Sɛ e kunndɛ kɛ Zoova i klun jɔ e wun’n, ɔ fata kɛ e lafi i su. Sanngɛ Biblu’n se kɛ: “Nán sran kwlaa yɛ ɔ lafi e Min’n su-ɔ.” (2 Tes. 3:2) Kɛ akoto Pɔlu kán ndɛ sɔ’n, “abɔlɛfuɛ mun nin sran tɛtɛ” nga be kleli i yalɛ’n be akunndan yɛ ɔ bu-ɔ. Sanngɛ ndɛ sɔ m’ɔ kannin’n, ɔ ti sran uflɛ wie’m be liɛ wie. Sran wie’m be kunndɛman kɛ bé láfi su kɛ Ɲanmiɛn kun o lɛ naan i yɛ ɔ yili like kwlaa-ɔ. (Rɔm. 1:20) Sran wie’m be liɛ’n, be se be wun kɛ be lafi Ɲanmiɛn su, afin be bu i kɛ like kun annzɛ sran kun o lɛ naan i tinmin’n cɛnnin. Sanngɛ i sɔ’n kwlá yoman naan Zoova i klun w’a jɔ be wun.

Ɔ fata kɛ e wun i wlɛ kɛ Zoova o lɛ sakpa naan ɔ yo be nga be lafi i su kpa’n “be ye.” (Ebr. 11:6) Ɲanmiɛn wawɛ’n yɛ ɔ kwla yo maan sran kun lafi i su-ɔ. Yɛ kɛ ɔ ko yo naan y’a ɲan Ɲanmiɛn wawɛ’n, ɔ fata kɛ e srɛ i. (Lik. 11:​9, 10, 13) Like cinnjin kun ekun mɔ e kwla yo naan y’a ɲan Ɲanmiɛn wawɛ’n, yɛle kɛ e kɛnngɛn i nuan ndɛ’n nun. I sin’n, maan e bu ndɛ nga e kanngan nun’n i su akunndan kpa, kpɛkun e nian su e nanti. Sɛ e yo sɔ’n, Zoova i wawɛ’n úka e naan y’a lafi i su kɛ ng’ɔ fa kunndɛ’n sa.