?Amun si sɔ?
?Ngue ti yɛ be nga be timan Izraɛlifuɛ’n, be yoli Famiɛn Davidi i sonja wie-ɔ?
FAMIƐN DAVIDI i sonja’m be nun’n, sran wie’m be timan Izraɛlifuɛ. Sran sɔ’m be nun wie yɛle Zelɛki m’ɔ ti Amɔnfuɛ’n, nin Iri m’ɔ ti Ɛtifuɛ’n, yɛ Itma m’ɔ ti Moabufuɛ’n. a (1 Ɲol. 11:39, 41, 46) Asa’n, ‘Kerɛtifuɛ mun, nin Pelɛtifuɛ mun, nin Gatifuɛ mun’ be o Davidi i sonja’m be nun wie. (2 Sam. 15:18) Kɔlɛ’n Kerɛtifuɛ mun nin Pelɛtifuɛ’m be nin Filistifuɛ’m be ti kun. (Eze. 25:16) Yɛ Gatifuɛ’m be kusu be fin Filistifuɛ’m be klɔ nga be flɛ i kɛ Gati’n su.—Zoz. 13:2, 3; 1 Sam. 6:17, 18.
?Ngue ti yɛ Davidi fali aofuɛ sɔ mun wlɛli i sonja’m be nun-ɔn? Ɔ lafili su kɛ be su kpɔcimɛn i, naan i kpa bɔbɔ’n, be su kpɔciman Zoova. Fluwa kun m’ɔ yiyi Biblu’n nun ndɛ’n nun’n, ɔ seli kɛ: ‘I nun mɔ Davidi dí famiɛn mɔ sa kekleekle’m be tɔli i su’n, Kerɛtifuɛ mun nin Pelɛtifuɛ’m b’a kpɔcimɛn i le.’ I wie yɛle kɛ, kɛ “Izraɛlifuɛ’m be kwlaa” be yacili Famiɛn Davidi lɛ be ko suli ɲin keklefuɛ kun mɔ be flɛ i kɛ Saba’n su’n, Kerɛtifuɛ mun nin Pelɛtifuɛ’m b’a kpɔciman Davidi. Yɛ be suɛnnin i bo maan ɔ kwlali Saba. (2 Sam. 20:1, 2, 7) Blɛ wie nun’n, Famiɛn Davidi i wa Adonia kunndɛli kɛ ɔ́ dé famiɛn bia’n, kusu nn Salomɔn yɛ ɔ fata kɛ ɔ sin famiɛn’n i ja nun-ɔn. Sanngɛ Kerɛtifuɛ mun nin Pelɛtifuɛ’m be ukali Davidi. Be ukɛli i naan w’a sie Salomɔn i famiɛn naan ɔ sin Davidi i ja nun. Afin Salomɔn yɛ Zoova kpɛli i kɛ ɔ di famiɛn-ɔn.—1 Fam. 1:24-27, 38, 39.
Aofuɛ kun ekun m’ɔ nin Davidi be nantili klanman kpa wie’n, yɛle Itai m’ɔ fin Gati’n. I nun mɔ Famiɛn Davidi i wa Absalɔmun jasoli i wun m’ɔ lakali Izraɛlifuɛ mun mɔ be awlɛn’n trɛnnin i su’n, Itai nin i sonja 600 be suannin Davidi bo. Kɛ mɔ Itai sɔ’n ti aofuɛ’n ti’n, i klikli’n nun’n Davidi seli i kɛ ɔ fataman kɛ ɔ kun i ti alɛ. Sanngɛ Itai tɛli i su kɛ: “Famiɛn, maan n di nanwlɛ Zoova m’ɔ lafiman’n ɔ nin ɔ bɔbɔ mɔ ɔ ɲin te o su yɛ’n, amun ɲrun. Lika kwlaa nga á kɔ́’n, ń sú wɔ su. Sɛ á wú-o, sɛ á ká nguan nun-o, e nin wɔ-ɔ.”—2 Sam. 15:6, 18-21.
Itai w’a kpɔciman Davidi mɔ Zoova sieli i famiɛn’n.
Kerɛtifuɛ mun, nin Pelɛtifuɛ mun, nin Gatifuɛ’m be ti aofuɛ. Sanngɛ be buli Zoova kɛ i yɛ ɔ ti Ɲanmiɛn Kpli’n niɔn, naan Davidi yɛ ɔ ti sran nga Zoova kpɛli i’n niɔn. E si kɛ, kɛ Davidi ɲannin sran kpa kɛ ngalɛ sa mun’n, i sɔ’n yoli i fɛ dan.
a Mmla’n 23:3-6 nun’n, Ɲanmiɛn mmla’n waan nán Amɔnfuɛ mun nin Moabufuɛ’m be fa be wun wla Izraɛlifuɛ’m be nun. Sanngɛ kɔlɛ’n mmla sɔ’n su se kɛ nán maan aofuɛ sɔ’m be kaci Izraɛli nvle’n i nunfuɛ, sanngɛ be kwla tran Izraɛlifuɛ’m be afiɛn, yɛ be nin Izraɛlifuɛ’m be kwla yo ninnge wie mun likawlɛ. Nian fluwa Étude perspicace des Écritures, volume 1 i bue 100-101 nun.
