Ndɛ ng’ɔ sinnin lɛ nun’n, e fali e ɲin sieli i ninnge wie’m be su. Yɛ ninnge sɔ’m be kle e weiin kɛ Ɲanmiɛn tɛkɛli Siewlɛ’n ɲanmiɛn su lɔ naan Zezi Klisi yɛ ɔ ti i su famiɛn’n niɔn.

Kɛ Ɲanmiɛn sieli Zezi famiɛn’n, like nga Zezi yoli’n, Biblu’n kɛn i ndɛ. Yɛle kɛ ɔ kannin Satan nin i mmusu’m be bo ɲanmiɛn su lɔ. Ɔ maan siɛn’n, asiɛ’n su wa ngunmin yɛ be kwla yo be ninnge mun-ɔn. Sa nga ti yɛ kɛ ɔ fɛ i afuɛ 1914 nun e wun e ɲrun’n, i kun yɛ ɔ o lɛ-ɔ.—Sa Nglo Yilɛ 12:7, 9.

Zezi ti Ɲanmiɛn Siewlɛ’n i su Famiɛn. Yɛ kannzɛ mɛn’n su yo tɛ kɔ i ɲrun’n, sanngɛ ɔ yo ninnge wie mun uka sran mun asiɛ wunmuan’n su. I wie yɛle kɛ ɔ seli i sɔnnzɔnfuɛ’m be kɛ bé wá klé sran’m be Biblu’n nun like asiɛ wunmuan’n su. I sɔ’n ti’n andɛ’n, sran kaka be suan Biblu’n nun like yɛ be mian be ɲin be nanti su cɛn kwlaa. (Ezai 2:2-4) Sran miliɔn kaka be wunnin i wlɛ  kɛ ɔ fataman kɛ be junman’n yo be cinnjin tra like kwlaa. Asa ekun’n, be mian be ɲin naan be awlobo tranlɛ’n w’a yo fɛ, yɛ be faman be wla kwlaa guaman aɲanbeun ninnge’m be su. Sran sɔ’m be suan like nga be kwla yo naan be mɛn dilɛ’n w’a yo kpa andɛ’n. Asa ekun’n, be mian be ɲin naan Ɲanmiɛn i Famiɛn’n w’a sie be wie.

Kannzɛ Zezi ti Famiɛn ɲanmiɛn su lɔ’n, sanngɛ klɔ sran’m be awa’m be te sie sran mun asiɛ’n su wa. Ɲanmiɛn seli Zezi kɛ: “Kɔ ɔ kpɔfuɛ’m be afiɛn naan sie be.” (Jue Mun 110:2) Ɔ maan ɔ ka kan’n, Zezi wá núnnún i kpɔfuɛ’m be kwlaa. Kpɛkun ɔ́ dé be nga be kunndɛ kɛ Ɲanmiɛn sie be’n.

Blɛ sɔ nun’n, Ɲanmiɛn Sielɛ’n wá yó ninnge nga mun:

• Ɔ́ núnnún Ɲanmiɛn sulɛ wafa ng’ɔ timan su’n. Ɲanmiɛn sulɛ wafa nga b’a kleman sran mun Ɲanmiɛn i su ndɛ nanwlɛ’n, mɔ be ti’n sran’m be wun be ɲrun’n, bé núnnún mlɔnmlɔn. Biblu’n fa Ɲanmiɛn sulɛ wafa ng’ɔ timan su’n sunnzun tekle bla. Yɛ i nunnunlɛ’n ɔ́ bó sran kpanngban be nuan.—Sa Nglo Yilɛ 17:15, 16.

• Ɔ́ núnnún klɔ sran’m be awa mun. Ɲanmiɛn Sielɛ’n wá núnnún klɔ sran’m be famiɛn diwlɛ’m be kwlaa.—Sa Nglo Yilɛ 19:15, 17, 18.

• Ɔ́ núnnún klunwifuɛ mun. ?Be nga be fa sa tɛ yolɛ’n be cici be ti mɔ be kplinman su kɛ Ɲanmiɛn i Famiɛn’n sie be’n be liɛ’n yó sɛ? Biblu’n se kɛ: “Klunwifuɛ’m be liɛ’n, bé núnnún be asiɛ’n su.”—Ɲanndra Mun 2:22.

• Ɔ́ núnnún Satan nin i mmusu mun. Satan nin i mmusu’m be wie fi su kwlá “lakaman nvlenvle’m be nunfuɛ’m be kun.”—Sa Nglo Yilɛ 20:3, 10.

 ?Kɛ Ɲanmiɛn Sielɛ’n wá yó i kwlaa sɔ’n, i su ye benin yɛ be nga be kplin su kɛ ɔ sie be’n bé ɲɛ́n i-ɔ?

Like nga Zezi wá yó’n, ɔ́ trá like nga klɔ sran’m be famiɛn dilɛ’n nun’n be yoli’n leleele. Ɔ nin sran 144.000 yɛ bé dí famiɛn-ɔn. Ɲanmiɛn kpali sran sɔ mun asiɛ’n su wa. Yɛ bé yó maan Ɲanmiɛn klun sa’n kpɛ́n su asiɛ’n su wa. (Sa Nglo Yilɛ 5:9, 10; 14:1, 3) ?Sanngɛ ngue like yɛ Ɲanmiɛn Sielɛ’n wá yó mán sran mun-ɔn?

• Tukpacɛ’n nin wie’n be su tranman lɛ kun. “Sran fi su seman kɛ: ‘N kpinndinman.’” Yɛ “wie’n su tranman lɛ kun.”—Ezai 33:24; Sa Nglo Yilɛ 21:4.

• Sran’m bé dí fɔundi, yɛ srɛ su kunman be kun. “Fɔundi nga ɔ mma’m bé wá dí’n,ɔ́ yó dan.” Yɛ “be tinuntinun bé trán be viɲin nin be figie waka’m be bo, yɛ sran fi su wlaman be ɲin nglonglo kun.”—Ezai 54:13; Mise 4:4.

• Sran’m bé ɲán junman kpa bé dí. “Min sran mɔ n kpali be’n, bé ɲán be sa nuan ninnge’m be su ye dan.” —Ezai 65:22, 23.

• Ɔ́ síesíe asiɛ’n i ye. “Aawlɛ flɛnnɛn’n nin asiɛ kee’n bé bó sró, yɛ lika kpɛtɛkplɛɛ’n i klun wá jɔ́, ɔ́ wá bó nɲrɛ kɛ safran’n sa.”—Ezai 35:1.

• Ɔ́ klé sran mun like ng’ɔ fata kɛ be yo naan b’a ɲan nguan m’ɔ leman awieliɛ’n. “Kɛ ɔ ko yo naan b’a ɲan nguan m’ɔ leman awieliɛ’n, ɔ ti cinnjin kɛ be si wɔ mɔ ɔ kunngba cɛ yɛ a ti Ɲanmiɛn’n, ɔ nin sran nga a sunmɛnnin i’n mɔ yɛle Zezi Klisi’n.”—Zan 17:3.

Ɲanmiɛn kunndɛ kɛ amun ɲan ninnge sɔ’m be su ye wie. (Ezai 48:18) I sɔ’n ti’n, ndɛ ng’ɔ ba lɛ’n, ɔ́ wá klé like ng’ɔ fata kɛ amun yo naan amun a ɲan suyralɛ sɔ mun’n.