?ASIƐ’N YÓ KPA EKUN?
Jenvie’n
NINNGE nga e di be’n, be nun sunman be fin jenvie’n nun. Asa’n, ninnge nga be fa yi ayre’n be nun wie’m be fin nun wie. Aunmuan kpa nga be flɛ i kɛ ɔsizɛnin’n i dan lika fin jenvie’n nun. Asa ekun’n, jenvie’n cuɛn kpukpuwa tɛ nga be flɛ i kɛ kaabɔnun’n. Jenvie’n ti’n lika’n loman dan, asa’n ayrɛ’n kunman e dan.
Sa nga ti yɛ ɔ fata kɛ e sasa jenvie’n
Kɛ mɔ lika’n su lo dan’n ti’n, ninnge nga be tran jenvie’n nun’n be su wie wu. Be nun wie yɛle waka nin ijre nin buke mun. Fluwa sifuɛ wie’m be waan sɛ y’a yoman like fi’n, wa nin afuɛ 30 ninnge nga be tran jenvie’n nun’n be nun sunman lika bé wú.
Fluwa sifuɛ wie mun ekun be waan anunman nga be tran jenvie nuan’n, be sunman lika b’a di potomo le. Ɔ maan afuɛ kwlakwla’n, potomo sɔ’m be kun anunman sɔ’m be nun miliɔn kaka.
Afuɛ 2022 nun’n, Antonio Guterɛsi m’ɔ ti anuannzɛ nga be flɛ i kɛ ONU i su kpɛn’n seli kɛ: “Y’a nianman jenvie’n i lika kɛ ng’ɔ nin i fata’n sa. I sɔ’n ti’n, jenvie’n i lika nianlɛ’n w’a kaci e ti su ndɛ andɛ.”
Wafa nga Ɲanmiɛn yili asiɛ’n ti’n ɔ kwla sin i osu laa’n nun ekun
Wafa nga Ɲanmiɛn yili jenvie’n nin i nun ninnge mun’n ti’n, sɛ sran’m b’a faman wla b’a guaman nun’n, ɔ kwla ka sanwun titi. Fluwa kun seli kɛ: “Sɛ be kplinman sran’m be su kɛ be yo jenvie’n i fiɛn’n, jenvie’n bɔbɔ kwla yo maan ɔ ka sanwun titi.” Maan e kan wafa i sɔ liɛ’n kwla yo ye’n i ndɛ kan.
-
Jenvie nun kakaa mma kanngan wie’m be cuɛn kpukpuwa tɛ nga be flɛ i kɛ diɔsidi de kaabɔnun’n be sie. Fluwa sifuɛ’m be waan kpukpuwa sɔ’n kwla yo maan lika’n lo. E kwla se kɛ kpukpuwa tɛ sɔ mɔ kakaa mma sɔ’m be cuɛn be sie’n, ɔ nin nga waka nin ijre’m be cuɛn’n be sɛ.
-
Kakaa mma wie mɔ be o jenvie’n nun’n, be di jue’m be fuɛn mun naan nzue’n w’a ka sanwun. Jenvie’n nun ninnge uflɛ wie’m be di kakaa mma sɔ mun. Anuannzɛ kun seli kɛ i sɔ mɔ be yo’n ti’n, jenvie’n ka sanwun titi.
-
Jenvie’n nun jue wie’m be like dilɛ wafa’n ɔ yo maan nzue’n i klakla m’ɔ ti’n kan ase. Ɔ maan nzue’n kwlá yoman ijre nin waka nin nzue’n nun ninnge uflɛ wie’m be tɛ.
Like nga sran’m be yo’n
Sɛ e kaman lɛ e yiman pata nin ninnge kɛ po sa’n be blo naan e fa yo like uflɛ ekun’n, i sɔ’n yó maan wla nga be fa guɛ i jenvie’n nun i su kpɛ́.
Fluwa sifuɛ’m be wla sran’m be fanngan kɛ nán maan be ka lɛ be yi pata nin ninnge kɛ po sa’n be blo. Sanngɛ maan be fa yo like uflɛ ekun. Sɛ e yo sɔ’n jenvie’n yó sanwun titi.
Sanngɛ junman ng’ɔ fata kɛ sran’m be di’n ɔ sɔnnin. Koko nun wa’n, anuannzɛ kun isali jenvie nuan wla nvle 112 nun. Kɛ be sunnzunnin’n, ɔ ti tɔnun 9.200. Sanngɛ kɛ e fa wla nga be isɛli i lɛ’n e sunnzun wla nga afuɛ nuan kwlaa nun’n be fa guɛ i jenvie’n nun’n, ɔ juman lika fi.
Fluwa kun seli kɛ: ‘Wafa nga jenvie’n w’a saci’n be yo i like fi-ɔ, ɔ yoman ye kun. Sin wunsrɛn ng’ɔ fin izinin’m be nun fite’n, ɔ yo jenvie’n i fiɛn dan ti’n, ninnge be o jenvie nun’n be kwlá yomɛn i sanwun kɛ ng’ɔ fata kɛ be fa yo’n sa.’
Ndɛ nga Biblu’n kan m’ɔ gua e awlɛn su nzue’n
“Ɔ sa nuan ninnge’m b’a yi asiɛ’n piɛ. I wie yɛle jenvie m’ɔ ti dan’n, m’ɔ la plaii’n, be dimɛn i nun ninnge nga nguan o be nun’n be yalɛ, wie’m be ti kanngan, yɛ wie’m be ti dandan.”—Jue Mun. 104:24, 25.
Wafa nga Ɲanmiɛn yili jenvie’n ti’n, i bɔbɔ kwla yo i wun sanwun. ?Ɲanmiɛn m’ɔ yili jenvie’n nin i nun ninnge kwlaa’n ɔ kwlá yoman naan jenvie’n w’a sin i osu’n nun? An nian ndɛ akpasua nga be flɛ i kɛ “Ɲanmiɛn tali nda kɛ asiɛ’n yó kpa ekun” nun. Ɔ o fluwa nga i bue 15 su.
