1. ?Like benin yɛ e wiengu junman difuɛ mun nin e wiengu suklu ba’m be kwla usa e i su sa-ɔ?

 ?KƐ Ɔ wiengu junman kun annzɛ ɔ wiengu suklu ba kun usa ɔ like nga a lafi su’n i su sa’n, wafa sɛ yɛ ɔ wun yo-ɔ? ?Ɔ klun titi-ɔ? Sɛ ɔ ti sɔ’n, nán ɔ kunngba yɛ ɔ wun yo wɔ sɔ-ɔ. Sanngɛ kosan nga sran sɔ’n usali wɔ ti’n, a kwla si akunndan ng’ɔ bu’n nin like ng’ɔ lafi su’n. Asa’n, i sɔ’n kwla yo maan a bo jasin fɛ’n kle i. Ɔ ju wie’n, sran kun m’ɔ bu i kɛ like nga e lafi su’n timan su’n, annzɛ sran kun m’ɔ kunndɛ kɛ ɔ nin e sí akplowa’n kwla usa e sa. Ɔ fataman kɛ i sɔ’n bo e nuan. Afin andɛ’n, sran kpanngban be fa e su ato nga b’a tru lika nun’n be su. (Yol. 28:22) Asa’n, e o “mɛn’n i awieliɛ blɛ nun.” Ɔ maan sran’m ‘be kunndɛman kɛ be nin be wiengu’m bé tí be wun aniɛn’ yɛ wie liɛ bɔbɔ’n ‘be yo wlɛ.’—2 Tim. 3:​1, 3.

2. ?Ngue ti yɛ ɔ fata kɛ e yo wɛtɛɛfuɛ-ɔ?

² Sanngɛ atrɛkpa’n, a kwla usa ɔ wun kɛ: ‘?Yɛ sɛ sran kun kunndɛ kɛ ɔ nin min sí Biblu’n nun ndɛ’n su akplowa nin? ?Ngue yɛ ɔ kwla uka min naan m’an tɛ i su amanniɛn su-ɔ?’ Like ng’ɔ kwla uka wɔ’n, yɛle wɛtɛɛ yolɛ’n. Sran ng’ɔ ti wɛtɛɛfuɛ’n, kɛ be klɔklɔ i’n annzɛ kɛ be usɛ i sa m’ɔ siman ndɛ ng’ɔ́ kán’n, ɔ faman ya ndɛndɛ yɛ ɔ trɛ i awlɛn. (Ɲan. 16:32) Sanngɛ a kwla se ɔ wun kɛ: ‘Ndɛ’n i kanlɛ yoman ya, i su nantilɛ’n yɛ ɔ ti ndɛ’n niɔn.’ ?Ɔ maan wafa sɛ yɛ e kwla yo wɛtɛɛfuɛ-ɔ? ?Kɛ sran’m be usa e like nga e lafi su’n i su sa’n, wafa sɛ yɛ e kwla tɛ su amanniɛn su-ɔ? ?Sɛ a ti siɛ annzɛ niɛn’n, wafa sɛ yɛ a kwla uka ɔ mma mun naan b’a kan like nga be lafi su’n i ndɛ b’a kle sran mun wɛtɛɛ su-ɔ? Like suanlɛ nga nun’n, é wá tɛ́ kosan sɔ’m be su.

3. ?Ngue ti yɛ e kwla se kɛ sran ng’ɔ ti wɛtɛɛfuɛ’n ɔ le wunmiɛn naan ɔ timan srɛfuɛ-ɔ? (2 Timote 2:​24, 25)

³ Sran wie’m be bu i kɛ sran ng’ɔ ti wɛtɛɛfuɛ’n, ɔ ti srɛfuɛ annzɛ ɔ leman wunmiɛn. Sanngɛ i sɔ’n timan nanwlɛ. Sran ng’ɔ  ti wɛtɛɛfuɛ’n kɛ be yo i sa’n, ɔ trɛ i awlɛn. I sɔ yolɛ kusu timan pɔpɔ. Wɛtɛɛ yolɛ’n ɔ o “nzuɛn nga Ɲanmiɛn wawɛ’n yo maan klɔ sran yi i nglo’n” nun wie. (Gal. 5:​22, 23) Glɛki nun ndɛ mma nga be kacili i Wawle nun kɛ “wɛtɛɛ yolɛ’n,” ɔ ju wie’n be fa kan nnɛn kpanngɔ kun mɔ be ko trɛ i blo lɔ be wa tɛ i’n i ndɛ. Kɛ be tɛ i’n ɔ lo sanngɛ i wunmiɛn’n wieman. ?Wafa sɛ yɛ e kwla yo wɛtɛɛfuɛ kpɛkun e kunngba’n e yo ninnge mun juejue su-ɔ? Sɛ sran w’a ukaman e’n, e kwlá yoman sɔ. Like ng’ɔ kwla uka e kusu’n, yɛle Ɲanmiɛn srɛlɛ’n. Ɔ fata kɛ e srɛ Ɲanmiɛn kɛ ɔ fɛ i wawɛ’n uka e naan e fa nzuɛn sɔ’n. Sa kpanngban be kle kɛ e kwla yo wɛtɛɛfuɛ. Zoova i sufuɛ kpanngban kpa be kle kɛ be ti wɛtɛɛfuɛ. Afin kɛ sran’m be klɔklɔ be’n, annzɛ be kunndɛ kɛ be nin be sí akplowa’n, be tra be awlɛn yɛ be tɛman be su. I sɔ mɔ be yo’n ti’n, sran wie’m be bu Zoova i sufuɛ’m be wun akunndan kpa. (An kanngan 2 Timote 2:​24, 25 nun.) ?Wafa sɛ yɛ e kwla yo wɛtɛɛfuɛ-ɔ?

4. ?Ngue yɛ Izaaki i su ndɛ’n kle e wɛtɛɛ yolɛ’n su-ɔ?

⁴ Biblu’n nun ndɛ kaka be kle kɛ wɛtɛɛ yolɛ’n ti cinnjin kpa. Izaaki i su ndɛ’n kle sɔ weiin. I nun m’ɔ tran Geraa m’ɔ o Filistifuɛ’m be mɛn’n nun’n, i mantanfuɛ’m be fali be ɲin be cili i yɛ be tanninnin gbo nga i si i sufuɛ’m be kpɛli be’n. Sanngɛ ɔ nin be w’a kanman ndɛ. Ɔ jasoli be wun lɛ ko trannin lika uflɛ kpɛkun ɔ kpɛli gbo uflɛ wie mun. (Bob. 26:​12-18) Sanngɛ Filistifuɛ’m be waan lika nga be kpɛli gbo’m be lɛ’n ɔ ti be liɛ naan lɛ nzue’n ti be liɛ wie. Ɔ nin i sɔ ngba’n, Izaaki nin be w’a kanman ndɛ. (Bob. 26:​19-25) ?Kɛ sran’m be kunndɛli kpa kɛ bé klɔ́klɔ́ Izaaki’n, ngue yɛ ɔ ukɛli i naan w’a trɛ i awlɛn titi-ɔ? E kwla se kɛ ɔ niɛnnin i si nin i nin be ajalɛ’n su. I si Abraamun nin sran’m be trannin klanman yɛ i nin Sara kusu ti sran ‘diin yɛ ɔ ti wɛtɛɛfuɛ.’—1 Piɛ. 3:​4-6; Bob. 21:​22-34.

5. ?Sa benin mun yɛ be kle kɛ siɛ nin niɛn’m be kwla uka be mma mun naan b’a yo wɛtɛɛfuɛ-ɔ?

⁵ Siɛ nin niɛn mun, amun kwla uka amun mma naan b’a yo wɛtɛɛfuɛ. Maan e kan gbanflɛn kun mɔ be flɛ i kɛ Masɛn m’ɔ le afuɛ 17 i ndɛ. Wie liɛ’n, suklu lɔ annzɛ kɛ ɔ́ bó jasin fɛ’n, ɔ ju wie’n sran’m be fa ya be kan ndɛ be kle i. I si nin i nin be trali be awlɛn be ukɛli i naan w’a yo wɛtɛɛfuɛ. I si nin i nin be seli kɛ: “Siɛn’n Masɛn wun i wlɛ kɛ sɛ sran kun klɔklɔ i naan ɔ trɛ i awlɛn naan w’a tɛmɛn i su ya su’n, ɔ ti kpa tra kɛ ɔ fa ya tɛ su’n. Masɛn wun i wlɛ kɛ kɛ sran kun klɔklɔ wɔ mɔ a tɛmɛn i su’n, i sɔ yolɛ’n ti kekle. Ɔ maan sɛ be klɔklɔ wɔ naan a tɛman su’n, i lɛ nun yɛ a kle kɛ a si ɔ awlɛn tra-ɔ.” Ɔ maan siɛn’n, Masɛn miɛn i ɲin naan w’a yo wɛtɛɛfuɛ.

6. ?Wafa sɛ yɛ Ɲanmiɛn srɛlɛ’n kwla uka e naan y’a yo wɛtɛɛfuɛ-ɔ?

⁶ ?Sɛ sran kun saci Ɲanmiɛn dunman annzɛ ɔ kan Biblu’n i wun ndɛ tɛtɛ’n, ngue yɛ e kwla yo-ɔ? I lɛ nun’n, e kwla srɛ Ɲanmiɛn kɛ ɔ fɛ i wawɛ’n man e annzɛ ɔ kle e ngwlɛlɛ naan e tɛ i su amanniɛn su. ?Yɛ sɛ i sin’n, e sie i nzɔliɛ kɛ y’a tɛmɛn i su kɛ ng’ɔ nin i fata’n sa nin? E kwla srɛ Zoova ekun kɛ cɛn uflɛ liɛ’n, ɔ uka e naan e tɛ sran’n su klanman. Sɛ e yo sɔ’n, Zoova fɛ́ i wawɛ’n mán e naan y’a nian e wun su naan y’a yo wɛtɛɛfuɛ.

7. ?Wafa sɛ yɛ Biblu’n nun ndɛ mma nga e fa sie e klun’n be kwla uka e blɛ kekle nun-ɔn? (Ɲanndra Mun 15:​1, 18)

⁷ Biblu’n nun ndɛ mma kpanngban wie’m be kwla uka e naan sɛ sran’m be klɔklɔ e’n y’a kwla tɛ be su amanniɛn su. Blɛ sɔ’n nun’n, Ɲanmiɛn wawɛ’n kwla uka e maan ndɛ mma sɔ’m be kpɛn e klun. (Zan 14:26) Ndɛ ng’ɔ o Ɲanndra Mun fluwa’n nun’n be kwla uka e naan y’a yo wɛtɛɛfuɛ. (An kanngan Ɲanndra Mun 15:​1, 18 nun.) Kɛ be klɔklɔ sran kun m’ɔ trɛ i awlɛn’n i su ye ng’ɔ ɲɛn i’n, fluwa sɔ’n kɛn i ndɛ.—Ɲan. 10:19; 17:27; 21:23; 25:15.

8. ?Ngue ti yɛ ɔ fata kɛ e bu like nga ti yɛ sran kun usa e kosan’n i akunndan-ɔn?

⁸ Sɛ e ti akunndanfuɛ’n i sɔ’n kwla uka e kpa. (Ɲan. 19:11) Kɛ be usa sran ng’ɔ ti akunndanfuɛ’n i like ng’ɔ lafi su’n i su sa’n, ɔ bu i sin kpa ka naan w’a tɛ su. Afin ɔ ju wie’n, be nga be usa e sa’n be kanman ndɛ trele nga ti yɛ be usa e sa’n be kleman e. Ɔ maan sɛ e si sa nga ti yɛ sran’n usa e sa ka naan y’a tɛ i su’n, ɔ ti kpa.—Ɲan. 16:23.

9. ?Kɛ ndɛ tɔli Zedeɔn nin Efraimun yasua’m be afiɛn’n, wafa sɛ yɛ Zedeɔn kleli kɛ ɔ ti akunndanfuɛ nin wɛtɛɛfuɛ-ɔ?

⁹ Maan e kan wafa nga Zedeɔn tɛli Efraimun yasua’m be su’n i ndɛ kan. Be waan kɛ Zedeɔn nin Izraɛlifuɛ’m be kpɔfuɛ’m bé kó kún’n, w’a flɛman be ti’n be fali ya. ?Sanngɛ like trele nga ti yɛ be fali ya’n yɛle benin? Atrɛkpa’n be tu be wun ti-ɔ. I kwlaa yoli-o, Zedeɔn buli wafa nga be wun yo be’n, i akunndan. Ɔ maan ɔ tɛli be su amanniɛn su. ?Kɛ ɔ yoli sɔ’n, wafa sɛ yɛ i bo guali-ɔ? “Kɛ ɔ kannin ndɛ sɔ’n, be guali be ya’n i ase.”—Jɔl. 8:​1-3.

10. ?Ngue yɛ ɔ kwla uka e naan y’a si wafa nga e kwla tɛ be nga be usa e sa’n be su-ɔ? (1 Piɛli 3:15)

¹⁰ Ɔ ju wie’n, e wiengu junman difuɛ kun annzɛ e wiengu suklu ba kun kwla usa e sa nga ti yɛ e nanti Biblu’n nun mmla wie su’n i  su kosan. I lɛ nun’n, maan e mian e ɲin naan e tɛ i su amanniɛn su. Sɛ e yo sɔ’n, é klé kɛ e bu i sran. (An kanngan nun 1 Piɛli 3:15) Nán maan e bu i kɛ i waan ɔ nin e sí akplowa annzɛ ɔ́ kán e ndɛ tɛ ti yɛ ɔ usali e sɔ-ɔ. Sanngɛ i kosan sɔ’n ti’n, e kwla si like ng’ɔ ti i cinnjin’n. Kannzɛ wafa nga sran’n usa e sa’n ɔ ti sɛ ti sɛ’n, sanngɛ maan e tɛ i su amanniɛn su. Wafa nga é tɛ́ i su’n kwla ukɛ i naan w’a kaci i akunndan’n. Kannzɛ sran’n fa ya kan ndɛ kle e’n, sanngɛ maan e mian e ɲin naan e tɛ i su klanman.—Rɔm. 12:17.

11-12. (1) ?Kɛ sran kun usa e sa’n, ka naan y’a tɛ i su’n ngue yɛ ɔ fata kɛ e yo-ɔ? (An nian foto’n wie.) (2) An fa sunnzun ase kun be yiyi wafa nga kosan kun m’ɔ sran kun usa ti’n e nin i e kwla koko yalɛ wɛtɛɛ su’n i nun.

¹¹ Ɔ ju wie’n, e wiengu junman difuɛ wie kwla usa e sa nga ti yɛ e diman awuliɛ cɛn’n i su sa. I lɛ nun’n e kwla se e wun kɛ: Atrɛkpa’n, ɔ usa kosan sɔ’n naan ɔ́ nían sɛ e fa blɛ e yiyi e ɲin su-o. Atrɛkpa kusu’n, ɔ kwla se i wun kɛ, kɛ mɔ e diman awuliɛ cɛn’n ti’n e nin e wiengu junman difuɛ mun e su timan e wun aniɛn. Sɛ ɔ ti sɔ’n, e kwla se e wiengu junman difuɛ’n kɛ, kɛ ɔ bu i wiengu junman difuɛ’m be akunndan m’ɔ kunndɛ kɛ be tran klanman’n i sɔ’n yo e fɛ. Sɛ e yo sɔ’n i wla kwla gua ase. Kpɛkun é kwlá kán awuliɛ cɛn dilɛ’n i su ndɛ nga Biblu’n kan’n i ndɛ é klé i.

¹² Sɛ sran kun usa e sa wie mɔ i su tɛlɛ’n ti kekle’n, e kwla yo like kunngba nga e kɛnnin i ndɛ ndɛ kpɔlɛ 11 nun’n wie. I wie yɛle kɛ e wiengu suklu ba kun kwla se kɛ ɔ fata kɛ Zoova i Lalofuɛ’m be kaci be wiengu yasua annzɛ bla mɔ be nin i be la’n, i su akunndan nga be bu’n. I lɛ nun’n, e kwla se e wun kɛ: Atrɛkpa’n, ɔ wunman be wiengu yasua annzɛ bla mɔ be nin i be la’n i su ndɛ nga Zoova i Lalofuɛ’m be kan’n i wlɛ kpa. Atrɛkpa kusu’n, i janvuɛ kun annzɛ i osufuɛ kun ti i sɔfuɛ. Asa kusu’n ɔ kwla bu i kɛ Zoova i Lalofuɛ’m be kpɔ be nga be yo i sɔ like’n. Sɛ ɔ ti sɔ’n, e kwla se sran sɔ’n kɛ e klo sran kwlakwla yɛ e wun i wlɛ kɛ sran kun le atin fɛ i tiaun nun ajalɛ. b (1 Piɛ. 2:17) I sin’n, kɛ e nanti Biblu’n nun mmla’n su’n, i su ye nga e ɲɛn i’n e kwla kɛn i ndɛ e kle i.

13. Kɛ mɔ e lafi su kɛ Ɲanmiɛn o lɛ’n ti’n, sran kun kwla yo e finfin. ?Wafa sɛ yɛ e kwla uka sran sɔ’n niɔn?

¹³ Sɛ sran kun kan sa kun i ndɛ kle e naan wafa ng’ɔ kan ndɛ’n kle kɛ ɔ lafi ndɛ ng’ɔ kan’n su kpa’n, nán maan e ka lɛ e se kɛ ɔ si sa sɔ’n i ngbɛsungbɛsu’n kwlaa. (Tit. 3:2) I wie yɛle kɛ e wiengu suklu ba kun kwla se e kɛ be nga be lafi su kɛ Ɲanmiɛn o lɛ’n be siman ngwlɛlɛ. Sɛ ɔ se e sɔ’n, nán maan e ka lɛ e se kɛ ɔ lafi su kɛ ninnge’m be boli nun sa ngbɛn naan ɔ si ninnge’m be yilɛ’n i su ndɛ kaka. Atrɛkpa’n, ndɛ ng’ɔ tili’n yɛle ng’ɔ su kan kle e lɛ’n. Ɔ maan ɔ fataman kɛ e nin i e si ndɛ nga siansifuɛ’m be kan’n i su akplowa. Sanngɛ e kwla kan ndɛ wie m’ɔ kwla uka sran’n naan w’a bu sa sɔ’n i su akunndan-ɔn. Annzɛ e kwla fɛ i ɲin e sie i ninnge’m be yilɛ’n i su ndɛ nga be o jw.org su’n i su trele. Atrɛkpa’n kɛ ɔ́ kɔ́ i ɲrun’n, ɔ kwla kunndɛ kɛ e koko ndɛ wie m’ɔ kanngannin nun’n annzɛ video wie m’ɔ niannin be jw.org su’n i su yalɛ. Nanwlɛ, sɛ sran kun usa e sa naan e tɛ i su amanniɛn su’n, ɔ kwla kunndɛ kɛ ɔ́ sí Biblu’n nun ndɛ’n i kpa.

14. ?Wafa sɛ yɛ Nɛli fali e ɛntɛnɛti adrɛsi’n i su ndɛ’n ukɛli i wiengu suklu ba kun-ɔn?

¹⁴ Aniaan gbanflɛn kun mɔ be flɛ i kɛ Nɛli’n, ɔ fa e ɛntɛnɛti adrɛsi’n i su ndɛ’n uka sran mun naan be wun i wlɛ kɛ Zoova i Lalofuɛ’m be su ndɛ nga sran’m be kan’n ɔ timan su. Aniaan bian’n seli kɛ: “Kpɛ sunman’n min wiengu suklu ba kun se min kɛ min  waan n lafiman siansifuɛ’m be ndɛ nga be kan’n su, sanngɛ n lafi Biblu’n nun ndɛ m’ɔ ti ngua ndɛ’n i su.” Nɛli i wiengu suklu ba’n w’a mɛnmɛn i atin kɛ ɔ yiyi like ng’ɔ lafi su’n i nun kle i. Ɔ maan Nɛli fɛli i ɲin sieli i ndɛ akpasua kun (“La Bible et la science”) m’ɔ o jw.org su’n i su. I sin’n, Nɛli sieli i nzɔliɛ kɛ i wiengu suklu ba sɔ’n kanngannin ndɛ sɔ’n nun naan ɔ kunndɛ kɛ ɔ́ sí ninnge’m be yilɛ i su ndɛ’n nun kpa ekun. Sɛ e nian Nɛli ajalɛ’n su’n, i bo’n kwla gua kpa man e wie.

15. ?Wafa sɛ yɛ siɛ nin niɛn’m be kwla uka be mma mun naan b’a tɛ be wiengu suklu ba nga be usa be sa’n be su wɛtɛɛ su-ɔ?

¹⁵ Siɛ nin niɛn’m be kwla uka be mma mun naan b’a tɛ be nga be kunndɛ kɛ be nin be sí like nga be lafi su’n i su akplowa’n be su wɛtɛɛ su. (Zak. 3:13) Kɛ siɛ nin niɛn wie’m be nin be mma’m bé sú Ɲanmiɛn awlo lɔ’n, be uka be i sɔ yolɛ’n nun. Blɛ sɔ’n nun’n, be kan sa wie mɔ be kwla tɔ ba’m be su suklu lɔ’n, ɔ nin wafa nga sɛ be usa be sa’n be kwla tɛ su’n be ndɛ. Kpɛkun be kle be mma mun wafa nga be kwla kan ndɛ’n amanniɛn su wie.—An nian kuku nga be flɛ i kɛ “ Ninnge nga amun kwla koko be su yalɛ awlo lɔ’n” nun.

16-17. ?Kɛ gbanflɛn nin talua’m be siesie be wun’n wafa sɛ yɛ i sɔ’n kwla uka be-ɔ?

¹⁶ Siɛ nin niɛn mun, sɛ awlo lɔ’n amun nin amun mma’m be koko ndɛ wie’m be su yalɛ’n, i sɔ’n úka be naan sɛ sran wie usa be sa’n b’a si su tɛ. Asa’n i sɔ’n úka be naan b’a lafi like nga amun kle be’n su wie. I sɔ yolɛ nun’n, amun kwla fa ndɛ akpasua ng’ɔ suan “Kosan nga Gbanflɛn nin talua’m be usa be’n” nin “Fiches de réflexion pour ados” mɔ be o jw.org su’n be uka gbanflɛn nin talua mun. Ndɛ akpasua sɔ’m be kwla uka gbanflɛn nin talua mun naan b’a lafi like nga be kle be’n su kpa. Asa’n be kwla uka be naan b’a tɛ kosan nga be usa be’n be su kɛ nga be  bɔbɔ be fa wun ndɛ’n i wlɛ’n sa. Sɛ awlo lɔ’n e suan ndɛ akpasua sɔ’m be su like’n, é kwlá kán like nga e lafi su’n i ndɛ amanniɛn su.

¹⁷ Gbanflɛn kun m’ɔ suan Matie’n kannin wafa nga i wun siesielɛ’n ukɛli i’n i ndɛ. Kɛ ɔ nin i si nin i nin bé sú Ɲanmiɛn awlo lɔ’n, ɔ ju wie’n be kunndɛ ndɛ wie m’ɔ nin i wiengu suklu ba’m be kwla koko su yalɛ’n i su like. Matie seli kɛ: “E bu sa nga be kwla ju min su suklu lɔ’n be akunndan. Kpɛkun e kunndɛ sa sɔ’n i su like yɛ e bu wafa nga n kwla fa like nga n sili i sa sɔ’n su’n n tɛ be su’n i akunndan wie. Kɛ n ko wun like nga n lafi su’n i wlɛ kpa’n, min wla gua ase yɛ n kwla tɛ kosan nga min wiengu’m be usa min’n i su amanniɛn su.

18. ?Ngue yɛ Kolɔsufuɛ Mun 4:6 kɛn i ndɛ m’ɔ ti cinnjin kpa-ɔ?

¹⁸ I yo, kannzɛ e yiyi ndɛ’n weinwein sɛ’n, sanngɛ nán sran ngba yɛ ɔ́ fá su-ɔ. Sanngɛ sɛ e kan ndɛ’n i amanniɛn su’n, i sɔ’n kwla yo maan be nun wie’m be sie be su e nuan bo. (An kanngan Kolɔsufuɛ Mun 4:6 nun.) Wafa nga e tɛ sran’m be su’n, ɔ ti kɛ balɔn wie yɛ e to man be sa. E kwla to balɔn’n i blɛblɛ annzɛ e to i kekle. Sɛ e to balɔn’n i blɛblɛ’n, sran’m be kwla sɔ nun kpɛkun be nin e tó balɔn’n titi. I wafa kunngba’n, sɛ e tɛ sran’m be su amanniɛn su’n, be kwla sie be su e nuan bo kpɛkun e nin be kwla koko yalɛ titi. Sanngɛ sɛ sran kun kunndɛ kɛ ɔ nin e sí akplowa annzɛ ɔ kunndɛ kɛ ɔ́ yó e finfin’n, ɔ fata kɛ e nin i e yaci yalɛ kokolɛ. (Ɲan. 26:4) Sanngɛ sran ngba timan kun. Sran kpanngban be kwla kunndɛ kɛ bé tíe ndɛ nga e kan’n.

19. ?Kɛ sran kun usa e like nga e lafi su’n i su sa’n, ngue ti yɛ ɔ fata kɛ e tɛ i su wɛtɛɛ su-ɔ?

¹⁹ Nanwlɛ, kɛ e ti sran wɛtɛɛfuɛ’n e ɲan su ye dan. I sɔ’n ti’n, maan e srɛ Zoova kɛ ɔ uka e naan sɛ sran’m be kunndɛ kɛ be nin e sí akplowa annzɛ bé klɔ́klɔ́ e’n, e kwla tɛ be su wɛtɛɛ su. Nán maan e wla fi su kɛ sɛ e ti wɛtɛɛfuɛ’n, e nin sran mun e su siman akplowa ngbɛnngbɛn. Sɛ e tɛ sran’m be su wɛtɛɛ su’n, i sɔ’n kwla yo maan be nun wie’m be kaci e su akunndan nga be bu’n. Asa’n, i sɔ’n kwla yo maan be kaci Biblu’n nun ndɛ’n i su akunndan nga be bu’n wie. I sɔ’n ti’n, ‘nán e sisi e bo’ naan y’a kan like nga e lafi su’n i ndɛ y’a kle sran mun. Sanngɛ maan ‘e yo i wɛtɛɛ su nin amanniɛn su.’ (1 Piɛ. 3:15) Nanwlɛ, i kwlaa sɔ’n kle kɛ wɛtɛɛ yolɛ’n ti kpa dan!