?Sran kun annzɛ like wie yɛ ɔ siesie e ɲrun lɔ sa mun-ɔn?
Sran kaka be bu i kɛ aolia nun sran kun annzɛ like wie yɛ ɔ siesie e ɲrun lɔ sa mun-ɔn. I sɔ’n ti’n, be yo ninnge wie mun naan aolia nun sran sɔ’n annzɛ like sɔ’n yo naan be liɛ yo ye.
LIKE NGA SRAN KAKA BE YO’N
BE NIAN NZRAAMA MUN BE YI WUNNZUE: Sran kaka be waan kɛ be wu sran kun’n, wafa nga nzraama’m be ti siesiewa cɛn sɔ’n nun’n, ɔ yi ninnge nga sran sɔ’n wá yó be cɛn wie lele’n be nglo. Ɔ maan be sie be su be nga be nian nzraama be yi wunnzue’n be nuan bo. I liɛ’n, bé sí sa ng’ɔ́ wá jú be su’n ɔ nin like ng’ɔ fata kɛ be yo naan sa sɔ’n w’a ɲanman be’n. Annzɛ be yo sɔ naan bé sí like nga be kwla yo naan be liɛ w’a yo ye’n.
BE KƆ BE NGA BE TI WUN ASE’N BE SIN: Sran wie’m be liɛ’n, kwlaa naan b’a yo like kun’n be kɔ be nga be ti wun ase’n be sin. I liɛ’n, sɛ like nga be waan bé yó’n ɔ́ yó ye annzɛ ɔ su yoman ye’n, bé wún i wlɛ. Be bu i kɛ sɛ be yo sɔ’n yɛ like kwlaa nga be yo’n, ɔ́ yó ye-ɔ. Asa ekun’n, be jran ndɛ nga sran sɔ’m be kan kle be’n su yɛ be fa ajalɛ-ɔ.
BE SƆ BE NANNAN NGA BE WULI’N: Sran wie’m be sɔ be nannan nga be wuli’n ɔ nin amuin wie mun. Afin be bu i kɛ be kwla sasa be annzɛ be kwla yra be su. Be flɛ bla kun kɛ Vanin. * Ɔ tran Viɛtinamun. Ɔ seli kɛ: “N buli i kɛ sɛ n sɔ min nannan nga be wuli’n, ń ɲán muae kpɛkun min mma’m be liɛ yó ye.”
BE BU I KƐ KƐ SRAN WU’N Ɔ KACI SRAN UFLƐ: Sran wie’m be waan kɛ sran kun wu’n, be wu i ekun. Kpɛkun kɛ ɔ wu’n be wu i ekun. Yɛ i sɔ’n leman kpɛ bo. Asa ekun’n, be waan sa nga be ju e su andɛ’n, sɛ be ti kpa-o, sɛ be ti tɛ-o, be fin like nga e yoli be ka naan b’a wu e’n.
Sran wie’m be lafiman ninnge nga e kannin be ndɛ lɛ’n be su. Sanngɛ be yo ninnge uflɛ wie mɔ be nin ninnge sɔ’m be kɔ likawlɛ-ɔ. I wie yɛle kɛ be kɔ wunnzue yifuɛ mun nin kɔmiɛnfuɛ’m be sin. Be se be wun kɛ kɔlɛ’n sran sɔ’m be kwla uka be naan b’a si be ɲrun lɔ sa mun.
?WAFA SƐ YƐ I BO’N GUA-Ɔ?
?Be nga be yo i sɔ ninnge mun’n, be liɛ yo ye sakpa?
Maan e fa e ɲin e sie i sa ng’ɔ juli Viɛtinamun lɔ bian kun su’n, i su. Be flɛ i kɛ Awo. Ɔ ɔli wunnzue yifuɛ mun nin be nga be ti wun ase’n be sin kpɛ sunman. Asa’n, ɔ sɔli i nannan nga be wuli’n. ?Kɛ ɔ yoli i kwlaa sɔ’n, i bo’n guali sɛ? I bɔbɔ tɛli su kɛ: “Min sika’n kwlaa wieli min sa nun. I ti’n, n ma fali kalɛ. Asa’n, ndɛ wa tɔli min awlo’n nun. I kwlaa ngalɛ ti’n, ngokɔɛ’n kunnin min kpo.”
Be flɛ bian kun ekun kɛ Kiminngin. Ɔ tran Taiwanin. I kusu ɔli wunnzue yifuɛ nin be nga be ti wun ase’n be sin wie. Asa’n, ɔ sɔli i nannan nga be wuli’n yɛ ɔ lafili su kɛ kɛ sran kun wu’n be wu i ekun. Sanngɛ kɛ ɔ wa buli ninnge sɔ’m be su akunndan kpa’n, ɔ seli kɛ: “N wunnin i wlɛ kɛ ninnge sɔ’m be sansan be wun kpɛkun be ti sukusuku. Asa’n, n sieli i nzɔliɛ kɛ ndɛ nga wunnzue yifuɛ’m be kan’n, be dan lika be kpɛnman su. Be nga be waan kɛ sran kun wu’n be wu i ekun’n, be ndɛ’n kusu ti sukusuku wie. ?Afin sɛ ɔ wla kpɛnman sa nga a yoli be ka naan b’a wu wɔ’n be nun wie fi su’n, á yó sɛ naan w’a kaci ɔ sa naan ɔ liɛ w’a yo ye?”
“N wunnin i wlɛ kɛ ninnge sɔ’m be sansan be wun kpɛkun be ti sukusuku.”—KIMINNGIN, Ɔ TRAN TAIWANIN
Kɛ Awo nin Kiminngin be sa’n, sran kaka be wunnin i wlɛ kɛ nzraama mun annzɛ e nannan nga be wuli mun annzɛ like uflɛ fi kwlá siesieman e ɲrun lɔ sa mun. Ɔ maan be kwlá ukaman e naan e liɛ w’a yo ye. ?Sanngɛ i sɔ’n kle kɛ like fi kwlá ukaman e naan e liɛ w’a yo ye?
Sran sunman be bu i kɛ sɛ be di suklu dan’n annzɛ be ɲan sika kaka’n, be liɛ yó ye. ?Sanngɛ kɛ be yoli sɔ’n, i bo’n guali sɛ?
^ ndɛ kpɔlɛ 6 Ndɛ nga ɔ nin i sin liɛ’m be nun’n, be kacili sran wie’m be dunman’n.
^ ndɛ kpɔlɛ 16 Ndɛ sɔ’n wo Ɲanmiɛn Ndɛ’n nun. Ɔ o Galasifuɛ Mun 6:7 nun. Sran wie’m be kan ndɛ kunngba’n be se kɛ: “Sɛ a lua gbɔlu’n, a su timan mankun. Sɛ a lua able kusu’n, a su kpɛman awie.”
Ninnge wie mɔ be kwla yo ɔ fɛ ekun'n
SASAFUƐ TRANWLƐ'N
Nguan’n nin wie’n be su ndɛ nga Biblu’n kan’n
?Be wu be o lɔ? ?Be nga be wuli’n be o nin?
