I wafa kunngba’n, sɛ é kwlá se’n, nzue dan kpa kun su wa tɔ. Zezi seli kɛ sa sɔ’n yɛle ‘ɲrɛnnɛn dan’n.’ (Matie 24:21) E lemɛn i yowlɛ, afin ɔ́ jú sakpasakpa. Sanngɛ e kwla yo like kun naan y’a fite nun. ?Like sɔ’n yɛle benin?

Kɛ Zezi kán Ɲanmiɛn ndɛ oka’n su lɔ’n, ɔ seli sran’m be kɛ: “Amun dun mmua kunndɛ Ɲanmiɛn Sielɛ’n nin i sa nuan su sɛsɛsɛ yolɛ’n titi.” (Matie 6:33) ?Sanngɛ wafa sɛ yɛ e kwla nanti ndɛ sɔ’n su-ɔ?

Maan amun dun mmua kunndɛ Ɲanmiɛn Sielɛ’n. Kɛ be se kɛ e dun mmua kunndɛ Ɲanmiɛn Sielɛ’n i bo’n yɛle kɛ ɔ fata kɛ ɔ yo e cinnjin tra like kwlaa. (Matie 6:25, 32, 33) ?Ngue ti-ɔ? Afin klɔ sran’m be kwlá yoman naan sa nga be o mɛn’n nun’n be wie mlɔnmlɔn. Ɲanmiɛn Sielɛ’n kunngba cɛ yɛ ɔ kwla siesie mɛn’n nun sa mun-ɔn.

Maan amun kunndɛ i sa nuan su sɛsɛ yolɛ’n. ?Ngue ti yɛ ɔ fata kɛ e mian e ɲin naan e nanti Ɲanmiɛn i mmla’m be su-ɔ? Ɔ fata kɛ e yo sɔ afin sɛ e bɔbɔ e fa e tiaun ajalɛ’n, i bo’n gúa tɛ mán e. (Ɲanndra Mun 16:25) Asa ekun’n, sɛ e nanti Ɲanmiɛn i mmla’m be su’n, i klun jɔ́ e wun, yɛ e bɔbɔ é ɲán su ye.—Ezai 48:17, 18.

Maan titi amun dun mmua kunndɛ Ɲanmiɛn i Famiɛn i Diwlɛ’n nin i sa nuan su sɛsɛsɛ  yolɛ’n. Zezi seli kɛ sran wie’m be ɲin kpá like ng’ɔ ti cinnjin’n su. Afin bé wá bú i kɛ sɛ be ɲan sika kaka’n, i sɔ’n sásá be. Wie’m be kusu bé wá kókó ninnge’m be ti dan. I sɔ’n ti’n, be su kunndɛman Ɲanmiɛn Sielɛ’n.—Matie 6:19-21, 25-32.

Sanngɛ be nga be suan Ɲanmiɛn Sielɛ’n i bo’n, Zezi tali be nda kɛ bé ɲán ninnge nga be sa mian be wun andɛ’n. Kpɛkun e ɲrun lɔ’n bé ɲán su ye kpanngban wie.—Matie 6:33.

Klisifuɛ klikli’m be kleli kɛ be dun mmua kunndɛ Ɲanmiɛn Sielɛ’n nin i sa nuan su sɛsɛsɛ yolɛ’n. Ɔ nin i sɔ ngba’n, be wunnin afɛ wie. Sanngɛ Ɲanmiɛn sasali be. ?Wafa sɛ?

Be nga be nantiman Ɲanmiɛn i mmla’m be su’n be wunnin afɛ wie mun. Sanngɛ afɛ sɔ’m be to fuannin Zezi i sɔnnzɔnfuɛ mun. Asa ekun’n, kɛ mɔ be lafi Ɲanmiɛn Sielɛ liɛ’n su kpa’n ti’n, i sɔ’n ukali be naan b’a jran sa’m be ɲrun kekle. Ɲanmiɛn kusu mannin be ‘wunmiɛn ng’ɔ tra klɔ sran liɛ’n.’—2 Korɛntifuɛ Mun 4:7-9.

Zezi seli kɛ e “dun mmua kunndɛ Ɲanmiɛn Sielɛ’n.” Klisifuɛ klikli’m be nantili ndɛ sɔ’n su. Yɛle kɛ kan nga be o lɛ’n be boli Ɲanmiɛn Sielɛ’n i jasin fɛ’n kleli sran kwlaa. (Kolɔsufuɛ Mun 1:23) ?Sran wie’m be yo sɔ andɛ?

Nanwlɛ, Zoova i Lalofuɛ’m be si kɛ ɔ ka kan’n, Ɲanmiɛn Sielɛ’n wá núnnún klɔ sran’m be awa mun. I sɔ’n ti’n, be tu be klun be nanti ndɛ nga Zezi kannin’n su. Ɔ seli kɛ: “Bé wá bó Ɲanmiɛn Sielɛ’n i jasin fɛ’n nga mɛn wunmuan’n nun, naan be ti i nvlenvle’m be kwlaa be nun. I sin yɛ mɛn’n wíe-ɔ.”—Matie 24:14.

?Yɛ amun li, ngue yɛ amún yó-ɔ? É wlá amún fanngan kɛ amun nian Klisifuɛ nga be trannin Maseduanin klɔ nga be flɛ i kɛ Bere’n su’n be ajalɛ’n su. Kɛ akoto Pɔlu boli Ɲanmiɛn Sielɛ’n i jasin fɛ’n kleli be’n, be sɔli nun “ndɛndɛ kpa.” Kpɛkun be ‘niannin Ɲanmiɛn Ndɛ’n nun kpa’ naan bé nían sɛ ndɛ nga be tili’n ti nanwlɛ-o. I sin’n, be nantili like nga be kleli be’n su.—Sa Nga Be Yoli’n 17:11, 12.

Amun kusu amun kwla nian be ajalɛ’n su wie. Sɛ amun dun mmua kunndɛ Ɲanmiɛn Sielɛ’n nin i sa nuan su sɛsɛsɛ yolɛ’n titi’n, i sɔ’n sásá amun andɛ. Yɛ e ɲrun lɔ’n, amún trán fɔundi nun, yɛ srɛ su kunman amun kun.