Ninnge nga be o nglo lɔ’n be ti siesiewa sɛsɛsɛ. Fluwa kun seli kɛ: “Ninnge nga be o nglo lɔ’n be truman lɛ sa ngbɛn. Be ti siesiewa sɛsɛsɛ.” ?Ngue ti yɛ ɔ ti sɔ-ɔ? Siansifuɛ’m be waan like kun mɔ be flɛ i kɛ “matière noire” ti yɛ ɔ ti sɔ-ɔ. Be waan like sɔ’n ti kɛ “tannin dan kpa kun sa. Sanngɛ be wunmɛn i. Kpɛkun ninnge nga be o nglo lɔ’n be gua nun. Sanngɛ be ti siesiewa sɛsɛsɛ. Asa’n ɔ suan be bo maan be ka be osu nun lɛ.”

?Ngue ti yɛ nglo lɔ ninnge’m be ti siesiewa sɛsɛsɛ sɔ-ɔ? ?Sɛ ɔ ti kɛ be boli nun sa ngbɛn’n, nn be bɔbɔ bé kwlá síesíe be wun kɛ ngalɛ’n sa? Be flɛ fluwa sifuɛ kun kɛ Alanin Sandejin. Be waan “kɛ ɔ fɛ i afuɛ 1901 lele m’ɔ́ fá jú afuɛ 2000 nun’n, ɔ ti be nga be suannin nglo lɔ ninnge’m be su like’n be nun nga be si fluwa kpa’n, be nun kun.” Sanngɛ kusu ɔ lafi su kɛ Ɲanmiɛn o lɛ.

 Ɔ seli kɛ: “Kɛ n nian wafa nga nglo lɔ ninnge’m be ti siesiewa’n, n bumɛn i kɛ be boli nun sa ngbɛn. Saan sran kun yɛ ɔ siesieli be sɔ-ɔ.”

Wafa nga nglo lɔ ninnge’m be fa ti’n ti’n, e kwla tran nguan nun. Fluwa sifuɛ’m be waan wunmiɛn kun yɛ ɔ yo maan wia’n jue kpa-ɔ. Be flɛ wunmiɛn sɔ’n kɛ “force faible.” Be waan sɛ ɔ ti kɛ wunmiɛn sɔ’n ti kaan dan’n, nn wia’n su tranman lɛ. Asa kusu’n, sɛ ɔ ti kɛ wunmiɛn sɔ’n cɛnnin dan’n, nn wia’n kpukeli w’a cɛ.

Nán wunmiɛn sɔ’n ngunmin ti yɛ e kwla ka nguan nun-ɔn. Ninnge kpanngban wie mun ekun be o lɛ. Be flɛ fluwa sifuɛ kun kɛ Anili Anantasuamin. I waan sɛ ninnge sɔ’m be nunman lɛ’n, nn “i nzraama mun-o, i nglo lɔ ninnge nga be ti kɛ asiɛ’n sa’n nin-o, be nun wie fi nunman lɛ. Ɔ maan like fi su tranman nguan nun.”

Asiɛ’n su ngunmin yɛ klɔ sran’m be kwla tran-ɔn. Asiɛ’n le ninnge kwlaa ng’ɔ fata kɛ ɔ ɲɛn i naan i su tranlɛ’n w’a yo ye’n. I wie yɛle kɛ kpukpuwa ng’ɔ bo sin yiɛ i’n ti kpa. Kpɛkun nzue ng’ɔ o su’n ti i nuan su sɛsɛsɛ. Asa’n, kɛ mɔ anglo ba’n i dan nun’n ti i nuan su sɛsɛsɛ’n ti’n, asiɛ’n kɛ i osu nun lɛ. Fluwa kun seli kɛ: “Yɔbuɛ nin waka nin nnɛn fanunfanun nga be o asiɛ’n su’n be ti’n, asiɛ’n su ngunmin yɛ klɔ sran’m be kwla tran-ɔn.” *

Fluwa sifuɛ’m be waan wia’n nin asiɛ’n nin anglo ba’n nin ninnge uflɛ nga be bo sin yia wia’n, “be o be liɛ ngunmin lika kun.” Yɛle kɛ be nin nzraama onga’m be afiɛn ti nun dan kpa. I sɔ’n ti yɛ e kwla tran nguan nun-ɔn. Afin sɛ ɔ ti kɛ asiɛ’n wo nzraama’m be wun koko lɛ’n, nn ɔ́ yrá. I kpa bɔbɔ’n, fluwa sifuɛ’m be waan lika nga asiɛ’n wo lɛ’n, “lɛ ngunmin cɛ yɛ ɔ fata kɛ ɔ tran naan sran’m b’a kwla ka nguan nun-ɔn.”

Be flɛ fluwa sifuɛ kun kɛ Pɔlu Devisi. Kɛ ɔ suannin nglo lɔ ninnge’m be su like lele’n, ɔ seli kɛ: “N bumɛn i kɛ nglo lɔ ninnge’m be boli nun sa ngbɛn. Nán like kun yɛ ɔ kpukeli kpɛkun ninnge’m be boli nun-ɔn. […] N bu i kɛ nán ngbɛn ti yɛ e o lɛ-ɔ.” Nán kɛ Devisi su se kɛ Ɲanmiɛn yɛ ɔ yili klɔ sran mun nin ninnge onga mun-ɔn. Sanngɛ ndɛ ng’ɔ kannin’n kle kɛ wafa nga nglo lɔ ninnge mun nin asiɛ’n be fa ti’n ti yɛ ninnge’m be kwla tran nguan nun-ɔn. ?I sɔ’n kleman kɛ sran kun yɛ ɔ siesieli i sɔ-ɔ?