Ɲanmiɛn wawɛ’n wla e fanngan naan y’a kwla jran kekle sa’n kwlaa ɲrun
Ɲanmiɛn wawɛ’n wla e fanngan naan y’a kwla jran kekle sa’n kwlaa ɲrun
“Sran ng’ɔ wla min fanngan’n ti’n, n kwla like kwlaa yo.”—FIL. 4:13, NW.
1. ?Ngue ti yɛ Zoova i sufuɛ’m be wun ɲrɛnnɛn sunman ɔn?
BE KLELI Zoova i sufuɛ’m be ɲrɛnnɛn kpɛ sunman. Wie liɛ’n, fɔ m’ɔ o e nun’n annzɛ mɛn tɛ nga e o nun’n ti’n, e wun ɲrɛnnɛn. Wie liɛ kusu’n, kpɔlɛ m’ɔ o be nga be su Ɲanmiɛn’n ɔ nin be nga be sumɛn i’n be afiɛn’n ti’n, Zoova i sufuɛ’m be wun ɲrɛnnɛn. (Bob. 3:15) Kɛ Ɲanmiɛn yili klɔ sran lele’n, ɔ ukɛli i sufuɛ kpa mun naan b’a kwla jran kekle ɲrɛnnɛn nga be Ɲanmiɛn sulɛ’n ti’n ɔ tɔ be su’n be ɲrun. Asa ekun’n, ɔ ukali be naan kɛ be wiengu’m be kle be ɲrɛnnɛn’n b’a kwla jran kekle wie. Yɛ ɔ ukali be naan b’a jran kekle ɲrɛnnɛn wafa kwlaa be ɲrun. I wawɛ’n kwla wla e fanngan naan y’a jran kekle sɔ wie.
Kɛ e Ɲanmiɛn sulɛ’n ti be kle e yalɛ’n
2. ?Ngue ti yɛ sran kun i Ɲanmiɛn sulafilɛ’n ti’n be kle i yalɛ ɔ? ?Yɛ yalɛ klelɛ sɔ’n kwla yo wafawafa sɛ?
2 Like nga ti yɛ sran kun i Ɲanmiɛn sulafilɛ’n ti’n be kle i yalɛ’n, yɛle kɛ bé yó naan like ng’ɔ lafi su’n, ɔ yaci i su lafilɛ naan nán maan i Ɲanmiɛn sulɛ’n wafa’n ɔ tru. Yalɛ klelɛ’n i wafa’n sɔnnin. Wie liɛ’n sran’m be fa gblɛ’n yɛ be kle e yalɛ ɔ. Wie liɛ kusu’n, be yo i trele. Wafa nga Satan fa kle e yalɛ’n, Biblu’n fa sunnzun wafa nga asɔmɔli nin ɔnda’n be fa tra nnɛn’n.—An kanngan Jue Mun 91:13 nun.
3. ?Wafa sɛ yɛ be kle e yalɛ kɛ nga asɔmɔli fa tra nnɛn’n sa ɔ? ?Yɛ wafa sɛ yɛ be yo i kɛ ɔnda’n i liɛ’n sa ɔ?
3 Kpɛ sunman’n, Satan kleli Zoova i sufuɛ’m be yalɛ trele kɛ asɔmɔli’m fa yo’n sa. Ɔ kwla yo be kpokokpoko yolɛ, annzɛ be bisua wlalɛ, annzɛ kusu jasin fɛ’n bolɛ’n junman’n i tanninlɛ. (Jue. 94:20) Fluwa Annuaire m’ɔ kan sa nga e blɛ liɛ’n su Zoova i Lalofuɛ’m be yo’n i ndɛ’n, ɔ kan yalɛ klelɛ wafa sɔ’n i ndɛ wie. Lika sunman nun’n, sran wie mɔ be nantiman mmla fi su’n, be kleli Ɲanmiɛn i sufuɛ’m be ɲrɛnnɛn. Be nga be tɔn be wun suɛn kɛ be ti Klistfuɛ’n be su kpɛn mun nin politikifuɛ mun yɛ be wlawlali sran sɔ’m be nun wie mun ɔn. I sɔ ɲrɛnnɛn mɔ be kleli Ɲanmiɛn i sufuɛ mun’n ti’n, be nun wie’m be yacili i sulɛ. Kɛ ɔnda wie sa’n, Satan fa gblɛ’n kle e yalɛ wie. Yɛle kɛ ɔ wlawla sran mun naan akunndan tɛ bla be ti nun, naan be yo i klun sa. Ɔ́ yó sɔ naan e kpɔnzɔ Ɲanmiɛn ninnge’m be nun naan e nin Ɲanmiɛn e afiɛn’n saci. Sanngɛ Ɲanmiɛn wawɛ’n kwla uka e naan y’a jran yalɛ klelɛ wafa nɲɔn sɔ’n be ɲrun kekle.
4, 5. ?Like kpafuɛ nga e kwla yo naan y’a kwla jran kekle yalɛ klelɛ’n i ɲrun’n yɛle benin? An fa sa kun be yiyi nun.
4 Nán sa wafawafa nga be kwla tɔ e su cɛn wie lele’n be akunndan mɔ é bú i sa trilili’n, i ti yɛ maan é kwlá jrán kekle ɔ. Ndɛ ng’ɔ ti nanwlɛ’n, yɛle kɛ ɲrɛnnɛn nga cɛn wie lele bé klé e’n, é kwlá simɛn i. Ɔ maan sɛ i sɔ’n ti e koko’n, ɔ ti kɛ e su kle e wun yalɛ ngbɛn sa. Sanngɛ ɔ le like kun mɔ e kwla yo ɔ. Biblu’n kannin sran kpanngban mɔ b’a kpɔciman Zoova le’n be ndɛ. Kɛ sran wie’m be buli sran sɔ’m be su sa’m be su akunndan’n, ɔ ukali be naan b’a kwla jran yalɛ klelɛ’n i ɲrun kekle. Asa ekun’n, like nga Zezi kleli’n ɔ nin i ajalɛ’n be su akunndan bulɛ’n, ɔ ukali be wie. I sɔ’n yoli maan be kloli Zoova dan kpa. Yɛ klolɛ sɔ’n kusu ukali be naan b’a jran kekle yalɛ klelɛ wafawafa’n kwlaa ɲrun.
5 E niaan bla nɲɔn mɔ be fin Malawi’n be su ndɛ wie yɛ. Sran kaka wie’m be kunndɛli kpa kɛ be to politiki anuannzɛ’m be fluwa’m be wie. I sɔ’n ti’n, be boli aniaan bla sɔ’m be bolɛ kpa, kpɛkun be yili be wun tralɛ’n yɛ be seli be kɛ be nin bé lá kekle’n nun. Sran sɔ’m be kpɛli be gblɛ kɛ Betɛli lɔfuɛ mun bɔbɔ be toli politiki anuannzɛ fluwa sɔ’n wie. ?Wafa sɛ yɛ aniaan bla’m be tɛli be su ɔ? Be seli kɛ: “Zoova kunngba cɛ yɛ e su i ɔ. Ɔ maan sɛ aniaan nga be o Betɛli lɔ’n be toli fluwa sɔ’n wie’n, e ndɛ nunman nun. Kannzɛ amún kún e bɔbɔ o, e su kpɔciman Zoova le!” Kɛ aniaan bla’m be trali be awlɛn sɔ’n, be yacili be nun.
6, 7. ?Wafa sɛ yɛ Zoova wlɛ i sufuɛ’m be fanngan naan b’a kwla jran yalɛ klelɛ’n i ɲrun kekle ɔ?
6 Akoto Pɔlu sieli i nzɔliɛ kɛ, kɛ Klistfuɛ nga be o Tɛsaloniki lɔ’n be fali ndɛ nanwlɛ’n su’n, be “wunnin nyrɛnnɛn dan kpa.” Sanngɛ ɔ nin i sɔ ngba’n, ‘Nyanmiɛn Wawɛ’n maan be klun jɔli.’ (1 Tɛs. 1:6) Laa nin andɛ’n, Klistfuɛ kpanngban mɔ be kleli be yalɛ mɔ be jrannin kekle’n be waan, kɛ bé klé be ɲrɛnnɛn kpa’n, be wla gua ase. Be wla m’ɔ gua ase sɔ’n kusu ti ninnge nga Ɲanmiɛn wawɛ’n maan sran yo’n i nun kun. (Gal. 5:22) I sɔ’n kusu uka be naan be akunndan’n w’a sannganman. Kɛ kekle tɔ Zoova i sufuɛ’m be su’n, ɔ fɛ i wunmiɛn’n m’ɔ fa di junman’n wla be fanngan naan b’a kwla jran kekle, naan b’a fa ajalɛ kpa sakpa. *
7 Sran nga be fa be ɲin be sie e su’n, kɛ be wun wafa nga Ɲanmiɛn i sufuɛ’m be jran kekle yalɛ klelɛ’n i ɲrun mɔ be kpɔcimɛn i’n, ɔ yo be ɲɛnmɛn. Ɔ yo be kɛ wunmiɛn nga Zoova i Lalofuɛ’m be ɲɛn i’n, ɔ tra klɔ sran liɛ’n sa. Kusu kɛ ɔ ti sɔ sakpa ɔ. Akoto Piɛli se e kɛ: “Sɛ be kpɛ amun nzowa Krist dunman b’ɔ o amun su’n ti’n, amun liɛ su ti ye, afin Nyanmiɛn Wawɛ’n b’ɔ lɛ nyrun’n ɔ nin amun wo nun!” (1 Piɛ. 4:14) Kɛ mɔ Ɲanmiɛn i mmla’m be su falɛ’n ti yɛ be kle e yalɛ’n, ɔ kle kɛ Ɲanmiɛn i klun jɔ e wun. (Mat. 5:10-12; Zan 15:20) Nanwlɛ kɛ e wun kɛ Zoova ra e su kɛ nga sa’n, ɔ man e aklunjuɛ dan!
Kɛ e wiengu’m be mianmian e’n
8. (a) ?Ngue ti yɛ maan Zozie nin Kalɛbu be kwla jrannin be wiengu nga be mianmian be’n be ɲrun kekle ɔ? (b) ?Ngue yɛ Zozie nin Kalɛbu be ajalɛ’n kle e ɔ?
8 Yalɛ klelɛ wafa uflɛ kun m’ɔ fata kɛ Klistfuɛ’m be jrɛn i ɲrun kekle’n, yɛle sa tɛ mɔ e wiengu’m be mianmian e kɛ e yo’n. Sanngɛ Zoova i wawɛ’n le kwlalɛ tra akunndan nga sran’m be bu’n. I sɔ’n ti’n, e kwla jran be nga be yo e finfin mɔ be bua e su ato’n, ɔ nin be nga be waan bé mían e naan e yo be klun sa’n, be ɲrun kekle. I wie yɛle kɛ, i nun mɔ be sunmannin Zozie nin Kalɛbu kɛ be ko kpla Kanaan lika’n be nian’n, kɛ be sali be sin be bali’n, b’a kanman ndɛ kunngba nga be wiengu blu’m be kannin’n wie. ?Ngue ti yɛ b’a yoman sɔ ɔ? Ɲanmiɛn wawɛ’n m’ɔ sieli be’n ti ɔ. Ɔ maan b’a buman “akunndan” kunngba nga be wiengu’m be buli’n wie.—An kanngan Kalɛ 13:30 nin Kalɛ 14:6-10, 24 nun.
9. ?Ngue ti yɛ ɔ nin i fataman kɛ Klistfuɛ’m be yo kɛ be nga’m be sa ɔ?
9 I kunngba’n, Ɲanmiɛn wawɛ’n wlali Zezi i akoto’m be fanngan maan be ɲin yili Ɲanmiɛn trali be nga sran’m be bu i kɛ be yɛ be kle Ɲanmiɛn su like kpafuɛ’n. (Yol. 4:21, 31; 5:29, 32) Sran sunman be kloman kɛ be wiengu’m be bu be fɔ annzɛ be nin be ɲan ndɛ. I ti’n, like nga be wiengu sɔ’m be yo’n, i wie yɛ be yo ɔ. Ɔ ti su kɛ kpɛ sunman’n, ɔ fata kɛ Klistfuɛ kpa’m be jran sa ng’ɔ ti kpa’n i sin. Sanngɛ fanngan nga Ɲanmiɛn i wunmiɛn’n wla be’n ti’n, sɛ be yoman kɛ be wiengu’m be sa’n, srɛ kunman be. (2 Tim. 1:7) Like kun mɔ i nun’n, ɔ fataman kɛ e yo kɛ e wiengu’m be sa’n, maan e fa e ɲin e sie su e nian.
10. ?Kekle benin yɛ ɔ kwla tɔ Klistfuɛ wie’m be su ɔ?
10 Sɛ gbanflɛn nin talua wie’m be wun kɛ be janvuɛ wie w’a yo sa kun m’ɔ nin Ɲanmiɛn Ndɛ’n kɔman likawlɛ’n, ajalɛ ng’ɔ fata kɛ be fa’n, ɔ kwla yo kekle man be. Ɔ kwla yo be kɛ sɛ be ko kan kle asɔnun kpɛnngbɛn mun’n, nn b’a kpɛ be janvuɛ’n i bo waka sa. I sɔ’n ti’n, be fia sa sɔ’n su. Kusu nn i sɔ’n yoman be nun wie fi i wun sa ye. Sa tɛ yofuɛ kun kwla miɛn i janvuɛ’m be kɛ be fiɛ i sa tɛ’n su. Nanwlɛ, nán gbanflɛn nin talua’m be ngunmin yɛ i sɔ sa’n ju be su ɔ. Kpɛnngbɛn wie mun bɔbɔ’n, sɛ be janvuɛ wie annzɛ be awlobofuɛ wie yo sa tɛ wie’n, ɔ kwla yo kekle man be kɛ be ko kan kle asɔnun kpɛnngbɛn mun. ?Sanngɛ sɛ be mianmian Klistfuɛ kpa kun sɔ’n, ngue yɛ ɔ fata kɛ ɔ yo ɔ?
11, 12. ?Sɛ asɔnun’n nunfuɛ kun se e kɛ e fia sa tɛ ng’ɔ yoli’n su’n, like kpafuɛ nga e kwla yo’n yɛle benin? ?Ngue ti ɔ?
11 Maan e bu sa nga i akunndan e nian. Maan ɔ yo e kɛ aniaan bian Kofi m’ɔ te yo gbanflɛn’n, w’a wun kɛ bian nin bla nna nga be fa fite nzra nun’n, yɛ i janvuɛ Kuasi m’ɔ ti asɔnun’n nunfuɛ wie’n, ɔ niɛn i titi sa ɔ. Ɔ maan Kofi se Kuasi kɛ sa ng’ɔ su yo i lɛ’n timan kpa. Sanngɛ Kuasi i ndɛ nunman nun. Kɛ Kofi se Kuasi kɛ ɔ ko kan kle asɔnun kpɛnngbɛn mun’n, ɔ tɛ i su kɛ: “Sɛ a ti min janvuɛ sakpasakpa’n, a su kan kleman be.” ?Sɛ Kofi kan’n, ɔ nin i janvuɛ’n be afiɛn’n kwla saci ti’n, ɔ maan ɔ fata kɛ srɛ kun i? Kusu Kofi kwla se i wun kɛ sɛ i bɔbɔ ko kan kle asɔnun kpɛnngbɛn mun’n, Kuasi kwla se kɛ ɔ su bua ato. Sɛ Kofi fia ndɛ’n su’n, i sin sa ng’ɔ́ bá’n ɔ kwla yo tɛ kpa. Kuasi nin Zoova be afiɛn’n kwla saci mlɔnmlɔn. Ɔ ti kpa kɛ Kofi i wla kpɛn ndɛ yɛ’n su. Yɛle kɛ: “Srongble’n i agualiɛ’n ti-man kpa. Sran ng’ɔ fɛ i wun wlɛ i Anannganman sa nun’n i liɛ’n, kɛ ɔ o lɛ’n yɛ ɔ wo-ɔ.” (Nya. 29:25) ?Ɔ maan ajalɛ benin ekun yɛ Kofi kwla fa ɔ? Klolɛ su ɔ nin Kuasi be kwla koko sa sɔ’n i su yalɛ ekun. Ɔ fata kɛ ɔ yo yakpafuɛ naan w’a kwla yo sɔ. Atrɛkpa’n, Kuasi kplín su kɛ be koko i sa tɛ’n i su yalɛ. Kɛ bé kókó yalɛ’n, ɔ fata kɛ Kofi wla Kuasi i fanngan kɛ ɔ ko wun asɔnun kpɛnngbɛn’m be wun. Kpɛkun ɔ kwla se i kɛ sɛ ɔ́ dí le nɲɔn kun naan Kuasi w’a ko wunman be wun’n, i bɔbɔ ɔ́ kó kán klé be.—Sau. 5:1.
12 Sɛ i sɔ sa liɛ’n tɔ e su’n, atrɛkpa’n i klikli nun’n, e ɲin nga e miɛn i kɛ é úka e janvuɛ’n ɔ su yomɛn i fɛ. Sanngɛ kɛ lika’n kɔ́ i ɲrun’n, ɔ kwla wun i wlɛ kɛ e yoli i ye. Sɛ be uka sran ng’ɔ yoli sa tɛ’n naan ɔ sɔ ukalɛ sɔ’n nun klanman’n, atrɛkpa’n ɔ́ lá e ase tititi. Afin e yoli yakpafuɛ, kpɛkun y’a yimɛn i ase le. ?Sanngɛ kɛ e seli asɔnun kpɛnngbɛn’m be kɛ be ukɛ i’n ti’n, sɛ i waan ɔ nin e diman kun mlɔnmlɔn’n, nn é kwlá sé kɛ i sɔ sran liɛ’n ti e janvuɛ kpa? Like kpa ng’ɔ fata kɛ e yo i titi’n, yɛle kɛ maan e yo naan Zoova m’ɔ ti e Janvuɛ kpafuɛ’n i klun jɔ e wun. Sɛ sa’n kwlaa nun’n, e dun mmua e bu Zoova i akunndan’n, sran uflɛ’m bé kló i. Kpɛkun kɛ mɔ e nin be e nanti seiin’n ti’n be ɲin yí e yɛ e nin be é káci janvuɛ kpa. Nán maan e yo naan mmusu’m be si Satan ɲan asɔnun’n nun wluwlɛ le. Nanwlɛ sɛ e yo sɔ’n, é bó Zoova i wawɛ’n i wla. Sanngɛ sɛ e mian e ɲin naan fiɛn w’a wluman asɔnun’n nun’n, nn Ɲanmiɛn wawɛ’n yɛ ɔ sie e ɔ.—Efɛ. 4:27, 30.
Sa wafawafa nga be tɔ e su’n
13. ?Ɲrɛnnɛn benin yɛ be tɔ Zoova i sufuɛ’m be su ɔ? ?Yɛ ngue ti yɛ i sɔ ɲrɛnnɛn sa’m be ju tikatika ɔ?
13 Ɲrɛnnɛn ng’ɔ tɔ sran su’n, ɔ ti fanunfanun. Ɔ kwla yo sika ndɛ. Ɔ kwla yo e junman m’ɔ saci’n. Ɔ kwla yo aunmuan dan m’ɔ fita’n annzɛ nzue dan m’ɔ tɔ saci lika’n, annzɛ asiɛ m’ɔ keje’n. Ɔ kwla yo e awlɛn su sran m’ɔ wu’n annzɛ tukpacɛ m’ɔ o e su tikatika’n, annzɛ kusu sa uflɛ wie mun. Kɛ mɔ ‘lika’n ti kekle’n’ ti’n, saan ɲrɛnnɛn wafawafa sɔ’n wie tɔ́ e su bɔɔ le. (2 Tim. 3:1) Sɛ i sɔ sa’n wie ɲan e’n, nán maan e akunndan’n sanngan. Afin, Ɲanmiɛn wawɛ’n kwla man e fanngan naan y’a jran kekle sa’n kwlaa ɲrun.
14. ?Ngue yɛ ɔ wlali Zɔbu i fanngan naan w’a kwla jran ɲrɛnnɛn nga be tɔli i su’n be ɲrun kekle ɔ?
14 Ɲrɛnnɛn wafawafa’m be tɔli Zɔbu su. I sa nun ninnge’m be fili i sa. I mma’m be kwlaa be wuli. I janvuɛ’m be wanndili i. Ɔ tɔli tukpacɛ kekle kpa. Kpɛkun i yi w’a lafiman Zoova su kun. (Zɔb 1:13-19; 2:7-9) Sanngɛ ɲrɛnnɛn blɛ’n sɔ’n nun’n, Zɔbu ɲannin fɔnvɔfuɛ kpa kun. Be flɛ i Elii. Elii i ndɛ ng’ɔ kannin’n, ɔ nin ndɛ kwlaa nga Zoova bɔbɔ kan kleli Zɔbu’n, i nun ndɛ cinnjin’n yɛ: “Bu Nyanmiɛn i abonuan sa’m be akunndan.” (Zɔb 37:14) ?Ngue yɛ ɔ ukali Zɔbu naan w’a jran sa nga be tɔli i su’n be ɲrun kekle ɔ? ?Yɛ ngue yɛ ɔ kwla uka e naan y’a jran e liɛ’m be ɲrun kekle wie ɔ? Sɛ e wla kpɛn junman fanunfanun nga Zoova i wawɛ’n dili’n be su naan e bu su akunndan’n, é kwlá jrán sa nga be tɔ e su’n be ɲrun kekle. (Zɔb 38:1-41; 42:1, 2) Atrɛkpa’n, e wla kpɛn blɛ wie mɔ be nun’n, e wunnin i kɛ e ndɛ lo Ɲanmiɛn’n be su. E ndɛ te lo i.
15. ?Ngue yɛ ɔ wlali akoto Pɔlu i fanngan naan w’a kwla jran kekle ɔ?
15 Akoto Pɔlu i Ɲanmiɛn sulafilɛ’n ti’n, ɲrɛnnɛn sa fanunfanun tɔli i su. (2 Kor. 11:23-28) ?Blɛ kekle sɔ’m be nun’n, ngue yɛ maan ɔ kwla yoli sran sɛsɛ mɔ i akunndan’n w’a sannganman ɔn? Kɛ m’ɔ lafili Zoova su m’ɔ srɛli i tankaan’n ti yɛ ɔ kwla yoli sɔ ɔ. Blɛ nga be kleli Pɔlu i ɲrɛnnɛn dan kpa mɔ atrɛkpa’n be kunnin i’n, i nun’n, ɔ klɛli i kɛ: “E Min’n yɛ ɔ jran min sin, yɛ ɔ wlali n fanngan yɛ maan n kwla kɛnnin i ndɛ’n kwlaa yɛ maan be kwlaa nga be ti-man Zuif’n be tili-ɔ. Ɔ deli min asɔmɔli’n i nuan nun.” (2 Tim. 4:17) Ɔ maan sa nga be juli Pɔlu bɔbɔ i su’n ti’n, ɔ kwla wlɛli i wiengu Klistfuɛ’m be fanngan kɛ nán be “koko sa fi su.”—An kanngan Filipfuɛ Mun 4:6, 7 nun. *
16, 17. Wafa nga Zoova wlɛ i sufuɛ’m be fanngan andɛ’n naan b’a jran kekle sa nga be tɔ be su’n be ɲrun’n, an fa sa kun yiyi nun.
16 Be nga be wunnin wafa nga Zoova niɛn i sufuɛ’m be lika’n be nun kun yɛle Rɔksana m’ɔ ti atin bofuɛ’n. Ɔ seli i junman su min’n kɛ ɔ mɛn i blɛ naan ɔ wɔ e nvle aɲia’n i bo. Bian’n tɛli i su ya su kɛ sɛ ɔ kɔ’n, ɔ́ tú i junman’n nun. Sanngɛ Rɔksana ɔli. Ɔ srɛli Ɲanmiɛn tankaan kpa naan nɛ́n i junman’n fi i sa. I sin’n, i wla guali ase. Kɛ aɲia’n wieli mɔ i aliɛ cɛnnin Kisie’n, i junman’n su min’n tuli i kɛ ng’ɔ fa kannin’n sa. Rɔksana i akunndan’n sanngannin kpa. Afin kannzɛ ɔ ɲanman sika junman sɔ’n nun kpa’n, sanngɛ ɔ fa suɛn i awlobofuɛ’m be bo. Yɛ ɔ wa srɛli Ɲanmiɛn ekun. Kpɛkun ɔ seli i wun kɛ sɛ Ɲanmiɛn niɛnnin i lika Ɲanmiɛn ninnge’m be nun aɲia’n bo lɔ’n, nn ɔ kwla niɛn i bɔbɔ ba’n i lika wie. Kɛ Rɔksana nánti kɔ́ awlo’n, ɔ wunnin kɛ be klɛli i lika kun kɛ be su kunndɛ junman difuɛ. Be nga be si mannzin dandan nga be fa kpa ninnge’n be nun junman di’n, yɛ be kunndɛ be ɔ. Sanngɛ ɔ ko klɛli i dunman. Junman sɔ’n i sunianfuɛ’n wunnin kɛ ɔ siman mannzin sɔ’m be nun junman di. Sanngɛ ɔ mannin Rɔksana i junman. Kpɛkun sika ng’ɔ ɲɛn i laa’n, ɔ ka kan naan siɛn’n liɛ’n w’a trɛ i kpɛ nɲɔn. Ɔ yoli Rɔksana kɛ Ɲanmiɛn w’a tɛ i srɛlɛ’m be su sa. Sanngɛ suralɛ dan kpafuɛ ng’ɔ ɲɛnnin i’n, yɛle kɛ ɔ kwla boli jasin fɛ’n kleli be ng’ɔ nin be di junman’n be nun kpanngban. Be nun sran nnun be sɔli nun klanman kpɛkun be wa yoli be batɛmu. I junman’n sunianfuɛ’n o be nun wie.
17 Wie liɛ’n, ɔ kwla yo e kɛ Ɲanmiɛn tɛman e srɛlɛ’m be su ndɛndɛ sa annzɛ ɔ tɛman e su kɛ nga e fa klo’n sa. Sɛ ɔ yo sɔ’n nn like kpa kun ti ɔ. Zoova si like sɔ’n. Sanngɛ e liɛ’n kɛ lika’n kɔ́ i ɲrun’n yɛ é wún i wlɛ ɔ. Like nga e kwla lafi su’n, yɛle kɛ Ɲanmiɛn sokpɛmɛn i gbanflɛn difuɛ le.—Ebr. 6:10.
Ɲrɛnnɛn nin lakalɛ’n be ɲrun kekle jranlɛ
18, 19. (a) ?Sɛ ɲrɛnnɛn tɔ e su’n, ngue ti yɛ e kwla lafi su kɛ é jrán kekle ɔ? (b) ?Wafa sɛ yɛ e kwla jran sa’m be ɲrun kekle ɔ?
18 Kɛ Zoova i sufuɛ’m be sa sin bubu be’n, mɔ be laka be mɔ be kle be yalɛ, mɔ be wiengu’m be mianmian be’n, ɔ boman be nuan. Mɛn nunfuɛ’m be kpɔ e. (Zan 15:17-19) Sanngɛ like kwlaa ng’ɔ kwla tanndan e Ɲanmiɛn sulɛ’n i ɲrun’n, i wawɛ’n kwla uka e naan y’a jrɛn i ɲrun kekle. Zoova su kplinman su kɛ sa ng’ɔ sɔnman e nun’n, ɔ tɔ e su. (1 Kor. 10:13) Ɔ su yaciman e, ɔ su kpɔciman e mlɔnmlɔn. (Ebr. 13:5) I nuan Ndɛ’n i su nantilɛ’n sasa e yɛ ɔ wla e fanngan. Asa ekun’n, blɛ nga e sa mian kpa’n, Ɲanmiɛn wawɛ’n kwla yo maan e wiengu Klistfuɛ’m be uka e.
19 Maan e kwlakwla e srɛ Ɲanmiɛn titi yɛ e suan Biblu’n nun like naan ɔ fɛ i wawɛ’n man e. Maan ‘e srɛ i kɛ ɔ man e fanngan i kwlalɛ dan b’ɔ lɛ-man wunsu’n ti, e srɛ i kɛ sa’n kwlaa nun e klun jɔ naan e kwla tra e anwlɛn [e] blu sa’m be su.’—Kol. 1:11.
[Ja ngua lɛ ndɛ mun]
^ Amun kwla wun i sɔ sa wie mun Sasafuɛ Tranwlɛ’n, afuɛ 2001, Mɛ 1 i bue 16 (blɔfuɛ nun), ɔ nin Réveillez-vous ! afuɛ 1993, Fevrie 8 i bue 21 nin 22 be nun.
^ Filipfuɛ Mun 4:13 (NW): “Sran ng’ɔ wla min fanngan’n ti’n, n kwla like kwlaa yo.”
?Amún tɛ́ su sɛ?
• ?Wafa sɛ yɛ e kwla siesie e wun naan y’a kwla jran yalɛ klelɛ’n i ɲrun kekle ɔ?
• ?Sɛ sran kun se e kɛ e fia sa tɛ kun su’n, ngue yɛ ɔ fata kɛ e yo ɔ?
• ?Ɲrɛnnɛn kwlaa ng’ɔ tɔ e su’n i nun’n, ngue su yɛ e kwla lafi ɔ?
[Kosan mun]
[Foto, bue 30]
?Ngue yɛ Zozie nin Kalɛbu be ajalɛ’n kle e ɔ?
[Foto, bue 31]
?Wafa sɛ yɛ e kwla uka e janvuɛ kun m’ɔ yoli sa tɛ’n niɔn?