Sran wie’m be usa be wun sɛ Ɲanmiɛn i nuan Ndɛ’n kacili-o. Sanngɛ Ɲanmiɛn nuan ijɔfuɛ Ezai seli kɛ “Nyanmiɛn’n i ndɛ’n ɔ tran lɛ tititi.” (Ezai 40:8) ?Ngue ti yɛ e kwla lafi su kɛ Ɲanmiɛn i ndɛ ng’ɔ kɛnnin i laa’n yɛ ɔ te o lɛ andɛ-ɔ?

Ɲanmiɛn le tinmin yɛ ɔ kwla yo maan i nuan Ndɛ’n ka lɛ titi. Laa kpa nun’n, Ɲanmiɛn nuan ijɔfuɛ’m be klɛli Ɲanmiɛn Ndɛ’n fluwa wie’m be su. Yɛ fluwa sɔ’m be cɛman naan b’a saci. Kɛ ɔ ko yo naan ndɛ nga be klɛli i fluwa sɔ’m be su’n w’a mlinman’n, sran wie’m be klɛli be nun ndɛ’n fluwa uflɛ su. Kɛ be ko wie i klɛ’n, be fa ndɛ ng’ɔ o laa fluwa liɛ’n su’n be sunnzun nga be klɛli’n naan bé nían sɛ be nun ndɛ’n ti kun sɛsɛsɛ-o. Sanngɛ kɛ mɔ fɔ o e kwlaa e nun’n ti’n, fluwa klɛfuɛ sɔ’m be nun wie’m be sa fɔnnin kan.

Fluwa nga laa’n be klɛli Ɲanmiɛn Ndɛ’n su’n be wunnin be nun kpanngban kpa. Ɔ maan kɛ be fa fluwa sɔ mun sunnzun be wiengu’n, be kwla wun fluwa nga be nun ndɛ’n timan su’n.—Sɛ amun kunndɛ kɛ amún sí ndɛ sɔ’n nun kpa ekun’n, amun wɔ jw.org su naan an kanngan ndɛ akpasua nga be flɛ i kɛ “La Bible a-t-elle été modifiée ou falsifiée?” nun.

I wie yɛle fluwa ɲɔnɲɔnwa nga be wunnin be jenvie m’ɔ ti njin nzue klakla’n i wun lɛ afuɛ 1947 nun’n. Ɲanmiɛn Ndɛ’n i bue wie mɔ be klɛli be w’a di afuɛ 2.000 tra su’n be o fluwa sɔ’m be nun. ?Kɛ fluwa sifuɛ’m be fali fluwa sɔ’m be nun ndɛ’n be sunnzunnin Ɲanmiɛn Ndɛ nga e le i andɛ’n, ngue yɛ be sieli i nzɔliɛ-ɔ?

Fluwa sifuɛ’m be wunnin i kɛ ndɛ ng’ɔ o lalafuɛ fluwa sɔ’m be nun’n, ɔ nin Ɲanmiɛn Ndɛ’n nga e le i andɛ’n be ti kun. * Ndɛ sɔ’n kle kɛ Ɲanmiɛn yoli like kwlaa naan y’a kwla ɲɛn i nuan ndɛ’n.

I sɔ’n ti’n, andɛ’n kɛ e kanngan Ɲanmiɛn Ndɛ’n nun’n, e kwla lafi su kɛ i nuan ndɛ’n yɛ ɔ o nun sakpasakpa-ɔ. Siɛn’n, maan e kan like nga Ɲanmiɛn nuan ijɔfuɛ’m be ndɛ nga be kannin’n, ɔ kle e Ɲanmiɛn su’n i ndɛ.