1. ?Ngue ti yɛ ɔ fata kɛ Zoova kle e atin-ɔn? An fa sa kun yiyi nun.

 MAAN e se kɛ w’a ɔ bo kun nun kpɛkun w’a ko mlin. Nnɛn wlɛfuɛ mun, nin wuo mun, nin kakaa tɛtɛ wie’m be o bo sɔ’n nun. Asa’n a kwla tɔ kunman wie nun. Blɛ sɔ’n nun’n, sɛ a kwla ɲan sran m’ɔ si lika’n i kpa naan ɔ kwla kle ɔ atin’n, i sɔ yó ɔ fɛ kpa. Sɛ ɔ si lika ng’ɔ fata kɛ a sin naan like yaya w’a yoman wɔ’n, i sɔ’n yó ɔ ye dan. Mɛn nga e o nun yɛ’n, ɔ ti kɛ bo sɔ’n sa. Ninnge nga be o mɛn’n nun mɔ be kwla yo naan e nin Zoova e afiɛn w’a saci’n, be diman be yalɛ. Sanngɛ Zoova kle e atin naan y’a ju mɛn uflɛ’n nun lɔ, naan y’a ɲan nguan m’ɔ leman awieliɛ’n.

2. ?Wafa sɛ yɛ Zoova kle e atin-ɔn?

² Like klikli nga Zoova fa kle e atin’n, yɛle Biblu’n. Sanngɛ ɔ sin klɔ sran’m be lika wie. I wie yɛle kɛ ɔ sin “junman difuɛ nanwlɛfuɛ m’ɔ si ngwlɛlɛ’n” i lika kle e like naan y’a kwla fa ajalɛ kpa. (Mat. 24:45) Asa’n, Zoova sin i sufuɛ wie mɔ be ɲin w’a ti kpa’n, be lika naan w’a kle e atin wie. I wie yɛle akpasua sunianfuɛ mun nin asɔnun kpɛnngbɛn mun. Be wla e fanngan yɛ be kle e like naan y’a kwla jran kekle. Nanwlɛ, kɛ e wun kɛ Zoova kle e atin mɛn’n i awieliɛ blɛ mɔ w’a yo kekle yɛ’n i nun’n, i sɔ’n yo e fɛ dan. Kɛ m’ɔ kle e atin’n ti’n, i klun kwla jɔ e wun yɛ e kwla ka nguan atin’n su.

3. ?Ngue yɛ é wá kɛ́n i ndɛ like suanlɛ nga nun-ɔn?

³ Ɔ ju wie’n, kɛ ɔ ko yo naan y’a fa atin nga Zoova kle e’n su’n ɔ ti kekle. I li kɛ ɔ sin klɔ sran mɔ fɔ o be nun kɛ e sa’n be lika kle e atin’n, yɛ i su falɛ’n kwla yo kekle kpa’n niɔn. ?Ngue ti-ɔ? Afin wie liɛ’n, afɔtuɛ nga be man e’n, ɔ timan e liɛ’n su. Annzɛ kusu e kwla bu i kɛ ajalɛ nga be kle e’n, ɔ timan ajalɛ kpa naan i sɔ’n finman Zoova. Blɛ kɛ ngalɛ’n sa’m be nun’n, ɔ ti cinnjin kɛ e wla kpɛn su kɛ Zoova yɛ ɔ kle i sufuɛ’m  be atin-ɔn, naan be nga be fɛ i atin’n su’n, i bo’n gua klanman man be. Kɛ ɔ ko yo naan y’a lafi ndɛ sɔ’n su kpa’n, like suanlɛ nga nun’n, é wá kán like nsan be ndɛ. I klikli’n yɛle wafa nga Zoova kleli i sufuɛ’m be atin laa’n. I nɲɔn su’n yɛle wafa nga Zoova kle e atin andɛ’n. Yɛ i nsan su’n yɛle Zoova i atin’n i su falɛ’n, i su ye nga e ɲɛn i’n.

WAFA NGA LAA’N ZOOVA KLELI IZRAƐLIFUƐ’M BE ATIN’N

4-5. ?Wafa sɛ yɛ Zoova kleli Izraɛlifuɛ’m be kɛ ɔ sin Moizi i lika kle be atin-ɔn? (An nian desɛn ng’ɔ o fluwa’n i bui’n su’n.)

⁴ Zoova fali Moizi naan ɔ fa Izraɛlifuɛ mun Ezipti lɔ fite. Ɔ kleli Izraɛlifuɛ’m be weiin kɛ i yɛ ɔ sin Moizi i lika kle be atin-ɔn. Nglɛmun’n, ɔ fali ɲanmiɛn ble tiaan kun kleli be atin. Yɛ kɔnguɛ’n, sin taaman tiaan kun yɛ ɔ fa kleli be atin-ɔn. (Tul. 13:21) Moizi suli ɲanmiɛn ble’n nin sin taaman’n be su lele ɔ nin Izraɛlifuɛ’m be juli jenvie ɔkwlɛ’n i nuan lɔ. Kɛ be juli lɛ mɔ be wunnin kɛ Eziptifuɛ’m be su be su’n, be buli i kɛ nn be liɛ w’a wie. Ɔ maan srɛ kunnin be kpa. Be seli be wun kɛ Moizi w’a fa be ti w’a bo i mankun nzue nun. Sanngɛ nán fɔnlɛ yɛ Moizi fɔnnin-ɔn. Zoova bɔbɔ yɛ ɔ sinnin i lika fali be ɔli lika sɔ’n nun-ɔn. (Tul. 14:2) I sin’n, Zoova yoli abonuan sa kun deli be.—Tul. 14:​26-28.

⁵ Kɛ ɔ fɛ i lɛ lele mɔ afuɛ 40 fá sín’n, ɲanmiɛn ble’n nin sin taaman’n be su yɛ Moizi suli naan w’a kle Ɲanmiɛn i sufuɛ’m be atin aawlɛ flɛnnɛn nun-ɔn. a Blɛ wie nun’n, Ɲanmiɛn yoli maan ɲanmiɛn ble’n ko jrannin Moizi i tannin sua’n i ti su. Yɛ Izraɛlifuɛ’m be kwlaa be kwla wun i. (Tul. 33:​7, 9, 10) Ɲanmiɛn ble tiaan nun yɛ Zoova kan ndɛ kle Moizi-ɔ. Kpɛkun i kusu kan ndɛ’n kle nvlefuɛ mun. (Jue. 99:7) Izraɛlifuɛ’m be wunnin i wlɛ weiin kɛ Zoova yɛ ɔ sin Moizi i lika kan ndɛ kle be-ɔ.

6. ?Ngue yɛ Izraɛlifuɛ’m be sunman lika b’a lafiman su-ɔ? (Kalɛ 14:​2, 10, 11)

⁶ Sanngɛ Izraɛlifuɛ’m be nun sunman b’a lafiman su kɛ Zoova yɛ ɔ sin Moizi i lika kle be atin-ɔn. (An kanngan Kalɛ 14:​2, 10, 11 nun.) Kpɛ sunman’n, b’a loman be wun b’a manman Moizi. I sɔ’n ti’n, Zoova w’a manman Izraɛlifuɛ sɔ’m be atin kɛ be wlu lika ng’ɔ seli kɛ ɔ́ fá mán be’n i nun.—Kal. 14:30.

7. ?Wan mun yɛ be fali atin nga Zoova kleli be’n su-ɔ? (Kalɛ 14:24) (An nian desɛn’n wie.)

⁷ Izraɛlifuɛ wie’m be liɛ’n, be fali atin nga Zoova kle’n su. I wie yɛle Kalɛbu liɛ’n. Zoova seli kɛ: ‘Kalɛbu tuli i klun fali min ndɛ’n su.’ (An kanngan Kalɛ 14:24 nun.) Zoova yrali Kalɛbu su. I kpa bɔbɔ’n, ɔ fali Kanaan mɛn’n i lika nga Kalɛbu seli kɛ ɔ fa mɛn i’n, ɔ fa mɛnnin i. (Zoz. 14:​12-14) Izraɛlifuɛ nga be wa jasoli su’n, be kusu be kleli ajalɛ kpa wie. Yɛle kɛ be fali atin nga Zoova kle be’n su. Kɛ Zozie sinnin Moizi i ja nun dunnin Izraɛlifuɛ’m be ɲrun mmua’n, Izraɛlifuɛ’m be ɲin yili i kpa lele naan w’a wu. (Zoz. 4:14) Ɔ maan Zoova yrali be su. Yɛle kɛ ɔ fali be wuli mɛn ng’ɔ seli kɛ ɔ́ fá mán be’n i nun.—Zoz. 21:​43, 44.

8. ?Wafa sɛ yɛ Zoova kleli i sufuɛ’m be atin famiɛn’m be blɛ su-ɔ? (An nian desɛn’n wie.)

⁸ Kɛ afuɛ kpanngban sinnin’n, Zoova kpali jɔlɛ difuɛ wie mun naan be kle i sufuɛ’m be atin. I sin ekun’n, famiɛn’m be blɛ su’n, Zoova kpali i nuan ijɔfuɛ wie mun naan be kle i sufuɛ’m be atin. Famiɛn nga be ti kpa’n, be fali afɔtuɛ nga Ɲanmiɛn nuan ijɔfuɛ’m be man be’n su. I wie yɛle Famiɛn Davidi liɛ’n. Kɛ Ɲanmiɛn  nuan ijɔfuɛ Natan tuli i fɔ’n, ɔ kɛnnin i wun ase sɔli nun klanman. (2 Sam. 12:​7, 13; 1 Ɲol. 17:​3, 4) I wie ekun yɛle Famiɛn Zozafati liɛ’n. Ɔ fali ndɛ nga Ɲanmiɛn nuan ijɔfuɛ Zaaziɛli kan kleli i’n su. Yɛ ɔ wlali Zidafuɛ’m be fanngan kɛ be ‘lafi Ɲanmiɛn i nuan ijɔfuɛ’m be su.’ (2 Ɲol. 20:​14, 15, 20) Blɛ kekle nun’n, Famiɛn Ezekiasi usali Ɲanmiɛn nuan ijɔfuɛ Ezai i ngwlɛlɛ afɛ. (Eza. 37:​1-6) Blɛ kwlaa nga famiɛn’m be fali atin nga Zoova kle be’n su’n, Zoova yrali be su, yɛ ɔ sasali nvle’n. (2 Ɲol. 20:​29, 30; 32:22) Sran’m be kwlaa be kwla wunnin i wlɛ kɛ Zoova sin i nuan ijɔfuɛ’m be lika kle i sufuɛ’m be atin. Sanngɛ famiɛn mun nin Izraɛlifuɛ’m be dan lika b’a faman ndɛ nga Zoova i nuan ijɔfuɛ’m be kan kleli be’n su.—Zer. 35:​12-15.

?WAFA SƐ YƐ ZOOVA KLELI KLISIFUƐ KLIKLI’M BE ATIN-ƆN?

9. ?Wan mun yɛ Zoova sinnin be lika kleli Klisifuɛ klikli’m be atin-ɔn? (An nian desɛn’n wie.)

⁹ Afuɛ 33 Pantekɔtu nun yɛ Zoova takali Klisifuɛ’m be asɔnun’n niɔn. ?Wafa sɛ yɛ Zoova kleli Klisifuɛ sɔ’m be atin-ɔn? Zoova sieli Zezi asɔnun’n i su kpɛn. (Efɛ. 5:23) Sanngɛ nán kɛ Zezi kan ndɛ kle i sɔnnzɔnfuɛ sɔ’m be trele-ɔ. Ɔ sinnin akoto mun ɔ nin kpɛnngbɛn nga be o Zerizalɛmun lɔ’n be lika naan w’a kle be atin. (Yol. 15:​1, 2) Asa’n be sieli asɔnun kpɛnngbɛn mun asɔnun’m be nun naan be kle asɔnun’n nunfuɛ’m be atin.—1 Tes. 5:12; Tit. 1:5.

10. (1) ?Klisifuɛ klikli’m be blɛ su’n, kɛ be kleli be atin’n ngue yɛ be yoli-ɔ? (Sa Nga Be Yoli’n 15:​30, 31) (2)?Ngue ti yɛ laa’n sran wie’m b’a loman be wun b’a manman sran nga Zoova sin be lika kle be atin’n niɔn? (An nian kuku nga be flɛ i kɛ “ ?Ngue ti yɛ sran wie’m b’a faman be ndɛ’n su-ɔ?” nun.)

¹⁰ Klisifuɛ klikli’m be dan lika be klun klo su be fali ajalɛ nga be kleli be’n su. I kpa bɔbɔ’n be klun jɔli dan. Afin ndɛ nga be kan kleli be’n, ɔ wlali be fanngan dan. (An kanngan Sa Nga Be Yoli’n 15:​30, 31 nun.) ?Yɛ andɛ li? ?Wafa sɛ yɛ Zoova kle i sufuɛ’m be atin-ɔn?

?WAFA SƐ YƐ ZOOVA KLE E ATIN ANDƐ-Ɔ?

11. ?Ngue yɛ ɔ kle kɛ Zoova kleli be nga be dun i sufuɛ’m be ɲrun mmua’n be atin-ɔn?

¹¹ Zoova te kle i sufuɛ’m be like andɛ. I sɔ yolɛ’n nun’n, ɔ sin Biblu m’ɔ ti i nuan ndɛ’n, ɔ nin i Wa m’ɔ ti asɔnun’n i su  kpɛn’n be lika. Sa wie’m be kle kɛ Zoova te sin klɔ sran’m be lika naan w’a kle i sufuɛ’m be atin. Maan e fa e ɲin e sie i sa wie mɔ kɛ afuɛ 1870 sinnin’n, be juli’n be su. Blɛ sɔ’n nun’n, aniaan bian Sali Risɛli ɔ nin i janvuɛ’m be wunnin i wlɛ kɛ Ɲanmiɛn Sielɛ’n i takalɛ’n nun’n, afuɛ 1914 ɔ́ yó afuɛ cinnjin kpa kun. (Dan. 4:​25, 26) Ndɛ nga Biblu’n kan mɔ be suannin su like’n, i ti yɛ be wunnin ndɛ sɔ’n i wlɛ-ɔ. Zoova bɔbɔ yɛ ɔ yoli maan be wunnin ndɛ sɔ’n i wlɛ-ɔ. Sa nga be juli afuɛ 1914 nun’n, be kleli weiin kɛ sran nga Ɲanmiɛn sieli i famiɛn’n w’a bo famiɛn dilɛ bo. Afuɛ sɔ’n nun yɛ be boli alɛ dan klikli’n i kunlɛ bo-ɔ. I sin’n tukpacɛ nga be sa ndɛndɛ’n be wa truli. Asiɛ’n kejeli lika sunman nun. Yɛ awe’n kpɛnnin. (Lik. 21:​10, 11) Nanwlɛ, e wun i wlɛ weiin kɛ Zoova sinnin Klisifuɛ kpa sɔ’m be lika naan be ukɛ i sufuɛ mun.

12-13. ?Ajalɛ benin wie mun yɛ Anuannzɛ’n fali be Alɛ Dan Nɲɔn su’n nun-ɔn?

¹² Maan e kan ajalɛ wie mɔ aniaan’m be fali be Alɛ dan nɲɔn su’n nun’n be ndɛ. Blɛ sɔ’n nun’n, aniaan nga be o anuannzɛ’n i bo bia’n su lɔ’n, be suannin Sa Nglo Yilɛ 17:8 i su like kpa. Ɔ maan be wa wunnin i wlɛ kɛ sran’m be su kunman alɛ sɔ’n lele fa juman Aamagedɔn alɛ’n su. Lika’n wá tɔ́ fɔuun yɛ Zoova i Lalofuɛ’m bé ɲán atin bé bó jasin fɛ’n i kpa. I sɔ’n ti’n be takali Galaadi suklu’n blɛ sɔ’n nun naan b’a kle aniaan’m be like naan be ko bo jasin fɛ’n mɛn’n wunmuan’n nun. Kusu nn blɛ sɔ’n nun’n, sran wie’m be kwla bu i kɛ ajalɛ sɔ’n i falɛ’n nin i fataman. Alɛ sɔ’n nun bɔbɔ’n, be fali aniaan wie mun ɔli lika wie’m be nun naan be ko bo jasin fɛ’n. Asa ekun’n, junman difuɛ nanwlɛfuɛ’n siesieli suklu kun b asɔnun’n be kwlaa be nun. Ɔ yoli sɔ naan be kle aniaan’m be like naan be si jasin fɛ’n i bo kpa, yɛ be si sran’m be like kle kpa wie. Ajalɛ sɔ’m be ti’n, aniaan’m be kwla buabuali be wun naan b’a di junman ng’ɔ minndɛ be’n.

¹³ Kɛ e fa e ɲin e sie i sa sɔ’m be su’n, e wun i wlɛ kɛ Zoova kleli i sufuɛ’m be atin blɛ kekle sɔ’n nun. Kɛ Alɛ Dan Nɲɔn su’n sinnin’n, nvle sunman nun’n lika’n wa tɔli fɔuun. Ɔ maan Zoova i Lalofuɛ’m be kwla ɲannin be ti be boli jasin fɛ’n i kpa. I kpa bɔbɔ’n be junman’n bali nvlɛ kpa.

14. ?Ngue ti yɛ ɔ fata kɛ e nanti ajalɛ kwlaa nga Zoova i Anuannzɛ’n ɔ nin asɔnun kpɛnngbɛn’m be kle e’n be su-ɔ? (Sa Nglo Yilɛ 2:1) (An nian foto’n wie.)

¹⁴ Andɛ’n, e Anuannzɛ’n i ɲrun dinfuɛ’m be lo be wun be man Klisi naan ɔ kle be atin. Be mian be ɲin naan ajalɛ nga be fa’n, ɔ nin akunndan nga Ɲanmiɛn bu’n be wɔ likawlɛ. Be sin akpasua sunianfuɛ mun nin asɔnun kpɛnngbɛn’m be lika naan b’a kle asɔnun’n nunfuɛ’m be like. c Be nga Ɲanmiɛn kpali be sieli be ngunmin mɔ be ti asɔnun kpɛnngbɛn’n, be o Zezi Klisi i sa fama’n nun. (An kanngan Sa Nglo Yilɛ 2:1 nun.) Ɔ ti su kɛ fɔ o aniaan sɔ’m be nun yɛ be kwla fɔn. Moizi nin Zozie nin akoto’m be fɔnnin cɛn kunngun. (Kal. 20:12; Zoz. 9:​14, 15; Rɔm. 3:23) Sanngɛ Zezi Klisi kle junman difuɛ nanwlɛfuɛ’n, ɔ nin asɔnun kpɛnngbɛn’m be atin. Yɛ ɔ́ yó sɔ “cɛn kwlakwla lele mɛn’n fá wie.” (Mat. 28:20) I sɔ’n ti’n, ɔ fata kɛ e lafi aniaan sɔ mɔ Zezi sin be lika kle e like’n be su. Yɛ e nanti ajalɛ nga be kle e’n su.

KƐ E FA ATIN NGA ZOOVA KLE E’N SU’N E ƝAN SU YE

15-16. ?Ngue yɛ aniaan wie mɔ be fali atin nga Zoova kle e’n su’n, be su ndɛ’n kle e-ɔ?

¹⁵ Kɛ e fa atin nga Zoova kle e’n su’n, e ɲan su ye dɔ nga su bɔbɔ. I wie yɛle aniaan bian kun mɔ be flɛ i Andi ɔ nin i yi Robinin be liɛ’n. Afɔtuɛ nga Anuannzɛ’n man e kɛ nán e fa sika kunndɛlɛ’n e cici e ti’n, be fali su. (Ebr. 13:5) I sɔ mɔ be yoli’n ti’n, be kwla ukali aniaan nga be kplan e Ɲanmiɛn sulɛ sua mun’n. Bla’n seli kɛ: “Ɔ ju wie’n, e tran sua kaan wie’m be nun. Wie liɛ bɔbɔ’n, gbo nunman nun naan b’a tɔn like. Asa’n n klo foto cilɛ’n. Sanngɛ n yoli ninnge nga n fa ci foto’n be atɛ. Nanwlɛ, i sɔ’n yoli min ya kpa. N sunnin bɔbɔ. Sanngɛ kɛ Abraamun i yi Sara sa’n, m’an faman min ɲin m’an siemɛn i ninnge nga n kpɔcili be’n be su. Sanngɛ ninnge nga n kwla yo n man Zoova’n, i su yɛ n fali min ɲin n sieli-ɔ.” (Ebr. 11:15) ?Ajalɛ sɔ mɔ aniaan’n nin i yi be fali’n, i su ye benin yɛ be ɲɛnnin i-ɔ? Robinin seli kɛ: “Kɛ e wun kɛ e fa e blɛ’n i kwlaa e su Zoova’n, e di aklunjɔɛ dan. Kɛ e nin min wun e di junman nga Zoova fa wlali e sa nun’n, e wun wafa nga mɛn uflɛ’n nun lɔ tranlɛ’n wá yó’n i wlɛ kan.” I wun Andi kusu seli kɛ: “Nanwlɛ, kɛ e wun kɛ e  tu e klun e suan Ɲanmiɛn Sielɛ’n i bo kɛ ngalɛ’n sa’n, i sɔ’n yo e fɛ dan.”

¹⁶ ?Kɛ e fa atin nga Zoova kle e’n su’n, i su ye benin yɛ e ɲɛn i ekun-ɔn? Maan e kan aniaan bla kun mɔ be flɛ i kɛ Maasia’n i ndɛ. Kɛ ɔ ɲannin baki’n, ɔ fali ajalɛ kɛ ɔ́ káci atin bofuɛ kɛ nga be wla e fanngan kɛ e yo’n sa. (Mat. 6:33; Rɔm. 12:11) Maasia seli kɛ: “Be mannin min fluwa kun m’ɔ man min atin kɛ n ko di Inivɛsite afuɛ nnan, kpɛkun n su tuaman sika. Sanngɛ n kunndɛli kɛ ń tú min klun ń sú Zoova. Ɔ maan m’an ɔman Inivɛsite. Sanngɛ n suannin junman wie dilɛ suklu kun nun. I liɛ’n kɛ ń má káci atin bofuɛ’n, ń kwlá ɲán sika kan naan m’an nian min wun lika. Nanwlɛ, ajalɛ sɔ mɔ n fali’n ɔ yoli kpa dan. Kɛ é sé yɛ’n, n ti titi atin bofuɛ, yɛ kɛ mɔ min junman’n faman min blɛ dan’n ti’n, n kwla di junman kan Betɛli lɔ. Yɛ n di junman uflɛ wie mun ekun Anuannzɛ’n nun.”

17. ?Kɛ e fa atin nga Zoova kle e’n su’n, i su ye benin yɛ e ɲɛn i ekun-ɔn? (Ezai 48:​17, 18)

¹⁷ Zoova i Anuannzɛ’n man e afɔtuɛ wie mɔ be sasa e-ɔ. I wie yɛle kɛ be wla e fanngan kɛ nán maan e klo sika dan. Yɛ nán e yo ninnge wie mɔ be kwla yo naan y’a fɔn Ɲanmiɛn i mmla’n. Kɛ e fa afɔtuɛ sɔ mɔ Zoova man e’n be su’n, ɔ yra e su. Asa’n e akunndan’n buman e fɔ, yɛ e kpɛman ndɛ e manman e wun. (1 Tim. 6:​9, 10) Kɛ e yo sɔ’n, e kwla tu e klun e su Zoova. Ɔ maan aklunjɔɛ nga e di’n, ɔ leman wunsu. Yɛ e wla gua ase fɔuun.—An kanngan Ezai 48:​17, 18 nun.

18. ?Ngue ti yɛ w’a fua kpa kɛ á fá atin nga Zoova kle e’n su titi-ɔ?

¹⁸ Ɲrɛnnɛn dan’n nun’n, yɛ Zezi Klisi i afuɛ akpi famiɛn dilɛ blɛ’n nun’n, Zoova wá sín klɔ sran wie’m be lika naan w’a kle i sufuɛ’m be atin titi. (Jue. 45:16) ?Yɛ sɛ be kle e ajalɛ kun naan e bɔbɔ e klo kɛ é yó like uflɛ nin? ?É fá ajalɛ nga be kleli e’n su? Sɛ dɔ nga su e fa atin nga Zoova kle e’n su’n, i sɔ’n yó pɔpɔ mán e blɛ sɔ’n nun. I sɔ’n ti’n, maan blɛ kwlaa nun’n e fa ajalɛ nga Zoova kle e’n su. I wie yɛle kɛ maan e nanti ajalɛ ng’ɔ sin be ng’ɔ kpali be kɛ be nian e su’n, be lika kle e’n be su. (Eza. 32:​1, 2; Ebr. 13:17) Maan e lafi Zoova m’ɔ kle e atin’n i su. Afin atin m’ɔ kle e’n ti’n, e su yoman like wie mɔ maan e nin i e afiɛn kwla saci-ɔ. Kpɛkun e kwla ju e juwlɛ mɔ yɛle mɛn uflɛ’n. Yɛ é ɲán nguan m’ɔ leman awieliɛ’n.