Awlobo tranlɛ fɛ’n i su ajalɛ mun

Akunndan kpa nga amun mma’m be ko fa ko nanti’n, maan amun kle be

Niɛn’n kun suan Lɔida *. Ɔ tran Mɛksiki. I waan: “Suklu lɔ’n, be cɛcɛ mantuan’m be potomo nga be flɛ i kapɔtu’n. Ɔ maan be se be wun kɛ, kɛ mɔ i sɔ like’n ‘sasa’ be bian nin be bla lika’n ti’n, be kwla kunndɛ bian nin bla.”

Niɛn kun suan Nobuko, ɔ tran Zapɔn lɔ. I waan: “N usali min wa yasua’n kɛ sɛ ɔ nin i soman’n be ngunmin be o lika wie’n, ngue yɛ ɔ́ yó ɔ. Ɔ tɛli min su kɛ: ‘Sɛ n di i nanwlɛ’n, ɔ́ mían min sa.’”

KƐ AMUN wa yasua kan’n annzɛ bla kan’n súan nantilɛ’n, kɛ ɔ ko yo naan sa kekle wie w’a ɲɛnmɛn i’n, amun yiayia awlo nun ninnge’m be su. ?Nɛ́n i ɔ? Atrɛkpa’n, amun katakata kolan ɲanman fitewlɛ’m be su. Yɛ amun fa ninnge nga be la’n annzɛ be ti piembie’n be fia. Kpɛkun amun ɲinɲin anuan nga be fite lika kunngblokunngblo’m be su’n.

Nanwlɛ, sɛ ɔ ti kɛ e kwla sasa e gbanflɛn nin talua mun kɛ ngalɛ’n sa’n, nn ɔ ti kpa o! Siɛn’n amun klun titiman amun blɛblɛ. Yɛle kɛ amun usa amun wun kɛ: ‘?Min wa yasua kan’n nian bian nin bla nna nga be fa fite nzra nun’n?’ ‘?Min wa bla kan’n ci i nvialiɛ nun lika wie foto ko mɛn i janvuɛ mun telefɔnu nun?’ Yɛ kosan ng’ɔ titi amun klun kpa’n yɛle nga: ‘?Min wa kan m’ɔ su ɲin’n, ɔ kunndɛ bian annzɛ bla?’

Nán ba’n i wun gladi dilɛ dɔ kwlaa su’n yɛ ɔ yo sa ye ɔ

Siɛ nin niɛn wie’m be di be mma’m be wun gladi sa cɔcɔcɔ. Sanngɛ i agualiɛ su’n, be nun sunman be wun i kɛ ‘ba’m be wun gladi dilɛ’ sɔ’n fa be mma mun wla sa tɛ nun. Yɛle kɛ, sa nga be waan nán ba’n yo’n mɔ i ti yɛ be jin i wun sɔ’n, ba’n yo i nvialiɛ nun. Yɛ w’a si su fia kpa.

Ɔ ti weiin kɛ nán ba’m be wun gladi dilɛ sɔ’n yɛ ɔ yo sa ye ɔ. Ninnge nga Ɲanmiɛn Kpli Zoova yili be’n, nán kɛ ɔ nin be nanti sɔ ɔ. Amun mɔ amun ti siɛ annzɛ niɛn’n, ɔ fataman kɛ amun yo sɔ wie. (Mmla’n 30:19) ?Sɛ ɔ ti sɔ’n niɔn, wafa sɛ yɛ amun kwla uka amun mma gbanflɛn nin talua kanngan mun naan b’a fa ajalɛ kpa ɔ?— Nyanndra Mun 27:11.

Ajalɛ i cinnjinfuɛ ng’ɔ fata kɛ amun fa’n yɛle kɛ amun nin amun mma’m be koko yalɛ titi. Yɛ amun bo i bo be bakan nun. * (Nyanndra Mun 22:6) Kɛ bé ɲín’n, amun nin be koko yalɛ titi. Amun mɔ amun ti siɛ’n annzɛ niɛn’n, sran cinnjin kpafuɛ ng’ɔ fata kɛ amun wa m’ɔ su ɲin’n, ɔ lafi i su’n, yɛle amun bɔbɔ. Angle Talua kaan kun m’ɔ suan Alisia’n waan: “Sran  kaka be bu i kɛ e nin e janvuɛ mun yɛ ɔ fata kɛ e koko bian nin bla nna’n i su yalɛ ɔ. Sanngɛ nɛ́n i su ɔ. E kunndɛ kɛ e si nin e nin mun yɛ be kɛn i sɔ ndɛ’m be kle e ɔ.”

Ɔ ti cinnjin kɛ amun uka be naan be nzuɛn’n w’a yo kpa

Kɛ ba’m bé ɲín’n, ɔ ti cinnjin kpa kɛ be kan bian nin bla nna’n i su ndɛ kle be. Nán wafa nga ɔ yo mɔ mmoja jran bla’n lele m’ɔ fa wu ba’n i ngunmin yɛ ɔ fata kɛ be yiyi nun be kle be ɔ. Asa ekun, ɔ fata kɛ be si ‘sa ng’ɔ ti kpa’n nin tɛ’n be ngbaciɛ’n i kpa.’ (Ebre Mun 5:14) Maan e kpɛ i kpo e se kɛ ɔ nin i fata kɛ be si bla nin bian nna i su ndɛ ng’ɔ ti kpa’n naan be nanti su be mɛn dilɛ nun. ?Akunndan kpa nga amun mma’m be ko fa ko nanti’n, wafa sɛ yɛ amún klé be ɔ?

Wafa nga amun bɔbɔ amun bu ninnge sɔ mun’n, amun dun mmua bu su akunndan nian. I wie yɛle kɛ atrɛkpa’n, amun kpɔ bla nin bian kunndɛlɛ sukusuku’n i dan. Yɛle kɛ ɔ nin i fataman kɛ be nga be nin a jaman be si sua. (1 Tɛsalonikfuɛ Mun 4:3) Kɔlɛ, amun mma’m be si kɛ amun kpɔ i sɔ ninnge mun. Biblu’n nun ndɛ nga amun jran su sɔ’n, be kwla bo kle sran bɔbɔ. Sɛ be usa be kosan’n, be kwla ka lɛ be tɛ su kɛ ɔ fataman kɛ be nga be nin a jaman’n be si sua.

Sanngɛ ɔ fataman kɛ ngalɛ’n su yɛ ɔ ka ɔ. Fluwa kun se kɛ ɔ kwla fite ba’m be nuan kɛ bian nin bla nna’n i su ndɛ nga be si nin be nin’m be kan’n, ɔ ti be liɛ’n su. Fluwa sɔ’n waan: “Be bɔbɔ be wunman ajalɛ kun nga be kwla fɛ i trele sa’n. Sɛ bian nin bla nna’n i su ndɛ fu be nun’n, be akunndan’n ka lɛ sanngan.” (Sex Smart) I sɔ’n ti yɛ ɔ ti cinnjin kpa kɛ be kle gbanflɛn nin talua kanngan’m be akunndan kpakpa nga bé nánti su’n niɔn. ?Wafa sɛ yɛ amun kwla uka be ɔ?

Nzuɛn kpa nga amun klo be’n, amun kan be ndɛ weinwein kle be. ?Amun bu i kɛ be nga b’a ja’n, be ngunmin yɛ ɔ fata kɛ be si sua ɔ? Sɛ ɔ ti sɔ’n, amun kɛn i ndɛ weiin flan nun kle amun wa kan m’ɔ su ɲin’n. Fluwa kun waan be sieli i nzɔliɛ kɛ “siɛ nin niɛn nga kpɛ sunman, be kɛn i weinwein be kle be mma’m be kɛ be kloman kɛ gbanflɛn nin talua kanngan’m be si sua’n, be mma’m be nian be wun su kpa naan b’a siman bian annzɛ bla ndɛ nun.”—Beyond the Big Talk.

I yo, kɛ nga e dun mmua e fa kannin’n sa’n, nán nzuɛn kpakpa nga amun klo be’n, be ndɛ kanlɛ sa ngbɛn yɛ ɔ́ yó maan amun mma’m bé nían su bé nánti ɔ. Sanngɛ, akunndan kpa nin aeliɛ kpakpa nga amun klo kɛ ɔ tran be nun’n, sɛ amun kɛn i ndɛ weinwein kpa kle be’n, bé kwlá fá úka be wun naan be nzuɛn’n w’a yo kpa. Sran wie’m be sieli i nzɔliɛ kɛ, kɛ ba kanngan sunman bé ɲín bé kɔ́’n, ɔ yo kɛ be faman ndɛ nga be si nin be nin’m be kan’n su sa. Yɛ be waan kannzɛ ɔ ti sɔ’n, sanngɛ i agualiɛ su’n be fa su.

AN YO NGA BE NIAN: Sɛ sa wie tɔli naan be kɛn i ndɛ’n, maan amun jran su be kpɛ yalɛ kokolɛ’n i ba, naan amun kan nzuɛn kpa’n i ndɛ. Wienun ɔn, b’a bo i jɔ kɛ be tɔli bla wie gblu. Amun kwla jran su se kɛ: “Wafa nga yasua wie’m be kunndɛ kɛ bé yó mmla’m be finfin’n, ɔ yo min tɛ kpa. ?Kɛ a niɛn i sa’n, be nin i sɔ akunndan’n fin nin?”

Maan amun kan bian nin bla nna’n i su ndɛ nanwlɛ ngba kle be. Ba’m be su nun wlalɛ’n ti cinnjin. (1 Korɛntfuɛ Mun 6:18; Zak 1:14, 15) Sanngɛ, like trele kun nga Biblu’n fa e ɲin sie su’n, yɛle kɛ bian nin bla nna’n ti like kun mɔ Ɲanmiɛn fa cɛli e ɔ. Naan, nán aya wie yɛ Satan suali e ɔ. (Nyanndra Mun 5:18, 19; Ngɔjue Fɛfɛ Kpa’n 1:2) Sɛ i tɛ lika’n i ngunmin cɛ yɛ amun kan kle ba mun’n, i agualiɛ su’n, bian nin bla nna i su ato ndɛ m’ɔ takaman Biblu’n su’n, yɛ ɔ́ ká be ti’n nun ɔn. Aflansi lɔ talua kun m’ɔ suan Korina’n waan: “Bian nin bla nna sukusuku’n i tɛ m’ɔ ti’n, min si nin min nin’n be kan kleli min flannin nun lelele. I sɔ’n ti’n, m ma buli bian nin bla nna bɔbɔ ba sa’n i like tɛ.”

Maan amun lafi su kpa kɛ amun mma’m be si bian nin bla’m be afiɛn ndɛ’n, i su nanwlɛ ngba. Mɛksiki lɔ niɛn’n kun suan Nadia. I waan: “Like nga titi m mian min ɲin kɛ ń yó naan min mma gbanflɛn nin talua kanngan’m be wun i wlɛ’n, yɛle kɛ bian nin bla nna’n timan like tɛ. Ɔ ti like ɲɛnmɛn kpa kun mɔ Ɲanmiɛn Zoova fa mannin sran mun ɔn. Sanngɛ, ɔ ti be nga b’a ja’n be ngunmin be liɛ. Naan kusu’n, bian annzɛ bla nna’n kwla man e aklunjuɛ annzɛ ɔ fa e wla ɲrɛnnɛn nun. I kwlaa’n fin wafa nga e di i su mmla’n su’n.”

AN YO NGA BE NIAN: Cɛn uflɛ nga amun nin amun wa gbanflɛn annzɛ talua kan’n bé kán bian nin bla nna ndɛ’n, amun kan ndɛ fɛ kun be fa guɛ i bo. Maan amun kle be kɛ i sɔ like’n ti like ɲɛnmɛn kun m’ɔ fin Ɲanmiɛn ɔn. Naan be ɲrun lɔ’n, sɛ be ja bian annzɛ bla’n be kwla di i ti aklunjuɛ. Maan amun yo naan be lafi su kɛ lele nin kɛ i sɔ blɛ’n jú kusu’n, be kwla fa Ɲanmiɛn i mmla’m be su be nanti. Nán maan amun sro i sɔ yolɛ’n.

 An uka amun mma mun naan be si wafa nga sa kun i bo’n kwla gua’n. Kɛ ɔ ko yo naan like kwlaa nga gbanflɛn nin talua kanngan’m bé yó’n nun’n, b’a fa ajalɛ kpa’n, ɔ fata kɛ sa kun i ɲrun’n be wun ajalɛ fanunfanun nga be kwla fa’n. Yɛ maan be si ajalɛ kun kusu nin i agualiɛ’n. Nán amun bu i kɛ, kɛ be ko si like ng’ɔ ti kpa’n nin tɛ’n, nn w’a wie. Ɔstrali lɔ Klistfuɛ bla kun suan Ema. I waan: “Kɛ m bu min wa yasua’n i fɔnlɛ’m be akunndan’n, n kwla se kɛ nán kɛ sran kun si Ɲanmiɛn i mmla’n, i ti yɛ ɔ́ nánti su ɔ. Sɛ e fa mmla sɔ’m be su’n, mmlusuɛ nga é ɲɛ́n i’n, ɔ ti cinnjin kɛ e si i. Sɛ kusu e faman be su’n, i sin sa nga bé tɔ́ e su’n, ɔ nin i fata kɛ e wun i wlɛ wie.”

I lɛ’n nun’n, Biblu’n kwla uka e. Afin i nun mmla sunman nun’n, be kle sa tɛ yolɛ’n i bo nzuɛn’n. I su sunnzun ase kun yɛle kɛ Nyanndra Mun 5:8, 9 wla e fanngan kɛ e wanndi bla nin bian kunndɛlɛ sukusuku’n, naan sɛ y’a yoman sɔ’n, ‘sran wie ko gua [e] nyin ase ngbɛn.’ Kɛ nga Biblu’n nun ndɛ mma ngalɛ’m be fa kle’n sa’n, be nga be nin a jaman mɔ be si sua’n, be sokpa be wun. Yɛ i bɔbɔ ba’n bumɛn i wun sran kun. Asa kusu’n, i sɔ’n yo maan be nga b’a kunndɛman bian nin bla sukusuku wie’n, be akunndan nunman su kpa kɛ be nin be bé já. Sɛ sran kun w’a faman Ɲanmiɛn i mmla’m be su’n, tukpaciɛ kwla tɔ i su, yɛ i wun kwla yo i wafa kun, yɛ ɔ nin Ɲanmiɛn be afiɛn’n sáci. Sɛ amun mma’m be bu i su akunndan’n, be kwla fua kpa ekun kɛ be su fɔnman Ɲanmiɛn wun. *

AN YO NGA BE NIAN: Maan amun fa sunnzun ase wie’m be kle amun wa’n naan ɔ wun i kɛ Ɲanmiɛn i mmla’m be su nantilɛ’n ti ngwlɛlɛ aeliɛ. Amun kwla se i kɛ: “Gbo nun’n, sɛ be trɔ sin’n, ɔ ti kpa. Sanngɛ sɛ be sɔ sin be yi i bo’n nun’n, ɔ ti tɛ. ?Ngbaciɛ benin yɛ ɔ o be nɲɔn’n be afiɛn ɔn? ?Yɛ wafa sɛ yɛ a kwla fa sunnzun ase sɔ’n kan bian nin bla nna’n i su mmla nga Zoova kpɛli’n i ndɛ ɔ?” Amun fa ndɛ ng’ɔ o Nyanndra Mun 5:3-14 nun’n, be uka amun wa kan’n, naan ɔ wun bla nin bian kunndɛlɛ sukusuku i sin sa tɛtɛ’m be wlɛ.

Takao le afuɛ 18 yɛ ɔ tran Zapɔn. I waan: “N si kɛ ɔ fata kɛ n yo like ng’ɔ ti kpa’n. Sanngɛ sa tɛ’n nin min kpli kpa titi.” Gbanflɛn nin talua nga be wun yo be sɔ’n, kɛ be si kɛ nán be ngunmin yɛ i sɔ sa’n wo be su’n, be wla’n kwla gua ase. Akoto Pɔlu bɔbɔ m’ɔ ti Klistfuɛ kpa kun’n, ɔ dili i wun nanwlɛ seli kɛ: “Cɛn kwlaa kɛ n klo kɛ ń yó sa kpa’n, kpɛkuun sa tɛ’n jin m bue.”—Rɔmfuɛ Mun 7:21.

Maan gbanflɛn nin talua kanngan’m be si kɛ, kɛ be nin sa tɛ’n be kpli’n, ɔ timan tɛ. Sran’n i wafa nga be waan bé yó’n, i sɔ’n kwla su be bo naan b’a bu i akunndan. Be kwla fa kosan nga’m be lɔngɔ su yɛ’n, be usa be wun: “?N klo kɛ m bɔbɔ ń fá ajalɛ ń nánti, naan sran’m be bu min sran, yɛ be wun i kɛ n nanti seiin? ?Annzɛ n klo kɛ sran’m be se kɛ n kwlá faman min tiaun ajalɛ naan min konvi’n yɛ ɔ sie min ɔn?” Sɛ amun wa kan’n si akunndan kpa nin nzuɛn kpa ng’ɔ ko fa ko nanti’n, ɔ́ tɛ́ kosan sɔ’m be su ngwlɛlɛ su.

[Ja ngua lɛ ndɛ mun]

[Kuku, bue 21]

Lele nin andɛ Biblu’n nun mmla mun yɛ be te yo kpa ɔ.

“Bian nin bla nna’n i su afɔtuɛ’m be sɔnnin sanngɛ lele nin andɛ Biblu’n nun liɛ mun yɛ be ti be nun kpafuɛ’n niɔn. Gbanflɛn nin talua nga be fa ajalɛ tɛ’n be te sɔn te kɔ. Kɛ ɔ́ yó sɔ kusu nn bé wún be ajalɛ’m be su afɛ’n. Be ajalɛ sɔ mun yɛle bian nin bla kunndɛlɛ sukusuku’n, ɔ nin ba nga be nunman aja nun mɔ be wu i’n. Kusu SIDA, ɔ nin bian nin bla nna nun tukpaciɛ uflɛ tɔ be su ekun. Kɛ Biblu’n se kɛ be nga b’a ja’n, yɛ ɔ fata kɛ be si sua’n, [...] i su ɔ. Afɔtuɛ sɔ’n, fiɛn kaan sa nunmɛn i sin. I ngunmin cɛ yɛ i su falɛ’n ɔ ‘sasa be bian nin be bla lika’n’ sakpa ɔ.”—Parenting Teens With Love and Logic.

AN FA KOSAN NGA’M BE USA BE WUN...

▪ ?Ngue yɛ ɔ kle kɛ nzuɛn kpa wie’m b’a tra ndin kpa min wa’n i nun ɔn?

▪ ?Kɛ ń kán bian nin bla nna’n i ndɛ ń klé min wa gbanflɛn annzɛ talua kan’n, nga n fɛ i ɲin’n n sie su kpa’n, yɛle kɛ bian nin bla nna’n ti like kun mɔ Ɲanmiɛn fa cɛli e ɔ? ?Annzɛ ɔ ti aya mɔ Satan fa sua e ɔ?