Nán maan e klo sa tɛ’n mlɔnmlɔn
Nán maan e klo sa tɛ’n mlɔnmlɔn
“A [Zezi] klo-man sa tɛ’n mlɔnmlɔn.”—EBR. 1:9.
1. ?Sran klolɛ’n i su ndɛ benin yɛ Zezi kannin ɔn?
KƐ ZEZI KLIST kán sran klolɛ i cinnjin m’ɔ ti’n i ndɛ’n, ɔ seli i sɔnnzɔnfuɛ’m be kɛ: “Ḿ mán amun mmla kun ekun: an klo amun wiengu. Klolɛ nga n fa kloli amun’n, amun kusu an fa klo amun wiengu sɔ. Sɛ an klo amun wiengu’n, i sɔ’n nun yɛ sran’m be kwlaa bé sí kɛ an ti n sɔnnzɔnfuɛ-ɔ.” (Zan 13:34, 35) Zezi seli i sɔnnzɔnfuɛ’m be kɛ be tu be klun be klo be wiengu. Be wiengu klolɛ sɔ’n yɛ bé fá síe be nzɔliɛ ɔ. Asa ekun’n, Zezi wlali be fanngan seli kɛ: “An klo amun kpɔfuɛ mun, yɛ be nga be wua amun amuɛn’n, an yra be nguan. Be nga be kpɔ amun’n, an yo be kpa, yɛ be nga be yo amun tɛtɛ bɔ be kle amun yalɛ’n, an srɛ Nyanmiɛn kɛ ɔ yo be kpa.”—Mat. 5:44.
2. ?Ngue yɛ ɔ fata kɛ Klist i sɔnnzɔnfuɛ’m be kpɔ i ɔ?
2 Nán be wiengu klolɛ’n i ngunmin yɛ Zezi kleli i sɔnnzɔnfuɛ mun ɔn. Sanngɛ ɔ kleli be like ng’ɔ fata kɛ be kpɔ i’n wie. Be kannin Zezi ndɛ seli kɛ: “A klo sa ng’ɔ ti kpa’n, a klo-man sa tɛ’n mlɔnmlɔn.” (Ebr. 1:9; Jue. 45:8) I sɔ’n kle kɛ nán sa kpa’n i klolɛ ngunmin, i su yɛ ɔ fata kɛ e ka ɔ. Sanngɛ maan e kpɔ sa tɛ’n wie. Maan e sie i nzɔliɛ kɛ akoto Zan seli kɛ: “Sran kwlaa ng’ɔ yo sa tɛ’n, wuun w’a tɔn Nyanmiɛn mmla’n, afin sa tɛ’n yɛ ɔ ti mmla’n i tɔnlɛ nin-ɔn.”—1 Zan 3:4.
3. ?Ninnge benin nun yɛ é wá wún wafa nga e kwla kle kɛ e kpɔ sa tɛ’n niɔn?
3 E mɔ e ti Klistfuɛ’n, ɔ fata kɛ e usa e wun kɛ: ‘?N kpɔ sa tɛ’n?’ Maan e nian wafa nga ninnge nnan nga be lɔngɔ su yɛ nun’n, e kwla kle kɛ e kpɔ sa tɛ’n: (1) wafa nga é bú nzan i nɔnlɛ ngboko’n, (2) wafa nga é bú bae dilɛ’n ninnge mun’n, (3) wafa nga é bú bian nin bla kunndɛlɛ sukusuku’n, yɛ (4) wafa nga é bú be nga be klo sa tɛ’n.
Nán maan e nɔn nzan e tratra su
4. ?Ngue ti yɛ kɛ Zezi sé sran’m be kɛ nán be yo nzan nɔnfuɛ’n, ɔ ijɔli weinwein ɔn?
4 Blɛ wie nun’n Zezi nɔnnin nzan. I sɔ’n m’ɔ yoli’n kle kɛ nzan’n fin Ɲanmiɛn. (Jue. 104:14, 15) Sanngɛ w’a faman nzan nɔnlɛ’n w’a cicimɛn i ti le. (Nya. 23:29-33) I sɔ’n ti’n, kɛ Zezi sé sran’m be kɛ nán be fa be wun wla i sɔ aeliɛ nun’n, ɔ ijɔli weinwein. (An kanngan Lik 21:34 nun.) Nzan’n i nɔnlɛ dan’n kwla fa sran kun yi i sa tɛtɛ kpa nun. I sɔ’n ti’n maan akoto Pɔlu klɛli i kɛ: “Nán an nɔn nzan bo, afin ɔ yo sran wannzo, sanngɛ maan Nyanmiɛn Wawɛ’n sie amun mlɔnmlɔn.” (Efɛ. 5:18) Asa kusu’n, ɔ wlali bla kpɛnngbɛn’m be su nun kpongbongbo kɛ “nán maan be yo nzan nɔnfuɛ.”—Tit 2:3.
5. ?Be nga be nɔn nzan ng’ɔ kwla bo’n, kosan benin yɛ ɔ fata kɛ be fa usa be wun ɔn?
5 Sɛ e waan é nɔ́n nzan ng’ɔ kwla bo’n, maan e fa kosan nga mun e usa e wun: ‘?Wafa nga Zezi bu nzanbɔɛ’n, kɛ m bu i sɔ wie ɔ? ?Sɛ ɔ fata kɛ m man sran kun nzan nɔnlɛ’n i su afɔtuɛ’n, kɛ ń íjɔ’n, min wun kpája min? ?Kɛ sa wie ti’n, min klun titi min annzɛ ngokɔɛ o min su’n, n nɔn nzan naan min wla’n fi min wun? ?Le mɔcuɛ kun nun sa’n, n nɔn nzan’n i tikatika annzɛ n nɔn i ngboko? ?Kɛ sran kun se min kɛ n nian min wun su naan nán n nɔn nzan dan’n, wafa sɛ yɛ n sɔ i ndɛ’n nun ɔn? ?N kpalo i ndɛ’n annzɛ n fɛ i wun ya bɔbɔ?’ Sɛ e nɔn nzan i ngboko’n, e ngwlɛlɛ’n kán ase. Yɛ e su kwlá faman ajalɛ ngwlɛlɛ su kɛ laa’n sa kun. Klist i sɔnnzɔnfuɛ’m be nian be wun su kpa naan like fi w’a saciman be akunndan’n.—Nya. 3:21, 22.
Nán e wunnge bae dilɛ’n i wun
6, 7. (a) ?Zezi yoli Satan nin i mmusu’m be sɛ? (b) ?Ngue ti yɛ andɛ bae dilɛ wafawafa’n w’a tru dan ɔn?
6 I nun nga Zezi wo asiɛ’n su wa’n, ɔ nin Satan nin i mmusu’m b’a diman mlɔnmlɔn. Kɛ Satan yili i wun nglo mɔ i waan ɔ́ yó naan Zezi kpɔci Ɲanmiɛn’n, Zezi kpaloli i nuan ndɛ’n. (Lik 4:1-13) Kusu’n, ninnge nga be ti kɛ aya sa mɔ be o bui bo’n, mɔ be kwla saci i’n, ɔ sieli be nzɔliɛ kpa. Kpɛkun ɔ jrannin be ɲrun kekle. (Mat. 16:21-23) Be nga mmusu’m be kle be yalɛ’n, Zezi yoli maan be ɲannin be ti mmusu klunwifuɛ sɔ’m be sa nun.—Mar. 5:2, 8, 12-15; 9:20, 25-27.
7 Afuɛ nga be flɛ i kɛ 1914 nun’n, kɛ Zezi trannin famiɛn bia’n su’n, ɔ kannin Satan nin i mmusu mun mɔ be aeliɛ’n saci sran’n, be bo ɲanmiɛn su lɔ. I sɔ’n ti’n, Satan w’a fua kpa kɛ ‘ɔ́ láka mɛn wunmuan nunfuɛ’m be kwlaa.’ (Ngl. 12:9, 10) Ɔ maan, bae dilɛ wafawafa nga w’a tru yɛ’n, ɔ nin klolɛ nga sran’m be fa klo be’n, ɔ nin i fataman kɛ ɔ bo e nuan. ?Wafa sɛ yɛ é sásá e wun ninnge sɔ’m be lika ɔ?
8. ?E ɲin su yiyilɛ’n i su kosan benin yɛ ɔ fata kɛ e tinuntinun’n, e fa usa e wun ɔn?
8 Biblu’n kle weiin kɛ ɔ timan kpa kɛ e di bae annzɛ kusu e nin mmusu mun e san nun. (An kanngan Mmla’n 18:10-12 nun.) Andɛ, Satan nin i mmusu mun be sin ninnge kaka lika be saci sran’m be akunndan’n. Ninnge sɔ’m be nun’n, be yi bae dilɛ wafawafa’m be nglo. Ɔ kwla yo kɛ flimu annzɛ fluwa, annzɛ video nun ngowa kanlɛ ninnge mun sa. I sɔ’n ti’n, sɛ e waan é fá like kun é yíyí e ɲin su’n, maan e usa e wun kɛ: ‘?Anglo nga be sinnin lɛ nun’n, ninnge nga n fa yiyili min ɲin su’n, be yili aolia nun sran wie’m be aeliɛ’n i nglo nun? Ɔ kwla yo televiziɔn, annzɛ video nun ngowa kanlɛ ninnge mun, annzɛ fluwa, annzɛ kusu aɲinsuɛ yilɛ ninnge uflɛ nun. ?N wun i wlɛ kpa kɛ ɔ ti cinnjin kɛ n sasa min wun mmusu’m be aeliɛ’m be lika? ?Annzɛ kusu ɔ timan min cinnjin sɔ liɛ? ?Ninnge nga n fa yiyi min ɲin su’n, m’an bu wafa nga Zoova bu be’n i akunndan le? ?Sɛ n fali min sa n wlɛli i sɔ ninnge’m be nun’n, klolɛ nga n klo Zoova ɔ nin i mmla mun mɔ be ti kpa ngunmin’n, ɔ su min bo kɛ ndɛndɛ kpa, n yaci i sɔ aeliɛ’n?’—Yol. 19:19, 20.
Sa sukusuku i su ndɛ nga Zezi kannin’n maan ɔ yo e cinnjin
9. ?Wafa sɛ yɛ sran kun kwla fa sa tɛ atin’n niɔn?
9 Akunndan nga Zoova bu i bla nin bian nna su’n, Zezi kleli kɛ i klun jɔ su. Ɔ seli kɛ: “Kɛ Nyanmiɛn yí sran’n, ɔ yili yasua nin bla naan w’a se kɛ: ‘I sɔ’n ti yɛ maan yasua kpáci i si nin i nin yɛ ɔ́ fɛ́ i wun mɛntɛn i yi yɛ be nnyɔn’n bé káci sran wunmuan nin-ɔn.’ ?An nian kɛnngɛn-mɛn i le? Kɛ ɔ ko yo sɔ’n, be ti-man sran nnyɔn kun, sanngɛ be ti sran wunmuan. Ɔ maan like nga Nyanmiɛn kan be bo nun’n, nán maan sran fi ti be nun.” (Mat. 19:4-6) Zezi si kɛ like nga e nian’n ɔ kwla ɲan ta e awlɛn’n su. I ti kɛ ɔ́ klé sran’m be like oka’n su lɔ’n, ɔ seli be kɛ: “Amun tili i kɛ be seli kɛ: ‘Nán kunndɛ bla ɔ yi bo annzɛ bian ɔ wun bo.’ Sanngɛ n liɛ’n, ń kán klé amun kɛ, sran kwlaa ng’ɔ wun bla kun b’ɔ bu i kunndɛlɛ akunndan i anwlɛn nun’n, wuun w’a kunndɛ bla sɔ’n.” (Mat. 5:27, 28) Be nga be fa ndɛ nga Zezi kannin’n fa sie be sin’n, be o sa tɛ’n i atin’n su.
10. An fa sa kun kle kɛ sran kun kwla yaci bian nin bla nna nga be fa fite nzra nun’n, i nianlɛ.
10 Andɛ mɛn wunmuan nun’n, Satan wlawla sran mun maan be fa bian nin bla nna’n fite nzra nun. Ɔ klo kɛ sran’m be kunndɛ bian nin bla sukusuku. Be nga be nian bian nin bla nna nga be fa fite nzra nun’n, kɛ ɔ yo naan be akunndan’n tu i sɔ ninnge’m be su’n, ɔ ti kekle man be. I kpa bɔbɔ’n ninnge sɔ’m be nianlɛ’n kwla kaci be junman. Sa sɔ’n, i wie tɔli Klistfuɛ kun su. Ndɛ ng’ɔ kannin’n yɛ: “Laa’n, n fia n nian bian nin bla nna nga be fa fite nzra nun’n. Kɛ ń yó i sɔ’n, min akunndan’n nun lɔ’n, m buli i kɛ min mɛn dilɛ wafa sɔ’n, ɔ kanman min Zoova i sulɛ’n. Blɛ sɔ nun’n, n si kɛ i sɔ aeliɛ’n ti tɛ. Sanngɛ n seli min wun kɛ Ɲanmiɛn i klun te jɔ wafa nga n su i’n su.” ?Ngue yɛ ɔ ukali aniaan bian’n naan w’a wla i aeliɛ tɛ sɔ’n i ase ɔ? I bɔbɔ seli kɛ: “N kannin min aeliɛ sɔ’n i ndɛ kleli asɔnun kpɛnngbɛn mun. N nin a faman ajalɛ kun mɔ i kekle’n tra ngalɛ’n niɔn.” Kasiɛn su’n, aniaan bian’n kwla finnin aeliɛ tɛ sɔ’n nun fiteli. Ɔ maan i bɔbɔ seli kɛ: “Kɛ m ma yacili aeliɛ tɛ sɔ’n i mlɔnmlɔnmlɔn’n, min akunndan’n yacili min fɔ bulɛ.” Be nga be kpɔ sa tɛ’n, ɔ fata kɛ be kpɔ bian nin bla nna nga be fa fite nzra nun’n wie.
11, 12. ?Sɛ e waan é tí jue’n, wafa sɛ yɛ é klé kɛ e kpɔ sa tɛ’n niɔn?
11 Jue nga be to’n, i sin miziki’n ɔ nin i nun ndɛ’n kwla wluwlu e wun kpa lele ɔ kaci e klun akunndan’n. Nán kɛ miziki bɔbɔ ba sa’n ti tɛ ɔ. Afin Ɲanmiɛn yɛ ɔ mannin ɔn. I sulɛ nun bɔbɔ’n, be bo miziki. Yɛ i sɔ’n finman andɛ. (Tul. 15:20, 21; Efɛ. 5:19) Sanngɛ Satan i mɛn’n tɛ nga nun’n, jue ng’ɔ kan bian nin bla kunndɛlɛ sukusuku’n, i ndɛ’n su yɛ be fa sran’m be ɲin sie ɔ. (1 Zan 5:19) ?Wafa sɛ yɛ é wún i wlɛ sɛ jue nga e tie’n, ɔ saci e annzɛ ɔ saciman e ɔ?
12 Maan e dun mmua e usa e wun kɛ: ‘?Jue nga n tie be’n be kle kɛ sran kunlɛ’n, annzɛ be yi bo bla kunndɛlɛ’n nin be wun bo bian kunndɛlɛ’n, ɔ nin bian nin bla kunndɛlɛ sukusuku’n, be ti kpa? ?Be tɔn Ɲanmiɛn i suɛn nun? ?Sɛ ɔ nin i fata kɛ n kanngan ndɛ nga be klɛ be jue sɔ’m be nun’n, be nun wie nun n kle sran kun’n, sran sɔ’n wún i kɛ n kpɔ sa tɛ’n? ?Annzɛ ndɛ sɔ’m bé klé kɛ min akunndan’n w’a saci?’ E kwlá kpɔman sa tɛ’n naan e kunngba’n y’a tie jue ng’ɔ kle kɛ sa tɛ’n ti kpa’n. Zezi seli kɛ: “Ndɛ ng’ɔ fin sran nuan fite’n ɔ fin i anwlɛn’n nun.” Yɛ ɔ ukali su kɛ like sɔ’n yɛ ɔ ‘saci sran ɔn.’ “Afin akunndan tɛ’n, nin sran kunlɛ’n, nin bla nin bian be yi annzɛ be wun i bo kunndɛlɛ’n, nin bla nin bian kunndɛlɛ’n, nin awie’n, nin be wiengu suɛn tɔnlɛ’n, ɔ nin sran wun ndɛ kanlɛ’n, i kwlaa sɔ’n wo sran i anwlɛn’n nun.”—Mat. 15:18, 19; an nian Zak 3:10, 11.
Maan e bu sa tɛ yofuɛ mun kɛ Zezi bu be’n sa
13. ?Wafa sɛ yɛ Zezi buli be nga be kunndɛman kɛ bé yáci sa tɛ’n i yolɛ’n niɔn?
13 Zezi seli kɛ ɔ bali sa tɛtɛ yofuɛ’m be flɛlɛ naan be kaci be nzuɛn’n. (Lik 5:30-32) ?Sanngɛ wafa sɛ yɛ ɔ buli be nga be kunndɛman kɛ bé yáci sa tɛ’n i yolɛ’n niɔn? Zezi wlali sran’m be su nun kpa kɛ nán be yaci be wun lɛ naan sa tɛ yofuɛ sɔ’m be saci be. (Mat. 23:15, 23-26) Asa kusu’n, ɔ seli kɛ: “Nán sran’m be kwlaa bɔ be flɛ min be Min’n be ngba yɛ Nyanmiɛn síe be sakpa-a, saan sran ng’ɔ yo min Si b’ɔ o nyanmiɛn su lɔ’n i klun sa’n, i yɛ ɔ́ síe be sakpa-a. Jɔlɛ dilɛ cɛn nun’n, sran kpanngban kpa bé wá úsa n kɛ: ‘?Nannan, Nannan, ɔ dunman nun y’a kan-man Nyanmiɛn ndɛ? ?Ɔ dunman nun y’a fuan-man asiɛ usu? ?Yɛ ɔ dunman nun y’a yo-man sa kekleekle mun?’” Zezi wá kpálo be kwlaa nga be kunndɛman kɛ bé yáci sa tɛ’n i yolɛ’n. Ɔ́ sé be kɛ: “An fa jao min wun lɛ.” (Mat. 7:21-23) ?Ngue ti yɛ ɔ́ bú be fɔ sɔ ɔ? Ɔ́ yó be sɔ afin be aeliɛ’n manmanman Ɲanmiɛn, yɛ ɔ saci sran.
14. ?Be nga be yo sa tɛ mɔ be kaciman be nzuɛn’n, sa benin ti yɛ be tu be asɔnun’n nun ɔn?
14 Be nga be yo sa tɛ mɔ be kaciman be nzuɛn’n, Ɲanmiɛn Ndɛ’n waan be tu be asɔnun’n nun. (An kanngan 1 Korɛntfuɛ Mun 5:9-13 nun.) Sa nga ti yɛ i sɔ yolɛ’n ti cinnjin’n be nun nsan yɛ: (1) kɛ ɔ ko yo naan Zoova i dunman’n w’a saciman’n, (2) kɛ ɔ ko yo naan aeliɛ tɛ sɔ’n w’a saman sran uflɛ asɔnun’n nun’n, yɛ (3) kɛ ɔ ko yo naan sa tɛ yofuɛ’n w’a kaci i nzuɛn tɛ’n.
15. ?Sɛ e waan e nin Zoova e afiɛn’n mantan titi’n, kosan cinnjin kpa benin mun yɛ é fá úsa e wun ɔn?
15 ?Be nga be kunndɛman kɛ bé yáci sa tɛ yolɛ’n, wafa nga Zezi bu be’n, e bu be sɔ wie? I sɔ’n ti’n, ɔ ti cinnjin kɛ e bu kosan nga’m be su akunndan: ‘?Sran nga b’a tu i asɔnun’n nun’n, annzɛ i bɔbɔ jaoli anuannzɛ’n nun’n, ń fá min wun ḿ mɛ́ntɛn i tikatika? ?Yɛ, sɛ sran sɔ’n ti min osufuɛ’n, mɔ sanngɛ e nin i e tranman awlo kunngba’n nun kun’n nin?’ Nanwlɛ, sa sɔ’n kwla yo kekle man e. Sɛ e klo sa ng’ɔ ti kpa’n, yɛ sɛ e kloman kɛ é kpáci Ɲanmiɛn’n, ajalɛ nga é fá’n, ɔ́ yí i nglo.
16, 17. ?Sa benin yɛ ɔ tɔli aniaan bla kun su ɔ? ?Kɛ be tu sran kun asɔnun’n nun’n, i su ajalɛ ng’ɔ fata kɛ e fa’n, ngue yɛ ɔ ukali aniaan bla sɔ’n naan w’a fa su sɛsɛsɛ ɔ?
16 Maan e kan sa ng’ɔ tɔli aniaan bla kun su’n, i ndɛ. I klikli nun’n, i wa yasua m’ɔ w’a yo kaklaka’n klo Zoova. Sanngɛ kɛ ɔ́ kɔ́ i ɲrun’n, ɔ wa fali sa tɛ’n yolɛ cicili i ti. I sɔ’n ti’n be tuli i asɔnun’n nun. E niaan bla’n klo Zoova. Sanngɛ kusu’n, ɔ klo i wa’n wie. Ɔ maan Biblu’n nun mmla ng’ɔ kle kɛ ɔ nin i fataman kɛ ɔ fɛ i wun mantan ba’n, i su falɛ wa yoli kekle kpa mɛnnin i.
17 ?Sɛ ɔ ti kɛ e o lɛ’n, nn afɔtuɛ benin yɛ é fá mán aniaan bla sɔ’n niɔn? Asɔnun kpɛnngbɛn kun ukɛli i maan ɔ wunnin i kɛ Zoova si kɛ ɔ o afɛ nun. Kɛ Zoova i anzi wie’m be jaoli i wun’n, wafa nga i sɔ’n kpɛli Zoova i awlɛn’n, asɔnun’n kpɛnngbɛn’n fali aniaan bla’n i ɲin sieli su. Ɔ ukɛli i maan ɔ wunnin i kɛ kannzɛ bɔbɔ Zoova si kɛ, kɛ be tu sran kun asɔnun’n nun’n ɔ yo ya’n, sanngɛ i waan i sɔ yɛ be yo sran ng’ɔ klo sa tɛ’n i yolɛ’n niɔn. Aniaan bla’n fali afɔtuɛ nga be mɛnnin i’n su. Ɔ maan, kɛ be tu sran kun asɔnun’n nun’n, ajalɛ ng’ɔ fata kɛ e fa’n, ɔ fali su sɛsɛsɛ. * I nzuɛn kpa sɔ’n jɔli Zoova klun.—Nya. 27:11.
18, 19. (a) ?Kɛ e nin sran ng’ɔ klo sa tɛ’n e bu’n, ngue yɛ i sɔ’n kle kɛ e kpɔ i ɔ? (b) ?Sɛ e kpɔciman Ɲanmiɛn naan e nian wafa ng’ɔ siesieli ninnge’m be su e nanti’n, wafa sɛ yɛ i bo’n kwla gua ɔ?
18 Sɛ i sɔ sa’n wo amun su’n, e klo kɛ amun si kɛ Zoova wun afɛ ng’ɔ o amun su’n wie. Kɛ e nin sran nga be tuli i asɔnun’n nun’n, annzɛ i bɔbɔ kpɔcili anuannzɛ’n e bu’n, i sɔ’n kle kɛ e kpɔ atin ng’ɔ fali su mɔ i ti yɛ ɔ tɔli i sɔ sa’n nun’n. Sanngɛ kusu’n, i sɔ’n kle kɛ e klo i dan. Naan i sɔ’n ti’n, e klo kɛ é yó like ng’ɔ ko yo i wun sa ye’n. Zoova i sin’n mɔ é jrán’n kwla uka sran nga be tuli i fɔ’n naan w’a yaci i aeliɛ’n ndɛndɛ naan w’a sɛ i sin Zoova wun.
19 Be tuli aniaan bla kun asɔnun’n nun, sanngɛ kasiɛn su’n ɔ sɛli i sin. Ndɛ ng’ɔ klɛli’n yɛ: “Klolɛ dan nga Zoova fa klo i sran mun mɔ i ti’n, ɔ fa ajalɛ naan i anuannzɛ’n ka sanwun titi’n, ɔ yo min fɛ dan. Gua su lɔfuɛ’m be kwla bu i kɛ ajalɛ sɔ’n ti tɛ. Sanngɛ ajalɛ sɔ’n nin i fata kpa, yɛ ɔ yi Zoova i sran klolɛ’n i nglo.” ?Kɛ be tuli aniaan bla’n asɔnun’n nun’n, sɛ i awlobofuɛ nin asɔnunfuɛ’m be nin i b’a buman’n, amun bu i kɛ ndɛ kɛ ng’ɔ o yɛ’n sa’n, ɔ́ fíte i nuan? Ajalɛ ng’ɔ ti mɔ e fa su sran ng’ɔ nunman anuannzɛ’n nun kun i lika’n, kɛ e fa su e nanti’n, i sɔ’n kle kɛ e klo sa ng’ɔ ti kpa’n. Naan kusu’n, e lafi su kpa kɛ Zoova yɛ ɔ fata kɛ ɔ kle wafa nga e ko nanti’n niɔn.
Maan e “kpɔ sa tɛ’n”
20, 21. ?Ngue ti yɛ ɔ ti cinnjin kɛ e kpɔ sa tɛ’n niɔn?
20 Akoto Piɛli seli kɛ: “An sasa amun wun, an nian-nian!” ?Ngue ti ɔ? “Afin mmusu’m be si Satan b’ɔ ti amun kpɔfuɛ’n, ɔ ti kɛ asɔmɔli b’ɔ wlan-wlan ɔ kpan kunndɛ nnɛn’n sa.” (1 Piɛ. 5:8) ?Sran sɔ’n kwla yo amun bɔbɔ? I kwlaa o amun sa nun. Ajalɛ nga amún fá’n, ɔ fin wafa nga amun kpɔ sa tɛ’n.
21 Sa tɛ’n i kpɔlɛ’n timan pɔpɔ. Afin, sa tɛ’n nun yɛ be wuli e ɔ. Asa kusu’n, mɛn nga e o nun yɛ’n, ɔ fa e ɲin sie i like nga klɔ sran konvi sɔ i’n su. (1 Zan 2:15-17) Sɛ e fa Zezi Klist i ajalɛ’n su naan e klo Ɲanmiɛn Zoova kpa’n, é kwlá kpɔ́ sa tɛ’n. Maan e ta nda kɛ é ‘kpɔ́ sa tɛ’n.’ Afin, e lafi su kɛ Zoova ‘sasa i sufuɛ nanwlɛfuɛ mun.’ Yɛ “ɔ de be klunwifuɛ’m be sa nun.”—Jue. 97:10.
[Ja ngua lɛ ndɛ’n]
^ An nian fluwa Wafa nga awlobo tranlɛ’n kwla yo fɛ’n i ndɛ tre 7 i nun wie.
?Amún tɛ́ su sɛ?
• ?Ngue yɛ ɔ kwla uka e naan y’a fa ajalɛ nzan ng’ɔ kwla bo’n i lika ɔ?
• ?Ngue yɛ e kwla yo naan y’a sasa e wun bae dilɛ wafawafa i lika ɔ?
• ?Ngue ti yɛ bian nin bla nna nga be fa fite nzra nun’n, ɔ ti tɛ kpa ɔ?
• ?Kɛ be tu sran kun asɔnun’n nun’n, wafa sɛ yɛ e kwla kle kɛ e kpɔ sa tɛ’n niɔn?
[Kosan mun]
[Foto, bue 29]
?Sɛ e waan é nɔ́n nzan ng’ɔ kwla bo’n, ngue yɛ ɔ fataman kɛ e ɲin kpa su ɔ?
[Foto, bue 30]
Be ɲin su yiyilɛ ng’ɔ yi bae dilɛ ninnge’m be nglo’n, maan e nian e wun su be lika.
[Foto, bue 31]
?Ngue yɛ sran ng’ɔ nian bian nin bla nna nga be fa fite nzra nun’n, ɔ yi i nglo kɛ ɔ klo i ɔ?
