1. ?Like nga ti yɛ Zoova kpɛli aja’n i ba’n, i kun yɛle benin?

 ZOOVA m’ɔ ti e ‘Ɲanmiɛn’n ɔ di aklunjɔɛ.’ Yɛ ɔ kunndɛ kɛ e di aklunjɔɛ wie. (1 Tim. 1:11) Ɔ mannin e ninnge kpanngban kpa naan y’a kwla di aklunjɔɛ. (Zak. 1:17) Ninnge sɔ’m be nun kun yɛle aja’n. Kɛ yasua kun nin bla kun bé já’n, be ta nda kɛ bé kló be wiengu yɛ be ɲin yí be wiengu. Kɛ yasua kun nin i yi be yo maan be afiɛn mantan kpa’n, be di aklunjɔɛ.—Ɲan. 5:18.

 2. ?Wafa sɛ yɛ yasua wie’m be nin be yi’m be tran andɛ-ɔ?

² Like ng’ɔ ti tɛ’n yɛle kɛ andɛ’n, yasua nin bla sunman be wla fi nda nga be tali be wiengu be aja cɛn nun’n i su. Ɔ maan be diman aklunjɔɛ. Koko nun wa’n, fluwa sifuɛ wie’m be seli kɛ yasua kpanngban be bo be yi mun, be kan be ndɛ tɛtɛ, annzɛ be yo be finfin. Yasua ng’ɔ yo sɔ’n, wie liɛ’n sran’m be ɲrun’n ɔ yo kɛ ɔ bu i yi’n i sran sa, kusu nn awlo lɔ’n ɔ yo i tɛtɛ. Yasua wie’m be nian bian nin bla nna nga be fa fite nzra nun’n. I sɔ mɔ be yo’n ti’n, be yi’m be wla bo be wun.

 3. ?Ngue ti yɛ yasua wie’m be yo be yi’m be tɛtɛ-ɔ?

³ ?Ngue ti yɛ yasua wie’m be yo be yi’m be tɛtɛ-ɔ? Yasua wie’m be si’m be yoli be nin’m be tɛtɛ. Ɔ maan be bu i kɛ i sɔ yolɛ’n timan tɛ. Wie’m be liɛ’n, akunndan nga be asa’n su lɔ yasua’m be bu’n i wie yɛ bu-ɔ. Yɛle kɛ be se kɛ ɔ fata kɛ yasua kun sa’n, ɔ kle kɛ i yɛ ɔ le kwlalɛ awlo’n nun-ɔn. Yasua wie’m be liɛ’n, be siman be wun su nian kaan sa. Wie’m be kusu’n, bian nin bla nna nga be fa fite nzra nun’n i nianlɛ’n w’a kaci be nzuɛn. Ɔ maan be buman bla’m be wie, yɛ sua silɛ’n i su akunndan nga be bu’n ɔ timan kpa mlɔnmlɔn. Asa’n fluwa sifuɛ’m be sieli i nzɔliɛ kɛ Koronavirisi blɛ nun’n, yasua’m be ayeliɛ sɔ’m be wa yoli tɛtɛ kpa. Sanngɛ i kwlaa yoli-o, yasua kun leman atin yomɛn i yi’n i tɛtɛ.

 4. ?Ngue yɛ ɔ fata kɛ Klisifuɛ nga be le bla’n be nian be wun su naan b’a yoman-ɔn? ?Yɛ ngue ti-ɔ?

 ⁴ Ɔ fata kɛ Klisifuɛ nga w’a ja bla’n, ɔ niɛn i wun su naan w’a buman bla’m be wun akunndan nga mɛn nunfuɛ’m be bu’n i wie. a Afin blɛ sunman’n akunndan nga sran kun bu’n, i nuan su sa yɛ ɔ yo-ɔ. Akoto Pɔlu seli Klisifuɛ nga be kpali be sieli be ngunmin mɔ be o Rɔmun lɔ’n be kɛ ‘nán be fa mɛn nga nunfuɛ’m be ayeliɛ’n kun.’ (Rɔm. 12:​1, 2) Kɛ Pɔlu klɛ́ Rɔmunfuɛ’m be fluwa’n, nn be takali lɔ asɔnun’n w’a di afuɛ nɲɔn kun. Sanngɛ Pɔlu i ndɛ sɔ’n kle kɛ, asɔnun sɔ’n i nunfuɛ wie’m be ayeliɛ’n nin akunndan nga be bu’n, ɔ te fa mɛn’n nunfuɛ’m be liɛ’n. I sɔ’n ti’n, ɔ wlali be fanngan kɛ be kaci be akunndan nin be ayeliɛ’n. Afɔtuɛ sɔ’n ti andɛ Klisifuɛ nga b’a ja bla’n be liɛ wie. Akunndan nga mɛn nunfuɛ’m be bu’n w’a saci Klisifuɛ wie mun. I kpa bɔbɔ’n, be yo be yi’m be tɛtɛ. b ?Wafa sɛ yɛ Zoova kunndɛ kɛ Klisifuɛ kun nin i yi’n be tran-ɔn? Biblu’n nun ndɛ mma nga like suanlɛ nga taka su’n ɔ tɛ su.

 5. ?Kɛ nga 1 Piɛli 3:7 fa kan sa’n, wafa sɛ yɛ ɔ fata kɛ yasua kun nin i yi’n be tran-ɔn?

⁵ An kanngan 1 Piɛli 3:7 nun. Zoova kunndɛ kɛ yasua’m be yo be yi’m be cɛcɛ. Sran ng’ɔ yo i yi’n i cɛcɛ’n, ɔ kle kɛ ɔ bu i sran. Yɛ wafa ng’ɔ nin i be tran’n, ɔ kle kɛ ɔ klo i. Like suanlɛ nga nun’n, é wá wún wafa nga yasua kun kwla kle kɛ ɔ yo i yi’n i cɛcɛ’n. Sanngɛ maan e dun mma e kan yasua wie’m be ayeliɛ wie m’ɔ kle kɛ be yoman be yi’m be cɛcɛ’n be ndɛ.

AYELIƐ NG’Ɔ FATA KƐ AN WLA BE ASE’N

 6. ?Wafa sɛ yɛ Zoova bu be nga be yo be yi’m be tɛtɛ’n mun-ɔn? (Kolɔsufuɛ Mun 3:19)

⁶ Bla’m be kpokokpoko yolɛ’n. Zoova i ɲin ci sran kwlaa ng’ɔ yo i wiengu’m be kpokokpoko’n. (Jue. 11:5) Be nga i ɲin ci be kpa’n, be yɛle yasua nga be yo be yi’m be tɛtɛ’n. (Mal. 2:16; An kanngan Kolɔsufuɛ Mun 3:19 nun.) Kɛ nga 1 Piɛli 3:7 mɔ e like suanlɛ’n taka su’n fa kan’n sa’n, yasua ng’ɔ yo i yi’n i tɛtɛ’n ɔ nin Ɲanmiɛn be afiɛn’n sáci. I kpa bɔbɔ’n, i sɔ’n kwla yo maan Zoova su tiemɛn i srɛlɛ’n.

 7. ?Kɛ nga Efɛzifuɛ Mun 4:​31, 32 fa kan’n sa’n, ndɛ benin yɛ ɔ fataman kɛ yasua kun kan kle i yi-ɔ? (An nian “Ndɛ wie’m be nun yiyilɛ” nun wie.)

⁷ Bla’m be ndɛ tɛtɛ kanlɛ’n. Yasua wie’m be kan ndɛ ya su kle be yi mun yɛ be kan be ndɛ tɛtɛ. Sanngɛ Zoova kloman “ya ble’n nin kpankpanlɛ’n nin nzowa’n.” c (An kanngan Efɛzifuɛ Mun 4:​31, 32 nun.) Ndɛ kwlaa nga e kan’n, ɔ ti. Ɔ maan wafa nga yasua kun kan ndɛ kle i yi’n awlo lɔ bɔbɔ’n, ɔ ti Zoova i cinnjin. Sɛ yasua kun kan ndɛ tɛtɛ kle i yi’n, nán be aja’n i ngunmin yɛ ɔ kwla saci-ɔ, ɔ nin Ɲanmiɛn be afiɛn kwla saci wie.—Zak. 1:26.

 8. ?Wafa sɛ yɛ Zoova bu bian nin bla nna nga be fa fite nzra nun’n i nianlɛ’n niɔn? ?Yɛ ngue ti-ɔ?

⁸ Bian nin bla nna nga be fa fite nzra nun’n i nianlɛ’n. ?Wafa sɛ yɛ Zoova bu bian nin bla nna nga be fa fite nzra nun’n i nianlɛ’n niɔn? Ɔ kpɔ i sɔ ayeliɛ’n. Ɔ maan yasua ng’ɔ niɛn i sɔ like’n, ɔ nin Zoova be afiɛn kwla saci. Asa’n i sɔ’n ti i yi’n i finfin yolɛ. d  Zoova kunndɛ kɛ yasua kun i ayeliɛ nin akunndan ng’ɔ bu’n be kle kɛ ɔ nin i yi’n be nanti klanman. Zezi seli kɛ sɛ yasua kun nian bla kun lele naan ɔ bu i kunndɛlɛ akunndan’n nn w’a kunndɛ bla sɔ’n i yi bo “i awlɛn’n nun lɔ.” e—Mat. 5:​28, 29.

 9. ?Ngue ti yɛ sua silɛ nun’n, Zoova kloman kɛ yasua kun miɛn i yi kɛ ɔ yo ninnge wie m’ɔ timɛn i liɛ su-ɔ?

⁹ Sua silɛ i wafa ng’ɔ ti bla’n i finfin yolɛ’n. Sua silɛ nun’n, yasua wie’m be mian be yi mun kɛ be yo ninnge wie mɔ be klomɛn i’n, annzɛ m’ɔ ti be kpokokpoko yolɛ’n, annzɛ be yo ninnge wie m’ɔ kwla sanngan bla’n i akunndan’n. Yasua ng’ɔ yo sɔ’n, ɔ kle kɛ ɔ bu i ngunmin i wun akunndan naan i yi’n i ndɛ lomɛn i. Zoova kpɔ ayeliɛ tɛtɛ kɛ ngalɛ sa mun. Ɔ klo kɛ yasua’m be yo be yi’m be cɛcɛ, be kle kɛ be klo be, yɛ be ɲin yi be. (Efɛ. 5:​28, 29) ?Yɛ sɛ Klisifuɛ kun nian bian nin bla nna nga be fa fite nzra nun’n, annzɛ ɔ yo i yi’n i finfin’n, annzɛ ɔ yo i tɛtɛ’n nin? ?Ɔ́ yó sɛ naan w’a kaci i akunndan’n nin i ayeliɛ’n?

LIKE NGA YASUA KUN KWLA YO NAAN W’A WLƐ I AYELIƐ TƐTƐ’M BE ASE’N

10. ?Wafa sɛ yɛ yasua’m be kwla ɲan Zezi i ajalɛ’n i su ye-ɔ?

¹⁰ ?Ngue yɛ ɔ kwla uka yasua kun naan w’a yaci i yi’n i tɛtɛ yolɛ nin i finfin yolɛ-ɔ? Ɔ fata kɛ ɔ miɛn i ɲin nian Zezi i ajalɛ’n su. I yo, Zezi w’a jaman bla. Sanngɛ wafa ng’ɔ nin i sɔnnzɔnfuɛ’n be trannin’n, ɔ kwla uka yasua mun naan be nin be yi’m b’a tran klanman. (Efɛ. 5:25) I wie yɛle kɛ, wafa ng’ɔ nin i akoto’m be trannin’n nin wafa ng’ɔ kannin ndɛ kleli be’n, ɔ kwla uka yasua’m be kpa.

11. ?Wafa sɛ yɛ Zezi nin i akoto’m be trannin-ɔn?

¹¹ Zezi yoli i akoto’m be cɛcɛ, yɛ ɔ kleli kɛ ɔ bu be sran. W’a yoman be tɛtɛ le. Zezi yɛ ɔ ti be Min’n niɔn. Sanngɛ w’a fɛmɛn i kwlalɛ’n w’a tintinman be su naan be sro i. I kpa bɔbɔ’n, ɔ kɛnnin i wun ase suli be. (Zan 13:​12-17) Ɔ seli i sɔnnzɔnfuɛ’m be kɛ: “Amun fa like nga n kle’n su. Afin n ti wɛtɛɛfuɛ, yɛ n ti wun ase kanfuɛ. Ɔ maan amun wla wá gúa ase.” (Mat. 11:​28-30) Zezi ti wɛtɛɛfuɛ. Kɛ be se kɛ sran kun ti wɛtɛɛfuɛ’n nán kɛ ɔ leman wunmiɛn ti-ɔ. Sanngɛ ɔ si i wun su nian. Kɛ be klɔklɔ i’n, ɔ guɛ i wla ase kpɛkun ɔ trɛ i awlɛn.

12. ?Wafa sɛ yɛ Zezi kannin ndɛ kleli i wiengu mun-ɔn?

¹² Ndɛ nga Zezi kannin’n, ɔ wlɛli i wiengu’m be fanngan yɛ ɔ cicili be wla. W’a kanman ndɛ ya su w’a klemɛn i sɔnnzɔnfuɛ mun le. (Lik. 8:​47, 48) Kɛ i kpɔfuɛ’m be klɔklɔli i mɔ be kpɛli i nzowa bɔbɔ’n, “w’a kpɛman be wie.” (1 Piɛ. 2:​21-23) Ɔ ju wie’n, ɔ muɛn i nuan naan w’a tɛman sran’m be su ya su. (Mat. 27:​12-14) Ajalɛ kpa yɛ ɔ kle Klisifuɛ nga b’a ja bla’n mun-ɔn.

13. ?Kɛ nga Matie 19:​4-6 fa kan’n sa’n, wafa sɛ yɛ yasua kun kwla kle kɛ ɔ ‘fɛ i wun mɛntɛn i yi-ɔ’? (An nian foto’n wie.)

¹³ Zezi kleli yasua’m be kɛ ɔ fata kɛ be nin i be yi’m be nanti klanman. Ɔ kannin ndɛ kunngba nga i Si kannin’n wie. Ɔ seli kɛ ɔ fata kɛ yasua’n ‘fɛ i wun mɛntɛn i yi’n.’ (An kanngan Matie 19:​4-6 nun.) Glɛki nun ndɛ nga be kacili i Wawle’n nun kɛ “fɛ i wun mɛntɛn i’n” be fa kan “kɔlu” mɔ yo maan like nɲɔn be kwla mantan su’n i ndɛ. I sɔ’n ti’n, ɔ fata kɛ klolɛ ng’ɔ o yasua kun nin yi be afiɛn’n, ɔ jran cinnjin kɛ b’a fa be b’a mantan su sa. Ɔ maan sɛ be nun kun yo like kun m’ɔ kwla saci be aja’n, be bue nɲɔn’n bé fɛ́. Yasua ng’ɔ nin i yi be  afiɛn mantan kpa’n, ɔ kpalo bian nin bla nna nga be fa fite nzra nun’n i wafa kwlaa. Ɔ miɛn i ɲin naan i “ɲin w’a tranman ninnge ngbɛnngbɛn’m be su.” (Jue. 119:37) I kpa bɔbɔ’n, ɔ nin i ɲinma’n be tra aenguɛ. Yɛle kɛ i yi’n i kunngba su yɛ ɔ fɛ i ɲin sie-ɔ.—Zɔb. 31:1.

14. ?Ngue yɛ ɔ fata kɛ yasua ng’ɔ yo i yi’n i tɛtɛ’n, ɔ yo naan ɔ nin Zoova nin i yi’n be afiɛn w’a sɛ-ɔ?

¹⁴ Yasua ng’ɔ yo i yi’n i tɛtɛ’n, annzɛ ɔ yo i finfin’n, ɔ fata kɛ ɔ yo ninnge wie mun naan ɔ nin Zoova be afiɛn w’a sɛ ekun, naan kusu w’a siesie ɔ nin i yi’n be afiɛn. ?Ninnge benin mun yɛ ɔ fata kɛ ɔ yo be-ɔ? I klikli nun’n, maan ɔ wun i wlɛ kɛ like ng’ɔ yo i lɛ’n ti tɛ. Zoova wun like kwlaa ng’ɔ yo’n yɛ ɔ ti ndɛ kwlaa ng’ɔ kan’n. (Jue. 44:21; Aku. 12:14; Ebr. 4:13) I nɲɔn su’n, ɔ fata kɛ ɔ yaci i yi’n i tɛtɛ yolɛ yɛ ɔ kaci i nzuɛn’n. (Ɲan. 28:13) I nsan su’n, maan ɔ kpɛtɛ i yi nin Zoova naan be yaci i sa tɛ’n be cɛ i. (Yol. 3:19) Asa’n, ɔ fata kɛ ɔ srɛ Zoova naan ɔ ukɛ i naan ɔ kunndɛ kɛ ɔ́ kací, naan i akunndan’n nin ndɛ ng’ɔ kan’n ɔ nin i ayeliɛ’n be yo kɛ nga Zoova fa klo’n sa. (Jue. 51:​10-12; 2 Kor. 10:5; Fip. 2:13) I nnan su’n, ɔ fata kɛ ɔ yo i srɛlɛ’n i nuan su sa. Yɛle kɛ ɔ miɛn i ɲin wla sran kpokokpoko yolɛ nin ndɛ tɛtɛ kanlɛ wafa kwlaa be ase. (Jue. 97:10) I nnun su’n, maan ɔ ko wun asɔnun kpɛnngbɛn be wun naan be ukɛ i. (Zak. 5:​14-16) I nsiɛn su’n, maan ɔ fa ajalɛ wie mɔ be kwla ukɛ i naan w’a wun like ng’ɔ kwla yo naan w’a yoman ninnge tɛtɛ sɔ’m be kun’n. Yasua ng’ɔ nian bian nin bla nna nga be fa fite nzra nun’n, ɔ fata kɛ ɔ nian ajalɛ sɔ’m be su wie. Zoova yrá i ɲin m’ɔ mian naan w’a kaci ayeliɛ’n su. (Jue. 37:5) Ɔ ti cinnjin kɛ yasua kun yaci i yi’n i tɛtɛ yolɛ. Sanngɛ nɛ́n i ngba-ɔ. Ɔ fata kɛ ɔ suan wafa ng’ɔ kwla kle kɛ ɔ bu i yi’n i sran’n wie. ?Wafa sɛ yɛ ɔ kwla yo sɔ-ɔ?

WAFA NGA YASUA KUN KWLA KLE KƐ Ɔ YO I YI’N I CƐCƐ’N

15. ?Wafa sɛ yɛ yasua kun kwla kle kɛ ɔ klo i yi’n niɔn?

¹⁵ Kle ɔ yi’n kɛ a klo i. Aniaan wie mɔ be di aklunjɔɛ be aja’n nun’n, be mian be ɲin  be yo like kun cɛn kwlakwla be fa kle be yi’m be kɛ be klo be. (1 Zan 3:18) Yasua kun kwla yo ninnge kanngan wie mun fa kle kɛ ɔ klo i yi’n. I wie yɛle kɛ ɔ kwla trɛ i sa’n nun, annzɛ ɔ kwla tɔ i nun. Ɔ kwla klɛ i mesazi se i kɛ: “N wla lo wɔ,” annzɛ ɔ kwla usɛ i kɛ: “?Ɔ wun ti kpa?” Cɛn kunngun’n, ɔ kwla klɛ ndɛ fɛfɛ wie mun lɛtri nun fa kle i kɛ ɔ klo i. Kɛ yasua kun yo ninnge kɛ ngalɛ’n sa mun’n, ɔ kle kɛ ɔ bu i yi’n i sran. Yɛ i sɔ m’ɔ yo’n ti’n, be aja’n taka kpa.

16. ?Ngue ti yɛ ɔ fata kɛ yasua kun yi i yi’n i ayɛ-ɔ?

¹⁶ Kle ɔ yi’n kɛ i ndɛ lo ɔ dan. Yasua ng’ɔ bu i yi’n i sran’n, ɔ kan sa nga ti yɛ i ndɛ lo i’n i ndɛ kle i, yɛ ɔ wlɛ i fanngan. Wafa ng’ɔ kwla yo sɔ’n i kun yɛle kɛ ɔ yo i yi’n i mo, like kwlaa ng’ɔ yo fa suɛn i bo’n ti. (Kol. 3:15) Kɛ yasua kun yi i yi’n i ayɛ’n, i wun kpɛjɛ i. Yɛ ɔ wun kɛ i wun’n bu i sran naan ɔ klo i sakpa.—Ɲan. 31:28.

17. ?Wafa sɛ yɛ yasua kun kwla kle kɛ i ɲin yi i yi-ɔ?

¹⁷ Yo ɔ yi’n i cɛcɛ yɛ maan ɔ ɲin yi i. Yasua ng’ɔ klo i yi’n ɔ yɛyɛ i. Ɔ bu i yi’n kɛ like dan kpa kun mɔ Zoova fa cɛli i’n sa. (Ɲan. 18:22; 31:10) I sɔ’n ti’n, ɔ yo i cɛcɛ, yɛ i ɲin yi i. I wie yɛle kɛ, kɛ ɔ nin i bé sí sua bɔbɔ’n, ɔ miɛnmɛn i kɛ ɔ yo like wie m’ɔ timɛn i liɛ su’n, annzɛ like wie m’ɔ sɛnngɛn i akunndan’n, yɛ ɔ yomɛn i kpokokpoko. f Asa’n ɔ yoman like wie mɔ i ti’n i bɔbɔ i akunndan’n kwla bu i fɔ’n.—Yol. 24:16.

18. ?Ngue yɛ ɔ fata kɛ yasua’m be fua kpa kɛ bé yó-ɔ? (An nian kuku nga be flɛ i kɛ “ Like nnan mɔ yasua kun kwla yo fa kle kɛ i ɲin yi i yi’n” i nun wie.)

¹⁸ Yasua mun, amun kwla lafi su kɛ Zoova wun wafa nga sa kwlaa nun’n, amun mian amun ɲin be yo amun yi’m be cɛcɛ’n. Amun fua kpa kɛ amun su yoman amun yi’m be tɛtɛ. Sanngɛ amun yo be ye, amun ɲin yi be yɛ amun yi be ayɛ. Sɛ amun yo sɔ’n, amún klé kɛ amun klo be naan amun yo be cɛcɛ naan be ndɛ lo amun dan. Sɛ amun yo amun yi’m be cɛcɛ’n, amun nin Zoova amun afiɛn su saciman.—Jue. 25:14.