Sran kpanngban be suman Ɲanmiɛn afin be bu i kɛ i ti yɛ be wun ɲrɛnnɛn-ɔn.

Ɲanmiɛn sulɛ wafa’m be su kpɛnngbɛn sunman be waan Ɲanmiɛn fa ɲrɛnnɛn yi sran’m be su. Wie liɛ’n be kɛn i trele. Wie liɛ kusu’n wafa nga be fa kan ndɛ’n yɛ ɔ kle sɔ-ɔ. Be nun wie’m be se kɛ:

• Ɲanmiɛn fa sanvuɛsa kɛ asiɛ m’ɔ keje’n sa’n fa yi sran’m be su naan ɔ́ tú be fɔ.

• Ba kanngan nga be wu’n, Ɲanmiɛn yɛ ɔ fa be-ɔ. Ɔ fa be kaci anzi.

• Kɛ alɛ tɔ’n, Ɲanmiɛn jran sran wie’m be sin. Kusu alɛ’n ti’n, sran’m be wun ɲrɛnnɛn dan.

?Sanngɛ Ɲanmiɛn i su ndɛ nga Ɲanmiɛn sulɛ wafa’m be su kpɛn’m be kan’n, ɔ ti nanwlɛ? ?Yɛ sɛ Ɲanmiɛn kpaloli sulɛ nga be su i’n nin?

Ɲanmiɛn faman ɲrɛnnɛn yiman e su.

Sɛ ɔ ti kɛ Ɲanmiɛn yo sɔ’n, nn i su ndɛ nga Biblu’n kan’n ɔ ti ato. Biblu’n se kɛ:

“[Ɲanmiɛn] i atin’m be ti seiin. [...] Ɔ yo sa’n i nuan su sɛsɛsɛ, ɔ di nanwlɛ.”​—MMLA’N 32:4.

“Klunwi yolɛ’n nin ndɛ kwlɛ bulɛ’n, be timan Ɲanmiɛn i nzuɛn mlɔnmlɔn.”​—ZƆB 34:10.

“Ɲanmiɛn b’ɔ kwla like kwlaa yo’n, ɔ buman ndɛ kwlɛ.”​—ZƆB 34:12.

Ɲanmiɛn kpaloli Ɲanmiɛn sulɛ wafa nga be buɛ i su ato’n.

I wie yɛle Ɲanmiɛn sulɛ wafa nga be se kɛ Ɲanmiɛn fa ɲrɛnnɛn yi e su’n, nin be nga be suan nzaje sa mun nin alɛ’m be bo’n.

“I sɔ sran liɛ’m be tɔn be wun suɛn ngbɛn, nán min [Ɲanmiɛn] yɛ n sunmannin be-ɔ. M’an faman ndɛ m’an kleman be. Be ti nun ninnge nga be wun i’n, ɔ ti ato. Sa nga be kɛn i kɛ ɔ́ wá jú’n [...] be kpɛ be ti nun yɛ be kan-ɔn.”​—ZEREMI 14:14.

Zezi kleli kɛ sran wie’m be yo be wun kɛ be ti Ɲanmiɛn sran sa.

“Nán be kwlaa nga be flɛ min kɛ, ‘Min Min, min Min’ yɛ bé wlú ɲanmiɛn su lɔ Famiɛn diwlɛ’n nun-ɔn. Sanngɛ sran ng’ɔ yo min Si m’ɔ o ɲanmiɛn su lɔ’n i klun sa’n, i sɔfuɛ’n yɛ ɔ kwla wlu lɔ-ɔ. Cɛn sɔ nun’n, sran kpanngban bé wá sé min kɛ: ‘?E Min, e Min, ɔ dunman nun y’a ijɔman Ɲanmiɛn nuan? ?Ɔ dunman nun y’a fuanman mmusu mun? ?Yɛ ɔ dunman nun y’a yoman sa kekleekle kpanngban?’ Yɛ ń sé be kɛ: ‘N siman amun mlɔnmlɔn! An jaso min wun lɛ, amun mɔ amun diman mmla’n su’n!’”​—MATIE 7:21-23.