BE NGA be fufu asiɛ’n be kunndɛ laa ninnge mun’n, be wunnin bliki kpanngban kpa Babilɔnin klɔ nvuɛn’n su lɔ. Bliki sɔ’m be ti dandan kpa. Be yɛ be fa kplannin Babilɔnin klɔ’n niɔn. Fluwa sifuɛ sɔ’m be nun kun m’ɔ suan Robɛɛ Kɔldewe’n, ɔ seli kɛ “be tɔn bliki sɔ mun fuu’m be nun klɔ’n i sin lɔ. Lɔ liɛ’n, be kwla ɲan ufa kpa yɛ be kwla ɲan ijre be fa trɔ sin.”

Lalafuɛ fluwa wie’m be seli kɛ be fa fuu sɔ’m be yo like kain kun. Fluwa sifuɛ kun m’ɔ o Torɔnto lɔ Inivɛsite lɔ’n, mɔ be flɛ i kɛ Pɔlu-Alɛn Bolie’n, ɔ seli kɛ: “Babilɔnin lɔ fluwa kpanngban be kle kɛ Babilɔnin famiɛn’n seli kɛ be fa be nga be yo ɲin kekle i su’n annzɛ be nga be ɲin yiman amuin mun’n, be yi fuu nun naan be yra.” Fluwa sɔ’m be nun kun nun’n, Famiɛn Nebikadnezaa seli kɛ: “Amun nunkun be, an wɔ be nun, […] an to bo gua fuu nun, […] maan sin wunsrɛn’n fin be nun fite lukuu yɛ maan be jue vlanwunvlanwun.”

Ndɛ sɔ’n ti’n be nga be si Biblu’n nun ndɛ’n, be wla kpɛn sa nga Daniɛli ndɛ tre 3 kɛn i ndɛ’n su. Ndɛ mma sɔ’n se kɛ Famiɛn Nebikadnezaa yoli sika ɔkwlɛ sran tɛnndɛn kpa kun Dura lɔ lika kpɛtɛkplɛɛ’n nun, Babilɔnin klɔ’n i sin lɔ. Kɛ Ebre gbanflɛn nsan mɔ be flɛ be kɛ Sadraki nin Mesaki ɔ nin Abɛdnego be waan be kotoman sika ɔkwlɛ sran’n i bo wie’n, Famiɛn’n fali be wun ya dan kpa. I sɔ’n ti’n, ɔ seli kɛ “be trɔ fuu’n i nun sin’n i kpa naan i nun lo fiaan tra titi liɛ’n kpɛ nso.” Kpɛkun ɔ seli kɛ “be to be gua fuu mɔ i nun sin’n jueman aɔwi’n nun.” Sanngɛ anzi kwlafuɛ kun deli be. Ɔ maan b’a wuman.—Dan. 3:1-6, 19-28.

Bliki nga be wunnin be Babilɔnin klɔ’n su lɔ’n be kle kɛ Biblu’n nun ndɛ’n ti nanwlɛ. Be klɛli famiɛn’n i manmanlɛ ndɛ wie mun Bliki sɔ’m be nun kpanngban su. Be klɛli kun su kɛ: “Min bɔbɔ Nebikadnezaa mɔ n ti Babilɔnin Famiɛn’n, […] min famiɛn sua nga n kplannin m’ɔ yi min aɲrunɲan’n i nglo’n yɛ. […] Maan min mma mun nin min anunman’m be sie klɔ’n i tititi.” Ndɛ sɔ’n nin ndɛ ng’ɔ Daniɛli 4:30 nun’n be fa be wun dan. Ndɛ mma sɔ’n nun’n, Nebikadnezaa seli kɛ: “?Nán Babilɔnin Klɔ Dan’n mɔ n fali min wunmiɛn nin min kwlalɛ’n n fa kplɛnnin i kɛ famiɛn sua sa’n, naan ń fá yí min aɲrunɲan’n i nglo’n yɛ ɔ o yɛ?”