LIKE SUANLƐ 15
JUE 124 Maan e yo ndɛnmanfuɛ titi
Maan e lafi Zoova i Anuannzɛ’n su kpa
“Maan amun wla kpɛn be nga be kle amun atin’n, mɔ be kannin Ɲanmiɛn ndɛ be kleli amun’n be su.”—EBR. 13:7.
NDƐ CINNJIN’N
É wá kán like nga e kwla yo naan y’a lafi Zoova i Anuannzɛ’n su titi’n i ndɛ.
1. ?Wafa sɛ yɛ Klisifuɛ klikli’m be siesieli ninnge’m be yolɛ asɔnun’n nun-ɔn?
KƐ ZOOVA mɛn i sufuɛ’m be junman’n, ɔ kunndɛ kɛ be siesie wafa nga bé dí junman sɔ’n i kpa naan i dilɛ’n w’a yoman sukusuku’n. (1 Kor. 14:33) I wie yɛle kɛ Zoova kunndɛ kɛ e bo jasin fɛ’n asiɛ’n wunmuan’n su. (Mat. 24:14) Zezi yɛ Zoova fɛli i sieli i junman sɔ’n su-ɔ. Yɛ i kusu nian junman sɔ’n su kpa naan i dilɛ’n w’a yoman sukusuku. Klisifuɛ klikli’m be blɛ su’n, kɛ bé táka asɔnun bo mun klɔ’m be su’n, be sie asɔnun kpɛnngbɛn mun naan be kle aniaan’m be atin. (Yol. 14:23) Asa’n akoto mun ɔ nin kpɛnngbɛn nga be o Zerizalɛmun lɔ’n, be yɛ be dun aniaan kwlaa sɔ’m be ɲrun mmua-ɔ. Kpɛkun ajalɛ kwlaa nga be fa’n yɛ ɔ fata kɛ aniaan’m be nanti su-ɔ. (Yol. 15:2; 16:4) Kɛ aniaan’m be nantili ajalɛ kwlaa nga be kleli be’n su’n, “asɔnun’m be nunfuɛ’m be lafili Ɲanmiɛn su kpa trali laa’n, kpɛkun cɛn kwlakwla sran’m be sɔn uka su.”—Yol. 16:5.
2. ?Kɛ ɔ fɛ i afuɛ 1919 nun’n, wafa sɛ yɛ Zoova kle i sufuɛ’m be atin-ɔn?
2 Lele nin andɛ’n Zoova te siesie wafa ng’ɔ fata kɛ i sufuɛ’m be yo ninnge mun’n. Kɛ ɔ fɛ i afuɛ 1919 nun’n, Zezi sin be nga be kpali be sieli be ngunmin’n be lika naan w’a siesie jasin fɛ bolɛ junman’n. Asa’n ɔ sin be lika naan w’a kle i sufuɛ’m be like blɛ ng’ɔ ti su’n i nun. a (Lik. 12:42) E wun i wlɛ weiin kɛ Zoova yra be junman’n su.—Eza. 60:22; 65:13, 14.
3-4. (1) Kɛ be siesie junman mun anuannzɛ’n nun’n e ɲan su ye. An fa sa kun yiyi nun. (2) ?Ngue yɛ é wá kɛ́n i ndɛ like suanlɛ nga nun-ɔn?
3 Sɛ ɔ ti kɛ e ninnge yolɛ’n timan siesiewa sa’n, nn e su kwlá diman junman nga Zezi seli e kɛ e di’n. (Mat. 28:19, 20) Maan e se kɛ b’a siesieman jasin fɛ bolɛ’n asɔnun’n nun. Yɛ sran kwlaa kwla jaso ko bo jasin fɛ’n lika kwlaa ng’ɔ klo’n. Sɛ ɔ ti sɔ’n, ɔ cɛman naan aniaan’m be dan lika b’a ko bo jasin fɛ’n lika kunngba’n nun, kpɛkun lika wie’m bé ká lɛ. Nanwlɛ, kɛ e siesie junman nga e di’n, e ɲan su ye dan.
4 I nun mɔ Zezi wo asiɛ’n su wa’n, ɔ kleli wafa ng’ɔ fata kɛ i sɔnnzɔnfuɛ’m be yo ninnge mun’n i su ajalɛ. Yɛ andɛ kusu’n ɔ te yo sɔ. Like suanlɛ nga nun’n, é wá wún ajalɛ nga Zezi kleli’n, ɔ nin wafa nga anuannzɛ’n nian ajalɛ sɔ’n su andɛ’n. Asa’n é wá kán like nga e kwla yo naan y’a kle kɛ e lafi Zoova i anuannzɛ’n su’n i ndɛ.
ANUANNZƐ’N NIAN ZEZI I AJALƐ’N SU
5. ?Like kun mɔ e kwla yo naan y’a nanti Zezi i ajalɛ’n su’n yɛle benin? (Zan 8:28)
5 Like ng’ɔ fata kɛ Zezi yo’n, ɔ nin ndɛ ng’ɔ fata kɛ ɔ kan’n, i Si kleli i. I wafa kunngba’n, Zoova i anuannzɛ’n nian Ɲanmiɛn Ndɛ’n nun uka e naan y’a wun sa kpa nin sa tɛ’n be ngbaciɛ’n. Asa’n ɔ nian Ɲanmiɛn Ndɛ’n nun naan w’a kle e atin. (An kanngan Zan 8:28 nun; 2 Tim. 3:16, 17.) Be se e titi kɛ e kanngan Ɲanmiɛn Ndɛ’n nun naan e nanti i nun ndɛ’n su. ?Sɛ e nanti afɔtuɛ sɔ’n su’n, i su ye benin yɛ é ɲɛ́n i-ɔ?
6. ?Wafa nga e kwla suan Biblu’n nun like naan y’a ɲan su ye’n, i wie yɛle benin?
6 Kɛ e fa fluwa nga anuannzɛ’n yi be’n e fa suan Biblu’n nun like’n, e ɲan su ye dan. I wie yɛle kɛ e kwla nian, sɛ ajalɛ nga anuannzɛ’n kle e’n, ɔ taka ndɛ nga Biblu’n kan’n su-o. Kɛ e wun kɛ ajalɛ nga be kle e’n ɔ taka Biblu’n su’n, e lafi Zoova i anuannzɛ’n i su kpa e tra laa’n.—Rɔm. 12:2.
7. (1) ?Jasin benin yɛ Zezi boli-ɔ? (2) ?Wafa sɛ yɛ Zoova i sufuɛ’m be niɛn i ajalɛ’n su-ɔ?
7 Zezi boli “Ɲanmiɛn Sielɛ’n i jasin fɛ’n.” (Lik. 4:43, 44) Yɛ ɔ seli i sɔnnzɔnfuɛ’m be kɛ be yo sɔ wie. (Lik. 9:1, 2; 10:8, 9) Kannzɛ Zoova i sufuɛ’m be tranwlɛ’n timan kun yɛ junman nga be di i anuannzɛ’n nun’n ɔ timan kun’n, sanngɛ be kwlaa be bo jasin fɛ’n.
8. ?Junman benin yɛ i dilɛ’n yo e fɛ dan-ɔn?
8 Kɛ e kan Ɲanmiɛn Sielɛ’n i su ndɛ nanwlɛ’n e kle e wiengu mun’n, i sɔ’n yo e fɛ dan. Afin nán sran kwlaa yɛ ɔ kwla yo sɔ-ɔ. I wie yɛle kɛ i nun mɔ Zezi te o asiɛ’n su wa’n w’a kplinman su kɛ mmusu’m be kɛn i ndɛ be kle sran mun. (Lik. 4:41) Andɛ kusu’n kwlaa naan b’a man sran kun i atin kɛ ɔ bo jasin fɛ’n, ɔ fata kɛ ɔ kle kɛ ɔ nanti Ɲanmiɛn i mmla’m be su. Sɛ lika kwlaa nga e wo’n, annzɛ blɛ kwlaa nga e ɲɛn i wun atin’n e bo jasin fɛ’n, é klé kɛ junman sɔ’n ti e cenjele like. Kɛ Zezi sa’n e kunndɛ kɛ é mían e ɲin é bó jasin fɛ’n, yɛ é klé sran’m be ndɛ nanwlɛ’n.—Mat. 13:3, 23; 1 Kor. 3:6.
9. ?Ngue yɛ anuannzɛ’n yoli naan sran’m b’a si Ɲanmiɛn i dunman’n niɔn?
9 Zezi yoli maan sran’m be sili Ɲanmiɛn i dunman’n. Cɛn kun mɔ Zezi srɛ́ i Si Ɲanmiɛn’n ɔ seli kɛ: “N yoli maan be sili ɔ dunman’n.” (Zan 17:26) I wafa kunngba’n, Zoova i anuannzɛ’n yo like kwlaa ng’ɔ kwla yo naan sran’m b’a si Ɲanmiɛn i dunman’n. I wie yɛle kɛ Ɲanmiɛn Ndɛ’n—Mɛn Uflɛ Biblu’n i nun’n, be fali Ɲanmiɛn i dunman’n be sieli i lika ng’ɔ fata kɛ ɔ tran lɛ’n. Andɛ’n e kwla ɲan Biblu’n sɔ’n i bue annzɛ i wunmuan’n aniɛn kɔe 270 tra su be nun. Sɛ a nian Biblu’n i bue nga be flɛ i kɛ Ndɛ uflɛ wie mun A4 nin A5 nun’n, á wún like nga ti yɛ be fali Ɲanmiɛn i dunman’n be sieli i lika wie’m be nun’n i wlɛ. Asa’n Bible d’étude i bue nga be flɛ i kɛ Appendice C nun’n, be kleli like nga ti yɛ Ɲanmiɛn Ndɛ’n i bue nga laa be klɛli i Glɛki nun’n i nun’n, Ɲanmiɛn i dunman’n wo nun kpɛ 237.
10. ?Ngue yɛ ndɛ nga bla ng’ɔ tran Biimanin’n kannin’n ɔ kle e-ɔ?
10 Kɛ Zezi sa’n, e kusu e kunndɛ kɛ é yó naan sran kpanngban be si Ɲanmiɛn i dunman’n. Bla kun tran Biimanin. Ɔ le afuɛ 67. Kɛ ɔ sili Ɲanmiɛn i dunman’n, ɔ sunnin kpa. Ɔ seli kɛ: “N nin-a timɛn i le kɛ Ɲanmiɛn i dunman’n yɛle Zoova, saan andɛ. […] Like nga amun kleli min lɛ’n ɔ leman wunsu.” Bla sɔ’n i su ndɛ’n kle kɛ, kɛ sran kun si Ɲanmiɛn i dunman’n i sɔ’n kwla ɲan ta i su.
MAAN E KLE TITI KƐ E LAFI ZOOVA I ANUANNZƐ’N SU
11. ?Wafa sɛ yɛ asɔnun kpɛnngbɛn’m be kwla kle kɛ be lafi Zoova i anuannzɛ’n su-ɔ? (An nian foto’n wie.)
11 ?Wafa sɛ yɛ asɔnun kpɛnngbɛn’m be kwla kle kɛ be lafi Zoova i anuannzɛ’n su-ɔ? Yɛle kɛ, kɛ anuannzɛ’n klɛ be fluwa’n ɔ fata kɛ be kanngan nun kpa naan be mian be ɲin be nanti i nun ndɛ’n su. Anuannzɛ’n kle asɔnun kpɛnngbɛn mun wafa ng’ɔ fata kɛ be tinngɛ aɲia mun’n, ɔ nin wafa nga be kwla srɛ Ɲanmiɛn aɲia’m be bo lɔ’n. Sanngɛ nɛ́n i ngba-ɔ. Be kle be wafa nga be kwla nian Zezi i sɔnnzɔnfuɛ’m be lika’n wie. Kɛ asɔnun kpɛnngbɛn’m be nanti ajalɛ nga anuannzɛ’n kle be’n be su’n, asɔnun’n i nunfuɛ’m be wun kɛ Zoova klo be naan ɔ nian be lika.
Asɔnun kpɛnngbɛn’m be uka e naan y’a lafi ajalɛ nga anuannzɛ’n kle e’n su. (An nian ndɛ kpɔlɛ 11 nun) b
12. (1) ?Ngue ti yɛ ɔ fata kɛ e lo e wun e man be nga be dun e ɲrun mmua’n mun-ɔn? (Ebre Mun 13:7, 17) (2) ?Ngue ti yɛ ɔ fata kɛ e fa e ɲin e sie i be nga be dun e ɲrun mmua’n be nzuɛn kpa’n su-ɔ?
12 Kɛ asɔnun kpɛnngbɛn’m be kle e ajalɛ’n, ɔ fata kɛ e fa su e klun klo su. Sɛ e yo sɔ’n, be junman’n i dilɛ’n su yoman kekle be sa nun. Biblu’n wla e fanngan kɛ e ɲin yi be nga be dun e ɲrun mmua’n, yɛ e lo e wun man be. (An kanngan Ebre Mun 13:7, 17 nun.) Ɔ ju wie’n i sɔ yolɛ’n kwla yo kekle e sa nun. Afin fɔ o be nun. Sanngɛ sɛ be nzuɛn nga be timan kpa’n i su yɛ e fa e ɲin e sie’n, ɔ ti kɛ e su uka e kpɔfuɛ mun sa. ?Wafa sɛ? Yɛle kɛ e kpɔfuɛ’m be kunndɛman kɛ e lafi su kɛ Zoova sin anuannzɛ’n i lika kle e atin. Ɔ maan sɛ e bu asɔnun kpɛnngbɛn’m be wun akunndan tɛ’n, anuannzɛ’n i sulafilɛ’n kwla yo kekle e sa nun. ?Ngue like yɛ e kwla yo naan e kpɔfuɛ’m b’a lakaman e-ɔ?
NÁN MAAN SRAN WIE TI’N Y’A LAFIMAN ZOOVA I ANUANNZƐ’N SU KUN
13. ?Ngue yɛ Ɲanmiɛn i kpɔfuɛ’m be yo naan b’a saci anuannzɛ’n i wun-ɔn?
13 Ɲanmiɛn i kpɔfuɛ’m be yo naan ninnge kpakpa kwlaa nga Zoova i anuannzɛ’n yo be’n, sran’m be bu i kɛ be ti tɛ. I wie yɛle kɛ Zoova kunndɛ kɛ e yo sanwun, e nzuɛn’n yo kpa yɛ e su i kɛ ng’ɔ nin i fata’n sa. Asa’n ɔ se kɛ sran ng’ɔ yo sa tɛ m’ɔ kacimɛn i ayeliɛ’n, ɔ fata kɛ be tu i asɔnun’n nun. (1 Kor. 5:11-13; 6:9, 10) E di ndɛ sɔ mɔ Zoova kan’n su. I sɔ mɔ e yo’n ti’n e kpɔfuɛ’m be waan e kloman sran, naan e bu sran’m be fɔ, naan e wunmɛn i wlɛ kɛ sran kun le atin yo like ng’ɔ klo’n.
14. ?Wan yɛ ɔ yo maan sran’m be bua Zoova i anuannzɛ’n i su ato-ɔ?
14 Maan e wun sran ng’ɔ yo ninnge sɔ mun’n i wlɛ. Satan yɛ ɔ yo maan sran’m be kan ato ndɛ mun Zoova i anuannzɛ’n su-ɔ. I yɛ ɔ ti ‘ato buafuɛ’m be si’n’ niɔn. (Zan 8:44; Bob. 3:1-5) Ɔ maan ɔ fata kɛ e wun i wlɛ kɛ Satan sú sran’m be bo titi naan be bua Zoova i anuannzɛ’n i su ato. I sɔ sa’n juli Zezi nin Klisifuɛ klikli’m be blɛ su wie.
15. ?Ngue yɛ Zifu’m be Ɲanmiɛn sulɛ wafa ng’ɔ timan su’n, be su kpɛnngbɛn’m be yoli Zezi nin i sɔnnzɔnfuɛ mun-ɔn?
15 Kannzɛ fɔ nunman Zezi nun naan ɔ yoli abonuan sa kpanngban’n, sanngɛ Satan i sran’m be buɛli i su ato lele. I wie yɛle kɛ Zifu’m be Ɲanmiɛn sulɛ wafa ng’ɔ timan su’n be su kpɛnngbɛn’m be seli kɛ “mmusu’m be su kpɛn’n,” i fanngan nun yɛ Zezi fuan mmusu mun-ɔn. (Mar. 3:22) Asa’n kɛ bé dí Zezi i jɔlɛ’n, kpɛnngbɛn sɔ’m be waan w’a saci Ɲanmiɛn wun. Yɛ be di wlali sran’m be kɛ be se kɛ be kun i. (Mat. 27:20) I sin’n kɛ Zezi i sɔnnzɔnfuɛ’m bé bó jasin fɛ’n, kpɛnngbɛn kunngba sɔ mun “be wlawlali be nga be timan Zifu’n, kpɛkun be sacili be ti nun” naan be kle Klisifuɛ sɔ’m be yalɛ. (Yol. 14:2, 19) Afuɛ 1998, Desanblu 1 Sasafuɛ Tranwlɛ’n blɔfuɛ nun liɛ’n, ɔ yiyili ndɛ ng’ɔ o Sa Nga Be Yoli’n 14:2 nun’n i nun. Ɔ seli kɛ: “Satan i sran’m b’a sɔman jasin fɛ nga Klisifuɛ’m be boli’n nun. Sanngɛ b’a kaman ngalɛ’n su. Be kannin be su ndɛ tɛtɛ wie mun naan sran’m b’a tieman be ndɛ’n, naan b’a kpɔ be.”
16. ?Sɛ e ti ato ndɛ wie mun’n, ngue yɛ ɔ fata kɛ e wla kpɛn su-ɔ?
16 Satan w’a yaciman ato bualɛ. Andɛ’n ɔ te laka sran mun. I kpa bɔbɔ’n “i yɛ ɔ laka asiɛ’n sufuɛ’m be kwlaa mɔ be mlin’n niɔn.” (Ngl. 12:9) Sɛ a ti anuannzɛ’n annzɛ aniaan nga be dun e ɲrun mmua’n be su ndɛ tɛtɛ wie mun’n, maan ɔ wla kpɛn like nga Ɲanmiɛn i kpɔfuɛ’m be yoli Zezi nin Klisifuɛ klikli mun’n su. Andɛ’n, sran’m be kle Zoova i sufuɛ’m be yalɛ, yɛ be bua be su ato kɛ nga Biblu’n fa kannin’n sa. (Mat. 5:11, 12) Sɛ e wun i wlɛ kɛ Satan yɛ ɔ bua Zoova i anuannzɛ’n i su ato’n yɛ sɛ e sasa e wun’n, ɔ su kwlá lakaman e. ?Ngue yɛ e kwla yo naan y’a sasa e wun-ɔn?
17. ?Ngue yɛ ɔ fata kɛ e yo naan y’a faman ato ndɛ’m be su-ɔ? (2 Timote 1:13) (An nian kuku nga be flɛ i kɛ “ ?Kɛ e ti ato ndɛ mun’n ngue yɛ ɔ fata kɛ e yo-ɔ?” nun wie.)
17 Maan e kpalo ato ndɛ mun. Kɛ e ti ato ndɛ wie mun’n, like ng’ɔ fata kɛ e yo’n Pɔlu kɛnnin i ndɛ weiin. Ɔ seli Timote kɛ ɔ se aniaan mun kɛ “nán be fa be ɲin sie ato ndɛ mun” be su, yɛ nán be fa ‘ato ndɛ mɔ be timan Ɲanmiɛn liɛ’n’ be su. (1 Tim. 1:3, 4; 4:7) Maan e fa sa kun e yiyi nun. Wie liɛ’n, kɛ bakan kun isa like kun asiɛ wun’n, ɔ ka lɛ fa wlɛ i nuan nun. Sanngɛ sran kaklaka’n su yoman sɔ. I wafa kunngba’n, kɛ mɔ e si kɛ Satan yɛ ɔ o ato ndɛ sɔ’m be sin’n ti’n, e tieman ndɛ sɔ mun. “Ndɛ kpakpa” nga be kan kle e’n, i su yɛ e fa e ɲin e sie-ɔ.—An kanngan 2 Timote 1:13 nun.
18. ?Wafa sɛ yɛ e kwla kle kɛ e lafi Zoova i anuannzɛ’n su-ɔ?
18 E kannin ninnge nsan nga anuannzɛ’n yo be naan w’a nian Zezi i ajalɛ’n su’n be ndɛ. Sanngɛ nɛ́n i ngba-ɔ. Kɛ á súan Biblu’n nun like kɔ́’n, sie ninnge uflɛ nga be nun’n anuannzɛ’n nian Zezi i ajalɛ’n su’n be nzɔliɛ wie. Asa’n uka aniaan mun naan be lafi Zoova i anuannzɛ’n su. Kle titi kɛ a lafi Zoova i anuannzɛ’n su. I lɛ nun’n su Zoova kpa titi, kpɛkun nanti ajalɛ kwlaa nga anuannzɛ’n fa be’n be su. Afin i yɛ Zoova sin i lika naan i klun sa’n w’a kpɛn su-ɔ. (Jue. 37:28) Zoova i sufuɛ’m be klo be wiengu, yɛ be afiɛn sɛ. Maan sulɛ mɔ e nin be e su Ɲanmiɛn likawlɛ’n, ɔ yo e cenjele like titi.
?AMÚN TƐ́ SU SƐ?
-
?Wafa sɛ yɛ Zoova i sufuɛ’m be nian Zezi i ajalɛ’n su-ɔ?
-
?Wafa sɛ yɛ e kwla kle titi kɛ e lafi Zoova i anuannzɛ’n su-ɔ?
-
?Sɛ e ti ato ndɛ wie mun’n ngue yɛ ɔ fata kɛ e yo-ɔ?
JUE 103 Sran nga be mannin be like kɛ be yo’n
a An nian kuku nga be flɛ i kɛ “Pourquoi 1919 ?” m’ɔ o fluwa Le culte pur de Jéhovah enfin rétabli ! i bue 102-103 nun’n.
b FOTO’N I SU NDƐ’N,: Asɔnun kpɛnngbɛn’m be su fa be ɲin be sie i ajalɛ nga anuannzɛ’n kleli i nzra nun jasin fɛ bolɛ’n su’n i su. I sin’n asɔnun kpɛnngbɛn kun su kle jasin bofuɛ nɲɔn be kɛ, kɛ bé fá kakaklolo bé bó jasin fɛ’n, ɔ fata kɛ be kaci be sin be si talɛ’n.
