“Maan ɔ Sielɛ’n i blɛ’n ju”—Srɛlɛ kun mɔ sran miliɔn kaka be si i’n
?Amun a srɛ Ɲanmiɛn le kɛ ɔ yo naan i Sielɛ’n i blɛ’n ju? Kɛ ɔ fɛ i laa lele andɛ’n, kɛ sran miliɔn kaka bé srɛ́ Ɲanmiɛn’n be se kɛ: “Maan ɔ Sielɛ’n i blɛ’n ju.” ?Sanngɛ ngue ti yɛ sran’m be srɛ Ɲanmiɛn sɔ-ɔ? Yɛle kɛ Zezi seli i sɔnnzɔnfuɛ’m be kɛ be srɛ naan Ɲanmiɛn Sielɛ’n i blɛ’n ju.
Ɲanmiɛn Sielɛ’n i su ndɛ nga Zezi kannin’n, i klikli nun’n i sɔnnzɔnfuɛ’m b’a wunmɛn i ngba i wlɛ. Cɛn kun’n, be usɛli i kɛ: “?E Min, dɔ nga su yɛ á wá yó naan famiɛn dilɛ’n sɛ i sin Izraɛli nvle’n nun-ɔn?” Sanngɛ Zezi w’a kleman be blɛ trele kun sa. Atrɛkpa’n, i sɔ’n boli be nuan. (Sa Nga Be Yoli’n 1:6, 7) ?I sɔ’n kle kɛ sran fi kwlá wunman Ɲanmiɛn Sielɛ’n i su ndɛ’n i wlɛ le? Cɛcɛ, nɛ́n i sɔ-ɔ!
Sasafuɛ Tranwlɛ’n nga nun’n, é wá tɛ́ kosan nga be lɔngɔ su yɛ’n be su:
?Ngue yɛle Ɲanmiɛn Sielɛ’n?
?Ngue ti yɛ e mian Ɲanmiɛn Sielɛ’n i wun-ɔn?
?Wan yɛ ɔ ti Ɲanmiɛn Sielɛ’n i su famiɛn’n niɔn?
?Blɛ benin nun yɛ ɔ́ wá síe asiɛ’n niɔn?
?Ngue yɛ Ɲanmiɛn Sielɛ’n wá yó-ɔ?
?Ngue ti yɛ ɔ fata kɛ e suan Ɲanmiɛn Sielɛ’n i bo dɔ nga su-ɔ?
Ninnge wie mɔ be kwla yo ɔ fɛ ekun'n
NINNGE CINNJIN NGA BIBLU’N KLE BE’N
?Ngue yɛ be flɛ i Ɲanmiɛn Sielɛ’n niɔn?
I nun mɔ Zezi kán Ɲanmiɛn ndɛ’n, ɔ kannin Ɲanmiɛn Sielɛ’n i ndɛ trali like kwlaa. I afuɛ ya kpanngban yɛ, sran’m be srɛ maan Sielɛ’n i blɛ’n ju.
