1. ?Kɛ be se kɛ ɔ fata kɛ Klisifuɛ’m be yo kɛ waka sa’n i bo’n yɛle benin? (An nian desɛn’n wie.)

 BE BU be ɲanndra kun be se kɛ: “Waka ng’ɔ kwla bli’n, aunmuan’n kwlá bumɛn i.” I sɔ’n kle e like nga ti yɛ maan waka wie’m be buman ndɛndɛ’n. Yɛle kɛ be kwla bli. Sɛ é kwlá sé’n, ɔ fata kɛ Klisifuɛ’m be yo kɛ waka m’ɔ kwla bli’n sa. Yɛle kɛ ɔ fataman kɛ be like yolɛ yo ya. ?Wafa sɛ yɛ be kwla yo sɔ-ɔ? I wie yɛle kɛ, kɛ e su sa’m be kaci’n, nán e sa sin bubu e. Asa’n nán maan e si ajalɛ nga e wiengu’m be fa’n i su akplowa.

2. (1) ?Sɛ e su sa’m be kaci’n, ngue yɛ ɔ kwla uka e naan y’a jran kekle-ɔ? (2) ?Ngue yɛ é wá kɛ́n i ndɛ like suanlɛ nga nun-ɔn?

² E mɔ e ti Zoova i sufuɛ’n, e kunndɛman kɛ e like yolɛ yo ya. E kunndɛ kɛ é yó wun ase kanfuɛ, yɛ é bú e wiengu’m be sran. Like suanlɛ nga nun’n, é wá wún wafa nga nzuɛn sɔ’m be ukali Klisifuɛ wie mun naan b’a jran be su sa’m be ɲrun kekle’n. Asa’n, é wá wún wafa nga nzuɛn sɔ’m be kwla uka e wie’n. Sanngɛ maan e dun mmua e kan sa nga ti yɛ e kwla se kɛ Zoova nin Zezi be like yolɛ yoman ya’n i ndɛ.

3. ?Ngue yɛ ɔ kle kɛ Zoova i like yolɛ yoman ya-ɔ?

³ Biblu’n nun’n ɔ ju wie’n be flɛ Zoova kɛ “Yɔbuɛ’n,” afin kɛ ɔ o lɛ’n yɛ ɔ wo-ɔ. (Mml. 32:4) Sanngɛ i like yolɛ yoman ya. Kɛ mɛn’n nun ninnge’m bé káci bé kɔ́’n, Zoova kusu kaci ninnge wie mun naan i klun sa’n w’a kpɛn su. Zoova yili e kɛ i bɔbɔ sa, ɔ maan e kusu e kwla yo sɔ wie. Biblu’n nun’n, ɔ man e afɔtuɛ wie mun naan sa kwlaa nun’n y’a wun ajalɛ nga é fá’n. Kannzɛ Biblu’n nun’n be flɛ Zoova kɛ “Yɔbuɛ’n,”  sanngɛ ajalɛ nga Zoova kle e’n ɔ nin afɔtuɛ ng’ɔ man e’n, be kle kɛ i like yolɛ yoman ya.

4. Kan sa kun m’ɔ kle kɛ Zoova i like yolɛ yoman ya’n i ndɛ. (Sanwun Yolɛ 5:7, 11)

⁴ Ninnge nga Zoova yo be’n be ti kpa lele tra su, yɛ be kle kɛ i like yolɛ yoman ya. Ɔ yoman klɔ sran’m be kpokokpoko. Maan e nian wafa nga Zoova yili i sɔ liɛ’n i nglo Izraɛlifuɛ’m be lika’n. Kɛ bé yí tɛ’n w’a seman kɛ aɲanbeunfuɛ mun nin yalɛfuɛ’m be yi like kunngba’n. Like nga sran kun i sa ju su’n yɛ ɔ se i kɛ ɔ fa man-ɔn.—An kanngan Sanwun Yolɛ 5:7, 11 nun.

5. An kan sa kun m’ɔ kle kɛ Zoova ti wun ase kanfuɛ naan ɔ si sran aunnvɔɛ’n i ndɛ.

⁵ Zoova i like yolɛ yoman ya, afin ɔ ti wun ase kanfuɛ yɛ ɔ si sran aunnvɔɛ. Blɛ mɔ Zoova fali ajalɛ kɛ ɔ́ núnnún sa tɛ yofuɛ mun Sodɔmun lɔ’n, sa ng’ɔ juli’n kle sɔ weiin. Ɔ sinnin i anzi mun be lika seli Lɔtu kɛ ɔ wanndi wɔ okaoka lika’m be nun lɔ. Sanngɛ srɛ m’ɔ kun i’n ti’n, ɔ seli kɛ maan ɔ nin i awlofuɛ’n be ko fia klɔ kaan kun mɔ be flɛ i Zoaa’n su lɔ. Kusu nn Zoova w’a dun mmua w’a se kɛ ɔ́ núnnún klɔ sɔ’n. Zoova kwla mian Lɔtu kɛ ɔ yo like nga ɔ seli i kɛ ɔ yo’n. Sanngɛ Zoova w’a yoman sɔ. Ɔ kplinnin ndɛ nga Lɔtu kan kleli i’n su, yɛ w’a nunnunman Zoaa klɔ’n. (Bob. 19:18-22) I sin’n, kɛ afuɛ kpanngban sinnin’n Zoova sili Ninivufuɛ’m be aunnvɔɛ. Ɔ sunmannin i nuan ijɔfuɛ Zonasi kɛ ɔ ko se be kɛ be nunnunlɛ’n w’a mantan koko kpa. Sanngɛ kɛ Ninivufuɛ’m be kacili be sa’n, Zoova sili be aunnvɔɛ yɛ w’a nunnunman be kun.—Zon. 3:1, 10; 4:10, 11.

6. ?Kɛ Zoova sa’n, wafa sɛ yɛ Zezi kleli kɛ i like yolɛ yoman ya-ɔ?

⁶ Zezi kusu niannin Zoova i ajalɛ’n su, ɔ kleli kɛ i like yolɛ yoman ya. Ɲanmiɛn sunmannin Zezi kɛ ɔ kɛn i nuan ndɛ’n kle “Izraɛli nvle’n nun bua mɔ b’a mlin’n.” Junman sɔ’n i dilɛ’n nun’n, Zezi kleli kɛ i like yolɛ yoman ya. Cɛn kun’n, bla kun m’ɔ timan Izraɛlifuɛ’n ɔ seli i kɛ ɔ yo i wa bla mɔ ‘mmusu kun w’a saci i’n,’ i juejue. Kɛ m’ɔ si bla’n i aunnvɔɛ’n ti’n, ɔ yoli like ng’ɔ seli i kɛ ɔ yo’n. (Mat. 15:21-28) Kɛ Zezi bó Ɲanmiɛn junman’n i dilɛ bo’n, ɔ seli kɛ: “Sran ng’ɔ kɛn i sran’m be ɲrun kɛ ɔ siman min’n, n kusu ń kɛ́n i min Si m’ɔ o ɲanmiɛn su lɔ’n i ɲrun kɛ n simɛn i.” (Mat. 10:33) ?Sanngɛ kɛ Piɛli seli kpɛ nsan kɛ ɔ simɛn i’n, i kusu seli kɛ ɔ simɛn i wie? Cɛcɛ. Zezi si kɛ Piɛli lafi Ɲanmiɛn su naan sa sɔ’n yo i nsisɔ. Kɛ Ɲanmiɛn cɛnnin Zezi’n, ɔ yili i wun nglo kleli Piɛli, yɛ e si kɛ ɔ yoli maan i wla guali ase, yɛ ɔ kleli i kɛ ɔ yacili sa sɔ’n cɛli i naan ɔ te klo i.—Lik. 24:33, 34.

7. ?Kɛ nga Filipufuɛ Mun 4:5 fa kan’n sa’n, ngue yɛ e kunndɛ kɛ sran’m be sie i nzɔliɛ e lika-ɔ?

⁷ E wunnin i kɛ Zoova nin Zezi be like yolɛ yoman ya. ?Yɛ e li? Zoova kunndɛman kɛ e like yolɛ yo ya. (An kanngan Filipufuɛ Mun 4:5 nun.) E tinuntinun e kwla usa e wun kɛ: ‘?Sran’m be bu i kɛ min like yolɛ yoman ya? ?Annzɛ be bu i kɛ n ti sran  mɔ be bli-ɔ ɔ bliman-ɔn? ?N jran sran’m be wun kɛ be yo ninnge mun kɛ nga n bɔbɔ n fa klo’n sa? ?N sie min su min wiengu’m be nuan bo? ?Yɛ sɛ ɔ nin i fata’n n yo be liɛ nga be se min kɛ n yo’n?’ Sɛ e like yolɛ yoman ya’n, é klé kɛ e nian Zoova nin Zezi be ajalɛ’n su. Maan e kan sa nɲɔn mɔ be nun’n, e kwla kle kɛ e like yoman ya’n be ndɛ. I klikli’n yɛle kɛ, kɛ e su sa’m be kaci’n, yɛ i nɲɔn su’n yɛle kɛ, kɛ e wiengu’m be fa ajalɛ m’ɔ timan e liɛ su’n.

8. ?Kɛ e su sa’m be kaci’n, ngue yɛ ɔ kwla uka e naan y’a kle kɛ e like yolɛ yoman ya-ɔ? (An nian ndɛ ng’ɔ o ja ngua lɔ’n nun wie.)

⁸ Kɛ e su sa’m be kaci’n ɔ fata kɛ e kle kɛ e like yolɛ yoman ya. Sa wie mɔ y’a sunnzunman’n be kwla tɔ e su. I wie yɛle kɛ tukpacɛ kekle wie w’a tɔ e su, annzɛ kan e tran lɛ’n sika ndɛ’n kwla yo kekle, annzɛ politiki ndɛ’n ti’n lika’n kwla yo sukusuku. (Aku. 9:11; 1 Kor. 7:31) Asa’n sɛ e di junman wie anuannzɛ’n nun naan be se e kɛ e yaci junman sɔ’n i dilɛ, annzɛ e kaci wafa nga e di junman sɔ’n ɔ kwla yo kekle man e. Maan e kan ninnge nnan mɔ kɛ e su sa’m be kaci’n e kwla yo naan y’a jran kekle’n be ndɛ. (1) Maan e wun i wlɛ kɛ e su sa’n w’a kaci, (2) maan e fa e ɲin e sie i ninnge nga e kwla yo be’n be su, (3) maan e fa e ɲin e sie i ninnge nga be man e aklunjɔɛ’n su, (4) maan e yo e wiengu’m be ye. b Maan e kan wafa nga i sɔ yolɛ’n ukali aniaan wie mun’n i ndɛ.

9. ?Kɛ sa wie mɔ aniaan kun nin i yi b’a sunnzunman’n ɔ tɔli be su’n, ngue yɛ ɔ ukali be-ɔ?

⁹ Maan e wun i wlɛ kɛ e su sa’n w’a kaci. Be flɛ aniaan bian kun kɛ Emanuele, yɛ be flɛ i yi kɛ Flansiska. Be fali be ɔli nvle uflɛ nun kɛ be ko di ngaliɛ dilɛ junman’n. Kɛ be juli lɔ mɔ be boli aniɛn uflɛ suanlɛ bo’n yɛ Koronavirisi’n boli i bo-ɔ. Ɔ maan be kwlá faman be wun be mantanman sran. I sin’n, Flansiska i nin’n wuli. Aniaan bla’n kunndɛli kpa kɛ ɔ́ kɔ́ i manmin sɛ bo, sanngɛ tukpacɛ’n ti’n w’a kwlá tuman ajalɛ. ?Ngue yɛ ɔ ukɛli i naan w’a jrɛn i su sa’m be ɲrun kekle-ɔ? Like klikli’n yɛle kɛ ɔ nin i wun be srɛli Zoova kɛ ɔ uka be naan b’a kokoman. Zoova tɛli be srɛlɛ’n su. Yɛle kɛ ɔ yoli maan be ɲannin ukalɛ blɛ ng’ɔ ti su’n i nun. I wie yɛle kɛ ndɛ nga aniaan kun kɛnnin i video kun nun’n ɔ wlali be fanngan kpa. Aniaan sɔ’n seli kɛ: “Sɛ e bɔbɔ e wun i wlɛ kɛ e su sa’n w’a kaci’n é dí aklunjɔɛ ekun. Kpɛkun ninnge nga e kwla yo be’n, é mían e ɲin é yó be.” c I nɲɔn su’n be fuali kpa kɛ bé mían be ɲin naan b’a si telefɔnun nun jasin fɛ’n i bo kpa. Be ɲannin sran kun be kleli i Biblu’n nun like bɔbɔ. I nsan su’n, be kplinnin su kɛ be asa’n su lɔ aniaan mun be uka be. I wie yɛle kɛ aniaan bla kun klɛli be mesazi cɛn kwlakwla. Ɔ fali Biblu’n nun ndɛ mma wie mun wlali nun. Ɔ yoli sɔ afuɛ kun. E kusu’n sɛ e wun i wlɛ kɛ e su sa’n w’a kaci’n é dí aklunjɔɛ. Afin nga e kwla i yo’n yɛ é yó-ɔ.

10. ?Kɛ aniaan bla kun i su sa’n kacili’n ngue yɛ ɔ ukɛli i-ɔ?

¹⁰ Maan e fa e ɲin e sie i ninnge nga e kwla yo be’n ɔ nin ninnge nga be man e aklunjɔɛ’n be su. Be flɛ aniaan bla kun kɛ Klistina yɛ ɔ tran Zapɔn lɔ. Ɔ kan Rumanin aniɛn’n sanngɛ ɔ o Angle asɔnun’n nun. Kɛ be seli kɛ be su yoman aɲia mun Angle nun kun’n i sa sin bubuli i. Sanngɛ w’a fɛmɛn i  ɲin w’a siemɛn i sɔ’n su sa trilili. Ɔ ko suannin aniaan nga be yo aɲia mun Zapɔn aniɛn’n nun’n be bo. Yɛ ɔ miɛnnin i ɲin kpa boli jasin fɛ’n Zapɔn aniɛn’n nun. Aniaan bla’n seli bla kun m’ɔ nin i be di junman laa’n kɛ ɔ ukɛ i naan ɔ ti Zapɔn aniɛn’n i kpa. Ɔ fali Biblu’n nin fluwa A kwla di aklunjɔɛ tititi! mɛnnin i. Yɛ ɔ seli i kɛ ɔ fa fluwa sɔ mun ukɛ i naan w’a ti Zapɔn aniɛn’n. I sɔ’n yoli maan Klistina tili Zapɔn aniɛn’n, yɛ bla’n kusu kunndɛli kɛ ɔ́ sí Biblu’n nun ndɛ’n i kpa. Kɛ e fa e ɲin e sie i ninnge nga e kwla yo be’n ɔ nin ninnge nga be man e aklunjɔɛ’n be su’n, wie liɛ bɔbɔ’n e kwla yo ninnge wie mɔ y’a sunnzunman’n.

11. ?Kɛ sika’n ndɛ’n yoli kekle mannin aniaan kun nin i yi’n, ngue yɛ ɔ ukali be-ɔ?

¹¹ Maan e yo e wiengu’m be ye. Aniaan kun nin i yi be tran nvle kun mɔ be tanninnin e jasin fɛ bolɛ’n nun’n i nun. Blɛ wie nun’n, sika ndɛ’n wa yoli kekle kpa nvle sɔ’n nun. Ɔ maan w’a yoman pɔpɔ w’a manman be. ?Ngue yɛ ɔ ukali be-ɔ? Like klikli nga be yoli’n yɛle kɛ b’a toman ninnge kaka kun. Asa’n b’a faman be ɲin b’a siemɛn i be su sa’m be su. Sanngɛ be fali ajalɛ kɛ bé úka sran mun. Ɔ maan be miannin be ɲin be boli jasin fɛ’n i kpa titi. (Yol. 20:35) Aniaan bian’n seli kɛ: “Kɛ e miannin e ɲin e boli jasin fɛ’n i kpa’n y’a faman e ɲin y’a siemɛn i sa ng’ɔ o e su’n i su ngboko. Ɲanmiɛn i klun sa yolɛ’n yɛ e fali e ɲin e sieli su-ɔ.” Kɛ e su sa’m be kaci’n, ɔ ti cinnjin kɛ e mian e ɲin e uka sran mun titi. I li jasin fɛ’n i bolɛ nun yɛ ɔ fata kɛ e yo sɔ kpa’n niɔn.

12. ?Wafa sɛ yɛ akoto Pɔlu i ajalɛ’n kwla uka e jasin fɛ bolɛ’n nun-ɔn?

¹² Jasin fɛ bolɛ’n nun’n, maan e kan ndɛ ng’ɔ ti sran’m be cinnjin’n. Sran nga e to be’n be ti wafawafa. Be finwlɛ’n, nin be ninnge yolɛ wafa’n, nin ninnge nga be lafi be su’n be timan kun. Akoto Pɔlu niannin wafa nga sran’m be su sa’m fa ti’n su naan w’a bo jasin fɛ’n w’a kle be. E kusu e kwla niɛn i ajalɛ’n su. Zezi kpali Pɔlu kɛ ɔ yo i ‘akoto, yɛ ɔ sunmɛnnin i be nga be timan Zifu’n be sin.’ (Rɔm. 11:13) Ɔ maan Pɔlu boli jasin fɛ’n kleli sran fanunfanun. Wie’m be ti Zifu, wie’m be ti Glɛki, wie’m be si fluwa, wie’m be le ɲrun, wie’m be leman ɲrun, yɛ wie’m be ti famiɛn. Kɛ ɔ ko yo naan Pɔlu w’a kwla uka be kwlaa sɔ mun’n, ‘ɔ yoli i wun kɛ be sa.’ (1 Kor. 9:19-23) Ɔ fɛli i ɲin sieli i be ng’ɔ to be’n be ninnge yolɛ wafa’n, nin be finwlɛ’n, ɔ nin ninnge nga be lafi su’n be su naan w’a bo jasin fɛ’n w’a kle be. E kusu sɛ e nian sran’m be su sa’n su naan y’a bo jasin fɛ’n y’a kle be’n, e jasin fɛ bolɛ’n bá nvlɛ.

13. ?Wafa sɛ yɛ 1 Korɛntifuɛ Mun 8:9 i nun ndɛ’n kwla uka e naan y’a siman ajalɛ nga e wiengu’m be fa’n i su akplowa-ɔ?

¹³ Sran nga i like yolɛ yoman ya’n, ɔ siman ajalɛ nga i wiengu’m be fa’n i su akplowa. I wie yɛle kɛ aniaan bla wie’m be kwla klo makiazi yolɛ, sanngɛ wie’m be klomɛn i. Asa’n Klisifuɛ wie’m be nɔn nzan, sanngɛ wie’m be nɔnman nzan. E kwlaa e klo kɛ é yó juejue sanngɛ nán ayre wafa kunngba mun yɛ e klo be yolɛ-ɔ. Sɛ e jran e niaan’m be wun kɛ be fa ajalɛ kunngba nga e fa’n wie’n, ɔ cɛman naan aniaan wie’m be ja w’a kpla, yɛ é búbú e wun nun asɔnun’n nun. E kunndɛman kɛ é yó sɔ kaan sa. (An kanngan 1 Korɛntifuɛ Mun 8:9 nun; 10:23, 24) Maan e kan sa nɲɔn mɔ be nun’n Biblu’n nun afɔtuɛ’m be kwla uka e’n be ndɛ. Sɛ e nanti afɔtuɛ sɔ’m be su’n, é klé kɛ e like yolɛ yoman ya, yɛ fɔundi trán asɔnun’n nun.

14. ?Biblu’n nun afɔtuɛ benin mun yɛ be kwla uka e e wun wlawlalɛ’n nin e ti yolɛ’n nun-ɔn?

 ¹⁴ E wun wlawlalɛ’n ɔ nin e ti yolɛ’n nun’n. Zoova w’a kleman e tralɛ trele ng’ɔ fata kɛ e wla annzɛ nán e wla’n. Sanngɛ ɔ mannin e afɔtuɛ wie mɔ be kwla uka e-ɔ. Ɔ fata kɛ wafa nga e wlawla e wun’n ɔ manman Ɲanmiɛn. Ɔ fata kɛ e wun wlawlalɛ’n kle kɛ e like yolɛ yoman ya. Nán maan e fa e wun e kle, yɛ ‘i sɔ yolɛ nun’n maan e fa ngwlɛlɛ.’ (1 Tim. 2:9, 10; 1 Piɛ. 3:3) I sɔ’n ti’n, ɔ fataman kɛ wafa nga e wlawla e wun’n ti’n, sran’m be fa be ɲin be sie e su dan. Biblu’n nun afɔtuɛ’m be kwla uka asɔnun kpɛnngbɛn mun naan b’a kpɛman be wun wlawlalɛ’n ɔ nin be ti yolɛ’n i su mmla. Asɔnun kun nun’n, asɔnun kpɛnngbɛn’m be waan bé mán aniaan gbanflɛn wie’m be afɔtuɛ be ti yilɛ’n su. Yɛle kɛ wafa nga gbanflɛn sɔ’m be yi be ti’n ɔ ti sukusuku dan. ?Sanngɛ bé yó sɛ naan b’a man be afɔtuɛ naan w’a yoman kɛ be su kpɛ mmla bé mán be sa? Akpasua sunianfuɛ’n seli asɔnun kpɛnngbɛn’m be kɛ be kwla se aniaan mun kɛ: “Sɛ a o cenje’n su lɔ a su ijɔ naan wafa nga a wlawlali ɔ wun’n, annzɛ wafa nga a yili ɔ ti’n, i su yɛ aniaan’m be fa be ɲin be sie’n nn i sɔ’n kle kɛ ɔ timan kpa.” Ndɛ sɔ’n ukali aniaan gbanflɛn mun kpa. Yɛ ɔ yoli maan asɔnun kpɛnngbɛn’m b’a kpɛman mmla. d

15. ?Biblu’n nun afɔtuɛ benin mun yɛ be kwla uka e naan y’a fa ajalɛ kpa ayre yolɛ’n nun-ɔn? (Rɔmunfuɛ Mun 14:5)

¹⁵ Ayre yolɛ’n nun’n. Ayre yolɛ nun’n, Klisifuɛ kun bɔbɔ yɛ ɔ fɛ i tiaun ajalɛ-ɔ. (Gal. 6:5) Biblu’n w’a kpɛman ayre yolɛ’n i su mmla. Ndɛ ng’ɔ kan’n yɛle kɛ ɔ fata kɛ e ci mmoja, yɛ ɔ fataman kɛ e fa e wun e wla amuin sɔlɛ ninnge’m be nun. (Yol. 15:20; Gal. 5:19, 20) Sɛ ɔ ti’ɛ i ti’n, Klisifuɛ kun  bɔbɔ yɛ ɔ kle ayre ng’ɔ fata kɛ be fa yo i’n niɔn. Sran wie’m be liɛ’n dɔɔtrɔ ayre kunngba yɛ be yo-ɔ. Yɛ wie’m be kusu be yo ayre wafa uflɛ wie mun. Kannzɛ e lafi su kpa kɛ ayre wafa kun ti kpa’n, ɔ fataman kɛ e mian e niaan mun kɛ i sɔ ayre’n yɛ be yo-ɔ. Asa’n ninnge wie’m be o lɛ m’ɔ fata kɛ be tran e klun-ɔn. (1) Ɲanmiɛn i Sielɛ’n kunngba yɛ ɔ́ yó maan sran’m be su tɔman tukpacɛ kun-ɔn. (Eza. 33:24) (2) Ɔ fata kɛ Klisifuɛ kun bu like ng’ɔ “lafi” su kpa kɛ ɔ ti kpa mɛn i’n i akunndan kpa. (An kanngan Rɔmunfuɛ Mun 14:5 nun.) (3) Ɔ fataman kɛ e kpli e di e wiengu’m be jɔlɛ annzɛ e yo like wie mɔ maan be ja kwla kpla-ɔ. (Rɔm. 14:13) (4) Klisifuɛ’m be yi i nglo kɛ be klo be wiengu. Be faman ajalɛ ng’ɔ kwla yo naan asɔnun’n nunfuɛ’m b’a bubu be wun nun’n. (Rɔm. 14:15, 19, 20) Sɛ ninnge sɔ’m be tran e klun’n e nin e niaan mun e afiɛn mántan kpa, yɛ bo kun yolɛ’n trán asɔnun’n nun.

16. ?Wafa sɛ yɛ asɔnun kpɛnngbɛn kun kwla kle kɛ i like yolɛ yoman ya-ɔ? (An nian desɛn nin foto mun wie.)

¹⁶ Ɔ fata kɛ asɔnun kpɛnngbɛn’m be kle kɛ be like yolɛ yoman ya. (1 Tim. 3:2, 3) I wie yɛle kɛ, kannzɛ asɔnun kpɛnngbɛn kun ti kpɛnngbɛn tra be onga mun’n ɔ su seman kɛ, i sɔ’n ti’n ɔ fata kɛ be fa ndɛ kwlaa ng’ɔ kan’n su. Ɔ si kɛ Zoova i wawɛ’n kwla sin be tinuntinun be lika naan w’a uka be naan b’a fa ajalɛ kpa. Sɛ ajalɛ nga asɔnun kpɛnngbɛn onga’m be fa’n ɔ fɔnman Ɲanmiɛn i mmla’n, kannzɛ ɔ nin i liɛ’n timan kun’n, ɔ sɔ nun klanman.

17. ?Kɛ e like yolɛ yoman ya’n, i su ye benin yɛ e ɲɛn i-ɔ?

¹⁷ Kɛ e kle kɛ e like yolɛ yoman ya’n e ɲan su ye dan. E nin e niaan mun e afiɛn mantan kpa, yɛ fɔundi tran asɔnun’n nun. Asa’n, e wun kɛ kannzɛ e sran ti wafawafa naan e ninnge yolɛ wafa’n timan kun’n, sanngɛ e kwlaa e ti kɛ awlobo kunngba nunfuɛ sa, yɛ e bo ti kun. I sɔ’n ti’n e klun jɔ. I cinnjin kpafuɛ’n yɛle kɛ e si kɛ e sɔnnzɔn e Ɲanmiɛn Zoova mɔ i like yolɛ yoman ya’n.