Biblu’n w’a tɛman su trele sa. Sanngɛ ɔ kannin sa wie mɔ atrɛkpa’n be ti yɛ be fali ajalɛ sɔ’n be ndɛ.

Anzi kun seli Mari kɛ ɔ́ wá wúnnzɛ naan ɔ́ wú ba kun. Kɛ anzi’n kán ndɛ sɔ’n klé Mari’n, nn Mari nin Zozɛfu be tran Nazarɛti klɔ m’ɔ o Galile asa’n su’n i su. (Lik. 1:26-31; 2:4) I sin’n, kɛ be fin Ezipti lɔ be bali’n be sali be sin Nazarɛti lɔ. Lɔ yɛ Zezi ɲinnin-ɔn. Ɔ maan ɔ kacili Nazarɛtifuɛ. (Mat. 2:19-23) I sɔ’n ti yɛ kɛ bé kán Zezi nin Zozɛfu nin Mari be ndɛ’n, e bu Nazarɛti i akunndan’n niɔn.

Mari i osufuɛ kun suan Elizabɛti, ɔ tran Zida. Ɔ ti Ɲanmiɛn ɲrun jranfuɛ Zakari i yi. Kpɛkun i yɛ ɔ wa wuli Zan Batɛmun Yofuɛ’n niɔn. (Lik. 1:5, 9, 13, 36) Mari ko niannin Elizabɛti i osu Zida lɔ. Ɔ dili anglo nsan i wun lɔ kpɛkun ɔ sɛli i sin Nazarɛti. (Lik. 1:39, 40, 56) Ɔ maan Mari si Zida asa’n su lika’n.

Blɛ kun nun’n, Zozɛfu jasoli Nazarɛti lɛ ɔli Bɛtleɛmun m’ɔ ti “Davidi i klɔ’n” su lɔ. Afin Rɔmunfuɛ’m be siefuɛ kun waan sran kun wɔ “i bɔbɔ i klɔ” lɔ ko ‘klɛ i dunman.’ Kusu’n, Ɲanmiɛn nuan ijɔfuɛ’m be seli kɛ Bɛtleɛmun lɔ yɛ bé wú Mesi’n niɔn. (Lik. 2:3, 4; 1 Sam. 17:15; 20:6; Mis. 5:2) Kɛ Mari wuli Zezi’n, Zozɛfu w’a kunndɛman kɛ be fa ba nɔnman’n be sa be sin Nazarɛti. Afin atin’n wali. Ɔ maan be kali Bɛtleɛmun lɛ. Klɔ sɔ’n nin Zerizalɛmun be afiɛn’n ti nun kilo kɔe ngwlan. I sɔ mɔ be yoli’n ti’n, be kwla fali be wa nɔnman’n be ɔli Ɲanmiɛn Sua’n nun lɔ be ko yili tɛ nga mmla’n waan be yi’n.—San. 12:2, 6-8; Lik. 2:22-24.

Ɲanmiɛn i anzi’n dun mmua kan kleli Mari kɛ Ɲanmiɛn wá fá “Davidi i famiɛn bia’n mɛ́n” i wa’n yɛ ɔ́ dí famiɛn. Atrɛkpa’n, Zozɛfu nin Mari be seli be wun kɛ ɔ ti cinnjin kɛ be wu Zezi Davidi i klɔ’n su lɔ. (Lik. 1:32, 33; 2:11, 17) Ɔ maan, kɔlɛ’n be seli be wun kɛ ɔ flunman kɛ be ka lɛ naan be nian like nga Ɲanmiɛn wá sé be kɛ be yo’n.

Lele nin kɛ nzraama kannganfuɛ’m bé fá tó be Bɛtleɛmun lɛ’n, e siman blɛ nga b’a di i lɛ’n. Sanngɛ kɛ ɔ́ yó sɔ’n nn be tran sua kun nun yɛ Zezi timan nɔnman kun, w’a yo kaklaka kan. (Mat. 2:11) I sɔ’n kle kɛ b’a saman be sin Nazarɛti lɔ naan be cɛli Bɛtleɛmun lɛ kan. Ɔ maan Bɛtleɛmun kacili be tranwlɛ.

Erɔdu seli kɛ be “kun ba yasua nga be le afuɛ nɲɔn’n, ɔ nin nga be nin-a ɲanman afuɛ nɲɔn mɔ be o Bɛtleɛmun” lɔ’n. (Mat. 2:16) Anzi kun dun mmua boli i sɔ’n su kleli Zozɛfu. Ɔ maan ɔ nin Mari be fali Zezi yɛ be wanndi ɔli Ezipti. Yɛ be kali lɔ lele Erɔdu wuli. I sin’n, Zozɛfu fɛli i awlobofuɛ mun kpɛkun be sali be sin Nazarɛti lɔ. ?Ngue ti yɛ b’a saman be sin Bɛtleɛmun lɔ-ɔ? Blɛ sɔ’n nun’n, nn Erɔdu i wa Aakelaisi mɔ i klun yo wi’n yɛ ɔ sie Zide asa’n niɔn. Asa ekun’n, anzi kun seli i kɛ nán maan be wɔ lɔ. I sɔ’n ti yɛ Zozɛfu fɛli i awlofuɛ mun ɔli Nazarɛti lɔ’n niɔn. Lɔ liɛ’n ɔ kwla ta Zezi i kpa naan w’a kwla su Ɲanmiɛn kɛ ng’ɔ nin i fata’n sa.—Mat. 2:19-22; 13:55; Lik. 2:39, 52.

Zozɛfu dun mmua wuli ka naan Zezi w’a tike ɲanmiɛn su lɔ kɔlɛ’n i atin’n. I sɔ’n ti’n, bé wá cɛ́n Zozɛfu i nguan asiɛ’n su wa. Ɔ maan sran kpanngban bé wún i, yɛ ɔ́ wá yíyí like nga ti yɛ kɛ Mari wuli Zezi’n be kali Bɛtleɛmun lɔ’n i nun kpa ekun klé be.