?Wan mun yɛle aolia nun sran mun?

Blɔfuɛ’m be lɔ’n, bla oke kun wluli asɔnun sua kun nun. Srɛlɛ ɲanman o i sa nun, kpɛkun aɲinyiɛ su, ɔ koto Mali i waka sran kun bo. E sran ble mɛn’n nun wa’n, awlobofuɛ wie’m be gua jinin ase be osufuɛ kun mɔ be ɲin yi i kpa’n i asieliɛ’n su. Amlɛnkɛn’m be lɔ’n, gbanflɛn kun kpɛ srɛ nun kpɛkun ɔ tran koun bu akunndan. I waan ɔ́ yó sɔ naan like ng’ɔ bu i kɛ ɔ ti i anzi m’ɔ sɛsɛ i’n, ɔ nin i bé kókó yalɛ. Azi mɛn’n nun lɔ’n, be plɛti kun ra fluwa wie mɔ be fa yoli ninnge wafawafa wie mun’n. Ɔ yo sɔ fa mɛn i nannan’m be wunmiɛn mun.

?WAFA sɛ yɛ sran ngalɛ’m be aeliɛ’m be ti kun ɔn? Yɛle kɛ be kwlaa be lafi su kɛ sran wie’m be o aolia nun lika’n nun lɔ naan be nin be kwla ijɔ. Kpɛkun be bu i kɛ i sɔ sran’m be kwla ɲan ta dan kpa klɔ sran’m be mɛn dilɛ’n su. Nanwlɛ, nán andɛ sa yɛ sran’m be boli i sɔ sa’n i su lafilɛ bo ɔ, yɛ i sɔ’n kusu boman e nuan. Ng’ɔ bo e nuan’n, yɛle be nga be tran aolia nun lika’n nun’n be su ndɛ fanunfanun nga be sansan be wun mɔ sran’m be kan’n.

Ɲanmiɛn flɛfuɛ’m be Ɲanmiɛn nga be su i’n ti kunngba. Be flɛ i Ala. * Be nga be tɔn be wun suɛn kɛ be ti Klistfuɛ’n be waan Ɲanmiɛn ti atre nsan. Yɛle kɛ kun ti Siɛ, kun ti Ba yɛ kun ti Wawɛ, kpɛkun be nsan’n be ti sran wunmuan kun. Be nga be flɛ be Ɛndu’n, be liɛ’n, ninnge nga be lafi be su mɔ be waan be ti be Ɲanmiɛn’n, be ju akpi tra su. Sran uflɛ’m be waan aolia nun sran’m be o nnɛn nin waka’m be nun, ɔ nin yɛbuɛ nin nzue ba wie’m be nun. Wie’m be kusu’n, anzi nin mmusu mun yɛ wunmiɛn nin amuin fanunfanun’m be su ndɛ nga be kɛn i fluwa nin flimu ɔ nin televiziɔn’m be nun’n, i su yɛ be fa ɔ.

Amuin nin ninnge ng’ɔ fata kɛ be su be’n, be su ndɛ nga be kan’n sɔnnin yɛ be sansan be wun. I kunngba’n, wafa ng’ɔ fata kɛ sran kun nin be koko yalɛ’n, i su ndɛ’n kusu sɔnnin yɛ be sansan be wun wie. E si kpa kɛ i sɔ’n ndɛ’n ngba kwlá yoman nanwlɛ. Maan e bu sa nga i akunndan e nian. Ka naan y’a flɛ sran kun i telefɔnu nun’n, ɔ fata kɛ e si sran sɔ’n. Kpɛkun ɔ fata kɛ e lafi su kɛ sran sɔ’n o lɛ sakpasakpa naan sɛ e flɛ i’n, ɔ́ sɔ́ su. Sɛ e siman sran sɔ’n naan e waan é flɛ́ i’n, ɔ ti e wun yalɛ klelɛ ngbɛn. Ng’ɔ ti tɛ’n, yɛle kɛ sɛ e flɛ sran kun m’ɔ ti gblɛfuɛ’n, ɔ kwla yo tɛ man e.

?Ɔ maan aolia nun sran’m be o lɛ sakpa? Biblu’n tɛ kosan sɔ’n su. Kpɛkun sran ng’ɔ nin i fata kɛ e nin i e koko yalɛ’n, ɔ nin i sa nun like nga e kwla ɲɛn i’n, ɔ yiyi nun kle e wie. Amun kanngan ndɛ nga bé bá lɛ’n be nun. Ndɛ nga Biblu’n kan’n, atrɛkpa’n, ɔ́ bó amun nuan.

[Ja ngua lɛ ndɛ’n]