Aniaan bla kun mɔ be flɛ i kɛ Mari’n, ɔ nin i wun Jɔnun a be o nvle kun mɔ sran kpanngban mɔ be fin Filipinin’n be ko tran yɛ be di junman lɔ’n nun. Be bo jasin fɛ’n kle sran sɔ mun. Koronavirisi blɛ’n nun’n, ɔ boli sran wie’m be Biblu’n nun like klelɛ bo nvle sɔ’n nun ɔ nin nvle wie mun ekun be nun. ?Wafa sɛ yɛ ɔ yoli sɔ-ɔ?

Mari usa be ng’ɔ kle be Biblu’n nun like’n be kɛ: “?A si sran uflɛ m’ɔ klo kɛ ɔ́ súan Biblu’n nun like wie-ɔ?” Sɛ ɔ tɛ su kɛ ɛɛn-ɛn’n, ɔ usɛ i kɛ: “?A kwla kle min sran sɔ’n?” Blɛ sunman’n kosan kpe kan sɔ m’ɔ usa’n i bo’n gua klanman. Afin kɛ sran kun klo Ɲanmiɛn Ndɛ’n, ɔ kunndɛ kɛ ɔ́ kán like ng’ɔ suan’n i ndɛ klé i osufuɛ mun nin i janvuɛ mun. ?Kɛ Mari usa kosan sɔ’n, sa benin yɛ ɔ ju-ɔ?

Bla kun mɔ Mari kle i Biblu’n nun like m’ɔ suan Zasiminin’n, ɔ kleli i sran nnan mɔ be kunndɛ kɛ bé súan like wie-ɔ. Be flɛ kun kɛ Klisitinin. Biblu’n nun like ng’ɔ suan’n ɔ yo i fɛ dan ti’n, ɔ seli Mari kɛ lemɔcuɛ kwlaa nun’n, ɔ kle i like kpɛ nɲɔn. Kɛ Mari usali Klisitinin sɛ ɔ si sran wie mɔ be kunndɛ kɛ bé súan Biblu’n nun like wie’n, ɔ tɛli su kɛ: “Ɛɛn-ɛn, ń má fá min janvuɛ mun ń klé wɔ.” Kɛ ɔ yoli sɔ’n w’a cɛman, Klisitinin fɛli i janvuɛ nnan mɔ be kunndɛ kɛ bé súan like’n, ɔ kleli Mari. I sin’n, Klisitinin fɛli i janvuɛ wie mun ekun kleli Mari. Be sɔfuɛ’m be nun wie’m be kusu be fali sran wie mun kleli Mari.

Asa’n Klisitinin kunndɛli kɛ i osufuɛ nga be o Filipinin lɔ’n, be suan Biblu’n nun like wie. I sɔ’n ti’n, ɔ bo su kleli i wa bla mɔ be flɛ i Andrea’n. I klikli’n nun’n, Andrea seli i klun lɔ kɛ: ‘Nán sran kpa mun yɛle Zoova i Lalofuɛ mun. Be lafiman Zezi su. Biblu’n i bue nga be flɛ i kɛ Aenguɛ Laa’n, i su yɛ be di-ɔ.’ Sanngɛ kɛ ɔ suannin like cɛn kunngba cɛ’n, ɔ wunnin kɛ akunndan ng’ɔ bu’n timan su. Blɛ kwlaa nga be kle i Biblu’n nun like’n, ɔ se kɛ: “Sɛ Biblu’n bɔbɔ kan sɔ’n, nn ɔ ti nanwlɛ.”

Kɛ ɔ́ kɔ́ i ɲrun’n, Andrea kɛnnin i janvuɛ nɲɔn nin i wiengu junman difuɛ kun be ndɛ kleli Mari. Ɔ maan be boli Biblu’n nun like suanlɛ bo wie. Asa’n be flɛ Andrea i tanti kun kɛ Anzela, ɔ wunman ase. Kɛ Mari klé Andrea i Biblu’n nun like’n, i tanti sɔ’n sie i su tie. Sanngɛ Mari simɛn i. Cɛn kun’n, Anzela seli Andrea kɛ ɔ fɛ i kle Mari naan ɔ kle i Biblu’n nun like wie. Like nga be kle Anzela’n ɔ yoli i fɛ dan. Lele mɔ anglo kun fá jú’n, nn w’a fa Biblu’n nun ndɛ mma kpanngban kpa w’a sie i ti nun. Yɛ ɔ kunndɛli kɛ Mari kle i like kpɛ nnan lemɔcuɛ kwlaa. Andrea ukɛli i maan ɔ kwla trannin aɲia’m be bo titi ɛntɛnɛti su.

 Mari tili i kɛ titi’n, kɛ ɔ́ klé Klisitinin i like’n, i wun mɔ be flɛ i kɛ Zosua’n, ɔ ti i sin lɛ. I sɔ’n ti’n, ɔ usɛli i sɛ ɔ kunndɛ kɛ ɔ́ súan like wie-o. Zosua tɛli i su kɛ: “N tili. Ń síe min su ń tíe ndɛ nga amun kan’n. Sanngɛ nán usa min kosan. Ɔ ti’ɛ i ti’n, ń jáso ń kɔ́.” Kɛ be boli i bo lele mɔ miniti nnun fá sín’n, kosan ng’ɔ usali’n, ɔ tra Klisitinin liɛ’n. Yɛ ɔ kunndɛli kɛ ɔ́ súan Biblu’n nun like wie.

Kosan kpe kan nga Mari usali’n ti’n, ɔ ɲannin sran kpanngban kleli be Biblu’n nun like. Ɔ fali sran sɔ’m be nun wie mun mannin aniaan mun naan be uka be. Mari kleli sran 28 mɔ be tran nvle fanunfanun nnan nun’n, be Biblu’n nun like.

Afuɛ 2021, Avrili nun’n, be yoli sran klikli nga e kɛnnin i ndɛ mɔ be flɛ i Zasiminin’n i batɛmun. Afuɛ 2022, Mɛ nun’n, be yoli Klisitinin i batɛmun. Kpɛkun ɔ sɛli i sin Filipinin naan ɔ́ kó trɛ́n i awlofuɛ’m be wun. Be yoli bla nɲɔn mɔ Klisitinin fa be kleli Mari’n be batɛmun wie. Kɛ ɔ́ kɔ́ i ɲrun’n, be yoli Anzela i batɛmun. Yɛ kɛ é sé yɛ’n, ɔ ti titi atin bofuɛ. Klisitinin i wun Zosua nin be wa bla Andrea nin sran wie mun ekun mɔ be suan Biblu’n nun like’n, be kɔ be ɲrun kpa.

Zezi nin i akoto’m be blɛ su’n, sran kpanngban be kannin jasin fɛ nga be tili’n kleli be osufuɛ mun nin be janvuɛ mun. (Zan 1:​41, 42a; Yol. 10:​24, 27, 48; 16:​25-33) ?Yɛ amun li? ?Sɛ amun yo sɔ wie’n nin? Amun usa be nga amun kle be Biblu’n nun like’n, ɔ nin be nga Ɲanmiɛn ndɛ’n lo be’n be kɛ: “?A si sran uflɛ m’ɔ klo kɛ ɔ́ súan Biblu’n nun like wie-ɔ?” Sɛ amun usa kosan kpe kan sɔ’n, atrɛkpa’n, amún ɲán sran kpanngban bé klé be Biblu’n nun like.