?E kwla wun aolia nun sran mun?

KANNZƐ e nian ɲanmiɛn su lɔ lele’n, e su wunman aolia nun sran fi. Sɛ e sie e su’n, e su timan be wie fi i nɛn. Sanngɛ e kwla lafi su kɛ aolia nun sran’m be o lɛ sakpa. Be si ngwlɛlɛ kpa yɛ be le tinmin. Kpɛkun be tinuntinun be le dunman yɛ sran’n i wafa nga be ti’n, ɔ ti fanunfanun. Wie’m be yo e ye, sanngɛ wie’m be kunndɛ kɛ bé yó e tɛ. E ndɛ lo be kwlaa.

Ɲanmiɛn Kpli bɔbɔ’n ti aolia nun sran. (Zan 4:24) I dunman’n ti kunngba. Yɛ i dunman sɔ’n yo maan ɔ nin amuɛn’m be timan kun. I dunman’n yɛle Zoova. (Jue Mun 83:18, NW) * Jue tofuɛ’n klɛli i kɛ: “Afin [“Zoova,” NW] ɔ ti dan, ɔ nin manmanlɛ fata. Ɔ yo sro tra amuɛn’m be kwlaa. Afin nvle-nvlefuɛ’m be amuɛn’m be ti ato ninnge mun. Anannganman yɛ ɔ yili nglo lɔ nin-ɔn. Ɔ ti dan sakpa, ɔ nin sulɛ fata. Kan ɔ tran lɛ’n ɔ ti kpajawa yɛiin, yɛ ɔ yi i fanngan’n i nglo lɛ.”—Jue Mun 96:4-6.

Be wunnin Ɲanmiɛn Kpli aolia nun

Biblu’n se e kɛ: “Sran fi nian wun-man Nyanmiɛn le.” (Zan 1:18) E kwlá wunmɛn i wunnɛn’n i wafa’n nin i aɲrunɲan’n be wlɛ. Ɔ ti kɛ e su fa like ble annzɛ ɔkwlɛ é klé sran nga be wuli i aɲinsifuɛ’n sa. Like klefuɛ kpa’n ɔ fa ndɛ nga i wlɛ wunlɛ timan kekle’n ɔ yiyi sa kekleekle’m be nun. Kɛ Ɲanmiɛn yo sɔ ɔ. Biblu’n m’ɔ ti Ɲanmiɛn i nuan Ndɛ’n i nun’n, Ɲanmiɛn fa ninnge nga e kwla wun be’n ɔ fa yiyi nga e kwlá wunman be’n be nun, naan y’a kwla wun be wlɛ. Zoova yoli maan laa i sufuɛ kpa’m be wunnin aolia nun ninnge wie mun. Ɔ yoli sɔ naan ɔ́ fá úka e naan y’a wun wafa nga ɲanmiɛn su lɔ’n ti’n, ɔ nin wafa ng’ɔ fata kɛ e nin be nga be o lɔ’n e nanti’n, be wlɛ.

Aolia nun like kun mɔ Ɲanmiɛn maan i nuan ijɔfuɛ Ezekiɛli wunnin i’n i nun’n, Zoova i ɲrun’n i ɲanɲan’n ti kɛ sin nin like m’ɔ bo mianmian’n, ɔ nin yɛbuɛ kpa mɔ be flɛ i safiri’n, ɔ nin ɲanngondin sa. Aolia nun like uflɛ kun ekun nun’n, akoto Zan wunnin kɛ Zoova o i famiɛn bia’n su. Kpɛkun Zan seli kɛ: “I nyrun’n ti nyannyannyan kɛ yɛbuɛ bɔ be flɛ be zasp nin sarduani’n sa.” Ɔ kan guali su kɛ: “Nyanngondin b’ɔ ti nyannyannyan kɛ yɛbuɛ bɔ be flɛ i emɛrɔd sa’n, ɔ sin yia bia sɔ’n.” Wafa nga be fa kannin Zoova i ndɛ sɔ’n, ɔ kle e kɛ kan Zoova o lɔ’n i klanman liɛ’n be ɲɛnmɛn i wunsu. Kpɛkun lɔ’n yo ɲɛnmɛn yɛ ɔ ti fɔuun.—Sa Nglo Yilɛ 4:2, 3; Ezekiɛl 1:26-28.

Ɲanmiɛn nuan ijɔfuɛ Daniɛli kusu wunnin Zoova aolia nun wie. Ɔ wunnin kɛ “sran  [“anzi,” NW] akpinngbin be jinjin [Zoova] i nyrun lɛ.” (Daniɛl 7:10) Nanwlɛ, i sɔ liɛ’n i nianlɛ’n kwla yoli ɲɛnmɛn dan! Anzi kun i wunlɛ aolia nun bɔbɔ’n, ɔ yo sro, yɛ se kɛ anzi akpiakpi!

Biblu’n nun’n, be kannin anzi’m be ndɛ kpɛ ko ju 400. Be flɛ be akpasua wie’m be kɛ Serafɛn ɔ nin Seribɛn. Biblu’n nun’n, Glɛki nin Ebre ndɛ mma nga be kacili be kɛ “anzi’n,” be bo’n yɛlɛ “ngaliɛ difuɛ.” Ɔ maan, anzi’m be nin be wiengu’m be kwla koko yalɛ. Kpɛkun laa’n be nin klɔ sran’m be kokoli yalɛ. Nán klɔ sran nga be trannin asiɛ’n su laa’n yɛle anzi mun. Zoova dun mmua yili aolia nun sran sɔ mun lele naan w’a yi klɔ sran.—Zɔb 38:4-7.

Aolia nun like nga Daniɛli wunnin i’n nun’n, anzi’m be yiali kɛ bé nían like cinnjin kun. Daniɛli wunnin “like kun b’ɔ fa klɔ sran.” Ɔ wunngeli Zoova i famiɛn bia’n i wun lɔ yɛ “be fali kwlalɛ’n be mɛnnin, be mɛnmɛnnin i, yɛ be fali famiɛn diwlɛ’n be wlɛli i sa nun. Nvle-nvle’n kwlaa nin mɛnmɛn’n kwlaa be nunfuɛ mun bɔ be kan aniɛn wafa-wafa’n kwlaa’n, be suli i.” (Daniɛl 7:13, 14) ‘Like ng’ɔ fa klɔ sran’ m’ɔ le ɲrun kpa ɲanmiɛn su lɔ’n, yɛle Zezi Klist mɔ be cɛnnin i’n, mɔ be mɛnnin i atin kɛ ɔ sie asiɛ wunmuan’n. Ɔ cɛ kan’n, i sielɛ’n wá sín klɔ sran’m be awa’m be osu. Kpɛkun ɔ́ yó maan tukpacɛ nin awlabɔɛ’n yɛ sran mianmianlɛ’n nin yalɛ’n ɔ nin wie’n bɔbɔ bé wíe.—Daniɛl 2:44.

Ɔ ti weiin kɛ Zezi i famiɛn sielɛ’n yoli anzi kpakpa kpanngban sɔ mɔ be kunndɛ kɛ klɔ sran’m be di ye’n be fɛ. Sanngɛ kusu nán aolia nun sran’m be ngba yɛ ɔ yo be fɛ sɔ ɔ.

 Be ti Ɲanmiɛn nin klɔ sran’m be kpɔfuɛ

Kɛ Ɲanmiɛn yili klɔ sran klikli mun’n, anzi’m be nun kun kunndɛli kpa kɛ be su i. Ɔ maan i ɲin cili Zoova yɛ ɔ wa kacili Satan. Dunman sɔ’n i bo’n yɛle “ɲrun tanndanfuɛ.” Satan mɔ sɛ ɔ ti kɛ sa tɛ’n ti sran’n nn é sé kɛ yɛle i’n, ɔ tanndannin Zoova m’ɔ ti sran klofuɛ’n i ɲrun. Anzi wie’m be suli Satan su. Biblu’n flɛ be mmusu. Kɛ Satan sa’n, be kacili klɔ sran’m be kpɔfuɛ wie. Ɲrɛnnɛn ng’ɔ o asiɛ’n su’n i dan lika ɔ nin ndɛ kwlɛ dilɛ’n, ɔ nin tukpacɛ’n, ɔ nin yalɛ’n, ɔ nin alɛ’n be fin mmusu sɔ mun.

Be nga be tɔn be wun suɛn kɛ be ti Klistfuɛ’n, be kanman Satan i ndɛ be asɔnun’m be nun sunman nun kɛ laa’n sa kun. Kannzɛ ɔ ti sɔ’n, sanngɛ Biblu’n nun’n, Zɔb fluwa’n yi anzi ɲin keklefuɛ sɔ’n i sran’n i wafa ng’ɔ ti’n ɔ nin i klun sa’n be nglo. Ɔ se kɛ: “Le kun Nyanmiɛn i anzi’m be ɔli i nyrun, kpɛkuun Satan ɔli wie.” I sin’n, kɛ bé kán ndɛ’n, Satan tɔnnin Zɔbu i suɛn kɛ like ng’ɔ ɲɛn i Ɲanmiɛn sa nun’n ti yɛ ɔ su i ɔ. I waan ɔ́ klé kɛ ndɛ ng’ɔ kannin’n ti nanwlɛ. Ɔ maan ɔ kleli Zɔbu i ɲrɛnnɛn kpa. Ɔ kunnin i nnɛn nin i mma blu mun. I sin ɔ fali tukpacɛ tɛ wie guali Zɔbu i wunnɛn wunmuan’n su. Sanngɛ i kwlaa sɔ’n yoli ngbɛn. W’a kwlá kleman kɛ like mɔ Zɔbu ɲɛn i Ɲanmiɛn sa nun’n ti yɛ ɔ su i ɔ.—Zɔb 1:6-19; 2:7.

Sɛ lele nin andɛ Zoova yacili Satan nun kɛ ɔ yo i klunklo like’n, nán ngbɛn ti ɔ. Sanngɛ ɔ su yacimɛn i nun sa trilili. Ɔ cɛ kaan sa’n, bé wá núnnún mmusu’m be si Satan’n. Ɲanmiɛn w’a dun mmua w’a fɛ i sɔ’n i wun ajalɛ klikli’n. I su ndɛ’n o Sa Nglo Yilɛ fluwa’n nun. E kɛnngɛn i kɛ: “Alɛ tɔli nyanmiɛn su lɔ. Misɛl [Zezi mɔ be cɛnnin i’n] nin i anz mun be nin dragɔn [Satan] nin i anz mun be kunnin. Dragɔn’n w’a nyan-man jranwlɛ, b’a mɛn-mɛn i nin i anz’m be lika nyanmiɛn su lɔ kun. Be kannin dragɔn sroesroe dan sɔ’n nin i anz’m be bo guali be asiɛ’n su wa. I yɛ be flɛ i wuo lalaa, nin mmusu’m be si, nin Satan nin-ɔn, i yɛ ɔ laka mɛn wunmuan nunfuɛ’m be kwlaa nin-ɔn.”—Sa Nglo Yilɛ 12:7-9.

Maan e sie i nzɔliɛ kɛ be waan Satan “laka mɛn wunmuan nunfuɛ’m be kwlaa.” Ɔ fa ato’n wlɛ i Ɲanmiɛn sulɛ’n nun naan sran’m be kaci be sin be si Zoova nin i Ndɛ’n. I ato’m be nun cinnjin kun yɛle kɛ, kɛ sran wu’n, ɔ kɔ aolia nun lika’n nun lɔ. I ato sɔ’n i su ndɛ’n ti fanunfanun. I wie yɛle kɛ sran ble mɛn’n nun nin Azi lɔ’n, sran sunman be bu i kɛ, kɛ sran wu’n, ɔ kɔ i nannan’m be sin blɔlɔ lɔ. Ɲrɛnnɛn lika’n ɔ nin lika nga be waan be kɔ lɔ be ko kplo be wun fiɛn’n be gua’n, be su like nga sran’m be kle’n, be taka akunndan nga be waan be wu be o lɔ’n, i su.

?Kɛ be wu’n be kɔ ɲanmiɛn su?

?Yɛ sran kpa’m be kwlaa be ɲanmiɛn su kɔlɛ ndɛ nga asiɛ wunmuan’n su sran akpinngbin kpanngban be lafi su’n nin? Ɔ ti su kɛ sran kpa wie’m be kɔ ɲanmiɛn su. Sanngɛ be juman sran akpingbinngbin kpanngban nga be sinnin wie’n nun’n be nun. Biblu’n yi i nglo kɛ ‘bé kpɔ́’ sran 144.000 ‘be ti asiɛ’n su.’ Kpɛkun bé kó ‘trán [Nyanmiɛn] nyrun,’ yɛle kɛ bé kó jrɛ́n i ɲrun, yɛ “bé síe sran mun asiɛ’n su wa.” (Sa Nglo Yilɛ 5:9, 10; 14:1, 3) Be nin klɔ sran’n mɔ yɛle Zezi Klist’n, bé káci awa kun m’ɔ o ɲanmiɛn su lɔ’n, i nun sran mun. Awa sɔ’n yɛle Ɲanmiɛn Sielɛ’n. Awa sɔ’n núnnún Satan nin i mmusu mun. Kpɛkun ɔ́ yó maan asiɛ’n káci mɛn klanman. Kɛ ɔ́ kɔ́ i ɲrun’n, bé cɛ́n be nga be wuli’n be nun sunman, kpɛkun bé kwlá trán asiɛ m’ɔ́ káci mɛn klanman’n i su tititi.—Lik 23:43.

Ndɛ’n i atabo’n yɛle kɛ sran kpanngban kpa be o aolia nun lika’n nun lɔ. Be nun ng’ɔ le ɲrun tra be ngba fatifati’n, yɛle Ɲanmiɛn Zoova m’ɔ ti like kwlakwla Yifuɛ’n. Anzi akpingbinngbin kpanngban be su i tititi. Anzi wie mɔ be su Satan su’n, be kacili be sin be sili Zoova. Junman nga be di’n yɛle sran’m be lakalɛ. Asa ekun’n, “be kpɔli” sran wie’m “be ti,” yɛle kɛ be kpali be asiɛ’n su wa kɛ be ko di junman wie mun ɲanmiɛn su lɔ. E si sran sɔ’m be nuan. Kɛ mɔ e si sɔ siɛn’n, maan e nian aolia nun sran nga e nin be e kwla koko yalɛ’n ɔ nin wafa nga e nin be e kwla yo sɔ’n.

[Ja ngua lɛ ndɛ’n]