1. ?Ka naan Piɛli w’a wu’n, ngue yɛ Zoova maan ɔ kwla yoli-ɔ?

 PIƐLI miɛnnin i ɲin suli Zoova afuɛ kpanngban kpa. Blɛ sɔ’n nun’n, ɔ nin Zezi be boli jasin fɛ’n likawlɛ. Kpɛkun ɔ boli jasin fɛ’n kleli be nga be timan Zifu’n. I sin’n, Klisifuɛ klikli’m be blɛ su’n ɔ yoli anuannzɛ’n i ɲrun dinfuɛ. Sanngɛ kɛ ɔ ka kan’n ɔ́ wú’n, m’ɔ wunnin i wlɛ weiin kɛ ɔ su wa wu’n, Zoova mɛnnin i junman wie mun. I wie yɛle kɛ afuɛ 62 nin 64 be afiɛn nun’n, Zoova maan ɔ klɛli fluwa nɲɔn. Be yɛle Piɛli fluwa klikli nin i nɲɔn su’n. Piɛli lafili su kɛ kɛ ɔ́ wá wú’n i fluwa’m be nun ndɛ’m bé wá úka Klisifuɛ mun kpa.—2 Piɛ. 1:​12-15.

2. ?Ngue ti yɛ ɔ fata kɛ Piɛli klɛ i fluwa nɲɔn mun-ɔn?

² I nun mɔ Piɛli klɛ́ i fluwa nɲɔn mun’n, nn “sa fanunfanun” o i niaan Klisifuɛ’m be su. (1 Piɛ. 1:6) I wie yɛle kɛ klunwifuɛ wie’m be kle ato ndɛ wie mun yɛ be yo ninnge tɛtɛ mun asɔnun’n nun. (2 Piɛ. 2:​1, 2, 14) Asa’n, ɔ ka kan’n Klisifuɛ nga be o Zerizalɛmun lɔ’n bé wá wún i wlɛ kɛ “ninnge kwlaa be awieliɛ’n w’a mantan koko.” Yɛle kɛ Rɔmun sonja’m bé wá núnnún Zerizalɛmun klɔ’n nin Ɲanmiɛn i sua’n. (1 Piɛ. 4:7) E si kɛ Piɛli i fluwa’m be ukali Klisifuɛ sɔ mun naan b’a si like nga be kwla yo naan b’a jran sa ng’ɔ o be su’n nin sa ng’ɔ́ wá tɔ́ be su’n be ɲrun lɔ’n be ɲrun kekle. b

3. ?Ngue ti yɛ ɔ fata kɛ e fa e ɲin e sie i fluwa nga Piɛli klɛli be’n be su-ɔ?

³ Kannzɛ Klisifuɛ klikli’m be dunman nun ti yɛ Piɛli klɛli i  fluwa nɲɔn mun’n, sanngɛ Zoova maan be fali fluwa sɔ’m be wlɛli i nuan Ndɛ’n nun. I sɔ m’ɔ yoli’n ti’n, e kusu e kwla ɲan be su ye wie. (Rɔm. 15:4) Kɛ Klisifuɛ klikli’m be sa’n, e kusu e o mɛn kun mɔ i nunfuɛ’m be yo sa tɛtɛ’n i nun. Ɔ maan Zoova i sulɛ’n kwla yo kekle. Asa’n, ɔ ka kan’n ɲrɛnnɛn’n ng’ɔ́ wá tɔ́ e su’n, ɔ́ yó dan trá ɲrɛnnɛn ng’ɔ tɔli Zifu’m be su’n. Ɔ maan ɔ ti cinnjin kɛ e fa e ɲin e sie i fluwa nɲɔn nga Piɛli klɛli be’n, be nun ndɛ’m be su kpa. I sɔ’n úka e naan y’a tran y’a minndɛ Zoova i cɛn’n. Kpɛkun i sɔ’n úka e naan y’a yoman srongble naan y’a klo e wiengu mun tankaan kpa. Asa’n, ndɛ sɔ’m bé wá úka asɔnun kpɛnngbɛn mun naan b’a si wafa nga be kwla nian Zoova i bua fa’n i lika kpa’n.

4. ?Kɛ nga 2 Piɛli 3:​3, 4 fa kan’n sa’n, ngue yɛ ɔ kwla yo maan e Ɲanmiɛn sulafilɛ’n kan ase-ɔ?

⁴ Andɛ’n, sran’m be lafiman e ɲrun sa’m be su ndɛ nga Biblu’n kan’n su. Kɛ mɔ e kɛn i kɛ ɔ ka kan’n mɛn’n wie mɔ andɛ nin andɛ’n mɛn’n nin-a wieman ti’n, sran’m be kwla yo e finfin. Yɛ sran wie’m be liɛ’n be se kɛ mɛn’n su wieman le. (An kanngan 2 Piɛli 3:​3, 4 nun.) Sɛ sran kun mɔ e boli jasin fɛ’n e kleli i’n, annzɛ e wiengu junman difuɛ kun annzɛ e osufuɛ kun kɛn i sɔ ndɛ mun kle e naan e sie e su i nuan bo’n, ɔ cɛman naan e Ɲanmiɛn sulafilɛ’n w’a kan ase. I lɛ nun’n, Piɛli kannin like ng’ɔ kwla uka e’n i ndɛ.

5. ?Ngue yɛ ɔ kwla uka e naan y’a tra e awlɛn y’a minndɛ mɛn nga i awieliɛ’n niɔn? (2 Piɛli 3:​8, 9)

⁵ Ɔ kwla yo sran wie’m be kɛ Zoova sisi i bo mɛn tɛ nga i nunnunlɛ’n nun. Ndɛ nga Piɛli kannin’n kwla uka e kpa. Afin ɔ kpɛn e wla kɛ Zoova i ninnge’m be yolɛ blɛ’n nin klɔ sran’m be blɛ liɛ’n be timan kun. (An kanngan 2 Piɛli 3:​8, 9 nun.) I wie yɛle kɛ klɔ sran’m be afuɛ akpi kun’n, ɔ ti cɛn ba kun Zoova ɲrun. Zoova trɛ i awlɛn, afin ɔ kunndɛman kɛ sran kun sa nunnun. Sanngɛ kɛ i blɛ’n wá jú’n, ɔ́ núnnún mɛn tɛ nga. Kɛ e fa blɛ kan ng’ɔ ka’n, e bo jasin fɛ’n e kle be kwlaa nga be o asiɛ wunmuan’n su’n, i sɔ’n ti e cenjele like dan.

6. ?Wafa sɛ yɛ e ‘ɲin kwla tran’ Zoova i cɛn’n su-ɔ? (2 Piɛli 3:​11, 12)

⁶ Piɛli wla e fanngan kɛ maan ‘e ɲin tran Zoova i cɛn’n su kpa.’ (An kanngan 2 Piɛli 3:​11, 12 nun.) ?Wafa sɛ yɛ e kwla yo sɔ-ɔ? Cɛn kwlakwla’n, e kwla bu ninnge nga Zoova wá yó mán e mɛn klanman nun lɔ’n be su akunndan. Blɛ sɔ’n nun’n, e kwla bu e bɔbɔ mɔ e su lo wunmiɛn lika yɛiin kun nun’n, annzɛ e su di aliɛ kpakpa mun’n be akunndan. Asa’n, e kwla bu e osufuɛ mun nin e janvuɛ mɔ bé wá cɛ́n be mɔ é wá sɔ́ be nun’n be akunndan. Kpɛkun e kwla bu be nga be dun mmua wuli lele ka naan Ɲanmiɛn nuan ijɔfuɛ’m be ndɛ’m b’a kpɛn su’n, be like klelɛ’n i akunndan wie. Sɛ e bu ninnge sɔ’m be su akunndan’n, e ɲin trán like nga e wla su’n i su kpa yɛ é láfi su kpa kɛ ɔ ka kan’n mɛn’n wíe. ‘Kɛ mɔ e si sa nga bé wá jú e ɲrun lɔ mun laa’n ti’n,’ e faman be nga be ‘nantiman mmla’n su’n be ato like nga be kle’n’ su.—2 Piɛ. 1:17.

7. ?Wafa sɛ yɛ sran srolɛ’n kwla kle e yalɛ-ɔ?

⁷ Kɛ mɔ e si kɛ Zoova i cɛn’n w’a mantan koko ti’n, e kunndɛ kɛ é yó like kwlaa nga e kwla yo naan y’a bo jasin fɛ’n y’a kle sran mun’n. Sanngɛ ɔ ju wie’n, e sisi e bo naan y’a yo sɔ. ?Ngue ti-ɔ? Like nga ti yɛ ɔ ti sɔ’n yɛle kɛ ɔ ju wie’n e sro sran. I sɔ sa’n juli Piɛli su. Kɔnguɛ nga be trali Zezi’n, srɛ m’ɔ kunnin Piɛli ti’n ɔ seli kɛ ɔ timan Zezi i sɔnnzɔnfuɛ wie. I kpa bɔbɔ’n, ɔ kɛnnin i kpɛ sunman kɛ ɔ siman Zezi! (Mat. 26:​69-75)  Sanngɛ kɛ ɔ́ kɔ́ i ɲrun’n, srɛ w’a kunman Piɛli kun. Ɔ maan ɔ kwla seli kɛ: “Nán amun sro like ng’ɔ kun sran’m be srɛ’n.” (1 Piɛ. 3:14) Piɛli i ndɛ sɔ’n kle kɛ kannzɛ e sro sran’n, sanngɛ e kwla yaci i sɔ yolɛ.

8. ?Ngue yɛ ɔ kwla uka e naan y’a sroman sran kun-ɔn? (1 Piɛli 3:15)

⁸ ?Ngue yɛ e kwla yo naan y’a sroman sran kun-ɔn? Piɛli se e kɛ: “An bu amun klun lɔ kɛ Klisi’n ti amun Min.” (An kanngan 1 Piɛli 3:15 nun.) I wie yɛle kɛ maan e bu e Min Zezi Klisi i ɲrun m’ɔ le i’n, nin i kwlalɛ’n be akunndan. Sɛ e waan é bó jasin fɛ’n é klé sran kun naan e klun titi e’n annzɛ srɛ kun e’n, maan e bu e Famiɛn’n i akunndan. Maan ɔ yo e kɛ e wun i naan ɔ ti i famiɛn bia’n su ɲanmiɛn su lɔ naan anzi miliɔn kpanngban kpa be bo sin yiɛ i sa. Asa’n, maan e wla kpɛn su kɛ ‘Ɲanmiɛn fali kwlalɛ’n kwlaa mɛnnin i naan ɔ sie ninnge nga be o ɲanmiɛn su lɔ’n nin asiɛ’n su wa’n be kwlaa’ naan ‘ɔ nin e o nun cɛn kwlaa lele mɛn’n fá wíe!’ (Mat. 28:​18-20) Piɛli wla e fanngan kɛ ‘nán e sisi e bo’ naan y’a kan like nga e lafi su’n y’a kle sran mun. ?A klo kɛ á bó jasin fɛ’n klé sran kun ɔ junman su lɔ, annzɛ suklu lɔ annzɛ kusu a klo kɛ á fá ɔ wun wlá jasin fɛ bolɛ’n i wafa wie nun? Sɛ ɔ ti sɔ’n, a kwla bu blɛ nga a kwla bo jasin fɛ’n kle sran’n, nin ndɛ nga a kunndɛ kɛ á kán klé i’n be akunndan. I sin’n, srɛ Zoova kɛ ɔ wla ɔ yakpa yɛ lafi su kɛ ɔ́ úka wɔ naan w’a sroman sran.—Yol. 4:29.

9. ?Blɛ kun nun’n, ngue yɛ Piɛli yoli m’ɔ timan kpa-ɔ? (An nian desɛn’n wie.)

⁹ Piɛli suannin wafa ng’ɔ kwla yi i nglo kɛ ɔ klo i wiengu mun’n. I nun mɔ Zezi kán ndɛ yɛ’n, nn Piɛli o lɛ: “Ń má mán amun mmla uflɛ: Amun klo amun wiengu. Kɛ nga n fa kloli amun sa’n, amun kusu amun klo amun wiengu sɔ.” (Zan 13:34) Ɔ nin i sɔ’n ngba’n, i niaan nga be ti Zifu’n be wun srɛ ti’n, ɔ nin i niaan nga be timan Zifu’n b’a diman like likawlɛ kun. I sɔ’n ti’n, akoto Pɔlu seli kɛ Piɛli “dili i fuka nɲɔn nun.” (Gal. 2:​11-14) Kɛ be tuli Piɛli i fɔ’n, ɔ sɔli nun klanman kpɛkun ɔ kacili i ayeliɛ’n. Fluwa nɲɔn ng’ɔ klɛli be’n nun’n, ɔ seli kɛ ɔ fataman kɛ e se ngbɛn kɛ e klo e niaan mun, sanngɛ ɔ fata kɛ e yi i nglo wie.

10. ?Ngue yɛ ɔ kwla uka e naan y’a ‘kloman e wiengu e nuan bui’n su-ɔ’? An yiyi nun. (1 Piɛli 1:22)

¹⁰ Piɛli waan ɔ fataman kɛ e ‘klo e niaan mun gblɛ nun.’ (An kanngan 1 Piɛli 1:22 nun.) Kɛ ɔ ko yo naan y’a yoman sɔ’n, ɔ fata kɛ ‘e fa ndɛ nanwlɛ’n su.’ Ndɛ nanwlɛ sɔ’n i wie yɛle kɛ “Ɲanmiɛn kpaman sran nun.” (Yol. 10:​34, 35) Sɛ asɔnun’n nun’n, e klo aniaan wie mun naan e kloman wie mun’n, nn e nantiman ndɛ nga Zezi kannin’n su. I yo, kɛ Zezi sa’n e nin aniaan wie mun e afiɛn kwla mantan kpa tra wie mun. (Zan 13:23; 20:2) Sanngɛ Piɛli kpɛn e wla kɛ ɔ fata kɛ ‘e klo e wiengu’m be’ kwlakwla yɛ e nin be tran kɛ awlobo kunngba nunfuɛ mun sa.—1 Piɛ. 2:17.

11. ?Kɛ be se kɛ ‘e klo e wiengu tankaan kpa’n’ i bo yɛle benin?

¹¹ Piɛli wla e fanngan kɛ ‘nán e klo e wiengu e nuan bui su.’ Ndɛ sɔ’n kle kɛ ɔ fata kɛ e klo e wiengu mun tankaan kpa. Kannzɛ bɔbɔ ɔ ju wie’n i sɔ yolɛ’n ti kekle’n, sanngɛ ɔ fata kɛ e mian e ɲin e yo sɔ. ?Yɛ sɛ e niaan wie yo e sa’n nin? ?Blɛ sɔ’n nun’n, ngue yɛ é yó-ɔ? E ja nun lɛ’n, e kwla se kɛ é yí é mɛ́n i. Sanngɛ Zezi kleli Piɛli kɛ i sɔ yolɛ’n jɔman Ɲanmiɛn klun. (Zan 18:​10, 11) Piɛli klɛli i kɛ: “Sɛ sran yo amun sa’n, nán amun yo i wie. Sɛ be kpɛ amun nzowa’n, nán amun kpɛ be wie.” (1 Piɛ. 3:9) Ɔ maan sɛ e klo e wiengu tankaan kpa’n, é sí be aunnvɔɛ yɛ e nin be trán klanman. Be nga be lo e ngasi bɔbɔ’n, e nin be trán klanman wie.

12. (1) ?Sɛ e klo e wiengu tankaan kpa’n, ngue yɛ é yó-ɔ? (2) ?Kɛ nga e fa wun i video’n nun sa’n, ngue yɛ a kunndɛ kɛ á mían ɔ ɲin yó-ɔ?

¹² Fluwa klikli nga Piɛli klɛli nun’n, ɔ seli kɛ sɛ e klo e wiengu tankaan kpa’n, i sɔ’n úka e naan y’a yaci be wun “sa tɛ kpanngban” y’a cɛ be. (1 Piɛ. 4:8) Atrɛkpa’n, Piɛli i wla kpɛnnin sa yaci cɛlɛ’n i su ndɛ nga Zezi kan kleli i laa’n i su. Blɛ sɔ’n nun’n, Piɛli buli i kɛ nn sɛ ɔ se kɛ ɔ kwla yaci i niaan kun i wun sa cɛ i “lele kpɛ nso’n,” nn ɔ si aunnvɔɛ dan. Sanngɛ Zezi kleli i kɛ ɔ fata kɛ ɔ yaci sa cɛ “lele kpɛ 77.” Ndɛ sɔ’n i bo’n yɛle kɛ ɔ fata kɛ e yaci sa e cɛ titi. (Mat. 18:​21, 22) Sɛ blɛ wie nun’n, y’a kwlá nantiman ndɛ sɔ’n su’n, ɔ fataman kɛ e sa sin bubu e! Ɔ ju wie’n, kɛ ɔ ko yo naan Zoova i sufuɛ mɔ fɔ o be nun’n, b’a yaci be wiengu’m be wun sa’n w’a cɛ be’n, ɔ ti kekle. I sɔ’n ti’n, maan e mian e ɲin e yo like kwlaa nga e kwla yo naan y’a yaci e wiengu’m be wun sa’n w’a cɛ be naan e nin be y’a ti e wun aniɛn’n. c

13. ?Ɔ ju wie’n, ngue yɛ ɔ kwla yo maan asɔnun kpɛnngbɛn’m be junman’n i dilɛ’n yo kekle man be-ɔ?

¹³ Kɛ Zezi cɛnnin nguan’n ndɛ ng’ɔ kan kleli Piɛli’n atrɛkpa’n i wla w’a fiman su le. Ɔ seli i kɛ: “Nian min bua ba’m be lika.”  (Zan 21:16) Sɛ a ti asɔnun kpɛnngbɛn’n, nn a wun i wlɛ kɛ ndɛ sɔ’n ti ɔ liɛ wie. Sanngɛ kɛ ɔ ko yo naan asɔnun kpɛnngbɛn kun w’a ɲan blɛ w’a di junman cinnjin sɔ mɔ be fa mɛnnin i’n ɔ kwla kekle. Afin ɔ fata kɛ asɔnun kpɛnngbɛn’m be dun mmua nian be awlobofuɛ’m be lika yɛ be uka be naan be nin Zoova be afiɛn mantan kpa. Asa’n, ɔ fata kɛ be fa jasin bolɛ’n i nun ta, yɛ be siesie junman nga bé wá dí i asɔnun aɲia mun nin akpasua su aɲia mun nin nvle kun aɲia’m be bo lɔ’n. Asɔnun kpɛnngbɛn wie’m be o Komite ng’ɔ nin Dɔɔtrɔfuɛ’m be di junman’n nun annzɛ be ko uka be asa liɛ’n su lɔ aniaan nga be o sua kplanfuɛ’m be biolo’n nun’n mun. Nanwlɛ, asɔnun kpɛnngbɛn’m be su junman’n sɔnnin!

14. ?Ngue yɛ ɔ kwla uka asɔnun kpɛnngbɛn mun naan b’a nian Ɲanmiɛn i bua fa’n i lika-ɔ? (1 Piɛli 5:​1-4)

¹⁴ Piɛli wlɛli i wiengu asɔnun kpɛnngbɛn’m be fanngan kɛ be ‘nian Ɲanmiɛn i bua fa’n i lika.’ (An kanngan 1 Piɛli 5:​1-4 nun.) Sɛ a ti asɔnun kpɛnngbɛn’n, e si kɛ a klo aniaan mun naan a kunndɛ kɛ á nían be lika. Sanngɛ ɔ ju wie’n kɔ mɔ a ɲanman ɔ ti annzɛ w’a fɛ dan ti’n, a kwlá diman ɔ junman’n kɛ nga a klo’n sa. ?Sɛ ɔ ti sɔ’n, ngue yɛ a kwla yo-ɔ? Srɛ Zoova naan kan ɔ klun ndɛ’n kle i. Piɛli seli kɛ: “Sɛ sran wie úkɛ i wiengu’n, maan ɔ lafi wunmiɛn nga Ɲanmiɛn man’n su.” (1 Piɛ. 4:11) Sa nga be o aniaan’m be su dɔ nga su’n, atrɛkpa’n nán mɛn nga nun yɛ i ngba wíe-ɔ. Sanngɛ nán amun wla fi su, Zezi Klisi m’ɔ “ti bua tafuɛ’m be su kpɛn’n” ɔ kwla uka aniaan sɔ mun tra amun bɔbɔ. Ɔ kwla uka be andɛ nin mɛn klanman nun lɔ. Ɔ maan like nga Ɲanmiɛn kunndɛ kɛ asɔnun kpɛnngbɛn’m be yo’n, yɛle kɛ be klo aniaan mun, be ndɛ lo be yɛ be “yo sa ng’ɔ ti kpa’n naan be nian su.”

15. ?Wafa sɛ yɛ asɔnun kpɛnngbɛn kun nian Ɲanmiɛn i bua fa’n i lika-ɔ? (An nian foto’n wie.)

¹⁵ Be flɛ aniaan bian kun m’ɔ ti asɔnun kpɛnngbɛn w’a cɛ kpa’n kɛ Wiliamun. Ɔ wun i wlɛ kɛ asɔnun kpɛnngbɛn junman’n timan kaan. Kɛ koronavirisi’n boli i bo’n, i bɔbɔ nin i wiengu asɔnun kpɛnngbɛn’m be fali ajalɛ kɛ bé flɛ́ aniaan nga be seli be kɛ be nian be lika lemɔcuɛ kwlaa nun’n be tinuntinun. Aniaan bian’n kannin like nga ti yɛ be fɛli i sɔ ajalɛ liɛ’n i ndɛ seli kɛ: “Aniaan kpanngban be ngunmin yɛ  be tran-ɔn. Ɔ maan, ɔ cɛman naan b’a bu akunndan tɛtɛ.” Kɛ sa o aniaan kun su m’ɔ su kɛn i klun ndɛ klé Wiliamun’n, ɔ sie i su kpa i nuan bo naan ɔ́ wún like nga aniaan’n i sa miɛn i wun’n. I sin’n, ɔ wun ninnge trele ng’ɔ kwla uka aniaan’n. Ɔ kwla yo video wie mɔ be o jw.org su’n. Wiliamun seli kɛ: “Dɔ nga su’n, aniaan’m be lika nianlɛ’n ti cinnjin kpa. E mian e ɲin e uka be nga be timan Zoova i sufuɛ’n naan b’a si Zoova. I wafa kunngba’n, ɔ fata kɛ e mian e ɲin kpa e uka aniaan mun naan be ka ndɛ nanwlɛ’n i atin’n su.”

16. ?Wafa sɛ yɛ e kwla nanti fluwa nga Piɛli klɛli be’n be nun ndɛ’n su-ɔ?

¹⁶ E fali e ɲin e sieli i fluwa nɲɔn nga Piɛli klɛli be’n be nun ndɛ wie’m be su. Atrɛkpa’n, a sieli ninnge wie m’ɔ fata kɛ a kaci ɔ sa be nun’n be nzɔliɛ. ?A kunndɛ kɛ á bú ninnge nga Ɲanmiɛn wá yó mán e mɛn klanman nun’n be su akunndan? ?Annzɛ a klo kɛ á bó jasin fɛ’n klé sran kun ɔ junman su lɔ, annzɛ suklu lɔ annzɛ kusu a klo kɛ á fá ɔ wun wlá jasin fɛ bolɛ’n i wafa wie nun? ?A kwla yi i nglo kɛ a klo ɔ niaan mun kpa tra laa’n? ?Asɔnun kpɛnngbɛn mun, amun a fua kpa kɛ amún nían Zoova i bua fa’n i lika kpa? Sɛ e sie i nzɔliɛ kɛ ɔ fata kɛ e kaci e sa ninnge wie’m be nun’n, ɔ fataman kɛ e sa sin bubu e. Afin “e Min’n ti kpa,” ɔ́ wá úka e naan e yo sran kpa. (1 Piɛ. 2:3) Piɛli wla e fanngan kɛ: “Ɲanmiɛn […] gúa amun like klelɛ’n i bo. Ɔ́ yó maan amún yó yakpafuɛ, ɔ́ yó maan amún ɲán wunmiɛn, yɛ ɔ́ yó maan amún jrán kekle.”—1 Piɛ. 5:10.

17. ?Sɛ e su Zoova kpa titi’n yɛ sɛ e man Zoova i atin naan ɔ kle e like’n, wafa sɛ yɛ i bo’n gúa-ɔ?

¹⁷ Blɛ kun nun’n, Piɛli seli i wun kɛ ɔ fataman kɛ Zezi fɛ i wun mɛntɛn i, afin ɔ nin i sɔ’n fataman. (Lik. 5:8) Sanngɛ Zoova nin Zezi be fanngan nun’n, Piɛli kwla suli Zezi lele guɛli i ti nin i bo. I sɔ’n ti’n, Zoova mannin Piɛli i ‘atin kɛ ɔ wlu e Min Zezi Klisi m’ɔ ti e Defuɛ’n i Famiɛn Diwlɛ m’ɔ́ ká lɛ tititi’n, i nun.’ (2 Piɛ. 1:11) Nanwlɛ, i sɔ’n ti suyralɛ dan-o! Sɛ e mian e ɲin e su Zoova kpa kɛ Piɛli sa’n, naan e man Zoova i atin kɛ ɔ kle e like’n, e kusu é ɲán nguan m’ɔ leman awieliɛ’n.“É ɲán like nga ti yɛ e lafi i su’n. Like sɔ’n yɛle e ti ɲanlɛ’n.’—1 Piɛ. 1:9.