?A kanngannin afuɛ nga nun Sasafuɛ Tranwlɛ’n i nun ndɛ’m be nun kpa? Sɛ ɔ ti sɔ’n, tɛ kosan nga’m be su:

?Wafa sɛ yɛ Zoova bu bla mun m’ɔ fata kɛ e nian su-ɔ?

Ɔ buman yasua’m be kpa traman bla mun. Kɛ bla’m be srɛ i’n, ɔ tie. Ɔ kle kɛ wafa nga be wun yo be’n, ɔ nin sa ng’ɔ o be su’n, be ti i cinnjin. Yɛ ɔ man be junman naan be di.—w24.01, b. 15-16.

Efɛzifuɛ Mun 5:7 se kɛ: “Nán amun nin be di.” ?Wafa sɛ yɛ e kwla nanti ndɛ sɔ’n su-ɔ?

Akoto Pɔlu su se kɛ nán maan e nin be nga be kwla yo naan Ɲanmiɛn i mmla’m be su falɛ’n w’a yo kekle’n e san nun. Nán maan e nin sran sɔ mun e san nun jrɛiin nun annzɛ ɛntɛnɛti su.—w24.03, b. 22-23.

?Ato ndɛ benin mun yɛ ɔ fata kɛ e nian e wun su naan y’a faman su-ɔ?

I wie yɛle ndɛ nga e janvuɛ’m b’a usaman nun naan b’a klɛ b’a blɛ e’n, ɔ nin ndɛ nga sran nga e siman be’n be klɛ blɛ e ɛntɛnɛti su’n, ɔ nin ndɛ ng’ɔ fin be nga be nin Ɲanmiɛn b’a bu mɔ be yo kɛ ndɛ nanwlɛ’n ti be cinnjin sa’n.—w24.04, b. 12.

Jɔlɛ mɔ Zoova wá dí Salomɔn, nin be nga be wuli Sodɔmun nin Gomɔru lɔ’n, ɔ nin Nowe blɛ su’n, i su ndɛ benin yɛ e si-ɔ? ?Yɛ i su ndɛ benin yɛ e simɛn i-ɔ?

E kwlá seman kɛ Zoova w’a di be jɔlɛ w’a wie naan be liɛ w’a wie mlɔnmlɔnmlɔn. Sanngɛ e si kɛ Zoova si sa kwlaa nun naan ɔ si aunnvɔɛ dan.—w24.05, b. 3-4.

?Kɛ Biblu’n flɛ Ɲanmiɛn kɛ “Yɔbuɛ’n,” ngue yɛ i sɔ’n kle e-ɔ? (Mml. 32:4)

E kwla fiɛ i sin. E kwla lafi i su, afin ɔ yia nda kwlaa ng’ɔ ta’n i nuan. Asa’n ɔ kaciman. Yɛle kɛ i nzuɛn’n kaciman yɛ like ng’ɔ seli kɛ ɔ́ yó’n, ɔ su kacimɛn i.—w24.06, b. 26-28.

?Sɛ a kɔ asɔnun bo uflɛ nun’n, ngue yɛ ɔ kwla uka ɔ naan ɔ wun w’a kpaja wɔ-ɔ?

Lafi Zoova su. Ɔ ukɛli i sufuɛ mun laa. Yɛ ɔ́ úka ɔ sɔ wie. Nán fa ɔ asɔnun bo uflɛ’n fa sunnzun laa liɛ’n. Fa ɔ wun wla like kwlaa nga ɔ asɔnun bo uflɛ’n i nunfuɛ’m be yo’n nun. Yɛ mian ɔ ɲin naan tra aniaan be janvuɛ.—w24.07, b. 26-28.

?Afɔtuɛ benin yɛ ɲanndra nsan nga Zezi buli m’ɔ o Matie ndɛ tre 25 nun’n man e-ɔ?

I ɲanndra ng’ɔ kan bua nin boli’n be ndɛ’n, ɔ kle kɛ maan e yo nanwlɛfuɛ yɛ e nin Ɲanmiɛn e nanti klanman. I ɲanndra ng’ɔ kan talua nga be nin-a siman bian’n be ndɛ’n, ɔ kle e kɛ maan e buabua e wun e sie, yɛ maan e ɲin tran su. I ɲanndra ng’ɔ kan talan’n i ndɛ’n, ɔ kle kɛ maan e tu e klun e di junman.—w24.09, b. 20-24.

?Ɲanmiɛn sua mɔ Salomɔn kplannin’n, i ɲrun lika fleiin’n i nglonglo su’n ti mɛtri nɲɛ?

Lalafuɛ fluwa nga be klɛli Ɲanmiɛn ndɛ’n su’n be nun wie’m be nun’n, be kɛnnin i 2 Be Ɲoliɛ 3:4 nun’n kɛ Ɲanmiɛn sua’n i ɲrun lika fleiin sɔ’n ti “kude 120.” Yɛle kɛ mɛtri 53. Sanngɛ fluwa uflɛ wie mɔ be kwla lafi be nun ndɛ’n su kpa’n be nun’n, be klɛli i kɛ “kude 20.” Yɛle kɛ mɛtri 9. Kɛ e bu sua’n i talɛ’n i akunndan’n, e kwla se kɛ ndɛ kasiɛnfuɛ’n yɛ ɔ ti su-ɔ.—w24.10, b. 31.

?Kɛ be se kɛ maan asɔnunfuɛ’m be ukafuɛ’n ‘ɔ yo sran mɔ i yi’n ti kunngba’n,’ i bo yɛle benin? (1 Tim. 3:12)

I bo yɛle kɛ ɔ jali bla kunngba cɛ. Yɛ ɔ fataman kɛ ɔ kunndɛ bla uflɛ. Asa’n, ɔ fɛmɛn i ɲin siemɛn i bla uflɛ su.—w24.11, b. 19.

?Ngue ti yɛ e kwla se kɛ ndɛ ng’ɔ o Zan 6:53 nun’n, ɔ kanman E Min’n i Aliɛ Cɛn dilɛ’n i ndɛ-ɔ?

Zan 6:53 se kɛ ɔ ti cinnjin kɛ be di Zezi i wunnɛn’n yɛ be nɔn i mmoja’n. Zezi kannin ndɛ sɔ’n afuɛ 32 nun. Kɛ ɔ́ yó sɔ’n, nn ɔ o Galile. Ɔ kannin ndɛ sɔ’n kleli Zifu m’ɔ fata kɛ be lafi i su’n. Sanngɛ kɛ afuɛ kun sinnin’n, yɛ Zezi kpɛli E Min’n i Aliɛ Cɛn dilɛ’n i ba-ɔ. Blɛ sɔ’n nun liɛ’n, be nga ɔ́ nin be dí famiɛn ɲanmiɛn su lɔ’n mun yɛ ɔ kan ndɛ kleli be-ɔ.—w24.12, b. 10-11.