Akoto Pɔlu seli Timote m’ɔ ti asɔnun kpɛnngbɛn wie’n kɛ: “Ń kán klé wɔ Ɲanmiɛn nin Klisi Zezi ɔ nin Ɲanmiɛn i anzi m’ɔ kpali be’n be ɲrun kɛ a nian afɔtuɛ nga’m be su. I sɔ yolɛ nun’n, nán kpli di sran jɔlɛ, yɛ nán kpa sran nun.”—1 Tim. 5:21.

Ɔ fata kɛ e dun mmua e wun be nga be nunman anzi akpasua sɔ’m be nun’n be wlɛ. Sran 144.000 be nunman anzi akpasua sɔ’m be nun wie. Afin i nun mɔ Pɔlu klɛ́ Timote i fluwa’n, nn be nga Ɲanmiɛn kpali be sieli be ngunmin’n be nin-a cɛnman be nun wie fi naan ɔ wɔ ɲanmiɛn su. Akoto mun nin be wiengu nga be kpali be sieli be ngunmin’n, be nin-a kaciman aolia nun sran. Ɔ maan nán be yɛle “Ɲanmiɛn i anzi m’ɔ kpali be’n” mɔ Pɔlu kan be ndɛ’n.—1 Kor. 15:​50-54; 1 Tes. 4:​13-17; 1 Zan 3:2.

Asa’n nán be yɛle anzi nga be yoli ɲin kekle Nowe blɛ su’n. Afin anzi sɔ’m be jrannin Satan sin, yɛ be kacili mmusu. Ɔ maan be ti Zezi i kpɔfuɛ. (Bob. 6:2; Lik. 8:​30, 31; 2 Piɛ. 2:4) Cɛn wie lele’n, bé wá fá be yí i kunman dan mɔ be simɛn i bo’n nun naan be ka lɔ lele afuɛ 1.000. I sin’n, bé núnnún be nin Suɛn Tɔnfuɛ’n.—Zid. 6; Ngl. 20:​1-3, 10.

Ɔ maan e kwla se kɛ “Ɲanmiɛn i anzi m’ɔ kpali be’n” be yɛle anzi nga be suannin “Ɲanmiɛn nin Klisi Zezi” be bo’n.

Anzi nga be nin Ɲanmiɛn be nanti klanman’n, be sɔnnin kpa. (Ebr. 12:​22, 23) Ɔ maan nán maan e bu i kɛ junman kunngba’n yɛ be kwlaa be di-ɔ. (Ngl. 14:​17, 18) I wie yɛle kɛ anzi kunngba yɛ Zoova sunmɛn i kɛ ɔ ko kun Asirifuɛ’m be sonja 185.000 mun-ɔn. (2 Fam. 19:35) Sanngɛ atrɛkpa’n, anzi kpanngban kpa yɛ ‘bé ísa Zezi i Famiɛn Diwlɛ’n nun ninnge kwlaa nga be yo mɔ sran ja kpla’n, ɔ nin be mɔ be yo ninnge tɛtɛ’n be kwlaa-ɔ.’ (Mat. 13:​39-41) Yɛ atrɛkpa’n, anzi wie’m ‘bé yíayía be nga Ɲanmiɛn kpali be’n’ ɲanmiɛn su lɔ. (Mat. 24:31) Asa’n, Ɲanmiɛn sieli wie mun naan ‘lika kwlaa nga é kɔ́’n be sasa e.’—Jue. 91:11; Mat. 18:10; an nian Matie 4:11; Lik. 22:43.

Atrɛkpa’n “Ɲanmiɛn i anzi m’ɔ kpali be’n” mɔ 1 Timote 5:21 kan be ndɛ’n, be junman nga be di’n yɛle kɛ be uka asɔnun mun sa trele wie’m be nun. Kɛ Pɔlu kán ndɛ sɔ’n, nn ɔ su kan asɔnun kpɛnngbɛn’m be junman’n i ndɛ, yɛ ɔ su se kɛ maan asɔnun’n nunfuɛ’m be ɲin yi be. Ɔ seli asɔnun kpɛnngbɛn’m be kɛ be junman’n i dilɛ’n nun’n, ‘nán be kpli di sran jɔlɛ, yɛ nán be kpa sran nun.’ Yɛ nán be fa ajalɛ kplukplu su. Sa cinnjin nga ti yɛ ɔ fata kɛ be nian Pɔlu i afɔtuɛ’n su’n, i kun yɛle kɛ be di be junman’n, “Ɲanmiɛn nin Klisi Zezi ɔ nin Ɲanmiɛn i anzi m’ɔ kpali be’n be ɲrun.” I sɔ’n kle kɛ anzi wie’m be uka asɔnun mun. I wie yɛle kɛ be sasa Ɲanmiɛn i sufuɛ mun. Be uka be jasin fɛ bolɛ junman’n nun. Yɛ be kan sa nga be wun i’n kle Zoova.—Mat. 18:10; Ngl. 14:6