Kɛ e kanngan Biblu’n nun’n ninnge kpanngban be kwla uka e naan y’a wun ndɛ nga e kanngannin nun’n i wlɛ. Sanngɛ nán Biblu’n nun ndɛ’m be silɛ ngunmin yɛ ɔ fata kɛ ɔ yo e cinnjin-ɔn. E kunndɛ kɛ é sí Zoova i su ndɛ wie mɔ be kwla uka e naan y’a klo i kpa y’a tra laa’n. I sɔ yolɛ nun’n, e kwla usa e wun kɛ: ‘?Ngue yɛ Biblu’n nun ndɛ nga kle min Zoova su-ɔ?’

E kwla fa e ɲin e sie i ninnge nga be kle kɛ Zoova ti klolɛ naan ɔ si ngwlɛlɛ naan ɔ yo sa nuan su sɛsɛ yɛ ɔ le tinmin’n be su. Sanngɛ nán Zoova i nzuɛn’m be ngba yɛle ngalɛ mun. Zoova i nzuɛn wie’m be o lɛ mɔ e kwla suan be su like ekun-ɔn. ?Sanngɛ fluwa benin yɛ ɔ kwla uka e naan y’a si Zoova i nzuɛn’m be su like ekun-ɔn?

E kwla nian Zoova i Lalofuɛ’m be like kunndɛlɛ fluwa’n i lika nga be klɛli i lɛ kɛ “Ɲanmiɛn Zoova.” I sin’n an nian kan be klɛli i lɛ “Zoova i nzuɛn.” Kpɛkun e fa e ɲin e sie i nzuɛn nga i ɲin fite Biblu’n i bue nga e su kanngan nun’n, nun’n i su.