3 ?Ngue ti yɛ sran kpa’m be wun be ɲrun-ɔn?
?Ngue ti yɛ kosan sɔ’n ti cinnjin-ɔn?
Kɛ e wun kɛ sran kpa mun bɔbɔ be fɛ wie’n, e se e wun kɛ ɔ timan su. Sa sɔ’n ti’n, sran wie’m be waan ɔ timan cinnjin kɛ e yo sa kpa. Afin i kwlaa yoli-o é wún e ɲrun.
Bu ndɛ nga i sin nian
Sran wie’m be lafi su kɛ, kɛ sran wu’n be wu i ekun. Ɔ maan sɛ ɔ wu kpɛ blu’n, bé wú i kpɛ blu. Be waan sɛ sran kun yo sa kpa naan ɔ wu’n, kɛ bé wá wú i ekun’n, ɔ su wunmɛn i ɲrun. Sanngɛ sɛ ɔ yoli sa tɛ’n, ɔ́ wún i ɲrun. Be ndɛ sɔ’n kle kɛ kannzɛ bɔbɔ sran kun yo sa kpa andɛ’n, sanngɛ sɛ ɔ yoli sa tɛ wie laa’n, saan ɔ́ wún i ɲrun. Sanngɛ yo, ...
-
?Sɛ sran nga be wuli i ekun’n i wla kpɛnman sa ng’ɔ yoli i laa’n su’n, nn ngue ti yɛ ɔ wun i ɲrun yɛ?
-
?Sɛ like wie mɔ e yoli i laa’n ti’n é tɔ́ tukpacɛ annzɛ é yó asidan’n, nn ngue ti yɛ e mian e ɲin naan i sɔ sa’m b’a ɲanman e-ɔ?
A KWLA SI NUN KPA EKUN
Kɔ jw.org su naan ko nian video ng’ɔ suan ?Ngue ti yɛ Ɲanmiɛn yaci sran’m be lɛ mɔ be wun ɲrɛnnɛn-ɔn?
Ndɛ nga Biblu’n kan’n
E su afɛ’n timan fɔ mɔ Ɲanmiɛn su tu e-ɔ.
Kpɛ sunman’n, nán e sa nun sa-ɔ. Wie liɛ’n, kɛ sa sɔ’n jú’n nn e o lɛ. I ti yɛ ɔ ɲan e-ɔ.
“Wanndilɛ i akatua’n ɔ timan be nga be wun kpɛ’n be liɛ titi, kwlalɛ’n kusu timan safuɲrɛn’m be liɛ titi. Nán cɛn kwlaa yɛ ngwlɛlɛfuɛ’n ɲɛn i nuan nun aliɛ di-ɔ. Ngwlɛlɛfuɛ’n yoman aɲanbeunfuɛ cɛn ngba. Nán be nga be si sa’n yɛ be man be kɔmin su cɛn ngba-ɔ. Afin kɛ blɛ’n fa ti bɔ sa’m be fa ju’n, i su like yɛ be wun i-ɔ.”—AKUNNDANFUƐ’N 9:11.
Kɛ mɔ e ti sa tɛ yofuɛ’n ti’n e wun e ɲrun.
Kpɛ sunman’n, sran ng’ɔ yo “sa tɛ’n” i yɛ be flɛ i sa tɛ yofuɛ-ɔ. Sanngɛ Biblu’n se kɛ i sran kpa mun-o, i sran tɛ mun-o, e kwlaa e ti sa tɛ yofuɛ. Afin be wuli e sa tɛ’n nun.
“Sa tɛ nun yɛ be wuli min-ɔn, afin sa tɛ nun yɛ min nin wunnzɛli min-ɔn.”—JUE MUN 51:7.
Kɛ mɔ e ti sa tɛ yofuɛ’n ti’n, e wun ɲrɛnnɛn dan.
Kɛ mɔ e ti sa tɛ yofuɛ’n ti’n, e nin e Yifuɛ’n e afiɛn sacili. Sanngɛ nɛ́n i ngba-ɔ. E nin e wiengu mun e kwlá tranman fɛfɛ, e buman akunndan kpa, yɛ e saci asiɛ’n. I sɔ’n ti’n, ɲrɛnnɛn dan kpa tɔ klɔ sran’m be kwlaa be su.
“Kɛ min waan ń yó sa kpa’n, sa tɛ’n jin min bue.”—RƆMUNFUƐ MUN 7:21.
“Ninnge nga Ɲanmiɛn yili be’n, be kwlaa be fɛfɛ, yɛ be kwlaa be wun ɲrɛnnɛn.”—RƆMUNFUƐ MUN 8:22.
