1. ?Ngue yɛ Zoova wlɛ i sufuɛ’m be fanngan kɛ be yo-ɔ? (An nian foto’n wie.)

 ?SƐ E kunndɛ kɛ be fɔnvɔ e annzɛ be kle e atin’n, wan yɛ e kwla se i kɛ ɔ yo sɔ man e-ɔ? E kwlaa e si kosan sɔ’n i su tɛlɛ’n. Ɲanmiɛn Zoova yɛ e kwla srɛ i kɛ ɔ uka e-ɔ. Biblu’n nun’n, ɔ se e kɛ e ‘srɛ i titi.’ I sɔ’n kle kɛ ɔ kunndɛ kpa kɛ e srɛ i kpɛ sunman. (1 Tes. 5:17) Ɔ maan, e kwla srɛ Ɲanmiɛn blɛ kwlaa nun. Kpɛkun e kwla srɛ i kɛ ɔ kle e atin sa kwlaa nun. (Ɲan. 3:5, 6) Kɛ mɔ e Ɲanmiɛn Zoova ti aklunyefuɛ ti’n, ɔ man e atin kɛ e srɛ i blɛ kwlaa nga e klo’n.

2. ?Ngue yɛ é wá kɛ́n i ndɛ like suanlɛ nga nun-ɔn?

² E bu Ɲanmiɛn srɛlɛ’n i like cinnjin kpa. Sanngɛ e ti mɔ e ɲɛnmɛn i’n ti’n, kɛ ɔ ko yo naan y’a fa blɛ y’a srɛ Ɲanmiɛn’n ɔ ti kekle. Asa kusu’n ɔ ju wie’n, ɔ yo e kɛ ɔ fata kɛ e srɛ Ɲanmiɛn kpa tra laa’n sa. Ɲanmiɛn Ndɛ’n man e Ɲanmiɛn srɛlɛ’n i su afɔtuɛ kpanngban mɔ be kwla uka e-ɔ. Like suanlɛ nga nun’n, é wá kán like nga e kwla yo naan y’a ɲan blɛ y’a srɛ Ɲanmiɛn’n i ndɛ. I lɛ’n nun’n, é wá fá e ɲin é síe i ajalɛ nga Zezi kle e’n i su. Asa’n, é wá kán like nnun mɔ be kwla uka e naan y’a srɛ Ɲanmiɛn kpa y’a tra laa’n be ndɛ wie.

3. ?Ɲanmiɛn srɛlɛ’n i su like benin yɛ Zezi si i-ɔ?

³ Zezi si kɛ Zoova bu srɛlɛ nga e srɛ i’n i like cinnjin kpa. Afuɛ kpanngban kpa ka naan w’a ba asiɛ’n su wa’n, ɔ wunnin i kɛ i Si tɛlɛ i sufuɛ kpa’m be srɛlɛ’n su. I wie yɛle kɛ ɔ wunnin i kɛ i Si tɛli Anin nin Davidi nin Eli nin i sufuɛ wie  mun ekun be srɛlɛ’n su. (1 Sam. 1:10, 11, 20; 1 Fam. 19:4-6; Jue. 32:5) I sɔ’n ti’n, Zezi seli i sɔnnzɔnfuɛ’m be kɛ be srɛ Ɲanmiɛn kpɛ sunman yɛ be lafi i su.—Mat. 7:7-11.

4. ?Ngue yɛ Zezi i Ɲanmiɛn srɛlɛ’n kle e-ɔ?

⁴ Zoova i srɛlɛ’n nun’n, Zezi kleli i sɔnnzɔnfuɛ’m be ajalɛ kpa. Kɛ ɔ́ dí Ɲanmiɛn i junman’n, ɔ srɛli Ɲanmiɛn kpɛ sunman. Kannzɛ ɔ ɲɛnmɛn i ti naan sran’m be sɔnnin i su’n, sanngɛ ɔ fali blɛ srɛli Ɲanmiɛn. (Mar. 6:31, 45, 46) I wie yɛle kɛ ɔ jaso nglɛmun ndɛ kpa’n kpɛkun ɔ kɔ lika diin kun nun ko srɛ ɲanmiɛn. (Mar. 1:35) Blɛ kun nun’n, ka naan w’a fa ajalɛ cinnjin kpa kun’n, ɔ srɛli Ɲanmiɛn kɔnguɛ wunmuan’n nun. (Lik. 6:12, 13) Asa’n, kɔnguɛ kasiɛn ka naan w’a wu naan w’a yia like cinnjin kpa nga ti yɛ ɔ bali asiɛ’n su wa’n i nuan’n, ɔ srɛli Ɲanmiɛn kpɛ sunman.—Mat. 26:39, 42, 44.

5. ?Ajalɛ benin yɛ Zezi kle e Ɲanmiɛn srɛlɛ’n nun-ɔ?

⁵ Zezi i su ndɛ’n kle e kɛ kannzɛ e ɲanman e ti sɛ’n, sanngɛ ɔ fata kɛ e fa blɛ e srɛ Ɲanmiɛn. Kɛ Zezi sa’n, e kwla jaso nglɛmun ndɛ kpa’n e srɛ Ɲanmiɛn annzɛ e kwla srɛ Ɲanmiɛn kɔnguɛ kɛ sran’m be kwlaa be ko la’n. Kɛ e yo sɔ’n, e kle Zoova kɛ e bu srɛlɛ mɔ e kwla srɛ i’n i like cinnjin. Be flɛ aniaan bla kun kɛ Linin. Kpɛ klikli nga be seli i kɛ ɔ kwla srɛ Ɲanmiɛn’n, wafa nga i wun yoli’n i wla w’a fiman su. Ɔ seli kɛ: “Kɛ n wunnin i wlɛ kɛ n kwla srɛ Zoova blɛ kwlaa nun’n, n ma buli Zoova kɛ min janvuɛ kpa kun sa yɛ n kunndɛli kɛ ń srɛ́ i kpa trá laa’n.” E nun kpanngban e wun yo e kɛ Linin liɛ’n sa. Siɛn’n, maan e fa e ɲin e sie i like cinnjin nnun mɔ e kwla fa wlɛ i e srɛlɛ’n nun’n be su.

6. ?Kɛ nga Sa Nglo Yilɛ 4:10, 11 fa kan’n sa’n, ngue yɛ ɔ fata kɛ e yo-ɔ?

⁶ Manman Zoova. Aolia nun’n, akoto Zan wunnin kpɛnngbɛn 24 mɔ be o ɲanmiɛn su lɔ be su manman Zoova’n. Kɛ bé mɛ́nmɛ́n i’n be se kɛ: “Sɛ be manman wɔ, be yi wɔ ayɛ naan be se kɛ a le tinmin’n ɔ ti su.” (An kanngan Sa Nglo Yilɛ 4:10, 11 nun.) Anzi’m be kusu ninnge nga be ti’n, be kwla manman Zoova kpɛkun be yi i ayɛ’n, be sɔnnin. I wie yɛle kɛ be nin Zoova yɛ be tran ɲanmiɛn su lɔ-ɔ yɛ be si i kpa.  Asa’n, be wun kɛ ninnge ng’ɔ yili be’n, be yi i nzuɛn’m be nglo. Kɛ be fa be ɲin be sie i wafa nga Zoova yo ninnge mun’n i su’n, i sɔ’n yo maan be mɛnmɛn i.—Zɔb. 38:4-7.

7. ?Ngue ti yɛ ɔ fata kɛ e manman Zoova-ɔ?

⁷ E kusu kɛ é srɛ́ Zoova’n, e kwla mɛnmɛn i wie. E kwla kan like nga ti yɛ e klo i’n ɔ nin like ng’ɔ yo e klanman i wun’n, be ndɛ. Kɛ é kánngan Biblu’n nun’n ɔ nin kɛ é súan nun like’n, e kwla fa e ɲin e sie i Zoova i nzuɛn nga be yo e ɲɛnmɛn kpa’n be su. (Zɔb. 37:23; Rɔm. 11:33) I sin’n, kɛ é srɛ́ i’n e kwla kan sa nga ti yɛ i nzuɛn sɔ’m be yo e ɲɛnmɛn’n i ndɛ e kle i. Ninnge ng’ɔ yo man e bɔbɔ nin e niaan mun ti’n, e kwla mɛnmɛn i wie. I wie yɛle kɛ ɔ nian e lika kpɛkun ɔ sasa e titi.—1 Sam. 1:27; 2:1, 2.

8. An kan ninnge nga be ti’n, e kwla srɛ Zoova e lɛ i ase’n be nun wie’m be ndɛ. (1 Tesalonikifuɛ Mun 5:18)

⁸ La Zoova i ase. Be diman ninnge nga be ti’n, e kwla la Zoova i ase’n be yalɛ. (An kanngan 1 Tesalonikifuɛ Mun 5:18 nun.) Ninnge kpakpa nga e le be’n be ti’n, e kwla lɛ i ase. Afin like kpa kwlaa nga e le be’n be fin i. (Zak. 1:17) Asiɛ m’ɔ yili i klanman’n nin i su ninnge’m be ti’n, e kwla srɛ i e lɛ i ase. Asa’n, e awlobofuɛ mun nin e janvuɛ mun ɔ nin ninnge kpakpa nga i dunman nun’n é wá ɲán be e ɲrun lɔ’n be ti’n, e kwla lɛ i ase wie. Asa kusu’n, kɛ m’ɔ man e atin kɛ e nin i e tra janvuɛ’n ti’n, e kwla srɛ i e lɛ i ase.

9. ?Ngue ti yɛ ɔ fata kɛ e kle Zoova kɛ e si ye-ɔ?

⁹ Ɔ ju wie’n, ɔ fata kɛ e mian e ɲin naan y’a wun like nga ti yɛ ɔ fata kɛ e srɛ Zoova e lɛ i ase’n i wlɛ. Andɛ’n, e o mɛn kun mɔ i nunfuɛ’m be siman ye kaan sa’n i nun. Kpɛ sunman’n, ninnge nga sran’m be kwla ɲan be’n, be akunndan yɛ be bu i sa trilili-ɔ. Be siman like nga be le i’n i su ye. Sɛ e yo kɛ sran sɔ’m be sa’n, kɛ é srɛ́ Zoova’n like nga e kunndɛ kɛ ɔ yo man e’n, i ndɛ yɛ é kɛ́n i sa trilili-ɔ. Kɛ ɔ ko yo naan i sɔ sa’n w’a juman e su’n, ɔ fata kɛ sa kwlaa nun’n e kle Zoova kɛ e si ye yɛ e srɛ i e lɛ i ase.—Lik. 6:45.

10. ?Kɛ aniaan bla Kiɔngu-Suku kleli kɛ ɔ si ye’n, wafa sɛ yɛ i sɔ’n ukɛli i naan w’a jrɛn i su sa’n i ɲrun kekle-ɔ? (An nian foto’n wie.)

¹⁰ Sɛ e si ye’n, sɛ sa tɔ e su’n i sɔ’n kwla uka e naan y’a jran kekle. I wie yɛle aniaan bla kun mɔ be flɛ i kɛ Kiɔngu-Suku’n i liɛ’n. Be kɛnnin i ndɛ afuɛ 2015, Zanvie Sasafuɛ Tranwlɛ’n nun. Dɔɔtrɔfuɛ’m be wunnin kɛ kansɛli o i afɔkɔ’n nun naan w’a fɛ i afɔkɔ’n wunmuan’n. Aniaan bla’n seli kɛ: “Kɛ n tili ndɛ sɔ’n, min sa sin bubuli min dan yɛ ɔ yoli min kɛ min liɛ w’a wie sa. Ɔ maan srɛ kunnin min kpa.” ?Ngue yɛ ɔ ukali aniaan bla’n naan w’a jran kekle-ɔ? Ɔ seli kɛ cɛn kwlakwla’n ka naan w’a ko la’n, ɔ fu i sua’n i ti su gbagblagba’n su lɔ kpɛkun ɔ mɛn i nɛn’n su srɛ Zoova lɛ i ase. Blɛ sɔ’n nun’n, ɔ kan ninnge nga Zoova yo mɛnnin i aliɛ ba kun nun’n, be nun nnun  be ndɛ. Kɛ ɔ yo sɔ’n, i wla gua ase kpɛkun ɔ ɲan wunmiɛn su Zoova. Asa’n, ɔ wunnin i wlɛ kɛ blɛ kekle’n nun’n, Zoova suɛn i sufuɛ’m be bo. Kpɛkun ɔ sieli i nzɔliɛ kɛ ninnge nga Zoova yo man e’n, be sɔnnin tra sa kekle nga be tɔ e su’n. Kɛ aniaan bla Kiɔngu-Suku liɛ’n sa’n, sa nga be tɔ e su’n be kwla yo kekle sɔ. Sanngɛ ninnge nga be ti’n e kwla srɛ Zoova e lɛ i ase’n be sɔnnin. Kɛ e srɛ Zoova e lɛ i ase’n, i sɔ’n yo maan e wla gua ase. Asa’n i sɔ’n kwla uka e naan y’a jran e su sa’m be ɲrun kekle.

11. ?Kɛ Zezi sɛli i sin ɲanmiɛn su lɔ’n, ngue ti yɛ ɔ fata kɛ be wlɛ i sɔnnzɔnfuɛ’m be yakpa-ɔ?

¹¹ Se Zoova kɛ ɔ man ɔ wunmiɛn naan w’a kwla bo jasin fɛ’n. Ka naan Zezi w’a sɛ i sin ɲanmiɛn su lɔ’n, ɔ seli i sɔnnzɔnfuɛ’m be kɛ be kɛn i ndɛ ‘Zerizalɛmun lɛ, nin Zide wunmuan’n nun, ɔ nin Samari lele fá jú asiɛ’n i tiwa lɔ.’ (Yol. 1:8; Lik. 24:46-48) Kɛ i osu lali nun kan’n, Zifu’m be kpɛnngbɛn’m be trali akoto Piɛli nin Zan kpɛkun be fali be ɔli Zifu’m be Jɔlɛ Difuɛ Dandan’m be ja su. Jɔlɛ difuɛ sɔ’m be wlanwlannin akoto mun yɛ be seli be kɛ be yaci jasin fɛ’n i bolɛ. (Yol. 4:18, 21) ?Kɛ be yoli sɔ’n, ngue yɛ Piɛli nin Zan be yoli-ɔ?

12. ?Kɛ nga Sa Nga Be Yoli’n 4:29, 31 fa kan’n sa’n, ngue yɛ Zezi i sɔnnzɔnfuɛ’m be yoli-ɔ?

¹² Kannzɛ Zifu’m be kpɛnngbɛn’m be wlanwlannin akoto mun’n, sanngɛ Piɛli nin Zan be seli be kɛ: “Sɛ Ɲanmiɛn ɲrun’n ɔ ti su kɛ e fa amun ndɛ’n su naan e yaci Ɲanmiɛn i liɛ lɛ’n, amun bɔbɔ amun bu i sin be nian. E liɛ’n, like nga e wunnin i’n, ɔ nin ndɛ nga e tili’n, e kwlá yaciman be ndɛ kanlɛ.” (Yol. 4:19, 20) Kɛ be yacili Piɛli nin Zan be nun’n, be nin Zezi i sɔnnzɔnfuɛ onga’m be mannin be nɛn’n su be srɛli Zoova. Be seli i kɛ be kunndɛ kɛ bé yó i klun sa’n. Ɔ maan be seli Zoova kɛ: “Uka ɔ sufuɛ mun naan be kan ɔ ndɛ’n yakpa su titi.” Zoova kusu tɛli be srɛlɛ’n su.—An kanngan Sa Nga Be Yoli’n 4:29, 31 nun.

13. ?Ngue yɛ aniaan bian Jinnin-Yuku i su ndɛ’n kle e-ɔ?

¹³ Sɛ nvle nga e tran nun’n i awa’n se e kɛ nán e bo jasin fɛ’n kun’n, maan e nian Zezi i sɔnnzɔnfuɛ’m be ajalɛ’n su. Yɛle kɛ e bo jasin fɛ’n titi. I wie yɛle aniaan bian kun mɔ be flɛ i kɛ Jinin-Yuku’n i liɛ’n. Kɛ mɔ i waan ɔ diman sonja’n ti’n be wlɛli i bisua. Bisua lɔ’n, be seli i kɛ ɔ niɛn i wiengu bisuafuɛ nga be fa be sie i aamiɛn’n be lika. Sanngɛ be seli i kɛ junman nga be fa mɛnnin i’n i ngunmin cɛ yɛ ɔ kwla kɛn i ndɛ kle bisuafuɛ sɔ mun-ɔn. Kpɛkun be seli i kɛ ɔ fataman kɛ ɔ kan Ɲanmiɛn ndɛ kle be. I sɔ’n ti’n, ɔ srɛli Zoova kɛ ɔ wlɛ i yakpa yɛ ɔ ukɛ i naan sɛ ɔ ɲɛn i wun atin’n, ɔ kɛn i ndɛ kle bisuafuɛ mun. (Yol. 5:29) Aniaan bian’n seli kɛ: “Zoova tɛli min srɛlɛ’n su. Yɛle kɛ ɔ mannin min wunmiɛn nin ngwlɛlɛ. Ɔ maan n fali miniti nnun n kleli bisuafuɛ kpanngban be Biblu’n nun like sua ba nga be o nun’n be anuan’n nun lɛ. Kɔnguɛ’n n klɛ be lɛtri, kpɛkun kɛ lika’n cɛn’n n fa man be.” Kɛ aniaan bian Jinnin-Yuku sa’n, e kusu e kwla srɛ Zoova kɛ ɔ wla e yakpa yɛ ɔ man e ngwlɛlɛ. Sɛ e yo sɔ’n, e kwla lafi su kɛ Zoova úka e naan y’a kwla bo jasin fɛ’n.

14. ?Kɛ sa’m be o e su’n, ngue yɛ ɔ kwla uka e-ɔ? (Jue Mun 37:3, 5)

¹⁴ Srɛ Zoova kɛ ɔ uka ɔ naan a jran sa nga be tɔ ɔ su’n be ɲrun kekle. Sa sunman be o aniaan kpanngban be su. Wie’m be ti tukpacifuɛ, wie’m be ti nun w’a sanngan yɛ wie’m be awlɛn su sran wie’m be wuli. Asa’n, ndɛ o wie’m be awlo’n nun yɛ wie’m be liɛ’n, Zoova mɔ be su i’n ti’n, sran’m be kle yalɛ yɛ sa uflɛ o wie’m be su. Kɛ tukpacɛ m’ɔ sa ndɛndɛ’n tru lika’n nun’n  annzɛ alɛ tɔ’n, sa sɔ’m be ɲrun kekle jranlɛ’n timan pɔpɔ kaan sa. Sɛ i sɔ sa’n wie o ɔ su’n, srɛ Zoova naan kan wafa nga ɔ wun yo wɔ’n i ndɛ kle i. Kan ɔ klun ndɛ kle i kɛ a su kan ɔ klun ndɛ kle ɔ janvuɛ kpa kun sa. Sɛ a yo sɔ’n, Zoova “yó ng’ɔ nin ɔ fata’n mán wɔ.”—An kanngan Jue Mun 37:3, 5 nun.

15. ?Wafa sɛ yɛ Ɲanmiɛn srɛlɛ’n kwla uka e naan y’a ‘tra e awlɛn blɛ kekle nun-ɔn’? An fa sa kun be yiyi nun.

¹⁵ Sɛ Ɲanmiɛn srɛlɛ’n kaci e nzuɛn’n, i sɔ’n úka e naan y’a ‘tra e awlɛn blɛ kekle nun.’ (Rɔm. 12:12) Zoova si sa nga be o i sufuɛ’m be su’n yɛ “ɔ ti kpanlɛ mɔ be kpan flɛ i kɛ ɔ uka be’n.” (Jue. 145:18, 19) Aniaan bla kun mɔ be flɛ i kɛ Klisiti’n ɔ wunnin i kɛ ndɛ sɔ’n ti nanwlɛ. Aniaan bla’n le afuɛ 29 yɛ ɔ ti atin bofuɛ. Tukpacɛ kekle kun ka lɛ yoli i. I sɔ’n ti’n, i ti nun wa sanngannin dan kpa. I sin’n, ɔ tili i kɛ tukpacɛ kun o i manmin wun naan tukpacɛ sɔ’n ɔ́ kún i. Klisiti seli kɛ: “N srɛli Zoova tankaan kɛ ɔ man min wunmiɛn naan n jran kekle aliɛ ba kwlaa nun. N yoli Zoova i sulɛ nun ninnge mun titi. I wie yɛle aɲia’m be bo kɔlɛ’n nin min ngunmin min Biblu’n nun like suanlɛ’n.” Ɔ seli ekun kɛ: “Ɲanmiɛn srɛlɛ’n ukali min kpa blɛ kekle sɔ’n nun. Kɛ mɔ n si kɛ Zoova nin min o nun titi ti’n, i sɔ’n fɔnvɔli min dan. Tukpacɛ ng’ɔ o min wun w’a kaman lɛ w’a wieman, sanngɛ n wunnin kɛ Zoova tɛli min srɛlɛ’m be su. Yɛle kɛ ɔ yoli maan min wun jɔli min fɔuun yɛ min wla guali ase.” Nán maan e wla fi ndɛ nga su le: “Zoova si be nga be nin i o nun titi mɔ sa tɔ be su’n be de.”—2 Piɛ. 2:9.

16. ?Ngue ti yɛ sɛ Zoova w’a ukaman e’n e su kwlá jranman sa tɛ’n i ɲrun kekle-ɔ?

¹⁶ Srɛ Zoova kɛ ɔ uka naan a jran sa tɛ’n i ɲrun kekle. Kɛ mɔ fɔ o e nun’n ti’n, ɔ fata kɛ e mian e ɲin kpa naan y’a yoman like ng’ɔ ti tɛ’n. Asa’n, Satan yo like kwlaa ng’ɔ kwla yo naan y’a tɔ sa tɛ’n nun’n. I wie yɛle kɛ ɔ kunndɛ kɛ ɔ́ sáci e akunndan’n. I sɔ’n  ti’n, ɔ fa be ɲin su yiyilɛ ninnge nga be timan kpa’n fa sie e ɲrun. Sɛ e fa ninnge sɔ mun e yiyi e ɲin su’n, e akunndan’n trán ninnge nga Zoova kloman be’n be su. Kpɛkun i sɔ’n kwla yo maan e yo sa tɛ.—Mar. 7:21-23; Zak. 1:14, 15.

17. ?Sɛ e srɛ Zoova kɛ ɔ uka e naan y’a yoman sa tɛ’n, wafa sɛ yɛ e bɔbɔ e kwla yo e srɛlɛ’n i nuan su sa-ɔ? (An nian foto’n wie.)

¹⁷ Sɛ e kunndɛ kɛ é jrán sa tɛ’n i ɲrun kekle’n, ɔ fata kɛ Zoova uka e. Srɛlɛ nga Zezi kleli i sɔnnzɔnfuɛ mun’n i nun’n, ɔ seli kɛ: “Nán yaci e lɛ naan be laka e, sanngɛ de e klunwifuɛ’n i sa nun.” (Mat. 6:13) Zoova kunndɛ kpa kɛ ɔ́ úka e, sanngɛ ɔ fata kɛ e bɔbɔ e se i kɛ ɔ uka e. Kɛ e ko srɛ i kusu’n, ɔ fata kɛ e yo e srɛlɛ sɔ’n i nuan su sa. Yɛle kɛ maan e fa ajalɛ trele wie mun naan y’a buman akunndan nga mɛn’n nunfuɛ’m be bu’n wie yɛ e mian e ɲin naan y’a faman ato ndɛ nga b’a tru Satan i mɛn’n nun’n be su. (Jue. 97:10) I lɛ nun’n, maan e kanngan Biblu’n nun cɛn kwlakwla yɛ e suan nun like. I liɛ’n e akunndan’n trán ninnge nga be ti kpa’n be su. Kpɛkun maan e tran aɲia’m be kwlaa be bo yɛ e tu e klun e bo jasin fɛ’n. Sɛ e yo sɔ’n é sásá e akunndan’n. Zoova kusu ta e nda kɛ ɔ su kplinman su kɛ sa nga be tɔ e su’n, be tra e kpɛn.—1 Kor. 10:12, 13.

18. ?Ɲanmiɛn srɛlɛ’n nun’n, ngue yɛ ɔ fata kɛ e kwlakwla e yo-ɔ?

¹⁸ Sɛ e tinuntinun e kunndɛ kɛ é jrán kekle mɛn m’ɔ w’a yo tɛ yɛ’n i awieliɛ blɛ nga nun’n, ɔ fata kɛ Ɲanmiɛn srɛlɛ’n kaci e nzuɛn. Ɔ maan, aliɛ ba kwlaa nun’n, maan e fa blɛ e srɛ Ɲanmiɛn. Zoova bɔbɔ kunndɛ kɛ e ‘kan ndɛ ng’ɔ o e awlɛn’n nun’n i kwlaa e kle i.’ (Jue. 62:8) Yɛ ninnge kwlaa ng’ɔ yo man e ti’n, maan e mɛnmɛn i yɛ e lɛ i ase. Asa’n, e srɛ i kɛ ɔ wla e yakpa naan y’a kwla bo jasin fɛ’n. Yɛ e srɛ i kɛ ɔ uka e naan e jran sa kwlaa nga be tɔ e su’n be ɲrun kekle. Kpɛkun ɔ uka e naan y’a tɔman sa tɛ’n nun. Nán e yaci like fi nun annzɛ sran fi nun naan ɔ tanndan e ɲrun naan y’a kwlá srɛman Zoova titi. ?Sanngɛ wafa sɛ yɛ Zoova tɛ e srɛlɛ’m be su-ɔ? Like suanlɛ nga i sin liɛ’n nun’n, é wá tɛ́ kosan sɔ’n su.