?Ngue ti yɛ sran sunman be ɲin yiman be wiengu kun-ɔn?

?NGUE TI YƐ Ɔ FATA KƐ E ƝIN YI E WIENGU MUN-ƆN?

Kɛ e ɲin yi e wiengu’n i sɔ’n yo maan kɛ sa tɔ’n ndɛ’n kɔman mmua.

Biblu’n se kɛ: “Kɛ a tɛ sran su amanniɛn su’n, ɔ guɛ i ya’n i ase, sanngɛ be nuan nun ndɛ ng’ɔ yra fiaan’n, ɔ klɔklɔ ya.” (Ɲanndra Mun 15:1) Sanngɛ kɛ e ijɔlɛ nun nin e ayeliɛ’n nun e kle kɛ e ɲin yiman e wiengu’n, sɛ ndɛ tɔ e afiɛn’n ɔ kaci ndɛ dan. Yɛ kpɛ sunman’n i bo guaman kpa.
Zezi seli kɛ: “Ndɛ ng’ɔ o sran’n i awlɛn’n nun’n yɛ ɔ fin i nuan fite-ɔ.” (Matie 12:34) Ɔ ju wie’n wafa nga e bu be nga e nin be e wunnɛn kplo’n annzɛ e finwlɛ’n annzɛ wafa nga be tali e’n ɔ timan kun’n, i ɲin fite wafa nga e kan ndɛ e kle be’n nun.

Be usali sran 32.000 be kosan, nvlenvle 28 nun. Kɛ be fa sran 100, be nun 65 be seli kɛ andɛ’n sran’m be ɲin yiman be wiengu kaan sa.

LIKE NGA A KWLA YO’N

Maan ɔ yo suklu lɔ-o, annzɛ junman su lɔ-o, kannzɛ bɔbɔ a nin ɔ wiengu mun amun nuan sɛman like kwlaa su’n, sanngɛ maan ɔ ɲin yi be. Bu ninnge nga amun nuan kwla sɛ su’n be akunndan. Sɛ a yo sɔ’n, a su kanman be ndɛ tɛtɛ, yɛ a su kpliman diman be jɔlɛ.

“Amun yaci amun wiengu’m be jɔlɛ dilɛ naan b’a diman amun jɔlɛ.”—Matie 7:1.

Like nga a kunndɛ kɛ sran’m be yo be man ɔ’n, yo i kunngba’n man be. Sɛ a bu ɔ wiengu’m be sran’n, be kusu be kwla yo i kunngba’n ɔ lika wie.

“Asa kusu’n, like nga amun klo kɛ sran’m be yo be man amun’n, amun yo i kunngba’n man be.”—Liki 6:31.

Yaci sa cɛ. Sɛ sran wie yo ɔ like’n, nán ka lɛ se kɛ i ɲinfu yɛ ɔ yoli-ɔ.

“Nanwlɛ, sran ng’ɔ ti akunndanfuɛ’n, ɔ faman ya ndɛndɛ, kɛ be lo i ngasi m’ɔ fɛmɛn i ɲin sieman su’n, ɔ ɲan kɔmin.”—Ɲanndra Mun 19:11.

LIKE NGA ZOOVA I LALOFUƐ’M BE YO’N

Lika kwlaa nga Zoova i Lalofuɛ’m be tran annzɛ be di junman lɛ’n, be kle kɛ be ɲin yi be wiengu mun.

Be kwlaa nga be klo’n e kle be Biblu’n nun like. Sanngɛ e mianman sran fi. Kɛ nga Biblu’n fa kan’n sa’n e kan ndɛ’n ‘wɛtɛɛ su, yɛ e yo i amanniɛn su.’—1 Piɛli 3:15; 2 Timote 2:24.

E kpaman sran nun. Be kwlaa nga be kunndɛ kɛ bé sí Biblu’n nun ndɛ’n i kpa’n be kwla tran e aɲia’m be bo. E mian e ɲin naan y’a bu “sran wafa kwlaa be sran.”—1 Piɛli 2:17.

Kan kwlaa nga e o lɛ’n, e ɲin yi siefuɛ mun. (Rɔmunfuɛ Mun 13:1) E di mmla’m be su, yɛ e su lapo’n. Ɔ ti su kɛ e yoman politiki, sanngɛ kusu sɛ sran wie waan ɔ́ yó politiki’n e tɛnndɛnmɛn i ɲrun.