan y’a yo like sɔ’n. I sɔ’n ti’n, maan e srɛ Zoova kɛ ɔ fɛ i wawɛ’n man e naan e yi nzuɛn wie mɔ be kwla uka e naan y’a yia like nga e waan é yó’n i nuan’n, be nglo. (Lik. 11:13; Gal. 5:22, 23) Aniaan bian Davidi mɔ e kɛnnin i ndɛ’n, ɔ kannin wafa nga Ɲanmiɛn srɛlɛ’n ukɛli i’n i ndɛ. Blɛ wie nun’n, ɔ kunndɛli kɛ i ngunmin súan Biblu’n nun like titi. Ɔ maan ɔ srɛli Zoova kɛ ɔ fɛ i wawɛ ukɛ i naan y’a kwla yo like nga i waan ɔ́ yó’n. Aniaan bian’n seli kɛ: “Zoova fanngan nun’n, n kwla siesieli min blɛ i kpa naan min ngunmin m’an kwla suan Biblu’n nun like. I sɔ’n ti’n, n kpɛman i sɔ yolɛ’n i nun cɛn kun.”

12. ?Wafa sɛ yɛ ndɛ ng’ɔ o Akunndanfuɛ’n 11:4 nun’n, ɔ kwla uka e naan y’a yia like nga e sunnzunnin kɛ é yó’n i nuan-ɔn?

¹² Nán e se kɛ é mínndɛ kɛ lika’n yo kpa ka. Mɛn tɛ nga nun’n, lika’n su yoman kpa sa le. Ɔ maan sɛ e waan é mínndɛ kɛ lika’n yo kpa ka naan y’a yo like kun’n, e su yoman like sɔ’n le. (An kanngan Akunndanfuɛ’n 11:4 nun.) Be flɛ aniaan bian kun kɛ Deiniɛli. Ɔ seli kɛ: “Lika’n su yoman kpa le. Ɔ maan sɛ e waan é yó like kun’n, ɔ fataman kɛ e minndɛ lele, maan e bo i bo.” Be flɛ aniaan bian kun ekun kɛ Pɔlu yɛ ɔ tran nvle nga be flɛ i kɛ Uganda’n i nun. Ɔ kannin like uflɛ nga ti yɛ sɛ e waan é yó like kun’n, ɔ fataman kɛ e tu i cɛn’n e sie’n i ndɛ. Ɔ seli kɛ: “Kannzɛ bɔbɔ lika’n timan kpa naan e bo like nga e waan é yó’n i yolɛ bo’n, Zoova úka e naan y’a kwla yo like sɔ’n.”—Mal. 3:10.

13. ?Ngue ti yɛ sɛ e waan é yó like kun’n, ɔ fata kɛ e bo i bo blɛblɛ-ɔ?

¹³ Bo i bo blɛblɛ. Sɛ like nga e waan é yó’n i yolɛ ti kekle dan’n, i yolɛ su yoman e fɛ. Sɛ a sie i sɔ liɛ’n i nzɔliɛ ɔ lika’n, a kwla bo i bo blɛblɛ. I wie yɛle kɛ sɛ a kunndɛ kɛ á yí nzuɛn kpa wie i nglo’n, i bo bolɛ nun’n a kwla yi nzuɛn sɔ’n i nglo sa kanngan wie’m be nun. Asa’n, sɛ a kunndɛ kɛ á kánngan Biblu’n i wunmuan’n nun’n, i bo bolɛ nun’n a kwla fa blɛ kan kanngan nun. I sɔ yɛ Toma mɔ e kɛnnin i ndɛ’n ɔ yoli-ɔ. Ɔ kunndɛli kɛ afuɛ nuan kun nun’n ɔ́ kánngan Biblu’n i wunmuan’n nun. Sanngɛ i sɔ yolɛ’n ti kekle mɛn i. I bɔbɔ seli kɛ: “N sieli i  nzɔliɛ kɛ blɛ nga min waan ń fá kánngan Biblu’n nun’n, ɔ sɔnnin dan. Ɔ maan n fali ajalɛ uflɛ. Yɛle kɛ cɛn ba kun nun’n, n kannganman ndɛ tre wunmuan kun nun. Sanngɛ n bubu nun yɛ i bue kan nga n kanngan nun’n, n bu su akunndan. I sɔ mɔ n yoli ti’n, n ma kloli Biblu’n nun kannganlɛ.” Kɛ Biblu’n nun kannganlɛ’n yó Toma i fɛ’n, ɔ fali blɛ kpanngban kanngannin nun. Ɔ maan ɔ kwla kanngannin Biblu’n i wunmuan’n nun. c

14. ?Sa benin wie mun yɛ be kwla tanndan e ɲrun naan y’a yoman like nga e sunnzunnin kɛ é yó’n niɔn?

¹⁴ Kannzɛ e fua kpa annzɛ e mian e ɲin sɛ, sanngɛ sa wie’m be kwla tɔ e su. I wie yɛle kɛ ‘sa wie mɔ y’a sunnzunman’n” ɔ kwla ɲan e. Ɔ maan e su ɲanman blɛ naan y’a yia like nga e sunnzunnin kɛ é yó’n i nuan. (Aku. 9:11) Asa’n, sa kekle wie ti’n e sa sin kwla bubu e. Ɔ maan e su ɲanman wunmiɛn e yoman like nga e klo’n. (Ɲan. 24:10) Asa kusu’n, fɔ m’ɔ o e nun ti’n e kwla fa ajalɛ wie mɔ be ti’n e su kwlá yiaman like nga e sunnzunnin kɛ é yó’n i nuan-ɔn. (Rɔm. 7:23) Wie liɛ bɔbɔ’n, afɛ’n tin e su dan. (Mat. 26:43) ?Ɔ maan ngue yɛ ɔ kwla uka e naan y’a jran sa nga be tanndan e ɲrun’n, be ɲrun kekle-ɔ?

15. ?Ngue ti yɛ kannzɛ sa wie tanndan e ɲrun’n, i sɔ’n kleman kɛ e kwlá yoman like nga e sunnzunnin’n niɔn? An yiyi nun. (Jue Mun 145:14)

¹⁵ Kannzɛ sa wie tanndan ɔ ɲrun’n, i sɔ’n kleman kɛ a kwlá yoman like nga a sunnzunnin’n. Biblu’n se kɛ sa kekle’m be kwla tɔ e su kpɛ sunman. Sanngɛ ɔ se e weiin kɛ Zoova fanngan nun’n, e kwla jran be ɲrun kekle kpɛkun e yia like nga e sunnzunnin kɛ é yó’n i nuan. (An kanngan Jue Mun 145:14 nun.) Aniaan bian Filipu mɔ e kɛnnin i ndɛ’n, ɔ seli kɛ: “Blɛ nga be nun’n, m’an kwlá yoman like nga sunnzunnin’n, n faman min ɲin n sieman be su. Sanngɛ n fa min ɲin n sie i blɛ mɔ n mian min ɲin n bo like sɔ’n i yolɛ bo ekun’n i su.” Aniaan bian Davidi mɔ kɛnnin i ndɛ wie’n, ɔ seli kɛ: “Kɛ sa kekle’m be tɔ min su’n, n seman min wun kɛ sa sɔ’n wá tánndan min ɲrun. Sanngɛ n se min  wun kɛ sa sɔ’n nun’n, ɔ fata kɛ n kle Zoova kɛ n klo i tankaan kpa.” Ndɛ sɔ’n kle kɛ kannzɛ lika’n ti kekle e su sɛ’n, sanngɛ sɛ e mian e ɲin e yia like nga e waan é yó’n i nuan’n, é klé Zoova kɛ e klo kɛ i klun jɔ e wun. E si kɛ kɛ Zoova wun kɛ e mian e ɲin e yia like nga e sunnzunnin kɛ é yó’n i nuan’n, i sɔ’n yo i fɛ dan.

16. ?Wafa sɛ yɛ sa nga be tɔ e su’n be ti’n, e kwla wun ninnge wie’m be wlɛ-ɔ?

¹⁶ Sa nga be tɔ e su’n be ti’n, e kwla wun ninnge wie’m be wlɛ. Maan e bu like nga ti yɛ y’a kwlá yoman like nga e sunnzunnin kɛ é yó’n i su akunndan. Kpɛkun maan e usa e wun kɛ: ‘?Ngue yɛ ɔ fata kɛ n yo naan cɛn uflɛ’n m’an kwla yia like nga min waan ń yó’n i nuan-ɔn?’ (Ɲan. 27:12) Ɔ ju wie’n, sɛ e waan é yó like kun naan i yolɛ ti kekle dan e sa nun’n, i sɔ’n kwla kle kɛ e su kwlá yoman like sɔ’n. Sɛ a bu i kɛ i sɔ sa’n wie o ɔ su’n, bu like nga ɔ waan á yó’n i akunndan kpa nian sɛ á kwlá yó like sɔ’n sakpa-o. d Sɛ e kunndɛ kpa kɛ é yó like kun naan y’a kwlá yoman’n, Zoova su buman e fɔ i sɔ’n ti.—2 Kor. 8:12.

17. ?Ngue ti yɛ ɔ fataman kɛ e wla fi ninnge nga y’a dun mmua y’a yo be’n be su-ɔ?

¹⁷ Nán e wla fi ninnge nga y’a dun mmua y’a yo be’n be su. Biblu’n se kɛ: “Ɲanmiɛn yoman sa m’ɔ timan su’n. Ɔ maan junman nga amun di mɛnnin i’n […] i wla su fiman su.” (Ebr. 6:10) E kusu nán e wla fi ninnge nga e yoli be’n be su. I wie yɛle kɛ e nin Zoova e kwla trali janvuɛ, e kwla kɛnnin i ndɛ e kleli sran mun yɛ be kwla yoli e batɛmun. E miannin e ɲin kpa naan y’a kwla yo ninnge sɔ mun. Ɔ maan sɛ e waan é yó ninnge uflɛ wie mun ekun naan e mian e ɲin kpa’n, é kwlá yó be.—Fip. 3:16.

18. ?Kɛ é yó ninnge wie mun naan y’a kwla yia like nga e sunnzunnin’n i nuan’n, ngue yɛ ɔ fataman kɛ e wla fi su-ɔ? (An nian desɛn’n wie.)

¹⁸ E wunnin kɛ alie kanfuɛ’n yoli ninnge wie mun naan w’a kwla ju i juwlɛ. I wafa kunngba’n Zoova fanngan nun’n, e kwla yo like nga e sunnzunnin kɛ é yó’n. Sanngɛ nán e wla fi ndɛ nga su: Alie kanfuɛ kpanngban be fa be ɲin be sie i ninnge ɲɛnmɛn nga be wun be’n be su. Kɛ be yo sɔ’n be di aklunjɔɛ. I wafa kunngba’n, kɛ é yó ninnge wie mun naan y’a kwla yia like nga e sunnzunnin’n i nuan’n, nán e wla fi wafa nga Zoova uka e’n i su. I liɛ’n é dí aklunjɔɛ blɛ sɔ’n nun. (2 Kor. 4:7) Sɛ e sa sin w’a bubuman e naan e yia like nga e waan é yó’n i nuan, é ɲán su ye kpanngban.—Gal. 6:9.