1. ?Ngue yɛ siɛ nin niɛn’m be kunndɛ kɛ be mma’m be yo-ɔ?

 SIƐ nin niɛn mun, e si kɛ amun kunndɛ kpa kɛ amún úka amun mma mun naan be si Zoova naan be klo i. Sanngɛ be kwlá wunman Ɲanmiɛn. ?Ɔ maan amún yó sɛ naan amun a uka be naan b’a wun kɛ Ɲanmiɛn ti sran jrɛiin kun naan b’a fa be wun b’a mɛntɛn i?—Zak. 4:8.

2. ?Wafa sɛ yɛ siɛ nin niɛn’m be kwla uka be mma mun naan b’a si Zoova i nzuɛn mun-ɔn?

² Like cinnjin kpa nga siɛ nin niɛn’m be kwla yo naan b’a uka be mma mun naan be nin Zoova be afiɛn w’a mantan kpa’n, yɛle be Biblu’n nun like klelɛ. (2 Tim. 3:14-17) Sanngɛ Biblu’n kan like uflɛ ekun m’ɔ kwla uka ba mun naan b’a si Zoova i su like’n i ndɛ wie. Ɲanndra Mun fluwa’n nun’n, be kan siɛ kun m’ɔ se i wa’n kɛ nɛ́n i wla fi Zoova i nzuɛn mɔ ninnge ng’ɔ yili be’n be yi i nglo’n be su le’n i ndɛ. (Ɲan. 3:19-21) Like suanlɛ nga nun’n, é wá kán wafa nga siɛ nin niɛn’m be kwla fa ninnge nga Zoova yili be’n be uka be mma mun naan b’a si Zoova kpa’n i ndɛ.

3. ?Ngue yɛ ɔ fata kɛ siɛ nin niɛn’m be uka be mma mun naan be yo-ɔ?

³ Biblu’n se kɛ: “Kannzɛ sran fi nin-a wunman Ɲanmiɛn le’n, sanngɛ kɛ ɔ fin cɛn nga Ɲanmiɛn yili mɛn’n lele mɔ w’a fa ju andɛ’n, ninnge ng’ɔ yili be’n be ti’n, sran’m be wun kɛ i tinmin’n ti anannganman naan ɔ ti Ɲanmiɛn.” (Rɔm. 1:20) Siɛ nin niɛn mun, e si kɛ blɛ wie nun’n amun nin amun mma mun be fite be ko yiyi be ɲin su. Blɛ sɔ’n nun’n, amun fa be ɲin sie i ‘ninnge nga Zoova yili be’n’ be su naan be si i nzuɛn mun.  Maan e kan wafa nga amun kwla nian Zezi i ajalɛ’n su’n i ndɛ.

4. ?Wafa sɛ yɛ Zezi fali ninnge nga Ɲanmiɛn yili be’n kleli sran’m be like-ɔ? (Liki 12:24, 27-30)

⁴ Maan e kan wafa nga Zezi fali ninnge nga Ɲanmiɛn yili be’n kleli sran’m be like’n i ndɛ kan. Cɛn kun’n, ɔ seli i sɔnnzɔnfuɛ’m be kɛ be fa be ɲin be sie i kɔkɔkuankuan mun nin ijre’m be su. (An kanngan Liki 12:24, 27-30 nun.) Zezi kwla kan nnɛn annzɛ ijre kaka be ndɛ. Sanngɛ anunman nin ijre nga i sɔnnzɔnfuɛ’m be si be kpa’n be ndɛ yɛ ɔ kannin-ɔn. Atrɛkpa’n, blɛ mɔ Zezi kán ninnge sɔ’m be ndɛ’n, i sɔnnzɔnfuɛ’m be wun kɔkɔkuankuan mɔ be su tu sin’n nin ijre mun. Atrɛkpa kusu’n, kɛ Zezi íjɔ’n nn ɔ́ tínndin i sa ninnge sɔ’m be wun. ?I sin’n, ngue yɛ ɔ yoli-ɔ? Ɔ kleli be kɛ be Si m’ɔ o ɲanmiɛn su lɔ’n i klun ti ufue. Yɛle kɛ sɛ Zoova nian kɔkɔkuankuan nin ijre’m be lika’n, nn ɔ́ níɛn i sufuɛ kpa’m be lika wie.

5. ?Wafa sɛ yɛ siɛ nin niɛn’m be kwla uka be mma mun naan b’a bu ninnge nga Zoova yili be’n be su akunndan-ɔn?

⁵ ?Siɛ nin niɛn mun kɛ amún klé amun mma’m be like’n, wafa sɛ yɛ amun kwla nian Zezi i ajalɛ’n su-ɔ? Amun kwla kan nnɛn annzɛ waka wie m’ɔ yo amun klanman kpa’n i ndɛ kle amun mma mun. Blɛ sɔ’n nun’n, amun kan Zoova i su like nga ninnge sɔ’m be kle e’n i ndɛ wie. Asa’n, amun kwla se be kɛ be kan nnɛn annzɛ waka wie mɔ be klo i kpa’n i ndɛ. Ɔ maan amun nin amun mma’m be koko ninnge nga be klo be’n be su yalɛ. I liɛ’n sɛ amun kan Zoova i su like nga ninnge sɔ’m be kle e’n i ndɛ’n, be kwla sie be su amun nuan bo.

6. ?Ajalɛ benin yɛ Klisitofɛɛ i manmin kle e-ɔ?

⁶ ?Siɛ nin niɛn mun, ɔ ti cinnjin kɛ amun fa blɛ be suan nnɛn annzɛ waka wie i su like kpa ka naan amun nin amun mma’m b’a koko Zoova i su like nga ninnge sɔ’m be kle e’n i su yalɛ? I sɔ yolɛ’n timan cinnjin sɔ liɛ. Zezi w’a kanman kɔkɔkuankuan mun nin ijre’m be su ndɛ tɛkɛtɛkɛ kwlaa. I yo, sɛ amun nin amun mma’m be koko ninnge nga Ɲanmiɛn yili be’n be su ninnge tɛkɛtɛkɛ wie’m be su yalɛ’n, i sɔ’n timan tɛ. Sanngɛ ɔ ju wie’n, ndɛ annzɛ kosan kpe kan kwla uka be naan b’a wun ndɛ cinnjin nga amun waan bé kán’n i wlɛ. I sɔ yɛ aniaan bian kun m’ɔ be flɛ i kɛ Klisitofɛɛ i manmin yoli-ɔ. Aniaan bian’n seli kɛ: “Min bakan nun’n, e manmin kan ninnge nga be bo sin yia e’n be su ndɛ wie mun kle e naan e klo be. I wie yɛle kɛ sɛ e kɔ wlanwlanlɛ naan e ju oka wie wun lɛ’n, ɔ se e kɛ: ‘Amun nian kɛ oka nga ti fleiin kpɛkun ɔ ti klanman-ɔn. ?Amun wunman kɛ Zoova ti dan?’ Sɛ e o jenvie nuan’n, ɔ se e kɛ: ‘Amun nian kɛ wunmiɛn o jenvie’n i bolɛ m’ɔ bo’n nun-ɔn. ?I sɔ’n kleman kɛ Ɲanmiɛn le tinmin?’” Klisitofɛɛ seli ekun kɛ: “Ndɛ nga e manmin kannin’n, be ukali e naan y’a bu akunndan. Yɛ andɛ nin andɛ be te uka e.”

7. ?Wafa sɛ yɛ amun kwla uka amun mma mun naan b’a bu ninnge nga Ɲanmiɛn yili be’n be su akunndan-ɔn?

⁷ Kɛ amun mma’m bé ɲín’n amun uka be naan be bu ninnge nga Zoova yili be’n be su akunndan naan be wun Zoova i su like nga ninnge sɔ’m be kle be’n. Amun fa be ɲin sie i like kun mɔ Zoova yili’n su, kpɛkun amun usa be kɛ: “?Zoova i su like benin yɛ like nga kle amun-ɔn?” Atrɛkpa’n, wafa nga bé wá tɛ́ kosan sɔ’n su’n, ɔ́ bó amun nuan.—Mat. 21:16.

8. ?Kɛ Izraɛlifuɛ’m be nin be mma’m bé tú ajalɛ’n, ngue yɛ be kwla yo-ɔ?

⁸ Zoova seli Izraɛlifuɛ’m be kɛ sɛ be nin be mma’m be su ‘nanti atin’n nun’n’ maan be kle be like. (Mml. 11:19) Kusu be diman atin’m be yalɛ Izraɛli nvle’n nun. Atin sɔ’m be su’n, be kwla wun nnɛn mun nin  anunman nin flɛli mun. Kɛ Izraɛlifuɛ’m be nin be mma’m bé tú ajalɛ’n, be kwla fa be ɲin be sie i ninnge nga Zoova yili be’n be su. Siɛ nin niɛn mun, amun nian ajalɛ sɔ’n su be kle amun mma’m be like wie. Siɛn’n, maan e kan wafa nga siɛ nin niɛn wie’m be yoli sɔ’n i ndɛ.

9. ?Ngue like yɛ Punita nin Kati’n be kle e-ɔ?

⁹ Be flɛ niɛn kun m’ɔ tran Ɛndi lɔ klɔ dan kun su’n kɛ Punita. Ɔ seli kɛ: “Kɛ min nin min wun nin ba mun é kɔ́ e osufuɛ nga be tran klɔ kanngan’m be su’n be osu nianlɛ’n, blɛ sɔ’n nun’n, e fa ba’m be ɲin sie i ninnge nga Zoova yili be’n be su. N sieli i nzɔliɛ kɛ kɛ e mma’m be nunman klɔ dan’n su’n, kɛ e kan ninnge nga Ɲanmiɛn yili be’n be ndɛ e kle be’n, be wun i wlɛ kpa. Afin klɔ dan’n su lɔ’n, lika’n ti woyowoyo dan.” Siɛ nin niɛn mun, amun mma’m be wla su fiman ninnge nga Ɲanmiɛn yili be’n be su yalɛ nga amun nin be kokoli’n i su le. Be flɛ Aniaan bla kun kɛ Kati’n yɛ ɔ fin Mɔldavi. Ɔ seli kɛ: “Like nga min kaan nun’n, e nin min si nin min nin e yoli mɔ min wla w’a fiman su’n, yɛle blɛ mɔ e nin be e kɔ bo nun lɔ wlanwlanlɛ’n. Blɛ sɔ’n nun’n, be fali min ɲin be sieli i ninnge nga Zoova yili be’n be su. Ɔ maan, n wunnin i wlɛ kɛ Zoova yɛ ɔ yili ninnge mun-ɔn. I sɔ mɔ be yoli ti’n, ń lá be ase.”

10. ?Siɛ nin niɛn mun, sɛ amun tran klɔ wie su naan amun kwlá kɔman blo lɔ’n, ngue yɛ amun kwla yo-ɔ? (An nian kuku nga be flɛ i kɛ “ Siɛ nin niɛn’m be liɛ” i nun.)

¹⁰ ?Yɛ sɛ e tran klɔ wie su naan e kwlá kɔman blo lɔ nin? Aniaan bian Amɔlu m’ɔ tran Ɛndi lɔ’n seli kɛ: “Kɛ nga n tran lɛ’n, kɛ siɛ nin niɛn’m be kɔ junman’n be baman ndɛ. Yɛ sɛ be waan be nin be mma’m bé tú ajalɛ bé kɔ́ lika kun bé kó níannían lɔ’n, bé bó kalɛ dan. Sanngɛ sɛ be nin be mma’m be o wunmiɛn lowlɛ kaan wie nun annzɛ be o sua kun i aunmuan fawlɛ kun su’n, be kwla fa be mma’m be ɲin sie i ninnge nga Zoova yili be’n be su.” Siɛ nin niɛn mun, sɛ amun niannian lika nga amun tranlɛ’n i kpa’n, atrɛkpa’n amún wún ninnge wie mɔ amun kwla  fa kle amun mma’m be like-ɔ. (Jue. 104:24) Sɛ amun yo sɔ’n, atrɛkpa’n amún wún anunman mun nin kaka mun nin waka mun nin ninnge uflɛ wie mun ekun. Aniaan bla Karina m’ɔ fin Alemaɲin’n seli kɛ: “Min manmin klo flɛli mun kpa. Ɔ maan min bakan nun’n, kɛ é wlánwlán’n ɔ fa min ɲin sie i flɛli’m be su.” Siɛ nin niɛn mun, amun kwla fa ninnge nga Ɲanmiɛn yili be’n be su video mun nin fluwa nga anuannzɛ’n yili be’n be kle amun mma’m be like. Ɔ maan, lika kwlaa nga amun tran lɛ’n, amun kwla fa amun mma’m be ɲin sie i ninnge nga Ɲanmiɛn yili be’n be su. Siɛn’n, maan e kan Zoova i nzuɛn nga amun kwla fa amun mma’m be ɲin sie su’n be nun wie’m be ndɛ.

11. ?Wafa sɛ yɛ siɛ nin niɛn’m be kwla uka be mma mun naan b’a wun i wlɛ kɛ Zoova klo sran-ɔn?

¹¹ Siɛ nin niɛn mun, sɛ amun waan amún úka amun mma mun naan be wun i wlɛ kɛ Zoova klo sran’n, amun fa be ɲin sie i wafa nga nnɛn’m be nian be mma’m be lika’n su. (Mat. 23:37) Asa’n, amun kwla fa be ɲin sie i ninnge nga Ɲanmiɛn yili be mɔ e kwlakwla e ɲan su ye’n be su. Karina mɔ e kɛnnin i ndɛ’n seli kɛ: “Min bakan nun’n, kɛ e nin min manmin é wlánwlán’n, ɔ wla min fanngan kɛ n fa min ɲin sie i flɛli’m be su kpa. I liɛ’n, ń wún kɛ ɔ le flɛli kun nin i wafa nin i klanman. Yɛ ń wún kɛ be yi i nglo kɛ Zoova klo sran. M’an ɲin sanngɛ n te fa min ɲin n te sie i flɛli’m be su. N wun kɛ be ti fanunfanun yɛ be ɲin’n ti wafawafa. Andɛ nin andɛ be te kle min kɛ Zoova klo e.”

12. ?Wafa sɛ yɛ siɛ nin niɛn’m be kwla uka be mma mun naan b’a wun i wlɛ kɛ Ɲanmiɛn si ngwlɛlɛ-ɔ? (Jue Mun 139:14) (An nian foto’n wie.)

¹² Amun uka amun mma mun naan be wun i wlɛ kɛ Ɲanmiɛn si ngwlɛlɛ dan. Zoova si ngwlɛlɛ tra e lelele. (Rɔm. 11:33) I wie yɛle kɛ amun kwla fa amun mma’m be ɲin sie i ɲanmiɛn ble’n su. Be ti nzue ngunmin yɛ be yo nɔnnin kpa. Sanngɛ be sinsin ɲanmiɛn su lɔ kɛ like fi nunman be nun sa. (Zɔb. 38:36, 37) Asa’n, an kwla fa be ɲin sie i klɔ sran’m be likalika’m be su. (An kanngan Jue Mun 139:14 nun.) I sɔ yɛ siɛ kun mɔ be flɛ i kɛ Vladimii’n yoli-ɔ. Ɔ seli kɛ: “Cɛn kun’n, e wa’n su fu kpanngɔ kpɛkun ɔ tɔli yɛ i wun kploli. Kɛ ɔ dili le nɲɔn kun’n, kannin’n wuli. Min nin min yi e yiyili nun kleli e wa’n kɛ, wafa nga Zoova yili e wunnɛn kplo’n ti’n, sɛ like yo e kplo’n su’n ɔ kwla wu kpɛkun ɔ sin i osu’n nun. Sanngɛ ninnge nga klɔ sran’m be yili be’n, be nun wie fi kwlá  yoman sɔ. I wie yɛle kɛ sɛ loto kun yo asidan naan ɔ saci’n, i bɔbɔ kwlá siesiemɛn i wun ye. I sɔ’n ukali e wa’n naan w’a wun i wlɛ kɛ Zoova i ngwlɛlɛ cɛnnin.”

13. ?Wafa sɛ yɛ siɛ nin niɛn’m be kwla uka be mma mun naan b’a wun i wlɛ kɛ Ɲanmiɛn le tinmin-ɔn? (Ezai 40:26)

¹³ Zoova wla e fanngan kɛ e man e ɲin su e nian nglo lɔ yɛ e bu tinmin ng’ɔ fali yili nzraama mɔ be o nglo lɔ sanngɛ be tɔman’n i su akunndan. (An kanngan Ezai 40:26 nun.) Amun wla amun mma’m be fanngan kɛ be nian nzraama mun naan be bu su akunndan wie. Aniaan bla kun m’ɔ fin Taiwanin’n kannin sa kun m’ɔ juli i bakan nun’n i ndɛ seli kɛ: “Cɛn kun’n, e nin min manmin e ɔli blo lɔ. I sɔ’n ti’n, kɛ lika’n sannin’n e wunnin nzraama kpanngban kpa. Kɛ a o blɔfuɛ klɔ’n a kwlá wunman ninnge sɔ mun. Blɛ sɔ’n nun’n, nn min wla guaman ase. Afin min wiengu suklu ba’m be kle min yalɛ yɛ n usa min wun sɛ n kwla su Ɲanmiɛn kpa titi-o. Min manmin wlali min fanngan kɛ n bu tinmin nga Zoova fa yili nzraama mun’n i akunndan. Kpɛkun ɔ kpɛnnin min wla kɛ Zoova kwla fɛ i tinmin’n uka min naan m’an jran sa nga be tɔ min su’n be ɲrun kekle. Blɛ sɔ’n nun’n, kɛ n fali min ɲin n sieli i ninnge nga Zoova yili be’n be su’n, n sili i kpa yɛ n fuali kpa kɛ ń sú i titi.”

14. ?Wafa sɛ yɛ siɛ nin niɛn’m be kwla uka be mma mun naan b’a wun i wlɛ kɛ Ɲanmiɛn di aklunjɔɛ-ɔ?

¹⁴ Ninnge nga Zoova yili be’n, be kle kɛ ɔ di aklunjɔɛ yɛ ɔ kunndɛ kɛ e di aklunjɔɛ wie. Siansifuɛ’m be sieli i nzɔliɛ kɛ nnɛn kpanngban kpa be kan ngowa. I wie yɛle anunman nin jue mun. (Zɔb. 40:20) ?Kɛ amun mma’m be wun nnɛn mɔ be su kan ngowa’n ɔ kle be srilɛ? Atrɛkpa’n, be wun ajeliwa kun m’ɔ su fa balɔn kan ngowa’n, annzɛ alua ba wie mɔ be o likawlɛ be su kan ngowa’n. Sɛ amun mma’m be wun ninnge sɔ mun naan ɔ kle be srilɛ’n, amun kwla se be kɛ Ɲanmiɛn kunndɛ kɛ e di aklunjɔɛ ti yɛ ɔ yoli maan nnɛn’m be yo sɔ-ɔ.—1 Tim. 1:11.

15. ?Ngue yɛ siɛ nin niɛn’m be kwla yo naan b’a si be mma’m be klun ndɛ-ɔ? (Ɲanndra Mun 20:5) (An nian foto’n wie.)

¹⁵ Ɔ ju wie’n, kɛ ɔ ko yo naan siɛ nin niɛn’m b’a si sa ng’ɔ o be mma’m be su’n ɔ ti  kekle. Sɛ i sɔ sa’n wie o amun su’n, amun mian amun ɲin be uka amun mma mun naan be kan be klun ndɛ be kle amun. (An kanngan Ɲanndra Mun 20:5 nun.) Siɛ nin niɛn wie’m be sieli i nzɔliɛ kɛ, kɛ be nin be mma’m be fite be kɔ ninnge nga Ɲanmiɛn yili be’n be niannianlɛ’n, ba’m be kan be klun ndɛ kle be yɛ i sɔ yolɛ’n timan kekle dan. Like nga ti yɛ ɔ ti sɔ’n yɛle kɛ blɛ sɔ’n nun’n, ninnge nga be kwla yo maan be sie be ɲin nɲɔnnɲɔn’n b’a sɔnman. Siɛ kun mɔ be flɛ i kɛ Masaiko m’ɔ fin Taiwanin’n kannin like uflɛ ndɛ. Ɔ seli kɛ: “Kɛ e nin ba mun e kɔ nantilɛ okaoka lika’m be nun annzɛ jenvie nuan’n, blɛ sɔ’n nun’n be wun kpaja be. Ɔ maan, be sisiman be bo naan b’a kan be klun ndɛ b’a kle e.” Kati mɔ e kɛnnin i ndɛ’n seli kɛ: “Kɛ min manmin ko fa min suklu lɔ’n, ɔ ju wie’n ɔ fa min kɔ wunmiɛn lowlɛ lika klanman kpa kun nun. Blɛ sɔ’n nun’n, min wla gua ase. Ɔ maan, n kwla kan sa ng’ɔ juli min su suklu lɔ’n nin ninnge nga be kun min srɛ’n be ndɛ n kle i.”

16. ?Wafa sɛ yɛ siɛ nin niɛn’m be kwla fa ninnge nga Zoova yili be’n be yiyi be ɲin su-ɔ?

¹⁶ Kɛ siɛ nin niɛn mun nin be mma’m bé yíyí be ɲin su’n, be kwla fa be ɲin be sie i ninnge nga Zoova yili be’n be su. I sɔ’n yó maan be afiɛn mántan kpa. Biblu’n se kɛ ɔ “le blɛ kun mɔ be fa sri-ɔ” yɛ ɔ “le blɛ kun mɔ be fa tu kpɛn-ɔn.” (Aku. 3:1, 4, jnd.) Zoova yili lika klanman kpa wie mɔ e kwla kɔ lɔ e ko yiyi e ɲin su-ɔ. Awlobofuɛ wie’m be klo bo nin okaoka lika’m be nun wlanwlanlɛ. Asa’n be klo jenvie nuan nantilɛ. Ba kanngan wie’m be klo wunmiɛn lolɛ lika’m be nun ngowa kanlɛ. Wie’m be klo nnɛn’m be nianlɛ yɛ wie’m be klo nzue wuɛlɛ. Ɔ maan be diman ninnge nga Zoova yili be mɔ e kwla fa yiyi e ɲin su’n be yalɛ!

17. ?Ngue ti yɛ ɔ fata kɛ siɛ nin niɛn’m be uka be mma mun naan be fa be ɲin be sie i ninnge nga Zoova yili be’n be su-ɔ?

¹⁷ Mɛn klanman nun lɔ’n, siɛ nin niɛn mun nin be mma’m bé wá fá be ɲin bé síe i ninnge nga Ɲanmiɛn yili be’n be su kpa tra andɛ. Blɛ sɔ’n nun’n, e su sroman nnɛn mun yɛ be kusu be su sroman e. (Eza. 11:6-9) Kɛ mɔ é wá trán nguan nun titi ti’n, é ɲán blɛ é fá e ɲin é síe i ninnge nga Zoova yili be’n be su. (Jue. 22:26) Sanngɛ siɛ nin niɛn mun, nán amun minndɛ kɛ blɛ sɔ’n ju ka naan amun a fa amun mma’m be ɲin b’a sie i ninnge sɔ’m be su. Amun fa ninnge nga Zoova yili be’n be kle be i su like. I liɛ’n bé kán ndɛ kunngba nga Famiɛn Davidi kannin’n wie. Ɔ seli kɛ: ‘Ee Zoova, ninnge nga a yo be’n be leman wunsu.’—Jue. 86:8.