1-2. ?Ngue ti yɛ Ɲanmiɛn i sufuɛ’m be di aklunjɔɛ-ɔ? (Zaki 1:​22-25)

 ZOOVA nin i Wa’n be kunndɛ kɛ e di aklunjɔɛ. Ɲanmiɛn i sufuɛ ng’ɔ klɛli Jue 119:2 seli kɛ: “Be nga be nanti i afɔtuɛ’m be su’n, mɔ be tu be klun be kunndɛ i’n, be liɛ su ti ye.” Asa’n, Zezi seli kɛ: “Be nga be ti Ɲanmiɛn i ndɛ’n mɔ be fa su’n, be liɛ su ti ye!”—Lik. 11:28.

² E mɔ e su Zoova’n, e di aklunjɔɛ dan. Sa nga ti yɛ e di aklunjɔɛ’n i kun yɛle kɛ e kanngan Ɲanmiɛn Ndɛ’n nun cɛn kwlakwla yɛ e nanti i nun ndɛ’n su.—An kanngan Zaki 1:​22-25 nun.

3. ?Kɛ e kanngan Ɲanmiɛn Ndɛ’n nun mɔ e nanti su’n, i su ye benin yɛ e ɲɛn i-ɔ?

³ Kɛ e nanti Ɲanmiɛn ndɛ’n su’n, e ɲan su ye kpanngban. I wie yɛle kɛ i sɔ’n yo maan Zoova i klun jɔ e wun. Yɛ e bɔbɔ e klun jɔ wie. (Aku. 12:13) Asa’n i sɔ’n yo maan e nin e awlofuɛ mun e tran klanman, yɛ e nin e wiengu Klisifuɛ mun e afiɛn mantan kpa. Atrɛkpa’n, ɔ bɔbɔ a wunnin kɛ i sɔ’n ti nanwlɛ. Kɛ sran’m be nantiman Zoova i mmla’m be su’n, sa ng’ɔ tɔ be su’n e liɛ’n ɔ tɔman e su wie. Ɔ maan ndɛ nga Famiɛn Davidi kannin’n ɔ ti e liɛ’n su. Jue kun nun’n, ɔ kannin Zoova i mmla mun, nin i afɔtuɛ mun, ɔ nin jɔlɛ ng’ɔ di be’n be ndɛ. Kpɛkun i agualiɛ su’n ɔ seli kɛ: “Sran ng’ɔ fa be su’n, ɔ ɲan su ye dan.”—Jue. 19:​7-11.

4. ?Ngue ti yɛ wie liɛ’n, Ɲanmiɛn Ndɛ’n i nun kannganlɛ’n nin i su nantilɛ’n ɔ ti kekle-ɔ?

⁴ Nán cɛn kwlaa yɛ Ɲanmiɛn Ndɛ’n i nun kannganlɛ’n nin i su nantilɛ’n ɔ ti pɔpɔ-ɔ. Kannzɛ bɔbɔ e ɲanman e ti’n, sanngɛ ɔ fata kɛ e sie blɛ naan e kanngan Biblu’n nun yɛ e suan  nun like. I liɛ’n, é wún like nga Zoova kunndɛ kɛ e yo’n i wlɛ. I sɔ’n ti’n, é wá kán like ng’ɔ kwla uka e naan y’a kanngan Biblu’n nun titi’n i ndɛ. Asa’n, é wá wún wafa nga e kwla bu ndɛ nga e kanngan’n i su akunndan’n, ɔ nin wafa nga e kwla nian su e nanti’n.

MAAN E SIE BLƐ E FA KANNGAN ƝANMIƐN NDƐ’N NUN

5. ?Ninnge benin wie mun yɛ be fa e blɛ’n i dan lika-ɔ?

⁵ Zoova i sufuɛ’m be nun sunman be ɲanman be ti kaan sa. E fa blɛ kpanngban e yo ninnge wie mɔ Biblu’n kle kɛ be ti cinnjin’n. I wie yɛle kɛ e nun kpanngban e di junman wie mun naan y’a kwla nian e bɔbɔ nin e awlofuɛ’m be lika. (1 Tim. 5:8) Aniaan kpanngban be nian be osufuɛ wie m’ɔ kwlaman nun’n annzɛ w’a yo oke’n i lika. Asa’n ɔ fata kɛ e fa blɛ e nian e bɔbɔ e wun lika. Yɛ ɔ fata kɛ e di junman wie mun asɔnun’n nun. Junman sɔ’m be nun kun yɛle kɛ e tu e klun e bo jasin fɛ’n. ?I kwlaa sɔ’n ti’n, é yó sɛ naan y’a sie blɛ y’a fa kanngan Biblu’n nun naan y’a bu su akunndan, naan kusu y’a nian su y’a nanti?

6. ?É yó sɛ naan y’a kwla kanngan Biblu’n nun titi? (An nian foto’n wie.)

⁶ Ninnge nga be ti cinnjin kpa man Klisifuɛ’n be nun kun yɛle Biblu’n nun kannganlɛ. Ɔ maan ɔ fata kɛ e mian e ɲin naan e kanngan nun. (Fip. 1:10) Kɛ Ɲanmiɛn i sufuɛ ng’ɔ klɛli Jue Mun klikli’n, ɔ́ kán sran nga i liɛ su ti ye’n i ndɛ’n, ɔ seli kɛ sran sɔ’n “i like liɛ ng’ɔ klo i’n yɛle Zoova i mmla’n, yɛ ɔ kɛn i nɛn’n i ase kɛnngɛn i mmla’n nun wia nun nin kɔnguɛ.” (Jue. 1:​1, 2) I sɔ’n kle weiin kɛ ɔ fata kɛ e sie blɛ naan e fa kanngan Biblu’n nun. ?Blɛ benin nun yɛ sɛ e kanngan Biblu’n nun’n, ɔ ti kpa dan-ɔn? Ɔ o e bɔbɔ e sa nun. Sanngɛ maan ɔ yo blɛ kun mɔ kɛ e niɛn i sa’n e kwla fa kanngan Biblu’n nun titi’n. Aniaan bian kun mɔ be flɛ i kɛ Viktɔɔ’n ɔ seli kɛ: “Min liɛ’n, n klo Biblu’n nun kannganlɛ nglɛmun nun. Kannzɛ bɔbɔ n timan sran kun m’ɔ jaso nglɛmun ndɛ kpa titi’n, sanngɛ n wun kɛ blɛ sɔ’n nun’n, ninnge nga be kwla kle min yalɛ’n b’a sɔnman. Blɛ sɔ’n nun’n, min ɲin  timan nɲɔnnɲɔn, yɛ n kwla fa min ɲin n sie i ndɛ nga n kanngan’n i su kpa.” Atrɛkpa’n kɛ a bu i sɔ wie-ɔ. Ɔ maan, maan e tinuntinun e usa e wun kɛ: ‘?Blɛ benin nun yɛ sɛ n kanngan Biblu’n nun’n, n kwla ɲan su ye kpa-ɔ?’

MAAN E BU NDƐ NGA E KANNGAN’N I SU AKUNNDAN KPA

7-8. ?Ngue yɛ sɛ e yo’n, e su kwlá ɲanman Biblu’n nun ndɛ nga e kanngan’n i su ye-ɔ? An fa sunnzun ase kun yiyi nun.

⁷ Ɔ ti cinnjin kɛ e sie blɛ naan e fa kanngan Biblu’n nun. Sanngɛ atrɛkpa’n, amun a sie i nzɔliɛ kɛ wie liɛ’n e kanngan ndɛ kun nun, kpɛkun kɛ ɔ́ kɔ́ i ɲrun’n, e wla fi ndɛ sɔ mɔ e kanngannin’n su. ?Nɛ́n i-ɔ? Kɛ e kanngan Biblu’n nun’n, i sɔ sa’n kwla ju wie. Atrɛkpa’n e fali ajalɛ kɛ é kánngan Biblu’n nun ndɛ tre kun nun annzɛ ndɛ tre kpanngban nun cɛn kwlakwla. Sɛ e fɛ i sɔ ajalɛ kusu’n ɔ ti kpa. Afin ɔ fata kɛ e fa ajalɛ kɛ é yó ninnge wie mun, kpɛkun maan e mian e ɲin e yo i sɔ ninnge mun. (1 Kor. 9:26) Sanngɛ nán Biblu’n nun kannganlɛ’n, yɛ ɔ ti like ng’ɔ fata kɛ e yo’n i ti nin i bo’n niɔn. Sɛ e kunndɛ kɛ é ɲán Ɲanmiɛn Ndɛ mɔ e kanngan nun’n i su ye kpa’n, like cinnjin kun ekun o lɛ m’ɔ fata kɛ e yo-ɔ.

⁸ Maan e fa sunnzun ase kun e yiyi nun. Kɛ ɔ ko yo naan waka’m b’a yo kpa’n, ɔ fata kɛ nzue tɔ be su. Kusu sɛ nzue’n tɔ dan’n naan kannzɛ bɔbɔ ɔ cɛman dan’n, sanngɛ asiɛ’n su kwlá nɔnnɔnman nzue’n ndɛndɛ. Kɛ nzue’n ka lɛ tɔ dan kɛ ngalɛ’n sa’n, i sɔ’n kwlá yoman waka’m be ye. Sanngɛ sɛ nzue’n tɔ blɛblɛblɛ’n, asiɛ’n kwla nɔnnɔn nzue’n kpɛkun waka’m be kwla yo kpa. I wafa kunngba’n, ɔ fataman kɛ e kanngan Biblu’n nun kplukplu su. Afin sɛ e yo sɔ’n, Biblu’n nun ndɛ’n su kwlá wluwluman e wun. Yɛ ndɛ nga e kanngan’n, e wla su kwlá kpɛnman su naan se kɛ é nían su é nánti.—Zak. 1:24.

9. ?Sɛ a sie i nzɔliɛ kɛ a kanngan Biblu’n nun kplukplu su’n, ngue yɛ ɔ fata kɛ a yo-ɔ?

⁹ ?Sɛ a sie i nzɔliɛ kɛ ɔ ju wie’n a kanngan Biblu’n nun kplukplu su’n, ngue yɛ ɔ fata kɛ a yo-ɔ? Kanngan nun blɛblɛblɛ. Kɛ á kánngan ndɛ wie nun’n, annzɛ kusu kɛ w’a  wie ndɛ wie nun kanngan’n, fa blɛ naan bu su akunndan kan. Ɔ fataman kɛ i sɔ yolɛ’n kun wɔ srɛ. I lɛ nun’n, a kwla uka blɛ nga a fa kanngan Biblu’n nun’n su. I liɛ’n, á ɲán blɛ á bú ndɛ’m be su akunndan. Sɛ a klo kusu’n, a kwla se kɛ a kannganman ndɛ kpanngban nun. I liɛ’n, a kwla ɲan blɛ bu ndɛ nga a kanngan’n i su akunndan. Aniaan bian Viktɔɔ mɔ e kɛnnin i ndɛ’n, ɔ seli kɛ: “Min liɛ’n n kannganman ndɛ tre kpanngban nun. Wie liɛ’n, ndɛ tre kunngba nun yɛ n kanngan-ɔn. Kɛ mɔ nglɛmun nun yɛ n kanngan nun’n ti’n, lele mɔ lika’n fá sán’n, n kwla bu ndɛ nga n kanngannin’n i su akunndan.” Sɛ á kánngan Biblu’n i ndɛ tre kpanngban nun annzɛ a su yoman sɔ’n, ɔ o ɔ bɔbɔ ɔ sa nun. Sanngɛ like ng’ɔ ti cinnjin’n, yɛle kɛ kanngan nun blɛblɛblɛ naan w’a kwla bu ndɛ’n i su akunndan.—Jue. 119:97; an nian kuku nga be flɛ i “ Kosan wie mɔ e kwla fa usa e wun’n” i nun.

10. An fa sa kun fa yiyi wafa nga e kwla kanngan Biblu’n nun kpɛkun e niɛn i nun ndɛ’n su e nanti’n i nun. (1 Tesalonikifuɛ Mun 5:​17, 18)

¹⁰ Kɛ á kánngan Biblu’n nun ndɛ wie’m be nun’n, bu wafa nga a kwla nanti su’n i akunndan. Kɛ á kánngan ndɛ kun nun’n, usa ɔ wun kɛ: ‘?Wafa sɛ yɛ n kwla nanti ndɛ nga su dɔ nga su annzɛ min ɲrun lɔ-ɔ?’ Maan e se kɛ w’a kanngan 1 Tesalonikifuɛ Mun 5:​17, 18. (An kanngan nun.) Kɛ a ko kanngan ndɛ mma nɲɔn sɔ’m be nun’n, a kwla jran kan. Kpɛkun bu wafa nga a srɛ Ɲanmiɛn’n i akunndan. Sɛ a srɛ i kpɛ sunman-o, yɛ sɛ ndɛ nga a kɛn i ɔ srɛlɛ’n nun’n, i bo’n ti kploun-o, bu i akunndan. Asa’n a kwla bu ninnge nga a kwla jran be su a la Ɲanmiɛn i ase’n be akunndan. Kɛ ɔ ko yo sɔ’n, a kwla fa ajalɛ kɛ á jrán ninnge sɔ’m be nun nsan su á lá Zoova i ase. Sɛ e fa blɛ kpe kan e bu Ɲanmiɛn ndɛ’n i su akunndan kɛ ngalɛ’n sa’n, i sɔ’n úka e naan y’a wun Ɲanmiɛn ndɛ’n i wlɛ kpa naan y’a nian su y’a nanti. Yɛ sɛ cɛn kwlakwla’n, e nian Biblu’n nun ndɛ nga e kanngan’n su e nanti’n, kɛ́ ɔ́ kɔ́ i ɲrun’n, é sú Zoova kpa é trá laa’n. ?Yɛ sɛ a fa ajalɛ sɔ’n su naan a wun kɛ ninnge nga be nun’n, ɔ fata kɛ a kaci ɔ sa’n be sɔnnin’n nin? ?Ngue yɛ ɔ fata kɛ a yo-ɔ?

FA Ɔ ƝIN SIE I NINNGE’M BE SU KUNNGUNNGUN

11. ?Ngue ti yɛ ɔ kwla yo wɔ kɛ ninnge ng’ɔ fata kɛ a kaci ɔ sa be nun’n be sɔnnin dan ngboko sa-ɔ? An fa sa kun yiyi nun.

¹¹ Kɛ á kánngan Biblu’n nun’n, a kwla sie i nzɔliɛ kɛ ninnge ng’ɔ fata kɛ a kaci ɔ sa be nun’n be sɔnnin dan. Ɔ maan i sɔ’n kwla bubu ɔ sa sin. Wienun-ɔn, andɛ’n ndɛ nga a kanngannin’n ɔ kle kɛ fataman kɛ e kpa sran nun. (Zak. 2:​1-8) Kɛ a bu i akunndan’n, a wun i wlɛ kɛ ɔ fata kɛ a kaci ɔ sa ninnge wie’m be nun naan a nin ɔ  wiengu’m b’a tran klanman. Kɛ i aliɛ cɛn’n, ndɛ nga a kanngan ɔ kle ɔ kɛ ɔ ti cinnjin kɛ e nian ndɛ nga e kan’n su. (Zak. 3:​1-12) Yɛ a sie i nzɔliɛ kɛ blɛ wie nun’n a kannin ndɛ wie m’ɔ timan kpa’n. Ɔ maan w’a fa ajalɛ kɛ siɛn’n á nían ɔ wun su kpa naan ndɛ nga á kán’n, ɔ wla ɔ wiengu’m be fanngan. Kɛ aliɛ cɛn ekun’n, ndɛ nga a kanngan’n, ɔ kle kɛ ɔ fataman kɛ e klo mɛn’n nun ninnge mun. (Zak. 4:​4-12) I lɛ nun’n, a sie i nzɔliɛ kɛ ɔ fata kɛ a kpa ninnge nga a fa yiyi ɔ ɲin su’n be nun. I aliɛ m’ɔ́ cɛ́n’n, ɔ yo wɔ kɛ ninnge ng’ɔ fata kɛ a kaci ɔ sa be nun’n be sɔnnin dan, naan a su kwlá yoman be le sa.

12. ?Ngue ti yɛ sɛ a sie i nzɔliɛ kɛ ninnge wie’m be nun’n ɔ fata kɛ a kaci ɔ sa’n, ɔ fataman kɛ ɔ sa sin bubu wɔ-ɔ? (An nian ja ngua lɔ ndɛ’n wie.)

¹² Sɛ a sie i nzɔliɛ kɛ ninnge sunman nun’n ɔ fata kɛ a kaci ɔ sa’n, nán maan ɔ sa si bubu wɔ. Afin i sɔ’n kle kɛ a ti wun ase kanfuɛ naan ɔ klun akunndan’n ti kpa. Sran ng’ɔ ti wun ase kanfuɛ m’ɔ di i bɔbɔ i wun nanwlɛ’n, kɛ ɔ́ kánngan Ɲanmiɛn Ndɛ’n nun’n, ɔ kunndɛ wafa ng’ɔ kwla kaci i sa ninnge wie’m be nun’n. a Asa’n maan ɔ wla kpɛn su kɛ nzuɛn uflɛ’n i falɛ’n fa blɛ. (Kol. 3:10) ?Ngue yɛ ɔ kwla uka ɔ naan w’a nian Ɲanmiɛn ndɛ’n su w’a nanti titi-ɔ?

13. ?Ngue yɛ e kwla yo naan y’a nanti like nga e suan’n su-ɔ? (An nian foto’n wie.)

¹³ Nán se kɛ á ká lɛ nánti like kwlaa nga a suan’n su. Sanngɛ fa ɔ ɲin sie i like kun annzɛ like nɲɔn su naan mian ɔ ɲin yo be. (Ɲan. 11:2) Ajalɛ kun mɔ a kwla nian su’n yɛ: Klɛklɛ ninnge kwlaa nga be nun’n, a wun kɛ ɔ fata kɛ a kaci ɔ sa’n be fluwa kun su. Kpɛkun fa ɔ ɲin sie i ninnge sɔ’m be nun kun annzɛ be nun nɲɔn be su. Cɛn uflɛ’n a ko fa ɔ ɲin ko sie i be onga’m be su. ?Ngue su yɛ ɔ fata kɛ a bo i bo-ɔ?

14. ?Kɛ ɔ ko yo naan y’a nanti like nga e suan’n su’n, ngue su yɛ e kwla bo i bo-ɔ?

 ¹⁴ Like nga ɔ bɔbɔ a wun kɛ i yolɛ su yoman kekle’n, yɛ a kwla fa bo i bo-ɔ. Sɛ a klo kusu’n, like ng’ɔ kle ɔ yalɛ dan’n, i su yɛ a kwla bo i bo-ɔ. Kɛ a ko fa ɔ ɲin ko sie i like trele kun su’n, kunndɛ i su like e fluwa’m be nun. Ɔ kwla yo e fluwa Index des publications Watch Tower annzɛ Zoova i Lalofuɛ’m be like kunndɛlɛ fluwa. Asa’n fa wlɛ i srɛlɛ’n nun. Srɛ Zoova kɛ ‘ɔ yo maan a kunndɛ kɛ á yó like ng’ɔ klo i’n, yɛ ɔ man ɔ wunmiɛn naan w’a kwlɛ i yo.’ (Fip. 2:13) I sin’n, nian like nga a suannin’n su nanti. Sɛ a kwla yoli like klikli nga a fali ɔ ɲin sieli su’n, i sɔ’n wlá ɔ fanngan naan w’a fa ɔ ɲin w’a sie i like uflɛ su. I kpa bɔbɔ’n sɛ a mian ɔ ɲin naan a yi nzuɛn kun nglo’n, atrɛkpa’n i sɔ’n yó maan nzuɛn uflɛ wie mun ekun be nglo yilɛ su yoman kekle ɔ sa nun.

MAAN ƝANMIƐN NDƐ’N ƝAN ‘TA E SU’

15. ?Ngbaciɛ benin yɛ ɔ o Zoova i sufuɛ mun nin be nga be waan be kanngan Biblu’n nun’n be nun sunman be afiɛn-ɔn? (1 Tesalonikifuɛ Mun 2:13)

¹⁵ Sran wie’m be se kɛ b’a kanngan Ɲanmiɛn Ndɛ’n i wunmuan’n nun kpɛ sunman. Sanngɛ blɛ sunman’n, be lafiman like nga Biblu’n kle’n su yɛ be nantimɛn i nun ndɛ’n su. Zoova i sufuɛ’m be liɛ’n, be timan sɔ. Kɛ Klisifuɛ klikli mun sa’n, e lafi su kɛ Biblu’n ti ‘Ɲanmiɛn i ndɛ sakpa.’ Asa’n e mian e ɲin e nanti ndɛ nga Biblu’n kan’n su.—An kanngan 1 Tesalonikifuɛ Mun 2:13 nun.

16. ?Ngue yɛ ɔ kwla uka e naan y’a yo sran m’ɔ nanti Ɲanmiɛn ndɛ’n su-ɔ?

¹⁶ Nán cɛn ngba yɛ Ɲanmiɛn Ndɛ’n i nun kannganlɛ’n nin i su nantilɛ’n ti pɔpɔ-ɔ. Wie liɛ’n, ɔ fata kɛ e mian e ɲin kpa naan y’a ɲan blɛ y’a kanngan nun. Wie liɛ kusu’n, kɛ é kánngan nun’n e kɛnngɛn i kplukplu su. Ɔ maan e faman blɛ e bumɛn i nun ndɛ’n i su akunndan kpa. Annzɛ kusu kɛ e kanngan nun mɔ e wun kɛ ninnge nga be nun’n ɔ fata kɛ e kaci e sa’n be sɔnnin’n, i sɔ’n kwla bubu e sa sin. Sanngɛ Zoova fanngan nun’n, e kwla kanngan Biblu’n nun kpa, yɛ e bu su akunndan. I sɔ’n ti’n, maan e lo e wun e mɛn i naan ɔ uka e naan e kaci sran m’ɔ timan ndɛ tiefuɛ ngbɛn, sanngɛ m’ɔ fa mmla’n su’n. Kɛ é kánngan Ɲanmiɛn Ndɛ’n nun é kɔ́ mɔ é nían su é nánti’n, é dí aklunjɔɛ kpa ekun é trá laa’n.—Zak. 1:25.