?Ngue ti yɛ bian nga be flɛli i kɛ ‘Nja’n’ seli kɛ sɛ ɔ ja Riti’n, ɔ́ ‘sáci’ i aja like liɛ’n niɔn? (Rit. 4:1, 6)

Izraɛlifuɛ’m be blɛ su’n, sɛ sran kun ja bla naan w’a wuman ba naan w’a wu’n, ɔ fata kɛ be kpɛ ndɛ wie’m be nun. I wie yɛle kɛ: ?Wan yɛ i asiɛ’n kɛ́ i sa nun-ɔn? ?Bé yó sɛ naan i dunman’n w’a mlinman? Moizi Mmla’n tɛ kosan sɔ’m be su.

?Sɛ bian kun wu annzɛ ɔ di yalɛ annzɛ kusu ɔ yo i asiɛ’n i atɛ’n, ngue yɛ ɔ fata kɛ be yo-ɔ? I lɛ nun’n, i niaan bian kun annzɛ i osufuɛ kun kwla kpɔ i ti annzɛ ɔ to asiɛ sɔ’n. I liɛ’n, i aja like’n ká be osu’n nun.—San. 25:23-28; Kal. 27:8-11.

?Ngue yɛ bé yó naan bian ng’ɔ wuli’n i dunman’n w’a mlinman-ɔn? Be di be niaan’n i angbeti’n i jalɛ’n i su mmla’n su. Yɛle kɛ bian ng’ɔ wuli’n i nian bian kun jɛ i angbeti’n. Kpɛkun sɛ be wu ba’n bian ng’ɔ wuli’n i dunman’n yɛ ɔ tran ba’n su-ɔ. Ɔ maan ɔ kwla di i aja. Riti i ndɛ liɛ’n nun’n, i sɔ yɛ be yoli-ɔ. Ajalɛ kpa sɔ’n yo maan angbeti’n kaman lɛ sa ngbɛn.—Mml. 25:5-7; Mat. 22:23-28.

Naomin liɛ’n su’n i sɔ yɛ be yoli-ɔ. Be flɛ i wun’n kɛ Elimelɛki. Yɛ ɔ nin i be wuli ba yasua nɲɔn. I sin’n, bian’n nin i wa nɲɔn’m be wuli. Ɔ maan sran fi nunman lɛ kun naan w’a niɛn i lika. (Rit. 1:1-5) Kɛ Naomin sɛli i sin Zida lɔ’n, ɔ seli i sewi Riti kɛ ɔ ko wun Boazi wun naan ɔ to be asiɛ’n. Afin ɔ ti Elimelɛki i osufuɛ. (Rit. 2:1, 19, 20; 3:1-4) Sanngɛ Boazi wunnin kɛ bian kun o lɛ m’ɔ nin Elimelɛki be mantan kpa trɛ i bɔbɔ-ɔ. Biblu’n nun’n be flɛ bian sɔ’n kɛ “Nja.” I bo bolɛ nun’n, ɔ kplinnin su kɛ ɔ́ kpɔ́ be ti.—Rit. 3:9, 12, 13.

I bo bolɛ nun’n, bian’n sɔ’n kunndɛli kɛ ɔ́ úka Naomin. (Rit. 4:1-4) Ɔ si kɛ i sɔ yolɛ’n nun’n ɔ́ bó kalɛ sanngɛ kusu ɔ si kɛ Naomin w’a yo kpɛnngbɛn. Ɔ maan ɔ kwlá wuman ba kun naan se kɛ ba sɔ’n dí Elimelɛki i aja. I sɔ’n ti’n asiɛ’n yó i liɛ. Kɔlɛ’n i sɔ’n ti yɛ ɔ kplinnin su kɛ ɔ́ tó asiɛ’n niɔn.

Sanngɛ kɛ bian sɔ’n wunnin i kɛ ɔ fata kɛ ɔ ja Riti’n, kpɛkun i waan ɔ toman asiɛ’n kun. Ɔ seli kɛ: “N su kwlá toman, afin ɔ cɛman naan m’an saci min bɔbɔ min aja liɛ’n.” (Rit. 4:5, 6) ?Ngue ti yɛ bian’n wa fali ajalɛ uflɛ-ɔ?

Sɛ bian sɔ’n annzɛ yasua uflɛ bɔbɔ ja Riti’n naan be wu ba’n, ba sɔ’n yɛ ɔ́ fá Elimelɛki i asiɛ’n niɔn. ?Wafa sɛ yɛ i sɔ’n kwla “saci” bian nga be flɛli i kɛ Nja’n i “aja” liɛ’n niɔn? Biblu’n tɛman su trele sa, sanngɛ e kwla fa e ɲin e sie i sa wie’m be su.

• I klikli’n, yɛle kɛ ɔ si kɛ Elimelɛki i asiɛ’n su yomɛn i liɛ. Sanngɛ ɔ́ yó Riti i wa’n i liɛ. Ɔ maan ɔ seli i wun kɛ sɛ ɔ to asiɛ’n i sɔ’n ti i sika’n i sacilɛ.

• I nɲɔn su’n, yɛle kɛ ɔ́ wá nían Naomin nin Riti be lika.

• I nsan su’n, yɛle kɛ sɛ ɔ nin Riti be wu ba’n ba sɔ’n nin i bɔbɔ i mma liɛ’m bé cɛ́ i aja ninnge’m be nun.

• I nnan su’n, yɛle kɛ sɛ ɔ leman ba laa naan ɔ nin Riti be wu ba’n, i bɔbɔ i asiɛ’n nin Elimelɛki i liɛ’n bé yó ba sɔ’n i liɛ. Ɔ maan sɛ ɔ wu’n, i asiɛ’n ká ba kun mɔ Elimelɛki i dunman yɛ ɔ o i su’n i sa nun. Bian’n w’a kunndɛman kɛ ɔ́ úka Naomin. Afin i waan sɛ ɔ yo sɔ’n, ɔ́ sáci i aja like’n. I sɔ’n ti’n, i waan Boazi m’ɔ nin be mantan’n yɛ ɔ fa ajalɛ sɔ’n niɔn. Boazi kusu kplinnin su. Afin ɔ kunndɛli kɛ ɔ́ yó naan bian ng’ɔ wuli’n, ‘i asiɛ’n yo i osu’n nunfuɛ’m be liɛ titi.’—Rit. 4:10.

Bian nga be flɛ i kɛ Nja’n i dunman’n nin i aja liɛ’n yɛ ɔ yoli i cinnjin-ɔn. Ɔ buli i ngunmin i wun akunndan. Sanngɛ i dunman sɔ’n w’a kaman lɛ, ɔ mlinnin mlɔnmlɔn. Asa’n, cenjele like kun fili i sa. Boazi yɛ ɔ ɲannin like sɔ’n niɔn. Yɛle kɛ Boazi yoli Zezi Klisi m’ɔ ti Mesi’n i nannan’m be nun kun. Bian’n w’a kplinman su kɛ ɔ́ úkɛ i wiengu. Ɔ maan i bo’n guali tɛ mɛnnin i.—Mat. 1:5; Lik. 3:23, 32.