Pɔlu: Afuɛ 1985, Novanblu’n nun’n e fali aviɔn naan é kɔ́ Liberia. Nvle sɔ’n o Sran ble mɛn’n i wia atɔliɛ lɔ lika’n nun. Lɔ yɛ ɔ fata kɛ e bo e ngaliɛ dilɛ junman’n i bo-ɔ. Kɛ e juli Senegali’n, aviɔn nga e fuli nun’n jrannin lɛ. Kɛ ɔ yoli sɔ’n min yi seli kɛ: “Ɔ ka dɔ kun é jú Liberia.” Sanngɛ i sin’n be seli e kɛ: “Maan be nga be su kɔ Liberia’n be jra wa. Afin sran wie’m b’a man be wun su lɔ, be waan bé tú plezidan ng’ɔ o lɔ’n.” Ɔ maan e kali e wiengu ngaliɛ difuɛ nga be o Senegali lɔ’n, be wun lɛ cɛn ba blu. Liberia lɔ nganniɛn ng’ɔ gua e su nun cɛn kwlakwla’n, yɛle kɛ be su kun sran kpanngban kpa, naan awa’n ɔ manman sran’m be atin kɛ be fite nnɔsua, naan sran ng’ɔ yo sɔ’n be ka lɛ be kun i.

Anin: E ti sran mɔ e sasa e wun dan-ɔn. I kpa bɔbɔ’n min kaan nun’n be flɛ min kɛ Anin Srɛfuɛ. Atin kpɛlɛ ngbɛn sa bɔbɔ’n, ɔ ti kekle man min. Sanngɛ e fuali kpa kɛ é kó dí junman nga be fa mannin e’n.

Pɔlu: Be wuli e Angle mɛn’n i wia atɔliɛ lɔ lika’n nun. Lika nga be wuli min’n, ɔ nin Anin liɛ’n be afiɛn ti nun kilo mɔcuɛ cɛ. Min si nin min nin be wlali min fanngan kɛ n yo atin bofuɛ. Anin kusu i nin wlɛli i fanngan kɛ ɔ yo sɔ wie. Ɔ maan kɛ e wieli Kolɛzi di’n, e kacili titi atin bofuɛ. Kɛ be tili i kɛ e kunndɛ kɛ é dí blɛ kwlaa nun Ɲanmiɛn junman’n, ɔ yoli be fɛ kpa, yɛ be suannin e bo. Kɛ n ɲannin afuɛ 19, n ɔli junman dilɛ Betɛli lɔ. Afuɛ 1982 nun’n e nin Anin e jali, kpɛkun ɔ toli min Betɛli lɔ.

Anin: E kloli Betɛli lɔ junman dilɛ’n kpa. Sanngɛ e kunndɛli titi kɛ é kɔ́ kan be mian jasin bofuɛ’m be wun lɔ’n. Kɛ e nin aniaan wie mɔ laa be ti ngaliɛ difuɛ’n e dili junman likawlɛ Betɛli lɔ’n, i sɔ’n wlali e fanngan kpa ekun. E fa wlɛli i srɛlɛ’n nun kɔnguɛ kwlaa. E yoli sɔ lele afuɛ nsan. Ɔ maan kɛ afuɛ 1985 nun’n be seli e kɛ e ko di Galaadi suklu’n i kpɛ 79 su’n wie’n, ɔ yoli e fɛ dan. Kɛ e wieli suklu’n i di’n, be seli e kɛ e wɔ Liberia. Ɔ o Sran ble mɛn’n i wia atɔliɛ lɔ lika’n nun.

Pɔlu: E fuli aviɔn klikli ng’ɔ́ kɔ́ Liberia’n nun. Kɛ e juli lɔ’n e wunnin kɛ srɛ kun sran’m be kpa, yɛ be kwlá fiteman blɛ kwlaa nun. Srɛ mɔ kun sran mun dan’n ti’n, sɛ loto wie i nɛn’n tɛ kekle kpa’n, be wanndi. Kɛ ɔ ko yo naan e wla w’a gua ase’n, kɔnguɛ kwlaa ka naan y’a la’n e kanngan Jue Mun  fluwa’n i nun ndɛ wie’m be nun likawlɛ. Kannzɛ lika’n ti sukusuku sɔ’n, sanngɛ e klo e junman’n i dilɛ. Anin bo jasin fɛ’n cɛn kwlaa, yɛ n kusu n di junman Betɛli. E nin aniaan kun mɔ be flɛ i Jɔnun Saruku’n a yɛ e di junman likawlɛ-ɔ. Aniaan sɔ’n ti’n n sili ninnge kaka. Afin ɔ o Liberia lɔ w’a cɛ kpa, yɛ ɔ si sa nga be o aniaan nga be o lɔ’n be su’n kpa.

Anin: W’a cɛman naan y’a klo Liberia lɔ tranlɛ. Afin aniaan nga be o lɔ’n be wun yo fɛ, yɛ be su Ɲanmiɛn kpa. E nin be e afiɛn mantannin kpa, yɛ be wa kacili kɛ e osufuɛ mun sa. Be mannin e afɔtuɛ kpa, yɛ be wlali e fanngan. Lɔ jasin fɛ bolɛ’n yo fɛ kpa. Sɛ a bo jasin fɛ’n kle sran kun naan w’a cɛman’n, ɔ yomɛn i fɛ. Lika kwlaa nga sran’m be o’n, be koko Biblu’n nun ndɛ’n i su yalɛ. Sran kwlaa nga to i’n a nin i be kwla koko yalɛ. Be nga e kle be Biblu’n nun like’n be sɔnnin dan ti’n, kɛ ɔ ko yo naan y’a ɲan blɛ y’a kle be kwlaa be like’n ɔ timan pɔpɔ. Ɔ maan lika sɔ’n nun jasin bolɛ’n yo fɛ dan!

Pɔlu: Lele mɔ é fá dí afuɛ nnan’n nn lika’n ti fɔun kan. Sanngɛ afuɛ 1989 nun’n, lika’n wa sanngannin kpa. Afuɛ 1990 Zuie i le 2 su’n, be nga be waan bé tú plezidan’n be fali Betɛli’n i nvɛnwunnvɛnwun lɛ lika mun. Ɔ maan lele m’ɔ́ fá jú anglo nsan’n, e nin be nga be o nvle uflɛ nun’n be nun wie fi e kwlá kokoman yalɛ. I kpa bɔbɔ’n, e nin e osufuɛ mun, ɔ nin aniaan nga be o anuannzɛ’n i bo bia’n su lɔ’n e kwlá kokoman yalɛ. Kɛ lika’n wa sanngannin tɛtɛ kpa’n, be ɲanman aliɛ be diman, yɛ be tɔ bla’m be gblu. I sɔ sa’n sali nvle wunmuan’n yɛ ɔ dili afuɛ lele 14.

Anin: Aniɛn wie’m be nin aniɛn uflɛ wie’m be kun. Alɛ kunfuɛ’m be o akpɔ’m be kwlaa be su. Wafa nga be wlawla be wun’n ɔ yo sro, yɛ be diman be sa nun alɛ ninnge’m be yalɛ. Be wluwlu awlo’m be nun, yɛ be fa like kwlaa nga be klo’n. Be kun sran mun kɛ akɔ mun sa. Alɛ kunfuɛ’m be jran sran mun lika wie’m be nun, yɛ kpɛ sunman’n be kun be, kpɛkun be tiantian be saka’n be nuan. Be yoli sɔ wie Betɛli’n i wun koko lɛ bɔbɔ. Be kunnin aniaan wie mun. Be nun nɲɔn be ti ngaliɛ difuɛ.

Aniaan wie’m be fali aniaan uflɛ wie’m be fiali. I sɔ mɔ be yoli’n ti’n, be fali be nguan’n sieli i wie nuan. Ngaliɛ difuɛ mun ɔ nin Betɛlifuɛ’m be yoli sɔ wie. Aniaan nga be wa fiali Betɛli lɔ’n, be nun wie’m be lali sua ba nga be o ja ngua’n be nun, yɛ e nin wie mun e lali sua ba nga be o nglo lɔ’n be nun. E sua ba liɛ’n nun’n, e nin sran nso mɔ be fin awlobo kunngba’n nun’n yɛ e o-ɔ.

Pɔlu: Cɛn kwlakwla’n alɛ kunfuɛ’m be kunndɛli kɛ bé wlú Betɛli’n nun lɔ naan bé nían sɛ e fiali sran  wie’m be lɔ-o. E fali ajalɛ wie mun kusu naan y’a kwla sasa e wun. Yɛle kɛ e nun nɲɔn be fite naan be nin alɛ kunfuɛ’m bé íjɔ. Kɛ ɔ́ yó sɔ’n aniaan nɲɔn be sasa be ti fenɛtri’n nun. Sɛ be nga be fiteli’n be sa o be ɲrun’n, nn ndɛ fi nunman lɛ. Sanngɛ sɛ be sa’n o be sin’n, i sɔ’n kle kɛ be nga be bali’n b’a fa ya dan. Kɛ aniaan nga be o fenɛtri’n nun’n be wun i sɔ’n, be ko fa aniaan mun fia ndɛndɛ.

Anin: Cɛn kun liɛ’n, alɛ kunfuɛ sɔ’m be nun wie’m be wluli Betɛli lɔ kekle nun. Kɛ ɔ yoli sɔ’n e nin aniaan bla kun e ko fiali abialiɛ lɔ, like sunman plakaa kun nun. Yɛ n toli e sin anuan. Fiawlɛ kaan kun o plakaa sɔ’n i klun lɔ. Lɔ yɛ aniaan bla’n ko fiali-ɔ. Alɛ kunfuɛ’m be toli e nglo lɔ, be sa nun tui. Be boboli anuan’n kekle kpa. Pɔlu kpatali be, ɔ seli be kɛ: “Min yi o abialiɛ lɔ.” Kɛ n ɲinnin lika kan nga aniaan bla’n fiali lɔ’n i anuan’n ɔ tɛli kekle. Asa’n, kɛ ń síesíe ninnge mun be osu laa’n nun’n ɔ fali blɛ. Ɔ maan atrɛkpa’n alɛ kunfuɛ’m be usali be wun kɛ ngue yɛ n su yo i lɔ-ɔ. I sɔ’n ti’n, srɛ kunnin min dan, ɔ maan n usuman aɔwi. N si kɛ ɔ fata kɛ n gua min wla ase naan m’an tike anuan’n. Ɔ maan n srɛli Zoova min klun lɔ, n srɛli i kɛ ɔ uka e. N guali min wla ase, kpɛkun n tikeli anuan’n yɛ n yoli be like blɛlɛlɛ. Be nun kun suli min bo, ɔ ɔli plakaa’n i wun lɔ, ɔ tikeli i anuan’n. Yɛ ɔ nianniannin nun. Kɛ w’a wunman like fi’n, i sɔ’n boli i nuan. Ɔ nin i wiengu mun be nianniannin sua ba onga mun, ɔ nin longolongo’m be nun, sanngɛ b’a wunman sran fi.

Pɔlu: Kɛ ɔ́ kɔ́ i ɲrun’n, aliɛ ndɛ’n wa jrannin. Ɔ ju wie’n e ɲanman aliɛ e dimɛn i nglɛmun. Sanngɛ Betɛli lɔ nglɛmun nun Ɲanmiɛn sulɛ’n, ɔ wlali e fanngan kpa.

E si kɛ sɛ e kɔ aliɛ nin nzue kunndɛlɛ’n, e su kwlá sasaman e niaan nga e fali be e fiali’n. Ɔ maan be kwla kun be. Blɛ sunman’n wafa nga Zoova yo maan e ɲan ninnge nga e sa mian be wun’n blɛ ng’ɔ ti su’n i nun’n, ɔ ti abonuan. Zoova niannin e lika, yɛ ɔ ukali e naan e wla w’a gua ase.

Lika’n yoli tɛ kpa ɔli i ɲrun, sanngɛ ndɛ nanwlɛ’n wlali e fanngan. E niaan’m be wanndili kpɛ sunman naan b’a kunman be. Kannzɛ ɔ ti sɔ’n, sanngɛ be suli Ɲanmiɛn kpa titi, yɛ be wla w’a tɔman blo. Aniaan wie’m be seli kɛ, sɛ be mian be ɲin be jran kekle sa sɔ’n nun’n, nn ɲrɛnnɛn dan’n nun’n bé kwlá jrán kekle wie. Asɔnun kpɛnngbɛn mun nin aniaan nga be te yo gbanflɛn’n be yoli like kwlaa nga be kwla yo naan b’a uka be niaan mun’n. Aniaan nga be wanndili’n be ukali be wiengu. Kan kwlaa nga be ju lɛ’n be bo jasin fɛ’n, yɛ be bo kpata kan be yo aɲia’m be bo. Blɛ kekle sɔ’n nun’n, aɲia’m be bo tranlɛ’n ɔ nin jasin fɛ bolɛ’n ɔ ukali aniaan’m be kpa. Kɛ bé cɛ́cɛ́ aniaan mun ninnge nga be sa mian be wun mun’n, aniaan sunman be liɛ’n, kɛ ɔ yo naan be srɛ tralɛ bɔbɔ’n, b’a yoman sɔ. Pata nga be ko fa ko bo jasin fɛ’n yɛ be srɛli-ɔ. Nanwlɛ, i sɔ’n yoli e ɲɛnmɛn. Be nga be wunnin ɲrɛnnɛn dan alɛ’n nun mɔ be wla boli be wun dan’n, be nun kpanngban be kunndɛli kɛ bé  tíe jasin fɛ’n. Be wunnin kɛ sa kekle sɔ’n nun’n Zoova i Lalofuɛ’m be wla gua ase, yɛ be ɲin nunman nglonglo. Yɛ i sɔ’n boli be nuan dan. Aniaan’m be ti kɛ kannin kun m’ɔ kpaja aosin nun’n sa. (Mat. 5:​14-16) Kɛ mɔ aniaan’m be su Ɲanmiɛn juejue su’n ti’n, alɛ kunfuɛ wie mɔ be yoli sa tɛtɛ bɔbɔ’n be wa suli Zoova wie.

Pɔlu: Alɛ’n dili afuɛ 14. Blɛ sɔ’n nun’n e jasoli Liberia lɔ kpɛ nnun. Kpɛ nsan liɛ’n y’a cɛman yɛ e sali e sin-ɔn. Yɛ kpɛ nɲɔn liɛ’n e dili afuɛ klonglo kun ka naan y’a sa e sin. Blɛ sɔ’n nun’n, wafa nga e wun yoli e’n, ndɛ kun mɔ aniaan bla kun m’ɔ ti ngaliɛ difuɛ’n ɔ kannin’n ɔ yi i nglo weiin. Ɔ seli kɛ: “Kɛ é dí Galaadi suklu’n, be seli e kɛ e klo e niaan mun yɛ e tu e klun e di e junman’n. I sɔ kusu yɛ e yoli-ɔ. Ɔ maan kɛ ɔ yo naan e yaci e niaan mun blɛ kekle kɛ ngalɛ’n sa’n be nun’n, w’a yoman pɔpɔ w’a manman e kaan sa.” Sanngɛ nvle nga be fali e ɔli lɔ’n be nin Liberia be mantan koko. Yɛ kɛ e o lɔ’n, e kwla uka e niaan nga be kali Liberia lɔ’n.

Anin: Afuɛ 1996, Mɛ anglo’n nun’n, e nun nnan e fali Betɛli loto kun. Kɛ ɔ́ yó sɔ’n, fluwa cinnjin wie mɔ junman nga aniaan’m be di i Liberia lɔ’n i su ndɛ’n o su’n, be o loto’n nun. E waan é kɔ́ lika kun mɔ lɔ ti kpa kan’n i nun. Yɛ lika sɔ’n ɔ nin kan e o lɛ’n, be afiɛn ti nun kilo 16. Kɛ e fali atin’n cɛ’n, e nin alɛ kunfuɛ wie mun e yiali nun. Be totoli tui nglo, yɛ be jrannin e. Be finndinnin e nun nsan be yili e gua su lɔ, yɛ be tuli loto’n i bo-ɔ. Kɛ ɔ́ yó sɔ’n nn Pɔlu te o loto’n i klun lɔ. E wunman like nga é yó-ɔ. Sanngɛ é nían-ɔn, Pɔlu yɛ ɔ́ nánti bá yɛ, mmoja o i ngban’n su. I klikli nun’n e buli i kɛ be toli i tui. Sanngɛ sɛ be toli i tui kusu’n nn ɔ su kwlá nantiman. Kannzu alɛ kunfuɛ kun finnin i like naan w’a su i bo w’a yi i gua su lɔ. Sanngɛ Ɲanmiɛn sa, i ngban su’n w’a kpukeman dan.

Kɛ ɔ́ yó sɔ’n, nn sonja’m be loto kun jin koko lɛ. Sran kpanngban kpa be o nun, yɛ srɛ kunman be aɔwi. Loto sɔ’n su wa tu i bo. Ɔ maan e ko sendeli i wun. Kɛ loto’n tuli i bo’n ɔ kɔ ndɛndɛ dan ti’n, ɔ ka kan naan y’a tɔ. E seli sofɛli’n kɛ ɔ wɔ blɛblɛ. Sanngɛ srɛ m’ɔ kun i dan’n ti’n w’a nianman e lɔ. E sendeli loto’n i wun lele e juli lika kun. Nanwlɛ, kɛ é fá jú lɔ’n e si’a wie se.

Pɔlu: Kɛ e juli lɔ mɔ e wunnin kɛ e wun ninnge’m b’a yo fiɛn dan, naan b’a titi’n, naan sanngɛ e ɲin te o su’n ɔ boli e nuan. E ko lali blo lɔ, aviɔn kun i wun koko lɛ. Aviɔn sɔ’n, b’a toto i wun tui lele w’a fiti ploploplo. Kɛ i aliɛ cɛnnin’n, aviɔn sɔ’n fali e ɔli Siera Leɔnin. Kɛ b’a kunman e’n ɔ yoli e fɛ, sanngɛ e niaan nga be kali Liberia lɔ’n ti’n e kokoli.

Anin: E juli Betɛli ng’ɔ o Siera Leɔnin lɔ’n nun klanman. Yɛ aniaan’m be niannin e lika kpa. Sanngɛ kɛ n o lɛ’n min ɲin kpɛnkpɛn sa nga be juli’n be su. Kɛ lika’n ko cɛn’n, srɛ kun min, ɔ yo min kɛ sa wie su wa ju sa. Min akunndan’n sanngan. Yɛ ɔ yo min kɛ n su cɛn laliɛ wie sa. Kpɛ sunman’n, kɔnguɛ afiɛn’n n kpiti kpli. Min wun usu min, yɛ ɔ yo min kɛ sa yaya wie su wa ju sa. Kpɛkun n kwlá loman wunmiɛn kpa bɔbɔ. Kɛ ɔ ko yo sɔ’n Pɔlu tra min sa’n, kpɛkun ɔ nin min srɛ Ɲanmiɛn. E to Ɲanmiɛn manman jue mun lele saan min wun w’a yaci min usulɛ. N buli i kɛ nn n su bo fia naan n su kwlá diman ngaliɛ junman’n i kun.

I sin’n, sa ng’ɔ juli’n min wla su fiman su le. Lemɔcuɛ kunngba sɔ’n nun’n e ɲannin fluwa nɲɔn. Kun yɛle afuɛ 1996 An Tinnge! Zuɛn i le 8 su liɛ’n. Fluwa sɔ’n i ndɛ akpasua kun kan like nga sɛ sa wie ti’n e klun te titi’n e kwla yo’n i ndɛ. (Comment venir à bout des crises de panique) Fluwa sɔ’n ti’n, n ma wunnin sa ng’ɔ o min su’n i wlɛ kpa. Fluwa nɲɔn su’n yɛle afuɛ 1996, Sasafuɛ Tranwlɛ’n Mɛ i le 15 su liɛ’n. Fluwa sɔ’n seli kɛ sɛ abɛbɛ kun i ndɛwa kun timan kpa bɔbɔ’n, ɔ kwla tu kpɛkun ɔ kunndɛ aliɛ. I wafa kunngba’n sɛ Zoova i sufuɛ kun i akunndan w’a sanngan kpa bɔbɔ’n, Zoova i wawɛ’n i fanngan nun’n ɔ kwla ukɛ i wiengu mun titi. Zoova sinnin fluwa sɔ’m be lika mannin min like nga n miɛn i wun’n blɛ ng’ɔ ti su’n i nun. (Mat. 24:45) N kunndɛli e fluwa nga be kan sa kunngba sɔ’n i ndɛ wie’n, yɛ n sieli be lika kun. I sɔ’n ukali min kpa. Kɛ ɔ́ kɔ́ i ɲrun’n min klun w’a titiman min dan kɛ ngalɛ’n sa kun.

Blɛ kwlaa nga be se e kɛ e sa e sin Liberia lɔ’n, e klun jɔ kpa. Lele mɔ afuɛ 2004 fá wíe’n, nn y’a di afuɛ 20 ngaliɛ dilɛ junman’n nun. Kɛ ɔ́ yó sɔ’n nn alɛ’n w’a wie. Be su kan Betɛli’n i kplanlɛ ndɛ. Kpɛkun-o, b’a se e kɛ e ko di junman lika uflɛ.

 Nanwlɛ, i sɔ’n w’a yoman pɔpɔ w’a manman e kaan sa. E nin Liberia lɔ aniaan mun e afiɛn mantan kpa. Be ti kɛ e osufuɛ mun sa, yɛ e kunndɛman kɛ é yáci be lɛ é kɔ́ lika uflɛ. Sanngɛ e wla kpɛn su kɛ, kɛ e yacili e osufuɛ mun mɔ e ko dili Galaadi suklu’n Zoova yrali e su. I sɔ’n ti’n, e kplinnin su kɛ é kɔ́ lika uflɛ nga be seli e kɛ e wɔ lɔ’n. Be seli e kɛ e wɔ Gana. Nvle sɔ’n nin Liberia nunman mmua.

Anin: Kɛ é jáso Liberia lɔ’n e sunnin kpa. Aniaan kpɛnngbɛn kun m’ɔ ti ngwlɛlɛfuɛ kpa’n seli e kɛ: “Maan amun wla fi e su.” I sɔ’n boli e nuan. Sanngɛ ɔ yiyili nun, ɔ seli e kɛ: “E si kɛ amun wla su fiman e su le. Ɔ maan amun tu amun klun be di junman uflɛ nga be fa mannin amun’n. Zoova yɛ ɔ su fa amun kɔ-ɔ. Ɔ maan amun fa amun ɲin be sie i lɔ aniaan’m be su kpa.” Kɛ é kɔ́ lika sɔ mɔ e ti nun ­aofuɛ’n mɔ sran kpanngban be siman e lɔ’n, i ndɛ sɔ’n wlali e fanngan kpa.

Pɔlu: Sanngɛ kɛ e juli Gana lɔ’n, w’a cɛman naan e nin aniaan nga be o lɔ’n e afiɛn w’a mantan kpa. Be diman aniaan’m be yalɛ lɔ. Wafa nga aniaan sɔ’m be tu be klun be su Ɲanmiɛn’n, ɔ kleli e ajalɛ kpa. E dili e junman’n Gana lɔ lele afuɛ 13. Kpɛkun sa kun juli m’ɔ boli e nuan-ɔn. Yɛle kɛ be wa seli e kɛ e ko di junman Kenia lɔ Betɛli’n nun. Nvle sɔ’n o Sran ble mɛn’n i wia afiliɛ lɔ. Kannzɛ e wla loli aniaan nga be o Liberia nin Gana lɔ’n, sanngɛ w’a cɛman naan y’a ɲan janvuɛ Kenia lɔ. Lɔ kusu’n be mian jasin bofuɛ’m be wun kpa wie.

Anin: Sa kekle wie’m be tɔli min su, yɛ ɔ ju wie bɔbɔ’n srɛ kunnin min kpa. Kɛ a tran lika kun mɔ be kun alɛ annzɛ be yo sa kekleekle mun lɔ’n, srɛ kwla kun wɔ kpa, ɔ wla kwla bo ɔ wun, yɛ a kwla tɔ su tukpacɛ. Zoova su yoman abonuan sa wie naan sa kɛ ngalɛ’n sa’m b’a tɔman e su. Dɔ nga su bɔbɔ’n sɛ n ti tui ngan’n srɛ kun min, yɛ ɔ yo kɛ min sa’m b’a wu min wun sa. Sanngɛ n fali min ɲin n sieli i ninnge kwlaa nga Zoova yo be naan w’a uka e’n be su kpa. I wie yɛle kɛ ɔ sin aniaan’m be lika wla e fanngan. Yɛ n wunnin kɛ, kɛ e suan Biblu’n nun like, e srɛ Ɲanmiɛn, e kɔ aɲia’m be bo, yɛ e bo jasin fɛ’n titi’n, Zoova kwla uka e naan y’a di e junman’n titi.

Pɔlu: Ɔ ju wie’n sran’m be usa e kɛ: “?Amun klo amun junman’n?” I yo, nvle nga be fa e kɔ nun kɛ e ko di junman’n ɔ kwla yo klanman, sanngɛ kusu sa kekle wie’m be kwla ju lɔ. Ɔ maan like nga e klo i kpa’n e junman’n i dilɛ nun’n, yɛle aniaan mɔ e nin be e ti kɛ awlobo kunngba nunfuɛ mun sa’n. Kannzɛ e finwlɛ’n timan kun’n, sanngɛ e kwlaa e bu akunndan kunngba nga Zoova bu’n wie. E bali be fanngan wlalɛ, sanngɛ be bɔbɔ li yɛ be wlali e fanngan-ɔn.

Nanwlɛ, e niaan’m be ti like mɔ Zoova fa cɛli e-ɔ. Kan kwlaa nga e ɔli’n e ɲannin aniaan. Kɛ e o asɔnun’n nun’n ɔ ti kɛ e o e osufuɛ’m be afiɛn sa, yɛ e wla gua ase. E lafi su kpa kɛ, sɛ e fa e wla e gua Zoova su’n, kannzɛ sa nga be tɔ e su’n be ti sɛ ti sɛ’n, ɔ́ mán e wunmiɛn.​—⁠Fip. 4:⁠13.