?A kunndɛ kɛ á ɲán ɔ ngunmin Biblu’n nun like suanlɛ’n i su ye kpa? Afɔtuɛ nga’m bé wá úka ɔ naan w’a fa ɔ ɲin w’a sie i like nga a suan’n su kpa:

• Kunndɛ lika kpa kun. Kunndɛ lika kun mɔ i nun ti yɛiin mɔ kusu a kwla wun ndɛ nga a kanngan’n i kpa’n. A kwla tran bia su annzɛ tabli kun sin. Sɛ a klo kusu’n, a kwla kɔ gua su lɔ lika diin kun nun.

• Kunndɛ lika kun mɔ sran nunman lɛ’n. Kɛ Zezi kunndɛli kɛ ɔ́ srɛ́ Ɲanmiɛn’n, ɔ “jasoli nglɛmun ndɛ kpa’n,” kpɛkun “i ngunmin ɔli lika diin kun nun.” (Mar. 1:35) Sɛ a kwlá ɲanman lika diin kun kusu’n, a kwla bo cɛn’n nin dɔ nga a suan like’n su kle ɔ awlofuɛ mun annzɛ ɔ tranfuɛ mun. Kpɛkun se be kɛ be yaci naan nán maan be kle ɔ yalɛ blɛ sɔ’n nun.

• Nán sie ɔ ɲin nɲɔnnɲɔn. Maan ɔ ɲin tran like nga a suan’n su. Sɛ tablɛti annzɛ telefɔnun yɛ a fa suan like’n, to i amunle naan w’a kleman ɔ yalɛ annzɛ kusu yo naan b’a kwlá flɛman wɔ. Asa’n, kɛ á súan like’n, sɛ ɔ wla kpɛn su kɛ ɔ fata kɛ a yo like wie’n, klɛ sie. I liɛ’n kɛ a wie like suan’n, a kwla yo. Sɛ a wun kɛ a su sie ɔ ɲin nɲɔnnɲɔn’n, jran like nga a su suan’n i kan. Kpɛkun ko nantinanti kan.