LIKE SUANLƐ 31
“An jran kekle, nán amun wun usu amun”
“Min niaan kpa mun, an jran kekle, nán amun wun usu amun.”—1 KOR. 15:58.
JUE 122 An jran kekle, nán amun wun usu amun!
I SU FITILƐ a
1-2. ?Ngue ti yɛ e kwla fa Klisifuɛ mun e sunnzun sua fleiin kun-ɔ? (1 Korɛntifuɛ Mun 15:58)
AFUƐ 1978 nun’n, be kplannin sua fleiin kpa kun Zapɔn lɔ klɔ nga be flɛ i kɛ Tokio’n i su. Kɛ mɔ asiɛ’n keje klɔ sɔ’n su lɔ dan’n ti’n, sran wie’m be usali be wun kɛ: ‘?Sɛ asiɛ’n keje’n, sua sɔ’n ɔ́ kwlá jrán cinnjin’n?’ ?Wafa sɛ yɛ be kplannin sua sɔ’n naan w’a kwla jran cinnjin-ɔn? Be kplannin sua sɔ’n i kekleke kpa sanngɛ ɔ kwla blibli. Ɔ maan sɛ asiɛ’n keje’n ɔ su bu guaman. Klisifuɛ’m be ti kɛ sua fleiin sɔ’n sa. ?Ngue ti yɛ e se sɔ-ɔ?
2 Ɔ fataman kɛ Klisifuɛ’m be like yolɛ yoman ya. Sanngɛ Zoova i mmla’m be su nantilɛ’n nun’n, ɔ fata kɛ be jran kekle yɛ nán be wun usu be. (An kanngan 1 Korɛntifuɛ Mun 15:58 nun.) Asa’n be ‘sisiman be bo naan b’a yo like nga be se be kɛ be yo’n’ yɛ be manman sran fi annzɛ like wie fi atin kɛ ɔ yo naan be fɔn Ɲanmiɛn i mmla’n. Sanngɛ kɛ ɔ nin i fata’n, be mian be ɲin naan ‘be like yolɛ w’a yoman ya.’ (Zak. 3:17) Klisifuɛ ng’ɔ yo sɔ’n, ɔ seman kɛ saan fii i ndɛ liɛ’n su yɛ ɔ ka-ɔ yɛ ɔ ju wie’n ɔ kaci aniɛn’n. Like suanlɛ nga nun’n, é wá wún blɛ ng’ɔ fataman kɛ e wun usu e’n. Asa’n, é wá wún ninnge nnun mɔ Satan yo be naan y’a fɔn Zoova i mmla mun’n ɔ nin wafa nga e kwla jran kekle’n.
?WAFA SƐ YƐ E KWLA JRAN KEKLE-Ɔ?
3. ?Zoova i mmla benin mun yɛ be o Sa Nga Be Yoli’n 15:28, 29 nun-ɔn?
3 Zoova kunngba cɛ yɛ ɔ le atin kpɛ mmla man e-ɔ. Yɛ kɛ ɔ kpɛ mmla’n kusu’n, ɔ yiyi nun weinwein kle i sufuɛ mun. (Eza. 33:22) I wie yɛle kɛ Klisifuɛ Klikli’m be blɛ su’n, anuannzɛ’n i ɲrun difuɛ’m be wunnin ninnge cinnjin nsan nga’m be wlɛ kpa. I klikli yɛle kɛ ɔ fata kɛ be su Zoova kunngba cɛ, ɔ fataman kɛ be sɔ amuin. I nɲɔn su’n, ɔ fata kɛ be nanti mmoja’n i su mmla nga Zoova mannin’n su. Yɛ i nsan su’n, ɔ fata kɛ be nanti Biblu’n nun mmla’m be su. (An kanngan Sa Nga Be Yoli’n 15:28, 29 nun.) ?Andɛ’n, wafa sɛ yɛ Klisifuɛ’m be kwla jran kekle ninnge nsan sɔ’m be nun-ɔn?
4. ?Wafa sɛ yɛ e kwla kle kɛ Zoova kunngba cɛ yɛ e su i-ɔ? (Sa Nglo Yilɛ 4:11)
4 Ɔ fataman kɛ e sɔ amuin, ɔ fata kɛ e su Zoova kunngba cɛ. Zoova seli Izraɛlifuɛ’m be kɛ be su i kunngba cɛ. (Mml. 5:6-10) Kɛ Satan sali Zezi niannin’n, Zezi kleli weiin kɛ Zoova kunngba cɛ yɛ ɔ fata kɛ e su i-ɔ. (Mat. 4:8-10) I sɔ’n ti’n, ɔ fataman kɛ e sin waka sran annzɛ like uflɛ lika e su Ɲanmiɛn. Asa’n, nán e su sran. Kannzɛ sran sɔ’n ti Ɲanmiɛn sulɛ wafa wie su kpɛn-o, annzɛ politiki anuannzɛ wie su kpɛn-o, annzɛ balɔn bofuɛ wie annzɛ flimu yofuɛ wie annzɛ jue tofuɛ wie mɔ i dunman w’a fu nin-o, ɔ fataman kɛ e su be kɛ be ti Ɲanmiɛn sa. Ɔ fata kɛ e jran Zoova i sin titi yɛ ɔ su i m’ɔ ‘yili like kwlaa’n’ i kunngba cɛ.—An kanngan Sa Nglo Yilɛ 4:11 nun.
5. ?Ngue ti yɛ ɔ fata kɛ e nanti mmoja’n i su mmla nga Zoova kpɛli’n niɔn?
5 Maan e nanti mmoja’n i su mmla nga Zoova kpɛli’n su. ?Ngue ti yɛ ɔ fata kɛ e yo sɔ-ɔ? Afin Zoova seli kɛ mmoja’n nun yɛ nguan’n wo-ɔ. Nguan’n kusu ti like cinnjin kpa kun mɔ Zoova fa cɛli e-ɔ. (San. 17:14) Kpɛ klikli nga Zoova seli sran’m be kɛ be di nnɛn mun’n, ɔ seli be kɛ nán be di mmoja. (Bob. 9:4) Kɛ ɔ́ mán Izraɛlifuɛ’m be mmla’n, ɔ flannin ndɛ sɔ’n nun. (San. 17:10) Klisifuɛ klikli’m be blɛ su’n, Zoova maan i anuannzɛ’n i ɲrun difuɛ’m be seli Klisifuɛ’m be kwlakwla kɛ be “ci mmoja.” (Yol. 15:28, 29) Kɛ e tɔ tukpacɛ mɔ e kunndɛ kɛ é yó e wun ayre’n, e nian nun e nanti mmla’n sɔ’n su. b
6. ?Ngue yɛ é yó naan y’a kwla nanti Zoova i mmla’m be su-ɔ?
6 Maan e nanti Zoova i mmla’m be su kpa. (Ebr. 13:4) Kɛ akoto Pɔlu kán wafa nga e kwla nanti Zoova i mmla’m be su’n i ndɛ’n, ɔ seli kɛ ‘e wla e asiɛ’n su wa nzuɛn’m be ase.’ Ndɛ sɔ’n kle kɛ ɔ fata kɛ e fa ajalɛ wie mun naan y’a yoman sa tɛ. I lɛ nun’n, e nianman ninnge nga be kwla yo maan e tɔ bla nin bian kunndɛlɛ sukusuku nin i wunsu ɲannzuɛn sa’m be nun’n. (Kol. 3:5; Zɔb. 31:1) Kɛ sa tɛ yolɛ i akunndan ba e ti nun’n, e kpalo i ndɛndɛ naan y’a yoman like wie m’ɔ kwla yo maan e nin Zoova e afiɛn saci’n.
7. (1) ?Ngue yɛ ɔ fata kɛ e fua kpa kɛ é yó-ɔ? (2) ?Yɛ ngue ti-ɔ?
7 Zoova kunndɛ kɛ ‘e tu e klun’ e fɛ i ndɛ’m be su. (Rɔm. 6:17) Ninnge kwlaa ng’ɔ se e kɛ e yo’n be ti kpa yɛ e ɲan su ye. E kwlá kacimɛn i mmla mun. (Eza. 48:17, 18; 1 Kor. 6:9, 10) E mian e ɲin e nanti i mmla’m be su naan i klun jɔ e wun. Yɛ e kan ndɛ nga jue tofuɛ kun kannin’n wie. Ɔ seli kɛ: “M’an fua kpa kɛ ń nánti ɔ mmla’m be su blɛ kwlaa nun, lele ń gúɛ i ti nin i bo.” (Jue. 119:112) Sanngɛ Satan kunndɛ kɛ ɔ́ yó naan e yaci Zoova i mmla’m be su nantilɛ. ?Wafa sɛ yɛ ɔ yo sɔ-ɔ?
NINNGE NGA SATAN YO BE NAAN Y’A YACI ZOOVA I MMLA’M BE SU NANTILƐ’N
8. ?Ngue yɛ Satan yo naan y’a nantiman Zoova i mmla’m be su kun-ɔn?
8 Yalɛ klelɛ’n. Kɛ ɔ ko yo naan y’a nantiman Zoova i mmla’m be su kun’n, Satan yo maan sran’m be yo e tɛtɛ annzɛ be jran e wun kɛ e fɔn Ɲanmiɛn i mmla’n. Ɔ kunndɛ kɛ ɔ́ yó naan e nin Zoova e afiɛn saci. (1 Piɛ. 5:8) Klisifuɛ klikli’m be blɛ su’n, be wlanwlannin be nun wie mun, be boli wie mun, yɛ be kunnin wie mun. Afin be fuali kpa kɛ bé sú Ɲanmiɛn titi. (Yol. 5:27, 28, 40; 7:54-60) Like kunngba’n yɛ Satan yo i andɛ-ɔ. I wie yɛle e niaan nga be o Risi lɔ’n nin nvle uflɛ nun mɔ be kle be yalɛ tɛtɛ kpa’n be liɛ’n.
9. ?Ngue ti yɛ ɔ fata kɛ e nian e wun su ninnge nga Satan yo be gblɛ nun’n be lika-ɔ? An fa sa kun be yiyi nun.
9 Ninnge’m be yolɛ gblɛ nun’n. Nán yalɛ ngunmin yɛ Satan yo maan be kle e, ɔ ‘yo ninnge mun gblɛ nun fa laka e.’ (Efɛ. 6:11) I sɔ sa’n juli aniaan bian kun mɔ be flɛ i kɛ Bɔbu’n i su. Blɛ wie nun’n, ɔ fata kɛ be yo i opele. Sanngɛ ɔ seli dɔɔtrɔ’m be kɛ nán maan be wlɛ i nun mmoja. Dɔɔtrɔ ng’ɔ fata kɛ ɔ yo i opele’n kplinnin su. Sanngɛ kɔnguɛ ka naan b’a yo i opele’n, kɛ i osufuɛ’m be ɔli awlo’n, dɔɔtrɔ bian kun wluli i sin lɔ. Kpɛkun ɔ seli i kɛ: ‘N si kɛ mmoja ndɛ su baman nun, sanngɛ é wá fá kan é síe e sa su lɛ. I liɛ’n sɛ ɔ tɔ cinnjin é fá wlá ɔ nun.’ Ɔ buli i kɛ sɛ aniaan’n i osufuɛ wie fi nunmanlɛ’n, ɔ́ káci aniɛn. Aniaan bian’n w’a kplinman su, yɛ ɔ seli kɛ kannzɛ ɔ́ yó sɛ yó sɛ’n, ɔ su kplinman su kɛ be wlɛ i nun mmoja.
10. ?Ngue ti yɛ ɔ fata kɛ e nian e wun su akunndan nga sran’m be bu’n i lika-ɔ?
10 Akunndan nga sran’m be bu’n. Sɛ e bu akunndan kɛ be nga be kloman Zoova i mmla mun’n sa’n, ɔ cɛman naan y’a yaci Zoova i sulɛ. (An kanngan 1 Korɛntifuɛ Mun 3:19, 20 nun.) Be nga be fa “mɛn’n nun ngwlɛlɛ’n” su be nanti’n, be klunklo ninnge mun yɛ be yo be-ɔ. Blɛ wie nun’n, Klisifuɛ nga be o Pɛɛgamun nin Tiatii lɔ’n be nun wie’m be wa buli bla nin bian kunndɛlɛ sukusuku nin i wunsu ɲannzuɛn sa mun, ɔ nin amuin sɔlɛ’n, be su akunndan nga be sran’m be bu’n wie. I sɔ’n ti’n, Zezi tuli asɔnun nɲɔn sɔ’m be fɔ kekle kpa. (Ngl. 2:14, 20) Andɛ’n, sran’m be kunndɛ kɛ bé yó naan e bu akunndan kɛ be sa. I wie yɛle kɛ e osufuɛ mun annzɛ sran uflɛ wie’m be kwla yo maan e bu i kɛ Zoova i mmla’m be su nantilɛ’n ti kekle ngboko, naan ɔ fataman kɛ e nanti be su. Wie liɛ’n be kwla se kɛ sɛ e yo e bɔbɔ e klunklo ninnge mun’n, i sɔ’n timan tɛ naan be kwlá diman Zoova i mmla’m be su kun.
11. ?Sɛ e kunndɛ kɛ é nánti Zoova i mmla’m be su titi’n, ngue yɛ ɔ fataman kɛ e yo-ɔ?
11 Ɔ ju wie’n, e kwla bu i kɛ Zoova i ndɛ ng’ɔ kan be’n be timan weinwein. Wie liɛ’n, sɛ y’a nianman e wun su’n, e kwla “fa ndɛ uflɛ uka ng’ɔ ti klɛwa’n su.” (1 Kor. 4:6) I sɔ yɛ Zezi blɛ su Zifu’m be Ɲanmiɛn sulɛ wafa ng’ɔ timan su’n be su kpɛnngbɛn’m be yoli-ɔ. Be kpɛli be bɔbɔ be mmla liɛ mun fa ukali Zoova i mmla’m be su. I lɛ nun’n, ɔ ti kɛ b’a wla trɔ nɔnninnɔnnin b’a fa sie i sran’m be wati su sa. (Mat. 23:4) Zoova sin i nuan Ndɛ’n nin i anuannzɛ’n be lika kle e ninnge trele wie m’ɔ fata kɛ e yo’n. Ɔ maan, ɔ nunman nun kɛ e kan ndɛ uflɛ e uka nga be kannin’n su. (Ɲan. 3:5-7) E faman ndɛ uflɛ e ukaman ndɛ nga Biblu’n kan’n su, yɛ sɛ sa wie nun’n sran kun le atin fɛ i klunklo ajalɛ’n, e kpɛman su mmla.
12. ?Wafa sɛ yɛ Satan fa “ndɛ ngbɛnngbɛn mun” fa laka sran mun-ɔn?
12 Ndɛ ngbɛnngbɛn mun. Satan sin “ndɛ ngbɛnngbɛn mɔ be ti gblɛ ngunmin” nin ‘ndɛ nga be fin klɔ sran’n’ be lika laka sran mun naan be bubu be wun nun. (Kol. 2:8) I wie yɛle kɛ Klisifuɛ klikli’m be blɛ su’n, mɛn nunfuɛ’m be ngwlɛlɛ’n nin like nga Zifu’m be kle m’ɔ takaman Ɲanmiɛn Ndɛ’n su’n, ɔ nin ndɛ nga be kɛn i kɛ ɔ fata kɛ Klisifuɛ’m be nanti Moizi Mmla’n su’n be truli lika’n nun. Ndɛ sɔ’m be ti’n, sran’m be kacili be sin be sili Zoova mɔ ngwlɛlɛ’n i kpafuɛ’n fin i’n. Andɛ’n, Satan sin televiziɔn, nin aladio, nin zronali, nin ɛntɛnɛti be lika naan w’a fa bewanbewan ndɛ wie mun w’a tru. Annzɛ ɔ sin ato ndɛ wie mɔ politiki anuannzɛ’m be su kpɛnngbɛn’m be kan’n be lika laka sran mun. E wunnin i sɔ liɛ’n koronavirisi blɛ’n nun. c Zoova i sufuɛ nga be nantili ajalɛ nga anuannzɛ’n fali be’n be su’n, b’a kokoman kɛ be nga be tieli ato ndɛ nga sran’m be kannin be’n sa.—Mat. 24:45.
13. ?Ngue ti yɛ ɔ fata kɛ e nian e wun su ninnge nga be kwla yo maan e sie e ɲin nɲɔnnɲɔn’n be lika-ɔ?
13 Ninnge nga be kwla yo maan e sie e ɲin nɲɔnnɲɔn’n. Ɔ fata kɛ e ɲin tran “ninnge nga be ti cinnjin kpa’n” be su titi. (Fip. 1:9, 10) Sɛ e sie e ɲin nɲɔnnɲɔn’n, é sáci e blɛ’n nin e wunmiɛn’n. Sɛ ninnge nga e yo be titi’n, mɔ i wie yɛle aliɛ dilɛ’n, nin nzan nɔnlɛ’n, nin e ɲin su yiyilɛ’n, nin junman dilɛ’n be ti e cinnjin dan’n, be kwla yo maan e sie e ɲin nɲɔnnɲɔn. (Lik. 21:34, 35) Asa’n, cɛn kwlakwla’n e ti politiki ndɛ mun, ɔ nin ndɛ nga sran’m be si be su akplowa’n. Ɔ fataman kɛ ninnge sɔ’m be ti’n, e sie e ɲin nɲɔnnɲɔn. Sɛ e yo sɔ’n, ɔ cɛman naan y’a jran sran sin. Satan sin ninnge kwlaa nga e kannin be ndɛ lɛ’n, be lika yo naan e ɲin kpa sa kpa yolɛ’n su. Siɛn’n, maan e kan wafa nga e kwla jran Satan i ɲrun kekle’n i ndɛ.
?WAFA SƐ YƐ E KWLA JRAN KEKLE-Ɔ?
Sɛ a kunndɛ kɛ á jrán kekle’n, bu ɔ wun mɔ a fa mannin Ɲanmiɛn’n nin ɔ batɛmun’n be akunndan. Asa’n suan Ɲanmiɛn Ndɛ’n nun like yɛ bu su akunndan, mian ɔ ɲin naan ɔ awlɛn’n w’a yoman nɲɔnnɲɔn yɛ lafi Zoova su. (An nian ndɛ kpɔlɛ 14-18 be nun.)
14. ?Ninnge nga be kwla uka e naan y’a jran Zoova i sin’n, be nun kun yɛle benin?
14 Bu ɔ wun mɔ a fa mannin Ɲanmiɛn’n nin ɔ batɛmun’n be akunndan. Like nga ti yɛ a yoli ninnge sɔ mun’n yɛle kɛ a kunndɛ kɛ á jrán Zoova sin. Bu like ng’ɔ ukali wɔ naan w’a wun i wlɛ kɛ w’a si ndɛ nanwlɛ’n i akunndan. A suannin Zoova i su like yɛ a sili i kpa. A wunnin i wlɛ kɛ ɔ ti e Si. Ɔ maan ɔ ɲin yi i, yɛ a klo i. A lafi i su, yɛ a kacili ɔ akunndan’n. A yacili ninnge nga Zoova i klun jɔman su’n be yolɛ, yɛ a boli i klun sa’n i yolɛ bo. Kɛ a wunnin i wlɛ kɛ Ɲanmiɛn yacili ɔ sa tɛ mun cɛli wɔ’n, ɔ wla guali ase. (Jue. 32:1, 2) A boli aɲia’m be bo tranlɛ bo, yɛ a kannin ninnge nga a sili be’n be ndɛ kleli ɔ wiengu mun. Ɔ maan a fali ɔ wun mannin Ɲanmiɛn, yɛ be yoli ɔ batɛmun. Siɛn’n, a nanti nguan atin’n su yɛ w’a fua kpa kɛ á nánti atin sɔ’n su titi.—Mat. 7:13, 14.
15. ?Ngue ti yɛ ɔ fata kɛ e suan Ɲanmiɛn Ndɛ’n nun like yɛ e bu su akunndan-ɔn?
15 Suan Ɲanmiɛn Ndɛ’n nun like yɛ bu su akunndan. Kɛ waka kun i olui’m be wla ase kpa’n, ɔ jran cinnjin kpa. I wafa kunngba’n, e kusu sɛ e Ɲanmiɛn sulafilɛ’n i bo’n wla ase kpa’n, é kwlá jrán kekle. Kɛ waka kun ɲín’n, nn i olui’m bé wlá ase kpa. E kusu, kɛ e suan Ɲanmiɛn Ndɛ’n nun like mɔ e bu su akunndan’n, e Ɲanmiɛn sulafilɛ’n i bo’n wla ase kpa, yɛ e lafi su kɛ Ɲanmiɛn i atin liɛ mun yɛ be ti kpa-ɔ. (Kol. 2:6, 7) Bu wafa nga Zoova ukɛli i sufuɛ mun laa m’ɔ sasali be’n be akunndan. I wie yɛle Ezekiɛli liɛ’n. Aolia nun’n ɔ wunnin kɛ anzi kun su sunnzun Ɲanmiɛn i sua’n, yɛ ɔ fɛli i ɲin sieli su kpa. Aolia nun like sɔ’n wlali Ezekiɛli i fanngan. Yɛ ɔ kle e ninnge wie mɔ e kwla yo be naan y’a suan Ɲanmiɛn sulɛ kpafuɛ’n i bo’n. d (Eze. 40:1-4; 43:10-12) E kusu sɛ e fa blɛ e suan Ɲanmiɛn ndɛ nga be wlɛ wunlɛ’n ti kekle’n be su like naan e bu su akunndan’n, é ɲán su ye.
16. ?Kɛ Bɔbu i awlɛn w’a yoman nɲɔnnɲɔn’n, wafa sɛ yɛ i sɔ’n ukɛli i-ɔ? (Jue Mun 112:7)
16 Mian ɔ ɲin naan ɔ awlɛn’n w’a yoman nɲɔnnɲɔn. Famiɛn Davidi seli kɛ ɔ su yaciman Zoova i klolɛ le. Ɔ seli kɛ: “Ee Ɲanmiɛn, min awlɛn’n timan nɲɔnnɲɔn.” (Jue. 57:7) E kusu e kwla lafi Zoova su tankaan kpa naan e awlɛn’n w’a yoman nɲɔnnɲɔn. (An kanngan Jue Mun 112:7 nun.) Maan e fa e ɲin e sie wafa nga i sɔ’n ukali Bɔbu mɔ e kɛnnin i ndɛ’n i su. Kɛ ɔ tili i kɛ be waan bé fá mmoja’n bé síe i lɛ naan sɛ ɔ jran cinnjin’n bé fá wlɛ́ i nun’n, ɔ ka lɛ tɛli su kɛ sɛ be waan bé mɛ́n i mmoja’n, ɔ́ kpɛ́ i kpo kɔ́ dɔɔtrɔ uflɛ nun. Bɔbu seli kɛ: “M’an sisiman min bo kaan sa yɛ srɛ w’a kunman min.”
Sɛ e Ɲanmiɛn sulafilɛ’n i bo’n wla ase kpa’n, kannzɛ sa nga be tɔ e su’n be ti sɛ, ti sɛ’n é kwlá jrán kekle. (An nian ndɛ kpɔlɛ 17 nun.)
17. ?Ngue yɛ Bɔbu i su ndɛ’n kle e-ɔ? (An nian desɛn’n nin foto wie.)
17 Like ng’ɔ ukali Bɔbu naan w’a jran kekle’n, yɛle kɛ ka naan b’a fɛ i b’a wɔ dɔɔtrɔ’n, ɔ fuali kpa kɛ ɔ́ yó Zoova i klun sa’n titi. Ɔ kunndɛli kpa kɛ ɔ́ yó naan Zoova i klun jɔ. Asa’n ɔ suannin mmoja’n i su ndɛ nga Biblu’n nin e fluwa’m be kan’n i su like kpa. Kpɛkun ɔ lafili su kpa kɛ sɛ ɔ nanti Zoova i mmla’m be su’n, ɔ́ ɲán su ye. E kusu kannzɛ sa nga be tɔ e su’n be ti sɛ ti sɛ’n, e kwla jran kekle.
Baraki nin i sran’m be su wanndi su Sizera i sonja’m be su. (An nian ndɛ kpɔlɛ 18 nun.)
18. ?Wafa sɛ yɛ Baraki i su ndɛ’n kle kɛ Zoova i su lafilɛ’n ti cinnjin-ɔn? (An nian foto ng’ɔ o fluwa’n i bui’n su’n.)
18 Lafi Zoova su. Maan e nian wafa nga Zoova i su lafilɛ’n ukali Baraki’n. Izraɛlifuɛ’m be timan alɛ kunfuɛ. Be leman alɛ kunlɛ ninnge wie fi. Sanngɛ Zoova seli Baraki kɛ ɔ wɔ naan ɔ nin Kanaanfuɛ’m be famiɛn Sizera mɔ i sonja’m be sɔnnin kpa’n be ko kun. (Jɔl. 5:8) Debora m’ɔ ti Ɲanmiɛn nuan ijɔfuɛ’n, ɔ seli Baraki kɛ ɔ jra kongo m’ɔ ti lika kpɛtɛkplɛɛ’n nun lɔ naan ɔ nin Sizera nin i kakaklolo 900 be ko kun. Baraki si kɛ sɛ i waan ɔ nin Sizera nin i kakaklolo’m bé kó kún alɛ lika sɔ’n nun lɔ’n, ɔ su yoman pɔpɔ mɛnmɛn i, sanngɛ ɔ ɔli. Kɛ ɔ nin i sonja’m be fin Tabɔɔ oka’n su mɔ bé jrá’n, Zoova yoli maan nzue’n tɔli dan kpa. Ɔ maan Sizera i kakaklolo’m be mlɔnnin nnɔtiɛ’n nun. Zoova yoli maan Baraki kwlali be. (Jɔl. 4:1-7, 10, 13-16) E kusu, sɛ e lafi Zoova su, yɛ e nanti ajalɛ ng’ɔ sin i anuannzɛ’n i lika kle e’n su’n, e liɛ yó ye.—Mml. 31:6.
MAAN E FUA KPA KƐ É JRÁN KEKLE
19. ?Ngue ti yɛ a kunndɛ kpa kɛ á jrán kekle-ɔ?
19 Kɛ e te o mɛn nga nun’n, e te mian e ɲin naan y’a jran kekle. (1 Tim. 6:11, 12; 2 Piɛ. 3:17) Maan e fua kpa kɛ e su yaciman yalɛ klelɛ’n, nin ninnge’m be yolɛ gblɛ nun’n, nin akunndan nga sran’m be bu’n, nin ndɛ ngbɛnngbɛn mun, ɔ nin ninnge nga be kwla yo maan e sie e ɲin nɲɔnnɲɔn’n be lɛ naan be saci e nin Zoova e afiɛn. (Efɛ. 4:14) Maan e fua kpa kɛ é jrán kekle, é fá e wun é mán Zoova yɛ é nánti i mmla’m be su titi. Like kun ekun m’ɔ fata kɛ e yo’n, yɛle kɛ nán maan e like yolɛ yo ya. Like suanlɛ nga i sin liɛ’n nun’n, é wá kán wafa nga Zoova nin Zezi be kle kɛ be like yolɛ yoman ya’n i ndɛ.
JUE 129 É trá e awlɛn titi
a Kɛ ɔ fɛ i Adan nin Ɛvu be blɛ su’n, Satan waan ɔ́ yó naan klɔ sran’m be bɔbɔ be kle like ng’ɔ ti kpa’n nin like ng’ɔ ti tɛ man be’n. I sɔ kunngba’n yɛ ɔ kunndɛ kɛ e yo i Zoova i mmla mun nin ajalɛ nga Zoova i anuannzɛ’n kle e’n be lika-ɔ. Like suanlɛ nga wá úka e naan y’a buman akunndan nga Satan i mɛn’n nunfuɛ’m be bu’n wie. Asa’n, ɔ́ wá úka e naan y’a fua kpa kɛ é nánti Zoova i mmla’m be su titi.
b Sɛ a kunndɛ kɛ á sí wafa nga Klisifuɛ kun kwla nanti mmoja’n i su mmla nga Ɲanmiɛn kpɛli’n su’n i su ndɛ kpa ekun’n, kanngan fluwa A kwla di aklunjɔɛ tititi! i like suanlɛ 39 nun.
c An kanngan ndɛ nga be flɛ i kɛ “Nian ɔ wun su ato ndɛ’m be lika” m’ɔ o jw.org su’n nun.
d Sɛ a kunndɛ kɛ á sí ndɛ’n nun kpa ekun’n, nian fluwa Le culte pur de Jéhovah enfin rétabli ! i ndɛ tre 13 nin 14 be nun.