1. ?Kɛ nga 1 Piɛli 5:2 fa kan’n sa’n, junman cinnjin benin yɛ ɔ fata kɛ asɔnun kpɛnngbɛn’m be di-ɔ?

 ASƆNUN kpɛnngbɛn mun yɛ ɔ fata kɛ be nian Zoova i bua fa’n i lika-ɔ. Junman sɔ’n i dilɛ’n ti be cinnjin kpa. I sɔ’n ti’n, be mian be ɲin be di junman kekle kpa naan b’a kwla ‘nian Zoova i bua fa’n su kpa.’ (Zer. 23:4; an kanngan 1 Piɛli 5:2 nun.) Nanwlɛ, kɛ e le aniaan kɛ ngalɛ sa mun e asɔnun’m be nun’n, i sɔ’n yo e fɛ kpa!

2. ?Sa benin wie mun yɛ be o asɔnun kpɛnngbɛn’m be su-ɔ?

² Asɔnun kpɛnngbɛn junman dilɛ’n timan pɔpɔ. I kun yɛle kɛ ɔ fata kɛ be di junman kekle kpa naan b’a kwla nian asɔnun’n i lika. Aniaan kun suan Tonin. Ɔ ti asɔnun kpɛnngbɛn yɛ ɔ tran Etazinin. Blɛ kun nun’n, ɔ wunnin i wlɛ kɛ ɔ kwlá yoman ninnge ngba. Ɔ seli kɛ: “Kɛ Koronavirisi’n boli i bo’n, n miannin min ɲin n dili junman kekle kpa naan y’a kwla yo aɲia mun, naan y’a kwla bo jasin fɛ’n. Ɔ nin i sɔ ngba’n, junman’n wieman. Ɔ maan n ɲanman min ti naan m’an kanngan Biblu’n nun, annzɛ naan min ngunmin m’an suan Biblu’n nun like annzɛ naan m’an srɛ Ɲanmiɛn bɔbɔ.” Aniaan kun ekun suan Ilɛɛ. Ɔ ti asɔnun kpɛnngbɛn wie, yɛ ɔ tran Kosovo. I liɛ’n sa uflɛ yɛ ɔ o i su-ɔ. Blɛ kun nun’n, kɛ alɛ tɔli kan ɔ tran lɛ’n, ajalɛ nga anuannzɛ’n fali be’n be su nantilɛ’n yoli kekle i sa nun. Ɔ seli kɛ: “Kɛ Betɛli’n seli min kɛ n ko nian aniaan nga be tran kan alɛ’n kpi kpa lɔ’n be lika’n, i sɔ’n yoli kekle kpa mannin min. Srɛ kunnin min, kpɛkun n seli min wun kɛ nán ajalɛ kpa yɛ Betɛli’n fali-ɔ.” Be flɛ aniaan bian kun m’ɔ ti ngaliɛ difuɛ Azi lɔ’n kɛ Timun. I liɛ’n, kɛ ɔ ko yo naan w’a kwla di i junman mun cɛn kwlaa’n, ɔ yoli kekle mɛnnin i. I bɔbɔ seli kɛ: “Ɔ ju wie’n, afɛ’n ti’n n kwlá nianman aniaan’m be lika kpa.” ?Sɛ sa kɛ ngalɛ sa’m be tɔ asɔnun kpɛnngbɛn’m be su’n, ngue yɛ ɔ kwla uka be naan b’a jran kekle-ɔ?

3. ?Ajalɛ benin yɛ Zedeɔn kle e-ɔ?

 ³ Kɛ asɔnun kpɛnngbɛn’m bé dí be junman’n, be kwla nian Zedeɔn i ajalɛ’n su. (Ebr. 6:12; 11:32) Ɲanmiɛn kpali Zedeɔn kɛ ɔ sɛsɛ i nvle’n nunfuɛ mun kpɛkun ɔ kle be atin. (Jɔl. 2:16; 1 Ɲol. 17:6) Kɛ Zedeɔn sa’n, Zoova kpali asɔnun kpɛnngbɛn mun kɛ be niɛn i sufuɛ’m be lika blɛ kekle nga nun. (Yol. 20:28; 2 Tim. 3:1) Kɛ Zedeɔn dí i junman’n, ɔ wunnin i wlɛ kɛ ɔ kwlá yoman ninnge ngba, ɔ kɛnnin i wun ase yɛ ɔ yoli aɲinyiɛfuɛ. Asa’n, sa kwlaa nga be tɔli i su’n be nun’n ɔ trɛli i awlɛn. I lɛ nun’n, Zedeɔn kle asɔnun kpɛnngbɛn’m be ajalɛ kpa. Ɔ maan kannzɛ a ti asɔnun kpɛnngbɛn-o annzɛ a timan asɔnun kpɛnngbɛn-o, a kwla kle kɛ a bu junman nga asɔnun kpɛnngbɛn’m be di’n, i like cinnjin. I wie yɛle kɛ a kwla suan aniaan sɔ mɔ be mian be ɲin be nian asɔnun’n i lika’n be bo.—Ebr. 13:17.

4. ?Wafa sɛ yɛ Zedeɔn kleli kɛ ɔ ti wun ase kanfuɛ-ɔ?

⁴ Zedeɔn kɛnnin i wun ase. I wie yɛle kɛ ɔ wunnin i wlɛ kɛ ɔ kwlá yoman ninnge ngba. b Kɛ Zoova i anzi’n seli Zedeɔn kɛ Zoova w’a kpɛ i kɛ ɔ ko de Izraɛlifuɛ mun Madianfuɛ mɔ be le wunmiɛn kpa’n be sa nun’n, ɔ seli kɛ: “Awlobo akpasua nga n fin nun’n yɛ ɔ ti Manase akpasua’n nun kaan’n niɔn. Min si i awlo’n nun’n, min yɛ n ti be nun kaan’n niɔn.” (Jɔl. 6:15) Ɔ seli i wun kɛ ɔ su kwlá diman junman nga be fa mɛnnin i’n. Sanngɛ Zoova liɛ’n ɔ si kɛ ɔ kwla di junman sɔ’n. Zoova fanngan nun’n, Zedeɔn kwla dili i junman’n lele guɛli i ti nin i bo.

5. ?Blɛ benin nun yɛ wun ase kanlɛ’n kwla yo kekle asɔnun kpɛnngbɛn kun i sa nun-ɔn?

⁵ Asɔnun kpɛnngbɛn’m be mian be ɲin naan b’a kan be wun ase sa kwlaa nun, yɛ be wun i wlɛ kɛ be kwlá yoman ninnge ngba. (Mis. 6:8; Yol. 20:18, 19) Be faman ninnge nga be si be yo’n, ɔ nin nga b’a yo be’n, be diman be nuan. Asa’n, kɛ be fɔn sa wie’m be nun’n be seman be wun kɛ be nunman sran nun. Sanngɛ ɔ ju wie’n be wun ase kanlɛ’n kwla yo kekle. I wie yɛle kɛ asɔnun kpɛnngbɛn kun kwla sɔ junman kaka nun, kpɛkun be dilɛ’n kwla yo kekle mɛn i. Asa’n, aniaan wie’m be kwla kɛn i ndɛ tɛtɛ annzɛ wie’m be yo i mo like wie m’ɔ yoli’n ti. ?Sa sɔ’m be nun’n, wafa sɛ yɛ Zedeɔn i su ndɛ’n kwla uka asɔnun kpɛnngbɛn mun-ɔn?

6. ?Wafa sɛ yɛ asɔnun kpɛnngbɛn’m be kwla kan be wun ase kɛ Zedeɔn sa-ɔ? (An nian foto’n wie.)

 ⁶ Amun se sran kɛ ɔ uka amun. Sran ng’ɔ ti wun ase kanfuɛ’n ɔ si kɛ nán ninnge ngba yɛ ɔ kwla yo be-ɔ. Kɛ mɔ Zedeɔn kɛn i wun ase ti’n, ɔ kplɛnnin su kɛ sran wie’m be ukɛ i. (Jɔl. 6:27, 35; 7:24) I sɔ yɛ asɔnun kpɛnngbɛn’m be yo-ɔ. Tonin mɔ e kɛnnin i ndɛ’n seli kɛ: “Wafa nga be tali min’n ti’n, kɛ be man min junman’n n kwlá seman kɛ n sɔman nun. Ɔ maan kɛ é sú Ɲanmiɛn awlo lɔ’n e suannin ninnge nga e kwla yo be’n, nin nga e kwlá yoman be’n be su like. Kpɛkun n seli min yi kɛ ɔ uka min. Asa’n n niannin video nga be flɛ i kɛ ‘Kɛ Zezi sa’n, maan e kle e wiengu’m be like, e lafi be su, yɛ e man be junman’ m’ɔ o jw.org su’n.” I sɔ’n ti’n, Tonin wa seli aniaan wie’m be kɛ be ukɛ i. ?Kɛ ɔ yoli sɔ’n, wafa sɛ yɛ i bo’n guali-ɔ? I bɔbɔ seli kɛ: “Siɛn’n asɔnun’n nun junman’m be kwlaa be di kpa. Kpɛkun n ɲan blɛ n yo ninnge ng’ɔ fata kɛ n yo be naan e nin Zoova e afiɛn w’a mantan kpa’n.”

7. ?Kɛ be kan asɔnun kpɛnngbɛn’m be ndɛ tɛtɛ’n, wafa sɛ yɛ be kwla nian Zedeɔn i ajalɛ’n su-ɔ? (Zaki 3:13)

⁷ Sɛ be kan amun ndɛ tɛ’n nán amun fa yo ndɛ. Sɛ aniaan’m be kan asɔnun kpɛnngbɛn’m be ndɛ tɛ’n, kɛ ɔ ko yo naan b’a kan be wun ase’n, ɔ kwla yo kekle. I lɛ nun’n, Zedeɔn kle be ajalɛ kpa ekun. Zedeɔn si kɛ fɔ o i nun naan nán cɛn ngba yɛ ɔ yo ninnge mun kɛ ng’ɔ nin i fata’n sa-ɔ. Ɔ maan kɛ Efraimunfuɛ’m be fɛli i wun ya mɔ be kɛnnin i ndɛ tɛtɛ’n, w’a fa yoman ndɛ. (Jɔl. 8:1-3) I kpa bɔbɔ’n, w’a tɛman be su ya su. Ɔ sieli i su be nuan bo, kpɛkun ɔ tɛli be su amanniɛn su. I lɛ nun’n, ɔ kleli kɛ ɔ ti wun ase kanfuɛ. Asɔnun kpɛnngbɛn mun, amun kwla nian Zedeɔn i ajalɛ’n su. Yɛle kɛ sɛ sran kun fa ya kan amun ndɛ tɛtɛ’n, amun sie amun su i nuan bo, yɛ amun tɛ i su amanniɛn su. (An kanngan Zaki 3:13 nun.) Sɛ amun yo sɔ’n, fɔundi trán asɔnun’n nun.

8. ?Sɛ asɔnun kpɛnngbɛn’m be di junman wie naan be yi i ayɛ’n, ngue yɛ ɔ fata kɛ be yo-ɔ? An fa sa kun be yiyi nun.

⁸ Amun fa manmanlɛ’n be man Zoova. Kɛ Zedeɔn kwlali Madianfuɛ mun mɔ sran’m be yili i ayɛ’n, ɔ fali be ɲin sieli i Zoova su. (Jɔl. 8:22, 23) ?Wafa sɛ yɛ asɔnun kpɛnngbɛn’m be kwla niɛn i ajalɛ’n su-ɔ? Ɔ fata kɛ be wun i wlɛ kɛ Zoova yɛ ɔ uka be ti yɛ be kwla di be junman’n niɔn. (1 Kor. 4:6, 7) I wie yɛle sɛ asɔnun kpɛnngbɛn kun si nzra nun ijɔ kpa naan aniaan’m be yi i ayɛ’n, ɔ kwla fa be ɲin sie i Ɲanmiɛn Ndɛ’n ɔ nin anuannzɛ mɔ Zoova sin be lika kle e like’n be su. Ɔ ju wie’n, asɔnun kpɛnngbɛn’m be kwla bu wafa nga be kle like’n i akunndan be nian. I liɛ’n, sɛ ɔ manman Zoova annzɛ ɔ yo maan sran’m be fa be ɲin be sie be su’n, bé wún i wlɛ. I sɔ yɛ aniaan kun m’ɔ suan Timoti’n ɔ yoli-ɔ. Kɛ be sieli i asɔnun kpɛnngbɛn uflɛuflɛ nun’n, like ng’ɔ klo i kpa’n yɛle nzra nun ijɔlɛ. Ɔ seli kɛ: “Kɛ ń íjɔ nzra nun’n, ndɛ nga n kan n fa fiti min ndɛ’n su’n ɔ nin sunnzun ase nga n fa be’n be wuali yɛ be wlɛ wunlɛ ti kekle. I sɔ mɔ n yo’n ti’n, wie liɛ’n sran’m be yi min ayɛ. Sanngɛ n sieli i nzɔliɛ kɛ min su yɛ be fa be ɲin be sie-ɔ. Be faman be ɲin be siemɛn i Biblu’n nin Zoova be su.” Timoti kacili wafa ng’ɔ ijɔ nzra nun’n naan sran’m b’a faman be ɲin b’a siemɛn i su kun. (Ɲan. 27:21) ?Wafa sɛ yɛ i bo’n guali-ɔ? I bɔbɔ seli kɛ: “Siɛn’n, aniaan’m be kan wafa nga ndɛ nga n kannin’n ukali be naan b’a kwla jran be su sa’m be ɲrun kekle’n, ɔ nin wafa nga i sɔ’n yoli maan be nin Zoova be afiɛn mantan’n be ndɛ. Kɛ n ti i sɔ ndɛ mun’n, ɔ yo min fɛ tra kɛ be yi min ayɛ’n.”

9. ?Ngue ti yɛ kɛ ɔ ko yo naan Zedeɔn w’a yo yakpafuɛ naan w’a yo like nga Zoova seli i kɛ ɔ yo’n ɔ yoli kekle-ɔ? (An nian foto ng’ɔ o fluwa’n i bui’n su’n.)

⁹ Kɛ Zoova kpali Zedeɔn kɛ ɔ dun Izraɛlifuɛ’m be ɲrun mmua’n, ɔ fata kɛ ɔ yo aɲinyiɛfuɛ  nin yakpafuɛ. Afin ɔ seli i kɛ ɔ ko bubu Baali i tɛ yiwlɛ ng’ɔ ti i si liɛ’n. (Jɔl. 6:25, 26) I sin’n, kɛ ɔ nin i sonja’m be yiali’n, Zoova seli i kpɛ nɲɔn kɛ be sɔnnin dan naan ɔ se wie’m be kɛ be sa be sin. (Jɔl. 7:2-7) Kasiɛn su’n, ɔ seli i kɛ ɔ nin i kpɔfuɛ’m be ko kun kɔnguɛ.—Jɔl. 7:9-11.

10. ?Ngue ti yɛ ɔ ju wie’n kɛ ɔ ko yo naan asɔnun kpɛnngbɛn’m b’a nanti ajalɛ nga be kle be’n su’n ɔ kwla yo kekle-ɔ?

¹⁰ Ɔ fataman kɛ asɔnun kpɛnngbɛn’m be ‘sisi be bo naan b’a yo like nga be se be kɛ be yo’n.’ (Zak. 3:17) Asɔnun kpɛnngbɛn ng’ɔ ti aɲinyiɛfuɛ’n ɔ sisimɛn i bo naan w’a nanti ndɛ nga Ɲanmiɛn Ndɛ’n kan’n su, yɛ ɔ suan ajalɛ kwlaa nga anuannzɛ’n fa be’n be bo. Kɛ ɔ yo sɔ’n ɔ kle i wiengu’m be ajalɛ kpa. Sanngɛ ɔ ju wie’n kɛ ɔ ko yo naan w’a yo aɲinyiɛfuɛ’n ɔ kwla yo kekle. I wie yɛle kɛ ajalɛ nga anuannzɛ’n fa be’n be su nantilɛ’n kwla yo kekle. Ɔ maan, ɔ ju wie’n ɔ kwla usɛ i wun sɛ be kwla nanti ajalɛ sɔ’m be nun wie’m be su sakpa-o, annzɛ bɔbɔ sɛ be ti kpa-o. Asa’n, ɔ kwla usɛ i wun sɛ ɔ fata kɛ ɔ sɔ junman kun mɔ i dilɛ nun’n be kwla trɛ i be wlɛ i bisua’n i nun-o. ?Sɛ sa kɛ ngalɛ sa wie ju asɔnun kpɛnngbɛn’m be su’n, wafa sɛ yɛ be kwla yo aɲinyiɛfuɛ kɛ Zedeɔn sa-ɔ?

11. ?Ngue yɛ ɔ kwla uka asɔnun kpɛnngbɛn mun naan b’a nanti ajalɛ nga be kle be’n su-ɔ?

¹¹ Amun fa amun ɲin be sie i ajalɛ nga be kle amun’n su yɛ amun fa su. Zoova kleli Zedeɔn wafa ng’ɔ fata kɛ ɔ bubu i si’n i tɛ yiwlɛ’n, ɔ nin lika ng’ɔ fata kɛ ɔ kplan i tɛ yiwlɛ liɛ’n, ɔ nin nnɛn ng’ɔ fata kɛ ɔ fa yi tɛ’n. Kɛ Zoova seli Zedeɔn sɔ’n, w’a ijɔmɛn i sin, ɔ yoli like ng’ɔ seli i kɛ ɔ yo’n. Andɛ kusu’n, Zoova i anuannzɛ’n kle asɔnun kpɛnngbɛn’m be ajalɛ wie mun. I sɔ yolɛ’n nun’n, ɔ klɛ be fluwa wie mun fa kle be ninnge ng’ɔ fata kɛ be yo naan b’a sasa aniaan mun’n naan be nin Zoova be afiɛn w’a mantan kpa’n. Kɛ asɔnun kpɛnngbɛn’m be nanti ajalɛ nga anuannzɛ’n kle be’n su’n, asɔnun’n wunmuan’n ɲan su ye. I sɔ’n ti’n, e klo be kpa.—Jue. 119:112.

12. ?Wafa sɛ yɛ asɔnun kpɛnngbɛn’m be kwla nanti ndɛ ng’ɔ o Ebre Mun 13:17 nun’n su-ɔ?

¹² Kɛ anuannzɛ’n kle ajalɛ uflɛ’n amun fa su. Zoova seli Zedeɔn kɛ ɔ se i sonja’m be dan lika kɛ be sa be sin be awlo. (Jɔl. 7:8) Atrɛkpa’n ɔ usɛli i wun sɛ i sɔ’n ti ajalɛ kpa-o. Atrɛkpa kusu’n, ɔ usɛli i wun sɛ i sɔ yolɛ’n i bo’n gúa klanman-o. Ɔ nin i sɔ ngba’n, ɔ yoli like nga Zoova seli i kɛ ɔ yo’n. Andɛ kusu’n, asɔnun kpɛnngbɛn’m be nian Zedeɔn i ajalɛ’n su. Yɛle kɛ, kɛ anuannzɛ’n kle be ninnge’m be yolɛ wafa uflɛ’n be fa su. (An kanngan Ebre Mun 13:17 nun.) I wie yɛle kɛ afuɛ 2014 nun’n, e Anuannzɛ’n i ɲrun dinfuɛ’m be fali e Ɲanmiɛn Sielɛ Sua nin e aɲia yowlɛ dandan mun be kplanlɛ junman’n i wun ajalɛ uflɛ. (2 Kor. 8:12-14) Laa’n kɛ anuannzɛ’n kplan asɔnun sua kun man asɔnun bo kun’n, ɔ fata kɛ asɔnun bo sɔ’n i nunfuɛ’m be yi sika nga be fa kplannin sua’n. Sanngɛ siɛn’n, sika nga asɔnun nga be o mɛn wunmuan’n nun’n be man’n yɛ be fa kplan Ɲanmiɛn Sielɛ Sua mun nin e aɲia yowlɛ dandan mun lika kwlaa-ɔ. Ɔ maan sɛ asɔnun bo kun nunfuɛ mun be leman sika kpanngban  bɔbɔ’n be kwla kplan be sua’n be man be. Kɛ aniaan bian kun mɔ be flɛ i kɛ Zoze’n tili i sɔ’n, ɔ seli i wun kɛ: ‘Nanwlɛ, sɛ i sɔ yɛ be waan bé yó’n, nn n bumɛn i kɛ bé kwlá kplán Ɲanmiɛn Sielɛ Sua mun ekun. ?Mɛn nga w’a jran yɛ’n i nun’n i sɔ’n kwla yo ye?’ ?Ngue yɛ ɔ ukali Zoze naan w’a suan ajalɛ sɔ’n i bo-ɔ? Ɔ seli kɛ: “Ndɛ ng’ɔ o Ɲanndra Mun 3:5, 6 nun’n, ɔ ukali min naan m’an lafi Zoova su. Ajalɛ sɔ mɔ anuannzɛ’n fali’n i bo guali klanman dan. Siɛn’n e kplan Ɲanmiɛn Sielɛ Sua kpanngban tra laa’n. Asa’n wafa nga be fa sika’n nga e man’n be fa yo ninnge mun’n ti’n, e kwlakwla e ninnge’m be sɛ.”

13. (1) ?Ngue yɛ Zedeɔn lafili su kpa-ɔ? (2) ?Yɛ wafa sɛ yɛ asɔnun kpɛnngbɛn’m be kwla yo kɛ Zedeɔn sa-ɔ? (An nian foto’n wie.)

¹³ Amun mian amun ɲin be yo Zoova i klun sa’n. Like nga Zoova seli Zedeɔn kɛ ɔ yo’n ti’n sa kwla ɲɛn i. Asa kusu’n srɛ kunnin i wie. Ɔ nin i sɔ ngba’n, ɔ yoli like nga Zoova seli i kɛ ɔ yo’n. (Jɔl. 9:17) Zoova kleli Zedeɔn weiin kɛ ɔ nin i be o nun. I sɔ’n ti’n Zedeɔn lafili su kpa kɛ Zoova úkɛ i naan w’a sɛsɛ i nvle’n. Asɔnun kpɛnngbɛn nga be tran lika nga be manman aniaan’m be atin kɛ be su Zoova’n be nun’n, be nian Zedeɔn i ajalɛ’n su. I wie yɛle kɛ be tinngɛ aɲia mun yɛ be kle ajalɛ kpa jasin fɛ bolɛ’n nun. Kusu nn be si kɛ, sɛ polisie’m be tra be’n be kwla usa be sa, annzɛ be kwla wla be bisua. Annzɛ kusu’n be junman’n kwla fi be sa, annzɛ sran’m be kwla yo be like yaya. c Kɛ ɲrɛnnɛn’n dan’n wá bó i bo’n, ajalɛ nga bé wá klé asɔnun kpɛnngbɛn mun’n, ɔ fata kɛ be yo yakpafuɛ naan b’a kwla nanti be su. I wie yɛle kɛ atrɛkpa’n bé wá sé e kɛ e bo jasin wie m’ɔ su yoman sran’m be fɛ-ɔ. Kpɛkun bé wá klé e ninnge wie m’ɔ fata kɛ e yo naan kɛ Gɔgu m’ɔ fin Magɔgu’n ɔ́ wá fá alɛ’n wlá e sin’n y’a kwla fite nun’n.—Eze. 38:18; Ngl. 16:21.

14. ?Ngue ti yɛ ɔ fata kɛ Zedeɔn miɛn i ɲin kpa naan w’a kwla di i junman’n niɔn?

¹⁴ Ɔ fata kɛ Zedeɔn miɛn i ɲin kpa naan w’a kwla di jɔlɛ dilɛ junman’n. Kɛ Zedeɔn nin Madianfuɛ’m bé kún alɛ’n mɔ be wanndili i ɲrun’n, ɔ suli be su. Ɔ fɛli i Zizreɛli Kongo’n  nun lɛ lele juli Zurdɛn nzue ba’n i nuan lɔ. Kusu nn waka’m be sɔnnin lika sɔ’n nun kpa. (Jɔl. 7:22) ?Kɛ ɔ yoli sɔ’n, Zedeɔn yacili be fuanlɛ’n? Cɛcɛ. Kannzɛ bɔbɔ ɔ nin i sran 300 mun b’a fɛ’n, sanngɛ be kpɛli nzue ba’n, kpɛkun be suli be su. I agualiɛ su’n be toli Madianfuɛ mun, kpɛkun be kwlali be.—Jɔl. 8:4-12.

15. ?Blɛ benin nun yɛ asɔnun kpɛnngbɛn’m be awlɛn tralɛ’n kwla yo kekle-ɔ?

¹⁵ Kɛ asɔnun kpɛnngbɛn’m bé nían aniaan mun ɔ nin be awlobo’n nunfuɛ’m be lika’n, ɔ ju wie’n afɛ’n tin be su yɛ be koko. ?Blɛ sɔ’n nun’n wafa sɛ yɛ be kwla nian Zedeɔn i ajalɛ’n su-ɔ?

16-17. (1) ?Ngue yɛ ɔ ukali Zedeɔn naan w’a kwla trɛ i awlɛn w’a di i junman’n niɔn? (2) ?Ngue yɛ asɔnun kpɛnngbɛn’m be kwla lafi su-ɔ? (Ezai 40:28-31) (An nian foto’n wie.)

¹⁶ Amun lafi su kɛ Zoova mán amun wunmiɛn. Zedeɔn lafili su kpa kɛ Zoova mɛ́n i wunmiɛn, yɛ i sɔ kusu yɛ Zoova yoli-ɔ. (Jɔl. 6:14, 34) Cɛn kun’n, Zedeɔn nin i sran’m be wanndi fuannin Madianfuɛ’m be famiɛn nɲɔn be ja nun. Kusu nn atrɛkpa’n, famiɛn nɲɔn sɔ’m be fuli ɲɔnngɔnmin’m be su yɛ be wanndili-ɔ. (Jɔl. 8:12, 21) Sanngɛ Zoova fanngan nun’n be kwla trali be. Asɔnun kpɛnngbɛn’m be kusu be kwla fa be wla be guɛ i Zoova su, afin “i wunmiɛn’n wieman le” yɛ ɔ “fɛman.” Ɔ́ mán be wunmiɛn blɛ ng’ɔ nin i fata’n nun.—An kanngan Ezai 40:28-31 nun.

¹⁷ Maan e kan aniaan bian kun m’ɔ suan Matie’n i ndɛ. Ɔ o Komite ng’ɔ nin Dɔɔtrɔfuɛ’m be di junman’n i nun. ?Ngue yɛ ɔ ukɛli i naan w’a kwla di i junman’n titi-ɔ? Matie seli kɛ: “N wunnin kɛ ndɛ ng’ɔ o Filipufuɛ Mun 4:13 nun’n ɔ ti nanwlɛ. Kɛ afɛ’n tin min su m’ɔ yo min kɛ n su kwlá yoman like fi kun’n, n srɛ Zoova tankaan kpa. N srɛ i kɛ ɔ man min wunmiɛn naan m’an kwla suan min niaan’m be bo. Kɛ ɔ ko yo sɔ’n, Zoova fɛ i wawɛ’n man min wunmiɛn yɛ ɔ uka min naan m’an jran kekle.” Kɛ Zedeɔn sa’n, e asɔnun kpɛnngbɛn’m be mian be ɲin be di junman kekle kpa naan b’a kwla nian Zoova i sufuɛ’m be lika. Kannzɛ ɔ fata kɛ be wun i wlɛ kɛ be kwlá yoman ninnge ngba’n, sanngɛ be kwla lafi su kɛ sɛ be srɛ Zoova kɛ ɔ uka be’n ɔ́ mán be wunmiɛn naan b’a jran kekle.—Jue. 116:1; Fip. 2:13.

18. ?Sɛ e waan é bó i kpɔlɛ’n, wafa sɛ yɛ asɔnun kpɛnngbɛn’m be kwla nian Zedeɔn i ajalɛ’n su-ɔ?

¹⁸ Nanwlɛ, Zedeɔn i su ndɛ’n kle asɔnun kpɛnngbɛn’m be like kpanngban. I wie yɛle kɛ ɔ fata kɛ be wun i wlɛ kɛ be kwlá yoman ninnge ngba. Yɛ kɛ be yi be ayɛ, annzɛ be kan be ndɛ tɛ’n, ɔ fata kɛ be kle kɛ be ti wun ase kanfuɛ. Asa’n, nán junman kwlaa yɛ ɔ fata kɛ be sɔ nun-ɔn. Ɔ fata kɛ be fa ajalɛ nga anuannzɛ’n kle be’n su, yɛ be yo yakpafuɛ. I li mɛn’n i blɛ kasiɛn nga nun yɛ ɔ fata kɛ be yo sɔ kpa’n niɔn. Maan be lafi su kɛ kannzɛ sa ng’ɔ tɔ be su’n ti sɛ ti sɛ’n, Ɲanmiɛn mán be wunmiɛn naan b’a kwla jran be ɲrun kekle. Nanwlɛ, e klo e niaan kpa sɔ mɔ be mian be ɲin be di be junman’n yɛ e ‘bu be sran titi.’—Fip. 2:29.