1-2. ?Sɛ be nin-a yoman ɔ batɛmun’n, ngue ti yɛ ɔ fataman kɛ ɔ sa sin bubu wɔ-ɔ? (An nian foto ng’ɔ o fluwa’n i bui’n su’n.)

 SƐ A kunndɛ kɛ be yo wɔ batɛmun’n, nn ajalɛ kpa yɛ a fali-ɔ. ?Sanngɛ kɛ a niɛn i sa’n, be kwla yo wɔ batɛmun dɔ nga su? Sɛ be kwla yo ɔ batɛmun naan kusu asɔnun kpɛnngbɛn’m be bu i sɔ wie’n, nán sisi ɔ bo naan w’a fɛ i sɔ ajalɛ’n. Sɛ a yo sɔ’n, á sú Zoova aklunjɔɛ su titi.

² ?Annzɛ kusu sran wie seli wɔ kɛ ɔ fata kɛ a yo ninnge wie mun ekun ka naan b’a kwla yo wɔ batɛmun? ?Annzɛ ɔ bɔbɔ yɛ a bu i sɔ-ɔ? Sɛ ɔ ti sɔ’n, nán ɔ sa sin bubu wɔ. Kannzɛ a ti gbanflɛn annzɛ talua-o, annzɛ kusu w’a yo kpɛnngbɛn-o, mian ɔ ɲin kɔ ɔ ɲrun naan be yo ɔ batɛmun.

3. (1) ?Ngue yɛ Etiopi bian’n srɛli Filipu kɛ ɔ yo-ɔ? (2) ?Yɛ kosan benin yɛ e kwla fa usa e wun-ɔn? (Sa Nga Be Yoli’n 8:36, 38)

³ An kanngan Sa Nga Be Yoli’n 8:36, 38 nun. Etiopi bian’n usali Filipu kɛ: “?Ngue ti yɛ be kwlá yoman min batɛmun yɛ?” Etiopi bian’n kunndɛli kpa kɛ be yo i batɛmun. ?Sanngɛ kɛ e niɛn i sa’n, blɛ’n sɔ’n nun’n be kwla yo i batɛmun sakpa?

4. ?Wafa sɛ yɛ Etiopi bian’n kleli kɛ ɔ kunndɛ kpa kɛ ɔ́ súan like ekun-ɔn?

⁴ Etiopi bian’n “fin Ɲanmiɛn sulɛ Zerizalɛmun lɔ.” (Yol. 8:27) Bian sɔ’n timan Zifu sanngɛ ɔ su Zifu’m be Ɲanmiɛn’n wie. Atrɛkpa’n, kɛ ɔ kanngannin Ɲanmiɛn Ndɛ nga be klɛli i Ebre nun’n yɛ ɔ sili Zoova-ɔ. Sanngɛ ɔ kunndɛli kɛ ɔ́ sí Ɲanmiɛn Ndɛ’n nun kpa trá laa’n. Asa’n, kɛ Filipu tó  bian’n atin’n nun’n, nn ɔ su kanngan Ɲanmiɛn nuan ijɔfuɛ Ezai i fluwa’n nun. (Yol. 8:28) Ɲanmiɛn ndɛ’n ng’ɔ su kanngan nun blɛ sɔ’n nun’n, i bo ti kploun kpa. Etiopi bian’n w’a kunndɛman kɛ ɔ́ ká Ɲanmiɛn ndɛ nga i wlɛ wunlɛ yoman ya’n i su like suanlɛ’n su. Sanngɛ ɔ kunndɛli kɛ ɔ́ súan like ekun.

5. ?Kɛ be kleli Etiopi bian’n i like’n ngue yɛ ɔ yoli-ɔ?

⁵ Bian sɔ’n di junman Etiopi famiɛn bla nga be flɛ i kɛ Kandasi’n i sa nun. “I yɛ ɔ niɛn i ninnge kpakpa’m be su-ɔ.” (Yol. 8:27) Ɔ maan atrɛkpa’n, ɔ le junman kaka di. Ɔ nin i sɔ’n ngba’n, ɔ fa blɛ su Zoova. W’a kaman like suanlɛ’n su ngunmin. Sanngɛ ɔ nantili like ng’ɔ suannin’n su. Asa’n, ɔ tuli ajalɛ Etiopi lɛ ɔ ɔli Zoova i sulɛ Ɲanmiɛn Sua ng’ɔ o Zerizalɛmun lɔ’n nun. Lɔ kɔlɛ’n kusu fa blɛ yɛ ɔ fata kɛ ɔ bo kalɛ wie mun. Sanngɛ bian’n yoli like kwlaa ng’ɔ kwla yo naan w’a ko su Zoova’n.

6-7. ?Ngue yɛ ɔ ukali Etiopi bian’n naan wa klo Zoova kpa w’a tra laa-ɔ?

⁶ Filipu kleli Etiopi bian’n ndɛ nanwlɛ cinnjin wie mun. I wie yɛle Mesi’n i su ndɛ’n. (Yol. 8:34, 35) Kɛ Etiopi bian’n wunnin like nga Zezi yo mɛnnin’n i wlɛ’n, i sɔ’n wluwluli i wun dan. ?Kɛ ɔ sili ninnge sɔ mun’n ngue yɛ ɔ yoli-ɔ? Ɔ kwla se kɛ ɔ́ ká wafa ng’ɔ fa su Zoova titi’n i ngunmin su. Sanngɛ kɛ m’ɔ klo Zoova nin i Wa’n be dan’n ti’n, ɔ fali ajalɛ wie mun naan be yo i batɛmun naan ɔ́ káci Zezi i sɔnnzɔnfuɛ. Filipu kusu sieli i nzɔliɛ kɛ be kwla yo bian’n i batɛmun, ɔ maan ɔ yoli i batɛmun.

⁷ Sɛ a nian Etiopi bian’n i ajalɛ’n su’n, be kwla yo wɔ batɛmun wie. Kɛ bian sɔ’n sa’n, ɔ kusu a kwla se kɛ: “?Ngue ti yɛ be kwlá yoman min batɛmun yɛ?” Siɛn’n, maan e fa e ɲin e sie i wafa nga a kwla nian Etiopi bian’n i ajalɛ’n su’n i su. Yɛle kɛ ɔ suannin like titi, ɔ nantili like ng’ɔ suannin’n su yɛ ɔ kloli Ɲanmiɛn titi.

8. ?Kɛ nga Zan 17:3 fa kan’n sa’n, ngue yɛ ɔ fata kɛ a yo-ɔ?

⁸ An kanngan Zan 17:3 nun. ?Zezi i ndɛ sɔ’n ukali wɔ naan w’a fa ajalɛ kɛ á súan Biblu’n nun like? Ndɛ sɔ’n ukali e nun sunman. ?Sanngɛ ndɛ sɔ’n kle kɛ ɔ fata kɛ e suan like titi? Ɛɛn. E su yaciman ‘Ɲanmiɛn Kpli i silɛ le.’ (Aku. 3:11) Yɛ e su yaciman like suanlɛ le. Kɛ é súan like é kɔ́’n, nn é kló Zoova kpa trá laa’n.—Jue. 73:28.

9. ?Kɛ e ko si Ɲanmiɛn Ndɛ’n i bo bolɛ ninnge mun’n, ngue yɛ ɔ fata kɛ e yo i ekun-ɔn?

⁹ Zoova i su like suanlɛ’n bo i bo Biblu’n nun ndɛ nga be wlɛ wunlɛ timan  kekle’n be su. Kɛ akoto Pɔlu klɛ́ Ebre’m be fluwa’n, ɔ flɛli ndɛ sɔ mun kɛ ‘Ɲanmiɛn i ndɛ’n i bo bolɛ ninnge mun.’ Nán kɛ Pɔlu su se kɛ ninnge sɔ’m be timan cinnjin ti-ɔ. Sanngɛ ɔ fa sunnzunnin nɔnnɔn mɔ ba nɔnman’m be nɔn’n. (Ebr. 5:12; 6:1) I sɔ’n ti’n, ɔ wlali Klisifuɛ’m be kwlakwla be fanngan kɛ nán maan be ka ninnge sɔ’m be suanlɛ’n su sa trilili. Sanngɛ ɔ fata kɛ be suan Biblu’n nun ndɛ nga be bo ti kploun’n be su like wie. ?A kunndɛ kpa kɛ á súan Biblu’n nun ndɛ nga be bo ti kploun’n be su like kpa? ?Yɛ a kunndɛ kpa kɛ á súan Zoova nin i klun sa’n be su like kpa ekun naan á kɔ́ ɔ ɲrun Ɲanmiɛn sulɛ’n nun?

10. ?Ngue yɛ ɔ ti kekle sran wie’m be sa nun-ɔn?

¹⁰ Like suanlɛ’n ti kekle e nun sunman e sa nun. ?Yɛ ɔ li? E si kɛ suklu lɔ’n, be kleli wɔ kannganlɛ nin like suanlɛ. ?Sanngɛ a kloli like suanlɛ’n yɛ a bu i kɛ i sɔ’n ti’n, a sili like kpanngban? ?Annzɛ kusu a bu i kɛ like suanlɛ’n timan ɔ liɛ wie? Sɛ ɔ ti sɔ’n, nán ɔ ngunmin yɛ ɔ yo wɔ sɔ-ɔ. Sanngɛ Zoova kwla uka wɔ-ɔ. I yɛ ɔ ti Like Klefuɛ danfuɛ’n niɔn.

11. ?Wafa sɛ yɛ Zoova kleli kɛ i yɛ ɔ ti “Like Klefuɛ Dan’n” niɔn?

¹¹ Zoova bɔbɔ seli kɛ i yɛ ɔ ti “Like Klefuɛ Dan’n” niɔn. (Eza. 30:20, 21) Asa’n, ɔ trɛ i awlɛn, ɔ si aunnvɔɛ yɛ ɔ wun e su sa’n i wlɛ. Asa ekun’n, ɔ fɛ i ɲin sie i like kpa ng’ɔ o be ng’ɔ kle be like’n be nun’n, i su. (Jue. 130:3) Ɔ seman e le kɛ e yo like nga e kwlá yoman’n. Yɛ nán e wla fi su kɛ i yɛ ɔ yili e ti nun miɛn’n niɔn. (Jue. 139:14) Wafa ng’ɔ yili e’n ti’n, e kunndɛ kɛ é sí ninnge kpanngban. Ɔ maan e Yifuɛ’n kunndɛ kɛ e suan like titi yɛ e klo like suanlɛ. I sɔ’n ti’n ɔ fata kɛ e “ konvi sɔ” ndɛ nanwlɛ mɔ o Biblu’n nun’n. (1 Piɛ. 2:2) Maan e fa ninnge wie mɔ e si kɛ e kwla yo be’n e sie e ɲrun kɛ é yó. Asa’n, maan e sie blɛ naan e fa kanngan Biblu’n nun, kpɛkun e suan nun like. (Zoz. 1:8) Sɛ e yo sɔ’n, Zoova úka e naan y’a klo Biblu’n nun kannganlɛ nin i bɔbɔ i su like suanlɛ titi.

12. ?Ngue ti yɛ ɔ ti kpa kɛ e suan Zezi i su like kpa-ɔ?

¹² Ɔ ju wie’n, ɔ fata kɛ e bu wafa nga Zezi yoli ninnge wie mun’n, ɔ nin wafa ng’ɔ boli jasin fɛ’n be akunndan. Mɛn nga w’a yo kekle yɛ’n nun’n, sɛ e nanti Zezi i ajalɛ’n su’n, é kwlá sú Zoova kpa. (1 Piɛ. 2:21) Zezi kannin sa nga be kwla ju i sɔnnzɔnfuɛ’m be su’n, i ndɛ weinwein kleli be. (Lik. 14:27, 28) Sanngɛ ɔ si kɛ i sɔnnzɔnfuɛ kpa’m be kwla jran sa sɔ’m be ɲrun kekle, kɛ nga i bɔbɔ jrannin kekle’n sa. (Zan 16:33) Ɔ maan suan wafa nga Zezi yoli ninnge mun’n i su like kpa yɛ fua kpa kɛ á níɛn i ajalɛ’n su titi.

13. (1) ?Ngue yɛ ɔ fata kɛ a srɛ Zoova kɛ ɔ yo man wɔ-ɔ? (2) ?Yɛ ngue ti-ɔ?

¹³ Ɔ fataman kɛ e ka like suanlɛ’n ngunmin su. Like nga ti yɛ e suan like’n yɛle kɛ ɔ uka e naan y’a si Zoova kpa. Yɛ ɔ uka e naan y’a yi nzuɛn kɛ klolɛ nin Ɲanmiɛn sulafilɛ sa’n be nglo. (1 Kor. 8:1-3) Kɛ á súan like kɔ́’n, srɛ Zoova titi kɛ ɔ uka wɔ naan a lafi i su kpa. (Lik. 17:5) Zoova tɛ srɛlɛ kɛ ngalɛ sa’n i su ndɛndɛ kpa. Sɛ a si Ɲanmiɛn kpa naan a lafi i su’n, i sɔ’n úka ɔ naan w’a wɔ ɔ ɲrun i sulɛ’n nun.—Zak. 2:26.

14. ?Wafa sɛ yɛ Piɛli kleli kɛ ɔ ti cinnjin kɛ e nanti like nga e suan’n su-ɔ? (An nian desɛn’n wie.)

¹⁴ Akoto Piɛli seli kɛ ɔ ti cinnjin kɛ Klisi i sɔnnzɔnfuɛ’m be nanti like nga be suan’n su. Ɔ kannin sa ng’ɔ juli Nowe blɛ su’n i ndɛ. Zoova seli Nowe kɛ ɔ́ wá  fá nzue dan kun núnnún klunwifuɛ’m be kwlakwla. Sanngɛ nán kɛ mɔ Nowe nin i awlofuɛ’m be si kɛ nzue’n wá tɔ́’n, i ti yɛ bé fíte nun-ɔn. Kɛ Piɛli kán sa nga be juli ka naan Nzue Dan’n w’a tɔ’n i ndɛ’n ɔ seli kɛ: “Blɛ kunngba sɔ’n nun’n, nn be su bobo mmeli’n.” (1 Piɛ. 3:20) I sɔ’n kle kɛ Nowe nin i awlofuɛ’m be nantili ndɛ nga Zoova kan kleli be’n su. Yɛle kɛ be boboli mmeli’n. (Ebr. 11:7) Piɛli fali like nga Nowe yoli’n sunnzunnin batɛmun yolɛ’n. Ɔ seli kɛ: “Batɛmun yolɛ m’ɔ ti sa sɔ’n i nzɔliɛ’n, ɔ de amun wie andɛ.” (1 Piɛ. 3:21) Ɔ maan e kwla fa like nga a su yo i dɔ nga su naan b’a yo ɔ batɛmun’n e sunnzun junman nga Nowe nin i awlofuɛ’m be fali afuɛ kpanngban be dili naan b’a bobo mmeli’n. ?Ngue yɛ ɔ fata kɛ a yo naan b’a kwla yo ɔ batɛmun-ɔn?

15. ?Kɛ be se kɛ sran kun w’a kaci i akunndan’n, i bo’n yɛle benin?

¹⁵ Like ng’ɔ fata kɛ e yo’n i kun yɛle kɛ maan e kaci e akunndan’n. (Yol. 2:37, 38) Sɛ e kacili e akunndan’n sakpa’n, bé wún i sɔ liɛ’n e ayeliɛ’n nun. ?A wlali ayeliɛ tɛtɛ nga Zoova kloman be’n be ase? Ayeliɛ tɛtɛ sɔ’m be nun wie mun yɛle bla nin bian kunndɛlɛ sukusuku’n, nin siklɛti nɔnlɛ’n nin nzowa kpɛlɛ’n nin ndɛ tɛtɛ kanlɛ’n. (1 Kor. 6:9, 10; 2 Kor. 7:1; Efɛ. 4:29) Sɛ a nin-a wlaman ayeliɛ tɛtɛ sɔ’m be ase’n, mian ɔ ɲin naan wla be ase. Se sran ng’ɔ kle wɔ Biblu’n nun like’n ɔ nin asɔnun kpɛnngbɛn’m be kɛ be uka wɔ. Sɛ a ti gbanflɛn annzɛ talua naan a te tran ɔ si nin ɔ nin be bo wun naan ayeliɛ wie kle wɔ yalɛ’n, kan kle be naan be uka wɔ. I liɛ’n, bé kwlá yó wɔ batɛmun.

16. ?Sɛ e kunndɛ kɛ é sú Zoova titi’n, ngue yɛ ɔ fata kɛ e yo-ɔ?

¹⁶ Ɔ ti cinnjin kɛ a yo ninnge wie mun titi Ɲanmiɛn sulɛ’n nun. I wie yɛle aɲia’m be bo tranlɛ’n nin kosan’m be su tɛlɛ’n. (Ebr. 10:24, 25) Kɛ be ko man ɔ atin kɛ a bo jasin fɛ’n wie’n, mian ɔ ɲin naan bo i titi. Afin sɛ a di junman sɔ’n titi’n yɛ á kló i dilɛ kpa-ɔ. (2 Tim. 4:5) Sɛ a ti gbanflɛn annzɛ talua naan a te tran ɔ si nin ɔ nin be bo wun’n, usa ɔ wun kɛ: ‘?Saan min si nin min nin bé sé min kɛ n wɔ aɲia’m be bo annzɛ n ko bo jasin fɛ’n naan m’an yo  ninnge sɔ mun?’ ?Annzɛ min bɔbɔ yɛ n fa ajalɛ kɛ ń yó ninnge sɔ mun-ɔn? Kɛ ɔ bɔbɔ a fa ajalɛ mɔ a yo ninnge sɔ mun’n, a kle kɛ a lafi Ɲanmiɛn su. Asa’n, i sɔ’n kle kɛ a klo Ɲanmiɛn Zoova naan a si i ye. Asa ekun’n, ninnge nga a yo be fa kle kɛ ‘w’a fa ɔ wun w’a mantan Ɲanmiɛn’n,’ ɔ ti kɛ like kpa kun yɛ a su fa man Zoova sa. (2 Piɛ. 3:11; Ebr. 13:15) Like kwlaa nga e tu e klun e fa man Ɲanmiɛn’n, m’ɔ timan mianmianlɛ su’n i klun jɔ su. (An nian 2 Korɛntifuɛ Mun 9:7 nun wie.) Kɛ mɔ e klo kɛ é fá like kpa nga e le i’n é mán Zoova’n, i ti yɛ e fa ajalɛ sɔ mun-ɔn.

17-18. (1) ?Nzuɛn benin yɛ ɔ fata kɛ a yi i nglo naan b’a yo ɔ batɛmun-ɔn? (2) ?Ngue ti-ɔ? (Ɲanndra Mun 3:3-6)

¹⁷ Kɛ á mían ɔ ɲin kɔ́ ɔ ɲrun naan be yo ɔ batɛmun’n, sa wie’m be kwla tanndan ɔ ɲrun. Kɛ mɔ a lafi Ɲanmiɛn su’n ti’n, sran wie’m be kwla yo ɔ finfin annzɛ be kle ɔ yalɛ. (2 Tim. 3:12) Atrɛkpa’n, a su mian ɔ ɲin naan á wlá ɔ nzuɛn tɛ wie i ase. Sanngɛ ɔ ju wie’n, a sa ɔ sin yo like sɔ’n ekun. Annzɛ ɔ kwla yo ɔ kɛ a kɔman ɔ ɲrun ndɛndɛ naan b’a yo ɔ batɛmun sa. I sɔ’n ti’n, ɔ klun jɔman. ?Ngue yɛ ɔ kwla uka wɔ naan w’a jran sa sɔ’n i ɲrun kekle-ɔ? Ninnge nga be kwla uka wɔ’n be nun cinnjin kpafuɛ’n yɛle Zoova i klolɛ’n.

¹⁸ Klolɛ mɔ a klo Zoova’n ti like cinnjin kpa kun. (An kanngan Ɲanndra Mun 3:3-6 nun.) Sɛ a klo Ɲanmiɛn tankaan kpa’n, i sɔ’n úka ɔ naan w’a jran ɔ su sa’m be ɲrun kekle. Ɔ ju wie’n Biblu’n kan klolɛ dan mɔ Zoova klo i sufuɛ mun’n i ndɛ. I sɔ’n ti’n, ɔ yimɛn i sufuɛ’m be ase le yɛ ɔ klo be titi. (Jue. 100:5) Ɲanmiɛn yili ɔ kɛ i sa. (Bob. 1:26) ?Ɔ maan á yó sɛ naan w’a yi klolɛ’n i nglo kɛ i sa wie?

19. ?Wafa sɛ yɛ a kwla kle Zoova kɛ a si ninnge ng’ɔ yo mannin wɔ’n be su ye-ɔ? (Galasifuɛ Mun 2:20)

¹⁹ Kle kɛ a si ye. (1 Tes. 5:18) Aliɛ ba kwlaa nun’n, usa ɔ wun kɛ: ‘?Wafa sɛ yɛ Zoova yi i nglo kɛ ɔ klo min-ɔn?’ I sin’n kɛ á srɛ́ Ɲanmiɛn’n, kan like trele ng’ɔ yo mannin wɔ’n i ndɛ kle i. Kɛ akoto Pɔlu sa’n, nán ɔ wla fi su kɛ klolɛ mɔ Zoova klo wɔ’n ti yɛ ɔ yo ninnge sɔ mun man wɔ-ɔ. (An kanngan Galasifuɛ Mun 2:20 nun.) Usa ɔ wun kɛ: ‘?Wafa sɛ yɛ n kwla yi i nglo kɛ n klo Zoova wie-ɔ?’ Sɛ a klo Zoova tankaan kpa’n, i sɔ’n kwla uka wɔ naan w’a  jran ayeliɛ tɛ wie nin sa kekle’m be ɲrun kekle. Asa’n, i sɔ úka wɔ naan w’a su Zoova kpa titi. I liɛ’n, á klé ɔ Si Ɲanmiɛn kɛ a klo i titi.

20. (1) ?Ngue yɛ a kwla yo naan w’a fa ɔ wun w’a man Zoova-ɔ? (2) ?Ngue ti yɛ i sɔ yolɛ’n ti cinnjin-ɔn?

²⁰ Kɛ ɔ́ kɔ́ í ɲrun’n, á wá srɛ́ Zoova á fá ɔ wun mɛ́n i. I sɔ srɛlɛ liɛ’n ti i liɛ ngunmin kun. Kɛ a fa ɔ wun man Zoova’n, a kwla lafi like kpa kun su. Yɛle kɛ a kwla yo i liɛ tititi. Kɛ a fa ɔ wun man Zoova’n, a tɛ i nda kɛ sɛ lika’n ti kekle-o annzɛ lika’n timan kekle-o, á sú i titi. Yɛ a su taman nda sɔ’n i kpɛ nɲɔn. I yo, kɛ e fa e wun e man Zoova’n i sɔ’n kle kɛ y’a fa ajalɛ cinnjin kpa kun. Sanngɛ bu like yɛ’n i akunndan: Lele nin i kɛ á fá wú’n, á wá fá ajalɛ kpanngban. Be nun wie’m bé yó kpa. Sanngɛ ajalɛ kwlaa sɔ’m be nun cinnjin kpafuɛ’n yɛle nga a fɛli i kɛ á fá ɔ wun mán Zoova’n. (Jue. 50:14) Satan wá yó naan a yaci ɔ Si Ɲanmiɛn i klolɛ. Nán kplin su maan Satan yia akunndan tɛ sɔ m’ɔ bu’n i nuan. (Zɔb. 27:5) Sɛ a klo Zoova tankaan kpa’n, i sɔ’n úka wɔ naan w’a yia nda nga a tɛli i kɛ á fá ɔ wun mɛ́ntɛn i naan á sú titi i nuan.

21. ?Ngue ti yɛ e kwla se kɛ batɛmun yolɛ’n timan Zoova i sulɛ’n i agualiɛ sanngɛ ɔ ti i bo bolɛ-ɔ?

²¹ Kɛ a ko srɛ Zoova ko fa ɔ wun ko mɛn i’n, kan kle asɔnun kpɛnngbɛn mun kɛ a kunndɛ kɛ be yo ɔ batɛmun. Nán maan ɔ wla fi su kɛ batɛmun yolɛ’n timan Ɲanmiɛn sulɛ’n i agualiɛ sanngɛ ɔ ti i sulɛ tititi’n i bo bolɛ. I sɔ’n ti’n, klo ɔ Si Ɲanmiɛn tankaan kpa. Asa’n, yo ninnge wie mun aliɛ ba kwlaa nun naan klolɛ mɔ a klo Zoova’n i su uka titi. Ninnge sɔ’m be yolɛ’n kwla uka ɔ naan w’a fa ajalɛ kɛ be yo ɔ batɛmun. Ɔ batɛmun yolɛ cɛn’n wá yó ɔ aklunjɔɛ dilɛ cɛn. Sanngɛ nán ɔ wla fi su kɛ blɛ li yɛ a su wa bo Zoova i sulɛ bo-ɔ. I sɔ’n ti’n, maan klolɛ mɔ a klo Zoova nin i Wa’n, ɔ yo tankaan kpa titi.